അൽ കഹ്ഫ് - الكهف - Al-Kahf

തന്റെ അടിമ മുഹമ്മദ് നബിക്ക് ഗ്രന്ഥമവതരിപ്പിക്കുകയും അതില്‍ ഒരു വക്രതയുമുണ്ടാക്കാതെ ഋജുവായ നിലയിലാക്കുകയും ചെയ്ത അല്ലാഹുവിനാണ് സര്‍വസ്‌തോത്രങ്ങളും. തന്റെ കഠിനശിക്ഷയെക്കുറിച്ച് താക്കീത് നല്‍കാനും ഉദാത്ത കര്‍മങ്ങളനുവര്‍ത്തിക്കുന്ന സത്യവിശ്വാസികള്‍ക്ക് ഉത്തമപ്രതിഫലം - അതിലവര്‍ ശാശ്വതവാസികളായിരിക്കും-ഉണ്ടെന്ന ശുഭവാര്‍ത്തയറിയിക്കാനും അല്ലാഹു സന്താനത്തെ വരിച്ചിരിക്കുന്നു എന്ന് ജല്‍പിച്ചവര്‍ക്ക് താക്കീത് നല്‍കാനുമത്രേ അത്.¹
അവര്‍ക്കോ പിതാക്കള്‍ക്കോ ആ ജല്‍പനം സംബന്ധിച്ച് യാതൊരുവിധ ജ്ഞാനവുമില്ല. അവരുടെ വായയില്‍ നിന്നുവരുന്ന ആ വാക്ക് അതീവ ഗുരുതരം! നുണമാത്രമാണവര്‍ പറയുന്നത്.

അതുകൊണ്ട്, ഈ വൃത്താന്തത്തില്‍ അവര്‍ വിശ്വസിച്ചില്ലെങ്കില്‍ കഠിനദുഃഖം മൂലം അങ്ങ് ജീവത്യാഗം ചെയ്‌തേക്കാം.²
ഭൂതലത്തിലുള്ളവയെ - മനുഷ്യരില്‍ ആരാണ് ഏറ്റം ഉദാത്ത കര്‍മി എന്ന് പരീക്ഷിക്കാനായി - അതിന്നു നാം ഒരലങ്കാരമാക്കിയിരിക്കുകതന്നെയാണ്. അതിന്റെ ഉപരിതലത്തിലുള്ളതൊക്കെ സംഹരിച്ച് നാം തന്നെ അതൊരു തരിശ്ഭൂമിയാക്കും.

അതല്ല, ആ ഗുഹക്കാരും 'റഖീമു'കാരും നമ്മുടെ ദൃഷ്ടാന്തങ്ങളില്‍ ഒരു വിസ്മയമായിരുന്നെന്നു നിനച്ചിരിക്കുകയാണോ താങ്കള്‍? ആ യുവാക്കള്‍ ഗുഹയിലേക്ക് പ്രവേശിച്ച ഘട്ടം സ്മരണീയമാണ്. തത്സമയം അവര്‍ പ്രാര്‍ത്ഥിച്ചു: നാഥാ, നിന്റെ പക്കല്‍ നിന്നുള്ള അനുഗ്രഹം ഞങ്ങള്‍ക്കു നല്‍കുകയും ഞങ്ങളുടെ കാര്യത്തില്‍ ഋജുമാര്‍ഗം സജ്ജീകരിച്ചുതരികയും ചെയ്യേണമേ.³
അങ്ങനെ ആ ഗുഹയില്‍ ഒട്ടേറെ വര്‍ഷങ്ങള്‍ അവരെ നാം ഉറക്കി. പിന്നീട്, തങ്ങളുടെ ഗുഹാവാസകാലത്തെക്കുറിച്ച് നിജവിവരമുള്ളവര്‍ ഇരുകക്ഷികളില്‍ ആരാണെന്ന് അനുഭവത്തിലൂടെ അറിയാനായി നാം അവരെ എഴുന്നേല്‍പിച്ചു.⁴

അവരുടെ വൃത്താന്തം താങ്കള്‍ക്കു നാം സത്യസന്ധമായി പ്രതിപാദിച്ചുതരാം: അവര്‍ തങ്ങളുടെ നാഥനില്‍ വിശ്വാസമര്‍പ്പിച്ച യുവാക്കളായിരുന്നു. അവര്‍ക്ക് നാം സന്മാര്‍ഗനിഷ്ഠ വര്‍ധിപ്പിച്ചുകൊടുക്കുകയും എഴുന്നേറ്റു നിന്ന് ഇങ്ങനെ പ്രഖ്യാപിച്ചപ്പോള്‍ മനോദാര്‍ഢ്യമേകുകയുമുണ്ടായി⁵
ഭുവന - വാനങ്ങളുടെ രക്ഷിതാവാണ് ഞങ്ങളുടെ നാഥന്‍. അവനെ വിട്ട് മറ്റൊരു ദൈവത്തെയും ഞങ്ങള്‍ ആരാധിക്കുകയില്ല തന്നെ. എങ്കില്‍ (ബഹുദൈവാരാധന ആകാമെന്ന നിലപാടെടുത്താല്‍) ഞങ്ങള്‍ പരിധിവിട്ട പ്രസ്താവം നടത്തിയവരായിപ്പോവുക തന്നെ ചെയ്യും. നമ്മുടെ ഈ സമൂഹം അല്ലാഹുവിനെ വിട്ടു മറ്റു പല ആരാധ്യരെയും വരിച്ചിരിക്കുകയാണ്. എന്തുകൊണ്ട് അവരതിന്ന് സ്പഷ്ടദൃഷ്ടാന്തം ഹാജരാക്കുന്നില്ല? അല്ലാഹുവിന്റെ മേല്‍ കള്ളം കെട്ടിച്ചമക്കുന്നവനെക്കാള്‍ വലിയ അക്രമിയായി മറ്റാരുണ്ട്!⁶

(അവര്‍ പരസ്പരം പറഞ്ഞു:) നാട്ടുകാരെയും അല്ലാഹുവിനെ വിട്ട് അവരാരാധിച്ചുകൊണ്ടിരിക്കുന്നവയെയും കൈവെടിഞ്ഞ നിലക്ക് ഇനി നിങ്ങള്‍ ആ ഗുഹയില്‍ അഭയം തേടുക. നാഥന്‍ തന്റെ കാരുണ്യം നിങ്ങള്‍ക്ക് വിശാലമാക്കുകയും ഈ ഉദ്യമത്തില്‍ സൗകര്യമൊരുക്കിത്തരികയും ചെയ്യും⁷

ഉദിക്കുന്ന സമയത്ത് സൂര്യന്‍ അവരുടെ ഗുഹവിട്ട് വലത്തോട്ട് തെന്നിമാറുന്നതും അസ്തമയസമയത്ത് അതവരെ വിട്ട് ഇടത്തോട്ട് നീങ്ങുന്നതും നിങ്ങള്‍ക്കു കാണാം. അതിന്റെ വിസ്തൃതാന്തര്‍ഭാഗത്താണവര്‍. അല്ലാഹുവിന്റെ ദൃഷ്ടാന്തങ്ങളില്‍ പെട്ടതത്രേ ഇത്. ഏതൊരാളെ അല്ലാഹു നേര്‍വഴിയിലാക്കുന്നുവോ അവനാണ് സന്മാര്‍ഗ പ്രാപ്തന്‍; ഏതൊരാളെ അവന്‍ ദുര്‍മാര്‍ഗത്തിലാക്കുന്നുവോ അയാളെ നേര്‍വഴിയിലേക്ക് നയിക്കുന്ന ഒരു രക്ഷകനെയും താങ്കള്‍ക്കു കണ്ടെത്താനാവില്ല തീര്‍ച്ച. അവര്‍ നിദ്രയില്‍ ലയിച്ചവരായിട്ടും ഉണര്‍ന്നവരാണെന്നാണ് താങ്കള്‍ക്കു തോന്നുക. അവരെ നാം വലത്തോട്ടും ഇടത്തോട്ടും മറിച്ചുകൊണ്ടിരിക്കുന്നു. അവരുടെ നായ ഗുഹയുടെ മുമ്പില്‍ ഇരുകൈകളും നീട്ടിക്കിടക്കുന്നുണ്ട്. അവരിലേക്ക് എത്തിനോക്കുന്ന പക്ഷം പേടിച്ചരണ്ട് താങ്കള്‍ പിന്തിരിഞ്ഞോടുന്നതാണ്⁸

അങ്ങനെ പരസ്പരം അന്വേഷിച്ചറിയാനെന്ന വിധം അവരെ നാം എഴുന്നേല്‍പിക്കുകയുണ്ടായി. നിങ്ങളിവിടെ എത്ര വസിച്ചു എന്ന് അവരിലൊരാള്‍ ചോദിച്ചു. ചിലര്‍ പ്രതികരിച്ചു: നാം ഒരു നാളോ ഒരു ദിനാംശമോ നിവസിച്ചിരിക്കും. മറ്റു ചിലര്‍ പറഞ്ഞു: എത്ര കഴിച്ചു കൂട്ടി എന്ന് നന്നായി അറിയുന്നവന്‍ നിങ്ങളുടെ നാഥനത്രേ.⁹
എന്തായാലും ഒരാളെ ഈ വെള്ളിയുമായി പട്ടണത്തിലേക്ക് വിടൂ; അവിടെ ഏതാണ് ഉത്തമഭോജ്യവസ്തുക്കളെന്നു നോക്കി നിങ്ങള്‍ക്കയാള്‍ ആഹാരം കൊണ്ടുവരട്ടെ. അയാള്‍ ജാഗ്രതപുലര്‍ത്തുകയും നിങ്ങളെപ്പറ്റി ഒരാളെയും അറിയിക്കാതിരിക്കുകയും ചെയ്യണം. നിങ്ങളെക്കുറിച്ച് വിവരം കിട്ടിയാല്‍ അവര്‍ എറിഞ്ഞുകൊല്ലുകയോ തങ്ങളുടെ മതത്തിലേക്കാക്കുകയോ ചെയ്യും; അങ്ങനെ സംഭവിച്ചാല്‍ ഒരിക്കലും നിങ്ങള്‍ വിജയം വരിക്കുകയില്ല തീര്‍ച്ച¹⁰

അങ്ങനെ അല്ലാഹുവിന്റെ വാഗ്ദാനം സത്യമാണെന്നും അന്ത്യദിനത്തിന്റെ കാര്യം സംശയരഹിതമാണെന്നും മാലോകരറിയാനായി നാം ആ ഗുഹാവാസികളെ ജനങ്ങള്‍ക്കു വെളിപ്പെടുത്തി. അവരെക്കുറിച്ചു തര്‍ക്കവിതര്‍ക്കങ്ങള്‍ നടത്തിക്കൊണ്ടിരിക്കേ ആളുകള്‍ പറഞ്ഞു: അവര്‍ക്കുമീതെ നിങ്ങള്‍ ഒരു കെട്ടിടം ഉണ്ടാക്കുക. അവരുടെ കാര്യത്തില്‍ പ്രാബല്യം നേടിയവര്‍ അറിയിച്ചു: 'നമുക്ക് അവരുടെ മേല്‍ ഒരു പള്ളി നിര്‍മിക്കുക തന്നെ ചെയ്യാം'. അവരില്‍ ചിലര്‍ പറയുന്നത് ഗുഹക്കാര്‍ മൂന്നു പേരാണെന്നാണ്, നാലാമത്തേത് നായയും; മറ്റൊരു പക്ഷം, അഞ്ചു പേരാണവര്‍, ആറാമത്തേത് നായയാണെന്നും - ഇതെല്ലാം ഊഹം മാത്രം. എന്നാല്‍, അവര്‍ ഏഴുപേരാണ്, എട്ടാമത്തേതാണ് നായ എന്നാണ് മറ്റു ചിലര്‍ പ്രസ്താവിക്കുന്നത്. നബീ, പ്രഖ്യാപിക്കുക: അവരുടെ എണ്ണത്തെപ്പറ്റി തന്റെ നാഥന്‍ സൂക്ഷ്മജ്ഞാനമുള്ളവനാണ്. വളരെക്കുറച്ചുപേര്‍ക്കേ അവരെപ്പറ്റി അറിയുകയുള്ളൂ. അതുകൊണ്ട് സ്പഷ്ടജ്ഞാനത്തോടെയല്ലാതെ അവരുടെ കാര്യത്തില്‍ വേദക്കാരോട് താങ്കള്‍ സംസാരിക്കരുത്; ഗുഹാവാസികളെപ്പറ്റി ആരോടും വിവരമന്വേഷിക്കുകയും വേണ്ട.¹¹

ഏതു കാര്യമായാലും, നാളെ ഞാനതു പ്രവര്‍ത്തിക്കുക തന്നെ ചെയ്യും എന്നു താങ്കള്‍ പ്രസ്താവിക്കരുത് - അല്ലാഹു ഉദ്ദേശിച്ചാലേ ചെയ്യൂ എന്ന് പറയണം; മറന്നുപോയാല്‍ താങ്കളുടെ നാഥനെ അനുസ്മരിക്കുക. ഇതിനേക്കാള്‍ സന്മാര്‍ഗബദ്ധമായ നിലപാടിലേക്ക് തന്റെ രക്ഷിതാവ് നയിച്ചേക്കാം എന്നും പറയുക¹²

തങ്ങളുടെ ഗുഹയില്‍ മുന്നൂറ് വര്‍ഷം-ഒമ്പത് അധികവും-¹³
അവര്‍ താമസിച്ചു. താങ്കള്‍ പ്രഖ്യാപിക്കുക: അവര്‍ നിവസിച്ചതിനെക്കുറിച്ച് നന്നായി അറിയുന്നവനാണ് അല്ലാഹു. ഭുവന -വാനങ്ങളിലെ ഗുപ്ത കാര്യങ്ങള്‍ അവങ്കലാണ്. എന്തൊരു കാഴ്ചയും കേള്‍വിയുമാണവന്ന്! മനുഷ്യര്‍ക്ക് അവനല്ലാതെ ഒരു രക്ഷാധികാരിയുമില്ല തന്നെ. തന്റെ വിധികര്‍തൃത്വത്തില്‍ അവന്‍ ആരെയും പങ്കാളിയാക്കുന്നതുമല്ല. താങ്കള്‍ക്ക് ദിവ്യബോധനം നല്‍കപ്പെട്ട നാഥന്റെ വേദഗ്രന്ഥം ഓതുക. അവന്റെ സൂക്തങ്ങള്‍ ഭേദഗതിവരുത്തുന്ന ഒരാളുമില്ല.¹⁴
അവനല്ലാത്ത മറ്റൊരഭയവും ഒരിക്കലും താങ്കള്‍ കണ്ടെത്തില്ല.

തങ്ങളുടെ നാഥന്റെ സംതൃപ്തി ലക്ഷീകരിച്ച് പ്രഭാത - പ്രദോഷങ്ങളില്‍ അവനോട് പ്രാര്‍ഥിച്ചുകൊണ്ടിരിക്കുന്നവരൊന്നിച്ചു താങ്കളും ക്ഷമിച്ചു കഴിഞ്ഞുകൂടുക; ഭൗതിക ജീവിതാലങ്കാരങ്ങള്‍ ആഗ്രഹിച്ച് അങ്ങയുടെ ദൃഷ്ടികള്‍ അവരെ വിട്ട് അകലാതിരിക്കട്ടെ. നമ്മുടെ സ്മരണ വിട്ട് ആരുടെ ഹൃദയത്തെ നാം അശ്രദ്ധമാക്കിയിരിക്കുന്നുവോ, ആരൊരാള്‍ സ്വേച്ഛയെ അനുഗമിക്കുകയും പരിധികള്‍ മറികടക്കുകയും ചെയ്യുന്നുവോ അവരെ താങ്കള്‍ അനുസരിച്ചുപോകരുത്¹⁵

പ്രഖ്യാപിക്കുക: നിങ്ങളുടെ നാഥങ്കല്‍ നിന്നവതീര്‍ണമായതാണ് സത്യം. അതുകൊണ്ട് ഇഷ്ടമുള്ളവര്‍ വിശ്വസിക്കുകയും ഇഷ്ടമുള്ളവര്‍ അവിശ്വസിക്കുകയും ചെയ്തുകൊള്ളട്ടെ. അക്രമകാരികള്‍ക്കു നാം നരകം സജ്ജീകരിച്ചുവെക്കുക തന്നെ ചെയ്തിരിക്കുന്നു. അതിന്റെ ഭിത്തി അവരെ ആവരണം ചെയ്യും. ജലത്തിനു യാചിക്കുമ്പോള്‍ ഉരുക്കിയ ലോഹസദൃശമായ, മുഖങ്ങള്‍ കരിച്ചുകളയുന്ന ഒരു ദ്രാവകം അവര്‍ക്കു നല്‍കപ്പെടുന്നതാണ്. അതെത്ര ഹീന പാനീയം! എത്ര ദുഷിച്ച സങ്കേതമാണു നരകം!! നിശ്ചയം, സത്യവിശ്വാസം കൈക്കൊള്ളുകയും സല്‍ക്കര്‍മങ്ങളനുഷ്ഠിക്കുകയും ചെയ്തവര്‍, ഉദാത്ത പ്രവൃത്തികള്‍ അനുവര്‍ത്തിക്കുന്ന ഒരാള്‍ക്കും നാം പ്രതിഫലം പാഴാക്കുന്നതേയല്ല.¹⁶
അവര്‍ക്കാണ് ശാശ്വത നിവാസത്തിനുള്ള സ്വര്‍ഗീയാരാമങ്ങള്‍; തങ്ങളുടെ താഴ്ഭാഗത്തുകൂടി ആറുകളൊഴുകും. അവര്‍ക്കവിടെ സ്വര്‍ണവളകള്‍ അണിയിക്കപ്പെടുന്നതാണ്. നേരിയതും കട്ടികൂടിയതുമായ വ്യത്യസ്ത പച്ചപ്പട്ടുടയാടകള്‍ അവര്‍ ധരിക്കും. സോഫകളില്‍ ചാരിയിരിക്കും അവര്‍. എത്ര ഉദാത്തമായ പ്രതിഫലം! എത്ര ഉത്തമമായ ആവാസകേന്ദ്രം!!

ജനങ്ങള്‍ക്കു താങ്കള്‍ രണ്ടാളുടെ ഒരു ഉപമ പറഞ്ഞുകൊടുക്കുക: നാം അവരിലൊരാള്‍ക്കു രണ്ടു മുന്തിരിത്തോട്ടങ്ങളുണ്ടാക്കി; ഈന്തമരങ്ങള്‍ കൊണ്ടു നാമതിനെ വലയം ചെയ്തു; അവയ്ക്കിടയില്‍ ധാന്യകൃഷിയുമുണ്ടാക്കി. രണ്ടു ഉദ്യാനങ്ങളും ഒരു ന്യൂനതയും വരാതെ ഫലങ്ങളേകി. അവയ്ക്കിടയിലൂടെ നാം ഒരരുവി ഒഴുക്കുകയും ചെയ്തു. അയാള്‍ക്കു ധാരാളം പഴങ്ങള്‍ (വരുമാനം) ഉണ്ടായി. ആത്മദ്രോഹം ചെയ്തുകൊണ്ട് തന്റെ തോട്ടത്തില്‍ പ്രവേശിച്ച അയാള്‍ സുഹൃത്തുമായി സംവദിക്കവെ പറഞ്ഞു: 'നിന്നെക്കാളേറെ സമ്പത്തും സംഘബലവുമുള്ള ആള്‍ ഞാനാകുന്നു. ഇത് ഒന്നും തന്നെ എന്നെങ്കിലും നശിക്കുമെന്നോ അന്ത്യനാള്‍ വന്നെത്തുമെന്നോ ഞാന്‍ വിചാരിക്കുന്നില്ല! ഇനി, എന്റെ നാഥങ്കലേക്ക് മടക്കിയയക്കപ്പെട്ടുവെന്നാല്‍ തന്നെ ഇതിനെക്കാള്‍ ഉദാത്തമായ സങ്കേതമാണ് എനിക്കവിടെ ലഭിക്കുക, തീര്‍ച്ച!¹⁷

ചങ്ങാതി അവനോടു പ്രതികരിച്ചു: മണ്ണില്‍ നിന്നും പിന്നീട് ഇന്ദ്രിയകണത്തില്‍ നിന്നും നിന്നെ സൃഷ്ടിക്കുകയും ശേഷം ഒരു പൂര്‍ണ മനുഷ്യനായി സംവിധാനിക്കുകയും ചെയ്ത സ്രഷ്ടാവിനെ നീ നിഷേധിച്ചിരിക്കുകയാണോ? അവനാണ്, അല്ലാഹുവാണ് എന്റെ രക്ഷിതാവ്. അവനോട് യാതൊന്നിനെയും ഞാന്‍ പങ്കാളിയാക്കുകയില്ല. നിന്റെ തോട്ടത്തില്‍ പ്രവേശിച്ചപ്പോള്‍ 'അല്ലാഹു ഉദ്ദേശിച്ചതാണിത്; അവനെക്കൊണ്ടേ ഏതൊരു ശക്തിയും ഉണ്ടാകൂ' എന്ന് എന്തുകൊണ്ട് നീ പറഞ്ഞില്ല? നിന്നെക്കാള്‍ സമ്പത്തും സന്താനങ്ങളും കുറഞ്ഞവനായി എന്നെ നീ മനസ്സിലാക്കുന്നുവെങ്കില്‍, എന്റെ നാഥന്‍ നിന്റെ ഉദ്യാനത്തെക്കാള്‍ മെച്ചപ്പെട്ടത് എനിക്കു തന്നുവെന്നും, നിന്റേതിലേക്ക് മാനത്തുനിന്നൊരു ഇടിവാളയച്ച് അത് മിനുത്ത തരിശാക്കുകയോ നിനക്കു തേടിപ്പിടിക്കാകാനാത്ത വിധം അതിലെ ജലം വറ്റിച്ചുകളയുകയോ ചെയ്തുവെന്നും വരാവുന്നതാണ്!¹⁸

അവന്റെ ഫല-കായ്കനികള്‍ സംഹാരവിധേയമായി. അവ പന്തലുകള്‍ സഹിതം നിപതിച്ചുകിടക്കവെ അതില്‍ ചെലവഴിച്ചതിന്റെ പേരില്‍ കൈമലര്‍ത്തിക്കൊണ്ട് അവന്‍ സങ്കടപ്പെട്ടു: 'എന്റെ നാഥനോട് ആരെയും ഞാന്‍ പങ്കാളിയാക്കാതിരുന്നെങ്കില്‍ എത്ര നന്നായിരുന്നു.' അല്ലാഹുവിനെക്കൂടാതെ ഒരു കൂട്ടരും തന്നെ സഹായിക്കാനുണ്ടായില്ല. പ്രതിസന്ധി സ്വയം മറികടക്കാന്‍ അവനായതുമില്ല. അവിടെ സത്യനിഷ്ഠനായ അല്ലാഹുവിനാണ് ആധിപത്യം. അവനാണ് പ്രതിഫലം നല്‍കുന്നവരില്‍ ഉത്തമന്‍; ഏറ്റം ഉദാത്തപരിണതിയും അവന്റേതു തന്നെ.¹⁹

ഐഹിക ജീവിതത്തിന്റെ ഒരു ഉപമ താങ്കള്‍ അവര്‍ക്കു പ്രതിപാദിച്ചു കൊടുക്കുക. അന്തരീക്ഷത്തില്‍ നിന്നു നാം വര്‍ഷിച്ച മഴവെള്ളം പോലെയാണത്; അതുവഴി ഭൂമിയില്‍ സസ്യങ്ങള്‍ ഇടകലര്‍ന്നുണ്ടായി. എന്നിട്ടത് കാറ്റുകള്‍ പാറ്റിക്കളയുന്ന ഉണക്കത്തുരുമ്പായി മാറി. അല്ലാഹു എല്ലാ കാര്യത്തിനും കഴിവുറ്റവനാകുന്നു. സമ്പത്തും സന്താനങ്ങളും ഐഹിക ജീവിതത്തിന്റെ പൊലിമയത്രേ. എന്നാല്‍ ബാക്കിവരുന്ന ഉത്തമ കര്‍മങ്ങളാണ് താങ്കളുടെ നാഥന്റെ പക്കല്‍ ഉദാത്ത പ്രതിഫലമുള്ളതും ശുഭപ്രതീക്ഷാദായകവും.²⁰

പര്‍വതങ്ങളെ നാം സഞ്ചരിപ്പിക്കുകയും ഭൂമി സമനിരപ്പായി താങ്കള്‍ക്ക് ഗോചരീഭവിപ്പിക്കുകയും ഒരാളുമൊഴിയാതെ മനുഷ്യരെ നാം ഒരുമിച്ചുകൂട്ടുകയും ചെയ്യുന്ന ദിനം സ്മരണീയമത്രേ. താങ്കളുടെ നാഥന്റെ മുമ്പിലവര്‍ നിരനിരയായി നിറുത്തപ്പെടും. (അല്ലാഹു അരുളും:) ആദ്യവട്ടം നാം സൃഷ്ടിച്ചതുപോലെ നിങ്ങളിതാ നമ്മുടെ മുമ്പാകെ സന്നിഹിതരായിരിക്കുകയാണ്; എന്നാല്‍ 'നിര്‍ണയിക്കപ്പെട്ടൊരു സമയം നിങ്ങള്‍ക്കു നാം ഏര്‍പ്പെടുത്തുകയില്ല തന്നെ' എന്നു തട്ടിവിടുകയായിരുന്നു നിങ്ങള്‍.²¹

മഹ്ശറില്‍ മര്‍ത്യരുടെ കര്‍മരേഖ സമര്‍പ്പിക്കപ്പെടും. തല്‍സമയം അതിന്റെ ഉള്ളടക്കത്തെപ്പറ്റി അധര്‍മകാരികള്‍ ഭയാക്രാന്തരായി താങ്കള്‍ക്കു കാണാം. അവര്‍ വിസ്മയം കൂറും:'ഹാ ഞങ്ങളുടെ ഒരു നാശം! എന്തൊരു കര്‍മരേഖയാണിത്? ചെറുതോ വലുതോ ആയ യാതൊന്നും ഉള്‍പ്പെടുത്താതെ ഇത് വിട്ടുകളഞ്ഞിട്ടില്ലല്ലോ!' തങ്ങളനുവര്‍ത്തിച്ചതൊക്കെ അതിലുള്ളതായി അവര്‍ക്ക് ബോധ്യപ്പെടും. താങ്കളുടെ നാഥന്‍ ആരോടും നീതികേട് കാട്ടുകയില്ല.²²

ആദമിന്നു നിങ്ങള്‍ സാഷ്ടാംഗം ചെയ്യുക എന്ന് മലക്കുകളോട് നാം കല്‍പിച്ച സന്ദര്‍ഭം സ്മര്‍ത്തവ്യമത്രേ. അപ്പോള്‍ അവര്‍ സുജൂദ് ചെയ്തു, ഇബ്‌ലീസ് ഒഴികെ; ജിന്നുകളില്‍ പെട്ടവനായിരുന്നു അവന്‍. അങ്ങനെ തന്റെ നാഥന്റെ ആജ്ഞയോടവന്‍ ധിക്കാരം കാട്ടി. എന്നിട്ട് എന്നെവിട്ട്, അവനെയും സന്തതികളെയും രക്ഷാധികാരികളാക്കുകയാണോ നിങ്ങള്‍! അവര്‍ നിങ്ങളുടെ പ്രതിയോഗികളത്രേ. അക്രമികള്‍ക്കു ലഭിച്ച ഈ ബദല്‍ എത്ര ഹീനം!²³
ഭുവന - വാനങ്ങളുടെയോ അവരുടെ തന്നെയോ സൃഷ്ടിപ്പിന് ആ പിശാചുക്കളെ നാം സാക്ഷികളാക്കിയിട്ടില്ല; വഴിതെറ്റിക്കുന്നവരെ സഹായികളാക്കുന്ന ശൈലി എനിക്കൊട്ടില്ല താനും²⁴

എന്റെ പങ്കുകാരാണെന്ന് നിങ്ങള്‍ ജല്‍പിച്ചിരുന്നവരെ വിളിച്ചുനോക്കൂ എന്ന് അല്ലാഹു പറയുന്ന നാള്‍ സ്മരണീയമാണ്. തത്സമയം ഇവര്‍ വിളിക്കും, പക്ഷേ അവ മറുപടി നല്‍കില്ല. അവര്‍ക്കിടയില്‍ ഒരു വിനാശ മേഖല നാമുണ്ടാക്കുന്നതാണ്. അധര്‍മകാരികള്‍ നരകം നേരില്‍ ദര്‍ശിക്കും; തത്സമയം, തങ്ങളതില്‍ നിപതിക്കുക തന്നെചെയ്യുമെന്നവര്‍ക്ക് മനസ്സിലാകും. അതില്‍ നിന്ന് തെന്നിമാറാന്‍ ഒരു മാര്‍ഗവും കണ്ടെത്താന്‍ അവര്‍ക്കാകുന്നതല്ല²⁵

ഈ ഖുര്‍ആനില്‍ മാനവതക്കായി സര്‍വവിധ ഉപമകളും നാം പ്രതിപാദിച്ചിരിക്കുന്നു. എന്നാല്‍ വലിയ താര്‍ക്കികനത്രേ മനുഷ്യന്‍. തങ്ങള്‍ക്കു നേര്‍മാര്‍ഗം ലഭിച്ചപ്പോള്‍ അതില്‍ വിശ്വാസമര്‍പ്പിക്കുകയും നാഥനോടു പാപമോചനമര്‍ഥിക്കുകയും ചെയ്യുന്നതിനെ വിട്ട് മനുഷ്യനെ തടഞ്ഞത്, മുന്‍ഗാമികളിലുണ്ടായ നടപടി തങ്ങളിലുമുണ്ടാകണം, അല്ലെങ്കില്‍ മുഖാമുഖം ശിക്ഷ വന്നെത്തണം എന്ന അവരുടെ ദുര്‍വാശി മാത്രമാണ്.²⁶
ശുഭവാര്‍ത്താവാഹകരും താക്കീതുനല്‍കുന്നവരും മാത്രമായാണ് നാം ദൂതരെ അയക്കുന്നത്. എന്നാല്‍ നിഷേധികള്‍ - സത്യവിധ്വംസനത്തിനു വേണ്ടി - ശിഥിലാശയങ്ങളുമായി തര്‍ക്കങ്ങള്‍ നടത്തുകയാണ്. എന്റെ ദൃഷ്ടാന്തങ്ങളും തങ്ങള്‍ക്കു നല്‍കപ്പെട്ട താക്കീതുകളും അവര്‍ പരിഹാസ പാത്രമാക്കുകയും ചെയ്തു.

തന്റെ നാഥന്റെ ദൃഷ്ടാന്തങ്ങളെക്കുറിച്ച് അനുസ്മരിക്കപ്പെട്ടിട്ടും അതില്‍ നിന്നു വ്യതിചലിക്കുകയും താന്‍ ചെയ്ത പാപങ്ങള്‍ വിസ്മരിക്കുകയും ചെയ്തവനെക്കാള്‍ വലിയ അക്രമി ആരാണ്? അതു മനസ്സിലാകാന്‍ പ്രതിബന്ധമാകും വിധം അവരുടെ ഹൃദയങ്ങളില്‍ ചില മൂടികളും കാതുകളില്‍ ബധിരതയും നാമുണ്ടാക്കുക തന്നെ ചെയ്തിരിക്കുന്നു. താങ്കള്‍ സന്മാര്‍ഗത്തിലേക്കു ക്ഷണിച്ചാല്‍ അവരൊരിക്കലും നേര്‍വഴി പ്രാപിച്ചവരാകില്ല, തീര്‍ച്ച.²⁷
താങ്കളുടെ നാഥന്‍ ഏറെ പൊറുക്കുന്നവനും കരുണാമയനുമത്രേ. തങ്ങളനുവര്‍ത്തിച്ച ദുഷ്‌കര്‍മങ്ങള്‍ക്ക് അവര്‍ക്കെതിരെ നടപടി എടുക്കുകയായിരുന്നുവെങ്കില്‍ തല്‍ക്ഷണ ശിക്ഷ അവന്‍ നല്‍കിയേനെ! എന്നാല്‍ അവര്‍ക്ക് ഒരു നിര്‍ണിതാവധിയുണ്ട്; അതിനപ്പുറം ഒരു അഭയസ്ഥലം കണ്ടെത്താന്‍ അവര്‍ക്കാവുകയേയില്ല. ആ നാടുകളിലെ നിവാസികളതാ, അക്രമം പ്രവര്‍ത്തിച്ചപ്പോള്‍ അവരെ നാം സംഹരിച്ചു കളഞ്ഞു. അവരുടെ ഉന്‍മൂലനത്തിന് ഒരവധി നാം നിശ്ചയിച്ചിരുന്നു.²⁸

മൂസാ നബി തന്റെ ദാസനോടു പറഞ്ഞ സന്ദര്‍ഭം സ്മരണീയമത്രേ: രണ്ടു കടലുകളുടെ സംഗമസ്ഥലത്തെത്തുകയോ ഏറെ സമയം സഞ്ചരിക്കുകയോ ചെയ്യുന്നതു വരെ ഞാന്‍ ഈ യാത്രാ ഉദ്യമം തുടര്‍ന്നുകൊണ്ടേയിരിക്കും. അങ്ങനെ, ഇരുകടലുകള്‍ സംഗമിക്കുന്നിടത്തെത്തിയപ്പോള്‍ തങ്ങളുടെ മത്സ്യത്തിന്റെ കാര്യം അവരിരുവരും വിസ്മരിച്ചു. കടലില്‍ ചാടിപ്പോയ വഴി അത് ഒരു മാളമാക്കി²⁹
എന്നിട്ട്, അവിടം വിട്ടു പോയപ്പോള്‍ മൂസാനബി ഭൃത്യനോടാജ്ഞാപിച്ചു: നീ നമ്മുടെ ആഹാരം കൊണ്ടുവാ; ഈ യാത്രമൂലം നാം പരവശരാവുക തന്നെ ചെയ്തിരിക്കുന്നു. ഭൃത്യന്‍ പറഞ്ഞു: അങ്ങ് അറിഞ്ഞോ? നാം ആ പാറക്കല്ലില്‍ വിശ്രമിച്ചപ്പോള്‍ മത്സ്യത്തിന്റെ കാര്യം ഞാന്‍ മറന്നുപോവുക തന്നെ ചെയ്തു. പിശാചല്ലാതെ മറ്റാരുമല്ല എന്നെ അത് വിസ്മരിപ്പിച്ചത്. താന്‍ ചാടിപ്പോയ മാര്‍ഗം ആ മത്സ്യം ഒരു വിസ്മയമാക്കിത്തീര്‍ക്കുകയുമുണ്ടായി. മൂസാനബി പ്രതികരിച്ചു: 'നമ്മുടെ അന്വേഷണസ്ഥലം അതു തന്നെയാകുന്നു.' അങ്ങനെ അവരിരുവരും സ്വന്തം കാല്‍പ്പാടുകളിലൂടെ തിരിച്ചു നടന്നു.³⁰

അങ്ങനെ അവരിരുവരും നമ്മുടെ ഒരടിമ(ഖളിര്‍)യെ കണ്ടുമുട്ടി. അദ്ദേഹത്തിന് നമ്മുടെ കാരുണ്യം നല്‍കുകയും നാം വശമുള്ള ജ്ഞാനം പഠിപ്പിക്കുകയും ചെയ്തിരുന്നു.³¹
മൂസാനബി അദ്ദേഹത്തോട് ചോദിച്ചു: താങ്കള്‍ക്ക് കിട്ടിയ സന്മാര്‍ഗജ്ഞാനം എനിക്കല്‍പം പഠിപ്പിച്ചുതരുന്നതിനായി ഞാന്‍ കൂടെ വരട്ടെയോ? അദ്ദേഹം പ്രതികരിച്ചു: ഞാനൊന്നിച്ചു ക്ഷമിച്ചുകഴിയാന്‍ നിങ്ങള്‍ക്കാവില്ല തന്നെ. സമഗ്രമായി ഗ്രഹിക്കാനാകാത്ത കാര്യത്തില്‍ താങ്കള്‍ക്ക് എങ്ങനെ ക്ഷമിക്കാന്‍ സാധിക്കും? മൂസാനബി പ്രതികരിച്ചു; അല്ലാഹു ഉദ്ദേശിച്ചാല്‍ ക്ഷമാശീലനായി എന്നെ താങ്കള്‍ക്ക് കാണാനാകും. താങ്കളുടെ ഒരു ശാസനക്കും ഞാന്‍ എതിരുചെയ്യില്ല. അദ്ദേഹം ഉപാധിവെച്ചു: എന്നെ പിന്തുടരുകയാണെങ്കില്‍ ഞാന്‍ വിവരിച്ചുതരുന്നതിന് മുമ്പേ യാതൊരു വിഷയത്തെപ്പറ്റിയും എന്നെ ചോദ്യം ചെയ്യരുത്.

പിന്നെയും അവരിരുവരും യാത്രതുടര്‍ന്നു. അങ്ങനെ രണ്ടാളും ഒരു ജലയാനത്തില്‍ കയറിയപ്പോള്‍ ഖളിര്‍ അതിന് ഒരു സുഷിരമുണ്ടാക്കി! മൂസാ പ്രതികരിച്ചു: ഈ കപ്പല്‍ക്കാരെ മുക്കിക്കൊല്ലാനായി താങ്കളിതിന്നു ഓട്ടയുണ്ടാക്കിയിരിക്കുകയാണോ? ഒരു ഹീനകൃത്യം തന്നെയാണ് താങ്കള്‍ ചെയ്തിരിക്കുന്നത്! അദ്ദേഹം പറഞ്ഞു: ഞാനൊന്നിച്ചു ക്ഷമിച്ചുകഴിയാന്‍ താങ്കള്‍ക്കാവുകയേ ഇല്ലെന്ന് ഞാന്‍ ഉണര്‍ത്തിയിരുന്നില്ലേ? മൂസാ നബി ബോധിപ്പിച്ചു: ഞാനത് വിസ്മരിച്ചുപോയത് മൂലം എന്റെ പേരില്‍ താങ്കള്‍ ശിക്ഷാനടപടി എടുക്കരുത്. ദുഷ്‌കരമായ യാതൊന്നിനും എന്റെ കാര്യത്തില്‍ താങ്കള്‍ നിര്‍ബന്ധിക്കയുമരുത് .³²

പിന്നെയും രണ്ടാളും യാത്രപോയി. അങ്ങനെ ഒരു കുട്ടിയെ കണ്ടപ്പോള്‍ അവനെ വധിച്ചുകളഞ്ഞു അദ്ദേഹം. മൂസാ നബി പ്രതികരിച്ചു: മറ്റൊരാള്‍ക്കുള്ള പ്രതിവധമൊന്നുമായല്ലാതെ ഒരു നിരപരാധിയെ താങ്കള്‍ വധിച്ചുവോ? അധിക്ഷേപാര്‍ഹമായ ഒരു കഠോരകൃത്യം തന്നെയാണു താങ്കള്‍ ചെയ്തത്. അദ്ദേഹം പ്രതികരിച്ചു: താങ്കള്‍ക്ക് ഞാനൊന്നിച്ചു ക്ഷമിച്ചുകഴിയാന്‍ ആവുകയേ ഇല്ലെന്ന് താങ്കളോടല്ലേ ഞാന്‍ പറഞ്ഞിരുന്നത്?³³

മൂസാ നബി മറുപടി നല്‍കി: എന്തിനെയെങ്കിലും കുറിച്ച് ഇനിയും ഞാന്‍ ചോദിക്കുകയാണെങ്കില്‍ പിന്നെ താങ്കളെന്നെ ഒപ്പം കൂട്ടേണ്ട. താങ്കള്‍ക്കെന്നില്‍ നിന്നു മതിയായ കാരണം കിട്ടിപ്പോയി.

പിന്നെയും രണ്ടാളും യാത്രചെയ്തു. അങ്ങനെ ഇരുവരും ഒരു നാട്ടുകാരുടെയടുത്തെത്തിയപ്പോള്‍ തദ്ദേശീയരോടവര്‍ ആഹാരമാവശ്യപ്പെട്ടു; എന്നാല്‍ ഇവര്‍ക്കാതിഥ്യമരുളാന്‍ അവര്‍ വിസമ്മതിച്ചു. അങ്ങനെ, അവിടെ നിലംപൊത്താറായ ഒരു മതില്‍ അവര്‍ കാണുകയും അദ്ദേഹം ഉടനെയത് നേരെയാക്കുകയുമുണ്ടായി. മൂസാനബി പ്രതികരിച്ചു: താങ്കള്‍ വിചാരിച്ചാല്‍ ഇതിനു വല്ല കൂലിയും മേടിക്കാമായിരുന്നു³⁴

ഖളിര്‍ പ്രസ്താവിച്ചു: എനിക്കും താങ്കള്‍ക്കുമിടക്കുള്ള വിരഹമുഹൂര്‍ത്തമാണിത്. ഏതൊക്കെ വിഷയങ്ങളില്‍ താങ്കള്‍ക്കു ക്ഷമിക്കാന്‍ സാധിക്കാതെയിരുന്നുവോ അവയുടെ പൊരുള്‍ ഞാന്‍ പറഞ്ഞു തരാം: ആ ജലയാനമുണ്ടല്ലോ, കടല്‍ തൊഴിലാളികളായ ഏതാനും പാവങ്ങളുടേതായിരുന്നു അത്. അവര്‍ക്കു പിറകില്‍ എല്ലാ നല്ല ജലയാനങ്ങളും ബലമായി പിടിച്ചെടുക്കുന്ന ഒരു രാജാവുണ്ടായിരുന്നു; അതിനാല്‍ അതിന് ന്യൂനതയുണ്ടാക്കണമെന്ന് ഞാന്‍ കരുതി. ആ കുട്ടിയുണ്ടല്ലോ, അവന്റെ മാതാപിതാക്കള്‍ സത്യവിശ്വാസികളായിരുന്നു. അവരെയവന്‍ അധര്‍മത്തിനും സത്യനിഷേധത്തിനും നിര്‍ബന്ധിക്കുമെന്നു ഞാന്‍ ഭയന്നു. തന്മൂലം, അവനെക്കാള്‍ ഉദാത്ത സ്വഭാവിയും കാരുണ്യത്താല്‍ ഏറെ സമീപസ്ഥനുമായ ഒരു പുത്രനെ അവരുടെ നാഥന്‍ പകരം നല്‍കണമെന്നു നാം അഭിലഷിച്ചു.

ഇനി, ആ മതിലുണ്ടല്ലോ, ആ പട്ടണക്കാരായ രണ്ട് അനാഥക്കുട്ടികളുടേതായിരുന്നു അത്. അവര്‍ക്കുള്ള ഒരു നിക്ഷേപമുണ്ടായിരുന്നു അതിനു ചുവട്ടില്‍. അവരുടെ പിതാവ് ഒരു സദ്‌വൃത്തനായിരുന്നു. അതിനാല്‍ അവര്‍ രണ്ടുപേരും യൗവന പ്രാപ്തരാവുകയും നിക്ഷേപം പുറത്തെടുക്കുകയും ചെയ്യണമെന്ന് താങ്കളുടെ നാഥന്‍ - തന്റെ അനുഗ്രഹമെന്ന നിലക്ക്-ഉദ്ദേശിച്ചു. എന്റെ സ്വാഭിപ്രായമനുസരിച്ചല്ല ഞാനിതൊന്നും തന്നെ പ്രവര്‍ത്തിച്ചത്. ഏതൊക്കെ വിഷയങ്ങളില്‍ ക്ഷമകൈക്കൊള്ളാന്‍ താങ്കള്‍ക്കു കഴിഞ്ഞില്ലയോ അവയുടെ വ്യാഖ്യാനമാണ് ഇപ്പറഞ്ഞത് .³⁵

ദുല്‍ഖര്‍നൈനിയെക്കുറിച്ചും താങ്കളോടവര്‍ ചോദിക്കും. 'അദ്ദേഹത്തെസംബന്ധിച്ചുള്ള വൃത്താന്തം നിങ്ങള്‍ക്കു ഞാന്‍ ഓതിത്തരാം' എന്നു താങ്കള്‍ പറയുക: നിശ്ചയം അദ്ദേഹത്തിന് നാം ഭൂമിയില്‍ സ്വാധീനം നല്‍കുകയും സര്‍വകാര്യങ്ങള്‍ക്കുമുള്ള വഴികള്‍ സൗകര്യപ്പെടുത്തിക്കൊടുക്കുകയും ചെയ്തിരുന്നു. എന്നിട്ടദ്ദേഹം ഒരു വഴിയില്‍ പ്രവേശിക്കുകയും അങ്ങനെ സൂര്യനസ്തമിക്കുന്ന സ്ഥലത്തെത്തുകയും ചെയ്തപ്പോള്‍ കറുത്ത ഒരു ചളിക്കുണ്ടില്‍ അതു മറഞ്ഞുപോകുന്നതായി ഗോചരീഭവിച്ചു. അതിനടുത്ത് ഒരു കൂട്ടം ആളുകളെയും അദ്ദേഹം കണ്ടു. നാം കല്‍പിച്ചു: ഹേ, ദുല്‍ഖര്‍നൈന്‍, താങ്കള്‍ക്കിവരില്‍ ശിക്ഷാനടപടികള്‍ കൈക്കൊള്ളുകയോ ഉദാത്തസമീപനം സ്വീകരിക്കുകയോ ചെയ്യാവുന്നതാണ്.³⁶

ദുല്‍ഖര്‍നൈന്‍ പ്രഖ്യാപിച്ചു: ആര് ദൈവനിഷേധിയാകുന്നുവോ അവനെ നാം ശിക്ഷാമുറകള്‍ക്ക് വിധേയനാക്കും. പിന്നീടവന്‍ നാഥങ്കലേക്കു മടക്കപ്പെടുന്നതും അപ്പോഴവന്‍ ഗുരുതരമായ പാരത്രികശിക്ഷ നിഷേധിക്കു നല്‍കുന്നതുമാണ്. ഇനി ആര് സത്യവിശ്വാസം കൈക്കൊള്ളുകയും സല്‍ക്കര്‍മങ്ങളനുഷ്ഠിക്കുകയും ചെയ്തുവോ അവനാണ് അത്യുദാത്ത സ്വര്‍ഗം പ്രതിഫലമായുള്ളത്. നമ്മുടെ ശാസനയില്‍ നിന്നു സുഗമമായതാണവനോടു നിര്‍ദേശിക്കുക.³⁷

പിന്നീടദ്ദേഹം മറ്റൊരു വഴിയില്‍ പ്രവേശിക്കുകയും അങ്ങനെ സൂര്യന്‍ ഉദിക്കുന്നിടത്തെത്തുകയും ചെയ്തപ്പോള്‍ അതിനുചുവട്ടില്‍ ഒരു ആവരണവും നാമുണ്ടാക്കിക്കൊടുത്തിട്ടില്ലാത്ത ഒരു സമൂഹത്തിനു മീതെ അത് ഉദിച്ചുയരുന്നതായി കാണുകയുണ്ടായി. മുന്‍ചൊന്ന പ്രകാരംതന്നെ താനനുവര്‍ത്തിച്ചു.³⁸
അദ്ദേഹത്തിന്റെ പക്കലുള്ളത് സംബന്ധിച്ച് സൂക്ഷ്മജ്ഞാനം കൊണ്ട് നാം സമഗ്രമായി അറിഞ്ഞിരുന്നു.

പിന്നീടദ്ദേഹം മറ്റൊരു സരണിയില്‍ കടക്കുകയും രണ്ടു മലകള്‍ക്കിടയിലെത്തുകയുമുണ്ടായി. സംസാരം സാവകാശം മനസ്സിലാക്കാനാകാത്ത ഒരു ജനതതിയെ ഇരുമലകള്‍ക്കിപ്പുറത്ത് താന്‍ കണ്ടു. അവര്‍ ബോധിപ്പിച്ചു: ഹേ ദുല്‍ഖര്‍നൈന്‍, നിശ്ചയം, യഅ്ജൂജ്-മഅ്ജൂജ് നാട്ടില്‍ കുഴപ്പമുണ്ടാക്കുകയാണ്; അതുകൊണ്ട് ഞങ്ങള്‍ക്കും അവര്‍ക്കും മദ്ധ്യേ ഒരു മതില്‍കെട്ടു നിര്‍മിച്ചുതരാന്‍ താങ്കള്‍ക്കു ഞങ്ങള്‍ സാമ്പത്തിക വിഹിതം നിര്‍ണയിച്ചുതരട്ടെയോ?³⁹

അദ്ദേഹം പ്രതികരിച്ചു: നാഥന്‍ എനിക്കു സ്വാധീനപ്പെടുത്തിയതത്രേ (നിങ്ങളുടേതിലും) ശ്രേഷ്ഠം; അതുകൊണ്ട് ശാരീരികശക്തികൊണ്ട് നിങ്ങളെന്നെ സഹായിക്കുക. നിങ്ങള്‍ക്കും അവര്‍ക്കുമിടയില്‍ ഞാനൊരു ബലിഷ്ഠമതില്‍ നിര്‍മിച്ചുതരാം. എനിക്കു നിങ്ങള്‍ ഇരുമ്പുകട്ടികള്‍ കൊണ്ടുവന്നുതരിക. അങ്ങനെ ആ രണ്ടു മലകള്‍ക്കിടയില്‍ അവ പടുത്തുയര്‍ത്തി തുല്യമാക്കി (തീയിട്ട്) '‌നിങ്ങള്‍ ഊതുക' എന്നദ്ദേഹം കല്‍പിച്ചു. എന്നിട്ടത് അഗ്നിസമാനമായപ്പോള്‍ 'കൊണ്ടുവരിന്‍, ഉരുക്കിയചെമ്പ് ഞാനിതിന്മേല്‍ ഒഴിക്കട്ടെ' എന്നദ്ദേഹം ഉത്തരവിട്ടു. (നിര്‍മാണം തീര്‍ന്നപ്പോള്‍) ആ മതില്‍കെട്ട് കയറിമറിയാന്‍ യഅ്ജൂജ് -മഅ്ജൂജിന്നായില്ല; അതിന്നു സുഷിരമുണ്ടാക്കാനും അവര്‍ക്കു സാധിച്ചില്ല.⁴⁰

എന്റെ നാഥന്റെ പക്കല്‍ നിന്നുള്ള ഒരനുഗ്രഹമാണിത് എന്നദ്ദേഹം പ്രഖ്യാപിച്ചു: എന്നാല്‍ എന്റെ നാഥന്റെ വാഗ്ദത്തമുഹൂര്‍ത്തം വന്നെത്തിയാല്‍ അവനതിനെ ശിഥിലമാക്കിക്കളയും. എന്റെ നാഥന്റെ വാഗ്ദാനം സത്യസന്ധമത്രേ.⁴¹

അന്ത്യനാളില്‍ മനുഷ്യരെ ചിലര്‍ മറ്റുചിലരുടെ മേല്‍ പരസ്പരം തള്ളിക്കയറും വിധം നാം വിട്ടേച്ചുകളയും. കാഹളത്തില്‍ ഊതപ്പെടുന്നതും തത്സമയം അവരെ നാം സമ്മേളിപ്പിക്കുന്നതുമാണ്. എന്നെക്കുറിച്ച പ്രസ്താവങ്ങള്‍ക്കു മുമ്പില്‍ ആരുടെ ദൃഷ്ടികള്‍ ആവൃതമാവുകയും അവയുള്‍ക്കൊള്ളാന്‍ ആരശക്തരാവുകയും ചെയ്തിരുന്നുവോ ആ സത്യനിഷേധികള്‍ക്കു അന്നു നാം നരകം നല്ലപോലെ കാട്ടിക്കൊടുക്കും.⁴²

എന്നെക്കൂടാതെ എന്റെ അടിമകളെ സംരക്ഷകരായി വരിക്കാമെന്ന് സത്യനിഷേധികള്‍ ധരിച്ചുവെച്ചിരിക്കുകയാണോ? നിശ്ചയം അവിശ്വാസികള്‍ക്കു ആതിഥ്യമരുളാനായി നരകം നാം സജ്ജീകരിച്ചിരിക്കുന്നു!

നബിയേ, പ്രഖ്യാപിക്കുക: അനുഷ്ഠാനകര്‍മങ്ങള്‍ ഏറ്റം നഷ്ടകരമായി ഭവിച്ചവരെപ്പറ്റി നിങ്ങള്‍ക്കു നാം പറഞ്ഞു തരട്ടെയോ? തങ്ങളുടെ ഐഹിക ജീവിതപ്രവര്‍ത്തനങ്ങളില്‍ മാര്‍ഗഭ്രംശം വന്നവരാണവര്‍; എന്നാല്‍ ഉദാത്തകര്‍മങ്ങളാണ് തങ്ങളനുവര്‍ത്തിക്കുന്നതെന്നാണവരുടെ ധാരണ.⁴³
തങ്ങളുടെ നാഥന്റെ ദൃഷ്ടാന്തങ്ങളിലും അവനുമായുള്ള കൂടിക്കാഴ്ചയിലും അവിശ്വസിച്ചവരത്രേ അവര്‍. തന്മൂലം അവരുടെ കര്‍മങ്ങള്‍ ശിഥിലമായിരിക്കുന്നു. അതുകൊണ്ട് പുനരുത്ഥാന നാളില്‍ അവര്‍ക്ക് ഒരു വിലയും നാം കല്‍പിക്കുകയില്ല. അതത്രേ അവരുടെ പ്രതിഫലമായ നരകം; സത്യം നിഷേധിക്കുകയും എന്റെ സൂക്തങ്ങളെയും ദൂതന്മാരെയും പരിഹാസപാത്രമാക്കുകയും ചെയ്തതുമൂലം.⁴⁴

നിശ്ചയം, സത്യവിശ്വാസം കൈക്കൊള്ളുകയും സല്‍ക്കര്‍മങ്ങളനുഷ്ഠിക്കുകയും ചെയ്തവരാരോ, അവര്‍ക്ക് ആതിഥ്യമേകാനുള്ളതാണ് സ്വര്‍ഗീയ പറുദീസകള്‍; അവരതില്‍ ശാശ്വതരായിരിക്കും, മാറിപ്പോകാനാഗ്രഹിക്കില്ല.

നബിയേ, പ്രഖ്യാപിക്കുക, കടല്‍വെള്ളമത്രയും എന്റെ നാഥന്റെ വചനങ്ങള്‍ രേഖപ്പെടുത്താനുള്ള മഷിയായിരുന്നെങ്കില്‍, അവന്റെ വചനങ്ങള്‍ അവസാനിക്കും മുമ്പ് കടല്‍വെള്ളം തീര്‍ന്നുപോവുകതന്നെ ചെയ്യും; തത്തുല്യമായത്ര സമുദ്രങ്ങള്‍ കൂടി നാം പിന്‍ബലമായി കൊണ്ടുവന്നാലും.⁴⁵

നബിയേ, വിളംബരം ചെയ്യുക: നിങ്ങളെപ്പോലെയുള്ള ഒരു മനുഷ്യന്‍ തന്നെയാണു ഞാന്‍; നിങ്ങളുടെ ദൈവം ഒരേയൊരു ദൈവം മാത്രമാണെന്ന് എനിക്ക് ബോധനം നല്‍കപ്പെടുന്നുണ്ട്.⁴⁶
അതുകൊണ്ട് തന്റെ നാഥനുമായി കണ്ടുമുട്ടണമെന്ന് ആരെങ്കിലുമാഗ്രഹിക്കുന്നുണ്ടെങ്കില്‍ അവന്‍ സല്‍കര്‍മങ്ങളനുഷ്ഠിക്കുകയും തന്റെ നാഥനുള്ള ആരാധനയില്‍ മറ്റൊന്നിനെയും പങ്കുചേര്‍ക്കാതിരിക്കുകയും ചെയ്യട്ടെ.⁴⁷