അൽ ഇസ്റാഅ് - الإسراء - Al-Isra

തന്റെ അടിമ മുഹമ്മദ് നബിയെ മസ്ജിദുല്‍ ഹറാമില്‍ നിന്ന് മസ്ജിദുല്‍ അഖ്‌സാ - അതിന്റെ ചുറ്റുപാടും നാം അനുഗ്രഹ പൂര്‍ണമാക്കിയിട്ടുണ്ട്-യിലേക്ക് ഒരു രാത്രിയില്‍ സഞ്ചരിപ്പിച്ചവന്‍ പരിശുദ്ധനത്രേ. നബിക്ക് നമ്മുടെ ചില ദൃഷ്ടാന്തങ്ങള്‍ കാണിച്ചുകൊടുക്കാനായിരുന്നു അത്. നിശ്ചയം, എല്ലാം കേള്‍ക്കുന്നവനും കാണുന്നവനുമാണ് അല്ലാഹു.¹

ഞാനല്ലാത്ത ഒരു കൈകാര്യകര്‍ത്താവിനെ വരിക്കരുതെന്ന സിദ്ധാന്തവുമായി മൂസാനബിക്ക് നാം വേദഗ്രന്ഥം നല്‍കുകയും ഇസ്രയേല്യര്‍ക്ക് അത് സന്‍മാര്‍ഗദര്‍ശകമാക്കുകയുമുണ്ടായി. നൂഹ് നബിയൊന്നിച്ച് നാം ജലയാനത്തില്‍ വഹിച്ചവരുടെ സന്തതികളേ, നിശ്ചയം, അദ്ദേഹം അതീവ കൃതജ്ഞനായിരുന്നു. (നിങ്ങളും അങ്ങനെ നന്ദിയുള്ളവരാകണം.)²

ഇസ്രയേല്യര്‍ക്ക് തൗറാത്തില്‍ നാം ഇങ്ങനെ വിധി കല്‍പിച്ചു: നിശ്ചയം, നിങ്ങള്‍ രണ്ടുവട്ടം ഭൂമിയില്‍ കുഴപ്പമുണ്ടാക്കുന്നതും മികച്ച ആഢ്യത്വം നടിക്കുന്നതുമാണ്. അതില്‍ ആദ്യത്തേതിന്റെ സന്ദര്‍ഭമായിക്കഴിഞ്ഞാല്‍ തീവ്രമായ ആക്രമണ ശേഷിയുള്ള നമ്മുടെ ചില ദാസരെ നിങ്ങളിലേക്ക് നാം നിയോഗിക്കുന്നതും വീടുകള്‍ക്കിടയില്‍ കടന്ന് നിങ്ങളെയവര്‍ തെരഞ്ഞു പിടിക്കുന്നതുമാണ്. പ്രയോഗവല്‍കൃതമാകുന്ന ഒരു വാഗ്ദാനമാണിത്. പിന്നീട് അവര്‍ക്കെതിരെ പോരാടാന്‍ നിങ്ങള്‍ക്കു നാം സന്ദര്‍ഭം തരും. സമ്പത്തുകളും സന്താനങ്ങളും കൊണ്ട് നിങ്ങളെ നാം സഹായിക്കുന്നതും പൂര്‍വോപരി സംഘശേഷിയുള്ളവരാക്കുന്നതുമാണ്. നന്മചെയ്താല്‍ അതിന്റെ ഗുണവും തിന്മചെയ്താല്‍ അതിന്റെ ദൂഷ്യവും നിങ്ങള്‍ക്കു തന്നെ. പിന്നീട് രണ്ടാം കുഴപ്പത്തിന്റെ സന്ദര്‍ഭമാകുമ്പോള്‍ നിങ്ങളെ അപമാനിതരാക്കാനും ആദ്യവട്ടം പള്ളിയില്‍ കടന്നപോലെത്തന്നെ രണ്ടാംവട്ടം കടക്കാനും അവര്‍ കൈയടക്കിയതിനെയത്രയും സംഹരിക്കാനും വേണ്ടി (വേറെ ശക്തിയെ നിയോഗിക്കും.)

രക്ഷിതാവ് നിങ്ങളോട് കാരുണ്യം പ്രകടിപ്പിച്ചേക്കാം. എന്നാല്‍, ധിക്കാരത്തിലേക്ക് തിരിച്ചുനടക്കുകയാണ് നിങ്ങളെങ്കില്‍ നാമും ശിക്ഷയാവര്‍ത്തിക്കും. സത്യം നിഷേധിക്കുന്ന യാളുകള്‍ക്ക് നരകം നാം തടങ്കല്‍ പാളയമാക്കി വെച്ചിരിക്കുന്നു³

നിശ്ചയം, ഈ ഖുര്‍ആന്‍ ഏറ്റവും ഋജുവായതിലേക്ക് നയിക്കുകയും സല്‍കര്‍മാനു ഷ്ഠാനികളായ സത്യവിശ്വാസികള്‍ക്ക് മഹത്തായ പ്രതിഫലമാണുള്ളതെന്നും പരലോക വിശ്വാസമില്ലാത്തവര്‍ക്ക് വേദനയുറ്റ ശിക്ഷ നാം ഒരുക്കിയിട്ടുണ്ടെന്നും ശുഭവാര്‍ത്തയറിയിക്കുകയും ചെയ്യുന്നു. ഗുണത്തിനു വേണ്ടി എന്നതുപോലെ ദോഷത്തിനുവേണ്ടി പ്രാര്‍ഥിക്കുകയാണു മനുഷ്യര്‍. ഏറെ തത്രപ്പാട് കാണിക്കുന്നവനത്രേ അവന്‍.⁴
രാവിനെയും പകലിനെയും രണ്ട് ദൃഷ്ടാന്തങ്ങളാക്കിയിരിക്കയാണു നാം. എന്നിട്ട് രാത്രിയെന്ന ദൃഷ്ടാന്തം നാം മായ്ച്ചു കളയുകയും പകലാകുന്ന ദൃഷ്ടാന്തം കാഴ്ചയുറ്റതാക്കുകയുമുണ്ടായി. നിങ്ങള്‍ക്ക് നാഥങ്കല്‍ നിന്നുള്ള അനുഗ്രഹങ്ങള്‍ തേടിപ്പിടിക്കുന്നതിനും കണക്കും വര്‍ഷങ്ങളുടെ എണ്ണവും അറിയാനും വേണ്ടി ഓരോ കാര്യവും നന്നായി നാം പ്രതിപാദിച്ചിരിക്കുന്നു⁵
ഓരോ മനുഷ്യന്റെയും ഭാഗധേയം അവന്റെ പിരടിയില്‍ തന്നെ നാം വെച്ചുകെട്ടിയിരിക്കയാണ്. തുറന്നുവെച്ചതായി താന്‍ കാണുന്ന ഒരു ഗ്രന്ഥം അന്ത്യനാളില്‍ അവന്നു നാം പുറത്തെടുത്തുകൊടുക്കും: 'വായിക്കൂ നിന്റെ ഈ കര്‍മരേഖ; നിനക്കെതിരെ സാക്ഷിയായി ഇന്നു ഈ ഏടുതന്നെ മതി!' ഒരാള്‍ നേര്‍വഴി പ്രാപിച്ചവനായാല്‍ സ്വന്തത്തിനുവേണ്ടി തന്നെയാണവന്‍ സന്‍മാര്‍ഗപ്രാപ്തനായത്; ഒരാള്‍ വഴിതെറ്റിപ്പോകുന്നുവെങ്കില്‍ തനിക്കു പ്രതികൂലമായിത്തന്നെയാണ് ആ മാര്‍ഗഭ്രംശം സംഭവിക്കുക. ഒരു പാപവാഹിയും മറ്റൊരാളുടെ കുറ്റമേല്‍ക്കുകയില്ല. ഒരു ദൂതനെ നിയോഗിക്കുന്നതുവരെ ആരെയെങ്കിലും ശിക്ഷിക്കുന്ന രീതി നമുക്കില്ല താനും⁶

ഏതെങ്കിലുമൊരു നാട് സംഹരിച്ചു കളയാന്‍ നാമുദ്ദേശിച്ചാല്‍ അവിടത്തെ സുഖലോലുപന്‍മാര്‍ക്ക് ഉത്തരവുനല്‍കുകയും അങ്ങനെ അവരവിടെ അധര്‍മപ്രവര്‍ത്തനങ്ങള്‍ നടത്തുകയും തദ്വാരാ അത് ഉന്മൂലനാര്‍ഹമാവുകയും അങ്ങനെ നാമത് നിശ്ശേഷം സംഹരിക്കുകയും ചെയ്യും. നൂഹ് നബിക്കു ശേഷം എത്ര തലമുറകളെയാണ് നാം നശിപ്പിച്ചത്! തന്റെ അടിമകളുടെ പാപങ്ങളെപ്പറ്റി ഏറെ അറിയുന്നവനും സൂക്ഷ്മദൃക്കുമായി താങ്കളുടെ നാഥന്‍ തന്നെ മതി⁷

ഒരാള്‍ ഭൗതിക ജീവിതക്ഷേമം മാത്രമാണ് ലക്ഷ്യം വെക്കുന്നതെങ്കില്‍ - നാം ഇച്ഛിച്ചതും ഉദ്ദേശിക്കുന്നവര്‍ക്കും -അതു വേഗം നല്‍കും. പിന്നീട് അവന്നായി നാം നരകം സജ്ജീകരിക്കു ന്നതാണ്. ഹീനനും അഭിശപ്തനുമായി അവനതില്‍ കടക്കും. പരലോക വിജയമാണ് ഒരാളുടെ ഉദ്ദേശ്യമെങ്കില്‍ - സത്യവിശ്വാസിയായിക്കൊണ്ടു തന്നെ അതിനുവേണ്ട ശ്രമങ്ങള്‍ അവനര്‍പ്പിക്കയും ചെയ്തു - അവരുടെ പ്രയത്‌നങ്ങള്‍ സ്വീകരിക്കപ്പെടുന്നതാണ്.⁸
താങ്കളുടെ നാഥന്റെ ദാനത്തില്‍ നിന്ന് ആ വിഭാഗത്തിന്നും ഈ വിഭാഗത്തിന്നും നാം നല്‍കുന്നതാണ് - താങ്കളുടെ രക്ഷിതാവിന്റെ ദാനം നിരോധിക്കപ്പെടുന്നതായിട്ടില്ല. അവരില്‍ ചിലരെ മറ്റു ചിലരെക്കാള്‍ എങ്ങനെയാണു നാം ശ്രേഷ്ഠരാക്കിയിരിക്കുന്നതെന്ന് താങ്കള്‍ നോക്കുക. എന്നാല്‍ പാരത്രിക ജീവിതം തന്നെയാണ് അത്യുന്നത പദവിയുള്ളതും ഏറ്റം ശ്രേഷ്ഠവും. മനുഷ്യാ, അല്ലാഹുവോടൊന്നിച്ച് മറ്റൊരു ആരാധ്യനെയും നീ സ്ഥാപിക്കരുത്; അങ്ങനെ ചെയ്താല്‍ നീ അധിക്ഷേപാര്‍ഹനും കൈവെടിയപ്പെട്ടവനുമായിരിക്കുന്നതാണ്⁹

തനിക്കല്ലാതെ നിങ്ങള്‍ ആരാധനകളര്‍പ്പിക്കരുതെന്നും മാതാപിതാക്കളോട് ഉദാത്ത സമീപനം പുലര്‍ത്തണമെന്നും താങ്കളുടെ നാഥന്‍ വിധിച്ചിരിക്കുന്നു. അവരിലൊരാളോ ഇരുവരും തന്നെയോ വാര്‍ധക്യപ്രാപ്തരായി നിന്റെ സമീപത്തുണ്ടാകുന്നുവെങ്കില്‍ അവരോട് ച്ഛെ എന്നുപോലും പറയുകയോ കയര്‍ത്തു സംസാരിക്കുകയോ ചെയ്യരുത്; ആദരപൂര്‍ണമായ വാക്കുകള്‍ പറയുകയും കാരുണ്യപൂര്‍വം വിനയത്തിന്റെ ചിറകുകള്‍ അവരിരുവര്‍ക്കും താഴ്ത്തിക്കൊടുക്കുകയും ഇങ്ങനെ പ്രാര്‍ഥിക്കുകയും വേണം: 'രക്ഷിതാവേ, ഇവരിരുവരും എന്നെ ചെറുപ്പത്തില്‍ പോറ്റിവളര്‍ത്തിയതു പോലെ ഇവര്‍ക്ക് നീ കാരുണ്യം ചൊരിയേണമേ'. നിങ്ങളുടെ മനസ്സുകളിലുള്ളത് നന്നായറിയുന്നവനാണ് രക്ഷിതാവ്. നിങ്ങള്‍ സദ്‌വൃത്തരാവുകയാണെങ്കില്‍, ഖേദിച്ചുമടങ്ങുന്നവര്‍ക്ക് ഏറെ പൊറുത്ത് കൊടുക്കുന്നവന്‍ തന്നെയത്രേ അവന്‍¹⁰

അടുത്ത ബന്ധുക്കള്‍ക്കും അഗതികള്‍ക്കും യാത്രക്കാര്‍ക്കും അവരുടെ അവകാശങ്ങള്‍ നല്‍കുക, ധനദുര്‍വ്യയം അരുത്; ദുര്‍വ്യയം ചെയ്യുന്നവര്‍ പിശാചിന്റെ കൂട്ടുകാര്‍ തന്നെയത്രേ.¹¹
തന്റെ രക്ഷിതാവിനോട് ഏറെ നന്ദികെട്ടവനത്രേ പിശാച്. നിന്റെ നാഥന്റെ പക്കല്‍ നിന്നുള്ള എന്തെങ്കിലും അനുഗ്രഹം വന്നെത്തുമെന്ന പ്രത്യാശയില്‍ പിന്തിരിയുന്ന പക്ഷം സൗമ്യതയോടെ അവരോടു പ്രതികരിക്കണം¹²
നീ ഒട്ടും പിശുക്ക് കാട്ടുകയും ധൂര്‍ത്തടിക്കുകയുമരുത്; അങ്ങനെ ചെയ്താല്‍ അധിക്ഷേപാര്‍ഹനും അതീവ ദുഃഖിതനുമായിരിക്കേണ്ടി വരും. നിശ്ചയം, നിന്റെ നാഥന്‍ താനുദ്ദേശിക്കുന്നവര്‍ക്ക് ഉപജീവന മാര്‍ഗം പ്രവിശാലമാക്കുകയും മറ്റു ചിലര്‍ക്ക് കുടുസ്സാക്കുകയും ചെയ്യും. തന്റെ അടിമകളെക്കുറിച്ച് സൂക്ഷ്മജ്ഞാനമുള്ളവനും അവരെ നന്നായി കാണുന്നവനും തന്നെയത്രേ അവന്‍. ദാരിദ്ര്യം വരുമെന്ന് ഭയന്ന് നിങ്ങള്‍ കുഞ്ഞുങ്ങളെ വധിക്കരുത്; അവര്‍ക്കും നിങ്ങള്‍ക്കും ആഹാരം തരുന്നത് നാമാണ്.¹³
അവരെ കൊല്ലുന്നത് ഘോരപാതകം തന്നെ. നിങ്ങള്‍ വ്യഭിചാരത്തോട് അടുത്തുപോകരുത്; ഹീനവൃത്തിയും ദുര്‍മാര്‍ഗവുമത്രേ അത്¹⁴
അല്ലാഹു നിഷിദ്ധമാക്കിയ ഒരു ജീവന്‍ നിയമാനുസൃതമല്ലാതെ നിങ്ങള്‍ വധിക്കരുത്. അക്രമവിധേയനായി ഒരാള്‍ വധിക്കപ്പെടുന്നുവെങ്കില്‍ അവകാശിക്ക് പ്രതിക്രിയാവകാശം നാം നിശ്ചയിച്ചിട്ടുണ്ട്; എന്നാല്‍ ആ പ്രതിക്രിയാവധത്തില്‍ പരിധിവിട്ടുകൂടാ. അതു നടപ്പാക്കാന്‍ സഹായിക്കപ്പെടേണ്ടവനാണവ ന്‍¹⁵
യൗവനപ്രാപ്തി വരെ അനാഥക്കുട്ടിയുടെ സമ്പത്തുമായി ഏറ്റം ഉത്തമരീതിയിലേ നിങ്ങള്‍ സമീപിക്കാവൂ. കരാറുകളെപ്പറ്റി വിചാരണ നടത്തപ്പെടുക തന്നെ ചെയ്യും - നിങ്ങളവ പൂര്‍ത്തീകരിക്കണം. അളക്കുമ്പോള്‍ പൂര്‍ണമായി നല്‍കുകയും ശരിയായ തുലാസുകൊണ്ട് തൂക്കുകയും വേണം; അതാണ് ഉദാത്തവും വിശിഷ്ട പരിണാമമുള്ളതും. ശരിയായ അറിവില്ലാത്ത ഒരു വിഷയവും അനുധാവനം ചെയ്യരുത്; കേള്‍വി, കാഴ്ച, ഹൃദയം എന്നിവയെപ്പറ്റിയൊക്കെ വിചാരണ നടത്തപ്പെടും. ഭൂതലത്തില്‍ അഹന്താപൂര്‍വം നീ നടക്കരുത്; ഭൂമിയെ കീറിമുറിക്കാനോ പര്‍വതങ്ങളുടെ ഉയരം പ്രാപിക്കാനോ നിനക്കാവില്ല, തീര്‍ച്ച.¹⁶
ഇപ്പറഞ്ഞവയില്‍ ഹീനമായതെല്ലാം നിന്റെ നാഥങ്കല്‍ വെറുക്കപ്പെട്ടതാകുന്നു. രക്ഷിതാവ് താങ്കള്‍ക്ക് ദിവ്യസന്ദേശം നല്‍കിയ തത്ത്വജ്ഞാനത്തില്‍ പെട്ടതാണിത്. അല്ലാഹുവോടൊപ്പം മറ്റൊരു ദൈവത്തെയും നീ സ്ഥാപിക്കരുത്. അങ്ങനെ ചെയ്താല്‍ അധിക്ഷിപ്തനും അഭിശപ്തനുമായി നീ നരകത്തിലിടപ്പെടുന്നതാണ്¹⁷

രക്ഷിതാവ് നിങ്ങള്‍ക്ക് ആണ്‍മക്കളെ പ്രത്യേകം നല്‍കുകയും തനിക്കുവേണ്ടി മലക്കുകളില്‍ നിന്നു പെണ്‍മക്കളെ തെരഞ്ഞെടുക്കുകയും ചെയ്തിരിക്കയാണോ? ഗൗരവതരമായ വാക്കുകള്‍ തന്നെയാണ് നിങ്ങള്‍ പുലമ്പുന്നത്. ജനങ്ങള്‍ ചിന്തിച്ചുഗ്രഹിക്കാനായി ഈ ഖുര്‍ആനില്‍ നാം വസ്തുതകള്‍ വിവരിച്ചിട്ടുണ്ട്. എന്നാല്‍ അവര്‍ക്കത് പിന്തിരിഞ്ഞോട്ടം വര്‍ധിപ്പിക്കുകമാത്രമാണ് ചെയ്യുന്നത്¹⁸
പറയുക: അവര്‍ ജല്‍പിക്കുന്നതു പോലെ അല്ലാഹുവൊന്നിച്ച് വേറെ ദൈവങ്ങളുണ്ടായിരുന്നെങ്കില്‍, സിംഹാസനത്തിന്റെ ഉടമയെ അതിജയിക്കാന്‍ അവര്‍ ഏതെങ്കിലും വഴി തേടുമായിരുന്നേനെ. എത്ര പരിശുദ്ധനാണവന്‍! അവര്‍ ജല്‍പിക്കുന്നതിനേക്കാള്‍ അവന്‍ എത്ര മഹോന്നതനായിരിക്കുന്നു! ഏഴു ആകാശങ്ങളും ഭൂമിയും അവയിലുള്ളവരും അവന്റെ മഹത്ത്വം പ്രകീര്‍ത്തിക്കുന്നുണ്ട്. അവനെ സ്തുതിച്ചുകൊണ്ട് വിശുദ്ധി വാഴ്ത്താത്തതായി യാതൊരു വസ്തുവുമില്ല തന്നെ. എന്നാല്‍ അവയുടെ പ്രകീര്‍ത്തനം നിങ്ങള്‍ക്കു മനസ്സിലാവില്ല. അവന്‍ സഹിഷ്ണുവും ഏറെ പൊറുക്കുന്നവനുമത്രേ.¹⁹

താങ്കള്‍ ഖുര്‍ആന്‍ പാരായണം ചെയ്യുകയാണെങ്കില്‍ അങ്ങേക്കും പരലോകവിശ്വാസമി ല്ലാത്തവര്‍ക്കുമിടയില്‍ അദൃശ്യമായൊരു മറ നാമുണ്ടാക്കുന്നു. അതു ഗ്രഹിക്കാതിരിക്കാന്‍ അവരുടെ ഹൃദയങ്ങള്‍ക്കു നാം ചില മൂടികളിടുകയും ചെവികളില്‍ ബധിരതയുണ്ടാക്കുകയും ചെയ്യും²⁰
സ്വന്തം രക്ഷിതാവിനെ മാത്രം താങ്കള്‍ ഖുര്‍ആനില്‍ പരാമര്‍ശിക്കുമ്പോള്‍ വെറുപ്പോടെ അവരതാ പിന്തിരിഞ്ഞുപോകുന്നു! താങ്കളെ സശ്രദ്ധം ശ്രവിക്കുമ്പോഴും പരസ്പരമവര്‍ സ്വകാര്യ സംഭാഷണം നടത്തുമ്പോഴും അതിനെപ്പറ്റി നമുക്ക് നന്നായറിയാം; അതായത് 'മാരണബാധയേറ്റ ഒരാളെ മാത്രമാണ് നിങ്ങള്‍ പിന്തുടരുന്നത്' എന്ന് അവര്‍ തട്ടിവിടുന്ന സന്ദര്‍ഭം. എന്തെല്ലാം ഉപമകളാണ് അങ്ങയെപ്പറ്റി അവര്‍ ജല്‍പിക്കുന്നതെന്ന് ഒന്നു ചിന്തിച്ചു നോക്കുക! അതുവഴി അവര്‍ മാര്‍ഗഭ്രഷ്ടരായി, നേര്‍മാര്‍ഗം പ്രാപിക്കാന്‍ തന്മൂലം അവര്‍ക്കാവില്ല²¹
അവരുടെ ചോദ്യമിതാണ്: എല്ലുകളും ജീര്‍ണാംശങ്ങളുമായിക്കഴിഞ്ഞാല്‍ പുതിയൊരു സൃഷ്ടിയായി ഞങ്ങള്‍ പുനര്‍ജീവിപ്പിക്കപ്പെടുമോ? നബീ, അങ്ങ് പറയുക: നിങ്ങള്‍ കല്ലോ ഇരുമ്പോ സ്വന്തം മനസ്സില്‍ വലുതെന്നു തോന്നുന്ന മറ്റു വല്ലതുമോ ആയിക്കോളൂ (പുനരുത്ഥാനം ഉറപ്പുതന്നെ). തത്സമയമവര്‍ ചോദിക്കും: ഞങ്ങളെയാര് ആവര്‍ത്തിച്ചു പടക്കും? 'ആദ്യവട്ടം സൃഷ്ടിച്ചവന്‍ തന്നെ' എന്നു താങ്കള്‍ പ്രതികരിക്കുക. അപ്പോഴവര്‍ തലകുലുക്കി ചോദിക്കും: എങ്കിലതുണ്ടാകുന്നത് എപ്പോള്‍? മറുപടി നല്‍കുക: അത് അടുത്തു തന്നെ - നിങ്ങളെയവന്‍ വിളിക്കുകയും അവനെ വാഴ്ത്തിക്കൊണ്ട് നിങ്ങളതിനുത്തരം നല്‍കുകയും ചെയ്യുന്ന നാള്‍ - ഉണ്ടായേക്കാം. വളരെ തുച്ഛ നേരമേ ദുന്‍യാവില്‍ താമസിച്ചിട്ടുള്ളുവെന്നു അന്നു നിങ്ങള്‍ക്കു തോന്നും²²

ഏറ്റം ഉദാത്തമായ സംസാരമേ ആകാവൂ എന്ന് താങ്കള്‍ എന്റെ അടിമകളോട് പറയുക. പിശാച് അവര്‍ക്കിടയില്‍ സ്പര്‍ദ്ധയുണ്ടാക്കുകതന്നെ ചെയ്യും. നിശ്ചയം, മാനവന്റെ പ്രത്യക്ഷ ശത്രുവാണ് പിശാച്²³
രക്ഷിതാവ് നിങ്ങളെപ്പറ്റി നന്നായറിയുന്നവനാണ്. താനുദ്ദേശിക്കുന്നുവെങ്കി ല്‍ അവന്‍ നിങ്ങള്‍ക്കു കരുണ ചൊരിയും, അല്ലെങ്കില്‍ ശിക്ഷ നല്‍കും. അവരുടെ മേല്‍നോട്ടക്കാരനാ യി അങ്ങയെ നാം നിയോഗിച്ചിട്ടില്ല. ഭുവന-വാനങ്ങളിലുള്ളവരെപ്പറ്റി താങ്കളുടെ നാഥനു നന്നായറി യാം. ചില പ്രവാചകരെ മറ്റു ചിലരെക്കാള്‍ നാം ശ്രേഷ്ഠരാക്കുക തന്നെ ചെയ്തിട്ടുണ്ട്. ദാവൂദ് ന ബിക്ക് സബൂര്‍ എന്ന വേദം നാം നല്‍കിയിരിക്കുന്നു.

നബീ, പ്രഖ്യാപിക്കുക: അല്ലാഹുവിനെ വിട്ട് ദൈവങ്ങളാണെന്ന് നിങ്ങള്‍ ജല്‍പിച്ചിരുന്നവ യെ വിളിച്ചുനോക്കൂ, നിങ്ങള്‍ക്ക് പ്രയാസങ്ങള്‍ ദൂരീകരിക്കാനോ അവസ്ഥാന്തരങ്ങള്‍ വരുത്താനോ അവക്കാവില്ല. അവരുടെ ആരാധ്യന്‍മാര്‍ - അവരില്‍ ഏറ്റം അടുപ്പമുള്ളവര്‍ തന്നെ - തങ്ങളുടെ രക്ഷിതാവിങ്കലേക്ക് സാമീപ്യമാധ്യമങ്ങള്‍ അന്വേഷിക്കുന്നവരും അവന്റെ അനുഗ്രഹം കാംക്ഷിക്കുന്നവരും ശിക്ഷ പേടിക്കുന്നവരുമാണ്. താങ്കളുടെ നാഥന്റെ ശിക്ഷ ഭയപ്പെടേണ്ടതുതന്നെ, തീര്‍ച്ച.²⁴
പുനരുത്ഥാന ദിനത്തിനുമുമ്പ് നമ്മുടെ സംഹരണത്തിനോ കഠിനശിക്ഷക്കോ വിധേയമാകാത്ത ഒരു നാടുമുണ്ടാവില്ല; ഗ്രന്ഥത്തില്‍ രേഖപ്പെടുത്തപ്പെട്ടതാണക്കാര്യം²⁵
അമാനുഷദൃഷ്ടാന്തങ്ങള്‍ പൂര്‍വികന്‍മാര്‍ നിഷേധിച്ചു എന്നതുമാത്രമാണ് വീണ്ടും അവ അയക്കുന്നതിനു നമുക്കു തടസ്സമാകുന്നത്. സമൂദ് സമുദായത്തിന് സ്പഷ്ടപ്രമാണമായി നാം ഒട്ടകം നല്‍കി; എന്നിട്ട് അവരതില്‍ അതിക്രമം കാട്ടുകയാണുണ്ടായത്. നാം ദൃഷ്ടാന്തങ്ങളയക്കുന്നത് ജനത്തെ പേടിപ്പെടുത്താന്‍ മാത്രമാണ്²⁶

നിശ്ചയം, താങ്കളുടെ നാഥന്‍ അറിവും കഴിവും കൊണ്ടു മനുഷ്യരെ വലയം ചെയ്തിട്ടുണ്ട് എന്ന് അങ്ങയോട് നാം പറഞ്ഞസന്ദര്‍ഭം സ്മരണീയമത്രേ. (വാനാരോഹണവേളയില്‍) താങ്കള്‍ക്കു നാം ഗോചരീഭവിപ്പിച്ച കാഴ്ചകളും ഖുര്‍ആനില്‍ അഭിശപ്തമായ നരകവൃക്ഷവും ജനങ്ങള്‍ക്കുള്ള ഒരു പരീക്ഷണം മാത്രമാണ്. അവരെ പേടിപ്പെടുത്തുകയാണ് നാം; പക്ഷേ, അതവര്‍ക്ക് ഗുരുതരമായ ധിക്കാരം വര്‍ധിപ്പിക്കുകയേ ചെയ്യുന്നുള്ളൂ²⁷
നിങ്ങള്‍ ആദമിനു സാഷ്ടാംഗം ചെയ്യുക എന്ന് മലക്കുകളോടു നാം പറഞ്ഞ സന്ദര്‍ഭം സ്മരണീയമത്രേ. അപ്പോള്‍ അവര്‍ സുജൂദ് ചെയ്തു; ഇബ്‌ലീസ് ഒഴികെ. നീ മണ്ണുകൊണ്ട് സൃഷ്ടിച്ചവന്ന് ഞാന്‍ സാഷ്ടാംഗം ചെയ്യുകയോ എന്ന് അവന്‍ ചോദിച്ചു. എന്നെക്കാള്‍ നീ ആദരിച്ച ഇവനുണ്ടല്ലോ, പുനരുത്ഥാനനാള്‍ വരെ എന്നെ നീ പിന്തിച്ചിട്ടുതരുന്നുവെങ്കില്‍ ഇവന്റെ മക്കളില്‍ - കുറച്ചാളുകളിലൊഴിച്ച് - ഞാന്‍ സര്‍വാധിപത്യം ചെലുത്തുക തന്നെ ചെയ്യും²⁸

അല്ലാഹു കല്‍പിച്ചു: പോകണം നീ. അവരാരെങ്കിലും നിന്നെ പിന്തുടരുന്നുവെങ്കില്‍ നിങ്ങള്‍ സകലര്‍ക്കുമുള്ള പ്രതിഫലം നരകം തന്നെയാണ്-മതിയായ കൂലി തന്നെ. നിന്റെ നാദസ്വരം കൊണ്ട് ആവുന്നവരെയൊക്കെ നീ ദുര്‍മാര്‍ഗികളാക്കുകയും നിന്റെ കുതിരപ്പടയും കാലാള്‍പടയും അവര്‍ക്കെതിരെ വിന്യസിക്കുകയും സമ്പത്ത-സന്താനങ്ങളില്‍ അവരൊന്നിച്ച് നീ പങ്കാളിയാകുകയും അവര്‍ക്ക് ബഹുവിധ വാഗ്ദാനങ്ങള്‍ നല്‍കുകയും ചെയ്യുക-പിശാച് അവര്‍ക്ക് വഞ്ചന മാത്രമേ വാഗ്ദാനം ചെയ്യൂ-എന്നാല്‍ എന്റെ സാക്ഷാല്‍ അടിമകളില്‍ യാതൊരാധിപത്യവും നിനക്കുണ്ടാകില്ല. സംരക്ഷകനായി താങ്കളുടെ നാഥന്‍ തന്നെ മതി²⁹

നിങ്ങളുടെ നാഥന്‍-അവന്റെ ഔദാര്യത്തില്‍ നിന്നു അന്വേഷിച്ചു കൊണ്ടുവരാനായി - നിങ്ങള്‍ക്കുവേണ്ടി കടലില്‍ കപ്പലോട്ടുന്നവനാണ്. അവന്‍ നിങ്ങളോട് ഏറെ കാരുണ്യമുള്ളവന്‍ തന്നെയത്രേ. സമുദ്രത്തില്‍ നിങ്ങള്‍ക്ക് അപകടം ഉണ്ടായാല്‍ അവന്നല്ലാതെ ആര്‍ക്കൊക്കെ നിങ്ങളാരാധിച്ചിരുന്നുവോ അവരത്രയും അപ്രത്യക്ഷമാകും. എന്നിട്ട് അവന്‍ രക്ഷപ്പെടുത്തി കരക്കെത്തിച്ചാല്‍ നിങ്ങള്‍ പിന്തിരിഞ്ഞുകളയുകയായി! മനുഷ്യന്‍ വല്ലാത്ത നിഷേധി തന്നെ. കരഭാഗത്തുതന്നെ അവന്‍ നിങ്ങളെ ആഴ്ത്തിക്കളയുകയോ നിങ്ങളിലേക്ക് ചരല്‍മഴ വര്‍ഷിക്കുകയോ -അപ്പോള്‍ ഒരു സഹായിയെയും നിങ്ങള്‍ക്കു ലഭിക്കില്ല-ചെയ്യില്ലെന്നു സമാധാനിച്ചിരിക്കുകയാണോ നിങ്ങള്‍? അല്ലെങ്കില്‍ ഇനിയൊരിക്കലവന്‍ നിങ്ങളെ അപകടത്തില്‍ പെടുത്തുകയോ ഒരു കൊടുങ്കാറ്റടിപ്പിച്ച് സ്വന്തം സത്യനിഷേധഫലമായി മുക്കിക്കൊല്ലുകയോ - അപ്പോള്‍ നമുക്കെതിരെ നടപടിയെടുക്കാന്‍ ആരെയും നിങ്ങള്‍ക്കു കിട്ടില്ല-ചെയ്യുകയില്ലെന്നു നിങ്ങള്‍ സമാശ്വസിച്ചിരിക്കുക യാണോ?³⁰

നിശ്ചയം നാം ആദമിന്റെ സന്തതികളെ ആദരിക്കുകയും കടലിലും കരയിലും വാഹനത്തിലേറ്റുകയും ഉദാത്തഭോജ്യങ്ങളില്‍ നിന്ന് അവര്‍ക്ക് ഉപജീവനമേകുകയും നാം പടച്ച മിക്കവരെയുംകാള്‍ അവരെ പ്രത്യേകം ശ്രേഷ്ഠരാക്കുകയും ചെയ്തിരിക്കുന്നു.³¹
എല്ലാ മനുഷ്യരെയും അവരുടെ കര്‍മരേഖയുമായി നാം വിളിച്ചുകൂട്ടുന്ന മഹ്ശര്‍ ദിനം സ്മരണീയമത്രേ. അപ്പോള്‍ ആര്‍ക്ക് കര്‍മരേഖ വലതുകൈയില്‍ നല്‍കപ്പെട്ടുവോ, അവര്‍ തങ്ങളുടെ ഗ്രന്ഥം പാരായണം ചെയ്യും; അവരോടു കടുകിട അനീതി ചെയ്യപ്പെടില്ല. ഈ ഭൗതിക ലോകത്ത് ആരെങ്കിലും സത്യത്തെവിട്ട് അന്ധനായിരുന്നാല്‍ പരലോകത്തും അവന്‍ അന്ധനും ഏറ്റം മാര്‍ഗഭ്രംശം ഭവിച്ചവനു മാകും.

നാം ദിവ്യബോധനം നല്‍കിയതില്‍ നിന്ന് താങ്കളെ വ്യതിചലിപ്പിക്കാന്‍, മറ്റെന്തെങ്കിലും താങ്കള്‍ കെട്ടിച്ചമക്കാനായി അവര്‍ ഉദ്യുക്തരാവുകയാണ്; തത്സമയം അങ്ങയെ അവര്‍ മിത്രമാക്കുകയും ചെയ്യും. നാം ദൃഢീകരണം തന്നിട്ടില്ലായിരുന്നുവെങ്കില്‍ താങ്കള്‍ അവരിലേക്ക് സ്വല്‍പമൊന്നു വ്യതിചലിച്ചേനെ! അങ്ങനെ സംഭവിച്ചിരുന്നെങ്കില്‍ ഭൗതിക ശിക്ഷയും പാരത്രിക ശിക്ഷയും താങ്കളെ ഇരട്ടിയായി നാം ആസ്വദിപ്പിക്കുമായിരുന്നു! പിന്നെ, നമുക്കെതിരെ ഒരു സഹായി യെയും താങ്കള്‍ക്കു കിട്ടുകയില്ല.³²
അങ്ങയെ മക്കയില്‍ നിന്ന് വിരട്ടിയോടിക്കാനൊരുങ്ങുകയാ ണവര്‍. താങ്കളെ അവിടെനിന്നു ബഹിഷ്‌കരിക്കുകയാണവരുടെ ഉന്നം. എങ്കില്‍, ആ ബഹിഷ്‌കര ണാനന്തരം ഹ്രസ്വസമയമേ അവരവിടെ നിവസിക്കൂ! അങ്ങയുടെ മുമ്പ് നിയുക്തരായ നമ്മുടെ ദൂതരില്‍ സംഭവിച്ച അതേ രീതി. നമ്മുടെ നടപടിക്രമത്തിന്ന് ഒരു മാറ്റവും താങ്കള്‍ക്കു കാണാനാവില്ല.³³

സൂര്യന്‍ ആകാശമദ്ധ്യത്തില്‍ നിന്ന് തെന്നിമാറുന്നതു മുതല്‍ രാത്രി ഇരുള്‍മുറ്റുന്നതുവരെ നിര്‍ണിത വേളകളില്‍ താങ്കള്‍ നമസ്‌കാരം മുറപോലെയനുഷ്ഠിക്കണം; ഖുര്‍ആനോതിയുള്ള പുലര്‍കാല നമസ്‌കാരത്തിലും നിഷ്ഠ പുലര്‍ത്തുക. പ്രഭാത നമസ്‌കാരത്തിലെ ഖുര്‍ആന്‍ പാരായണം മാലാഖമാരാല്‍ സാക്ഷ്യം വഹിക്കപ്പെടും, തീര്‍ച്ച. രാത്രിയില്‍ നിന്ന് (ഉറക്കമുണര്‍ന്ന്) അല്‍പനേരവും ഖുര്‍ആനോതി നമസ്‌കരിക്കുക; താങ്കള്‍ക്കു അധികമായുള്ള ഒരു പുണ്യകര്‍മമാണിത്. രക്ഷിതാവ് അങ്ങയെ ഒരു ശ്ലാഘനീയ പദവിയില്‍ നിയോഗിച്ചേക്കാം.³⁴
താങ്കള്‍ ഇങ്ങനെ പ്രാര്‍ത്ഥിക്കുക: നാഥാ, എന്നെ സത്യകവാടത്തിലൂടെ പ്രവേശിപ്പിക്കുകയും സത്യകവാടത്തി ലൂടെ പുറത്തുകൊണ്ടുവരികയും ചെയ്യേണമേ. ഉപോല്‍ബലകമായ ഒരധികാരശക്തി നിന്റെ പക്കല്‍ നിന്ന് എനിക്കു നിര്‍ണയിച്ചു തരികയും ചെയ്യേണമേ.³⁵
സത്യം സമാഗതമാവുകയും അസത്യം നിഷ്‌ക്രമിക്കുകയും ചെയ്തിരിക്കുന്നു, നിശ്ചയമായും നശിക്കാനുള്ളതുതന്നെയാണ് അസത്യം എന്നു താങ്കള്‍ പ്രഖ്യാപിക്കുക.³⁶

സത്യവിശ്വാസികള്‍ക്ക് ശമനവും കാരുണ്യവുമായിട്ടുള്ളതാണ് ഖുര്‍ആനിലൂടെ നാം ഇറക്കുന്നത്. എന്നാല്‍ അക്രമികള്‍ക്കത് നഷ്ടമല്ലാതെ മറ്റൊന്നും വര്‍ധിപ്പിക്കുന്നില്ല.³⁷
മനുഷ്യനു നാം അനുഗ്രഹം ചെയ്താല്‍ അവഗണിച്ചും അഹങ്കരിച്ചും കൊണ്ട് അവന്‍ പിന്തിരിഞ്ഞു കളയുന്നു; വല്ല തിന്മയും ബാധിച്ചാലോ, അവന്‍ ഹതാശനാവുകയായി. പ്രഖ്യാപിക്കുക: സര്‍വരും അവരവരുടെ രീതിയനുസരിച്ചാണു പ്രവര്‍ത്തിക്കുക. കൂടുതല്‍ സന്മാര്‍ഗപ്രാപ്തന്‍ ആരാണെന്നു താങ്കളുടെ നാഥന്‍ നന്നായി അറിയുന്നുണ്ട്.³⁸

ആത്മാവിനെക്കുറിച്ചു താങ്കളോടവര്‍ ചോദിക്കും. പ്രതികരിക്കുക: 'എന്റെ രക്ഷിതാവിന്റെ കാര്യത്തില്‍ പെട്ടതാണ് ആത്മാവ്; അല്‍പം വിജ്ഞാനം മാത്രമേ നിങ്ങള്‍ക്കു നല്‍കപ്പെട്ടിട്ടുള്ളൂ.³⁹
നാം ഉദ്ദേശിച്ചിരുന്നുവെങ്കില്‍ താങ്കള്‍ക്കു നല്‍കിയ ദിവ്യബോധനം പിന്‍വലിക്കുകതന്നെ ചെയ്യുമായിരുന്നു; പിന്നെയതില്‍ നമുക്കെതിരെ ഒരു സഹായിയെയും താങ്കള്‍ കണ്ടെത്തില്ല. താങ്കളുടെ നാഥനില്‍ നിന്നുള്ള അനുഗ്രഹം മാത്രമാണിത്. അങ്ങയുടെ മേലുള്ള അവന്റെ ഔദാര്യം അതിമഹത്തരം തന്നെ. നബീ, താങ്കള്‍ വിളംബരപ്പെടുത്തുക: ഈ ഖുര്‍ആനു തുല്യമായി മറ്റൊന്നു കൊണ്ടുവരാന്‍ മനുഷ്യരും ജിന്നുകളും ഏകോപിച്ചാല്‍ പരസ്പരം സഹായിച്ചാല്‍ പോലും അവര്‍ക്കതിന്നു സാധിക്കുന്നതേയല്ല! മാനവതക്കായി എല്ലാതരം ഉപമകളും നാം ഈ ഖുര്‍ആനില്‍ വിവരിച്ചിട്ടുണ്ട്. എന്നാല്‍ മിക്കമനുഷ്യരും നിഷേധിക്കാന്‍ മുതിരുക മാത്രമാണ് ചെയ്യുന്നത്⁴⁰

അവര്‍ ജല്‍പിച്ചു: ഭൂമിയില്‍ നിന്നു ഞങ്ങള്‍ക്ക് ഒരു ഉറവ ഒഴുക്കിത്തന്നാലേ നിന്നെ ഞങ്ങള്‍ വിശ്വസിക്കൂ. അല്ലെങ്കില്‍ നിനക്ക് ഈത്തപ്പനയുടെയും മുന്തിരിയുടെയും തോട്ടമുണ്ടാവുകയും അതിനിടയിലൂടെ സമൃദ്ധമായ അരുവികളൊഴുക്കുകയും വേണം. അല്ലെങ്കില്‍ - നീ പറയുന്ന പോലെ - ആകാശം ഞങ്ങള്‍ക്കു മീതെ ചിന്നഭിന്നമാക്കി വീഴ്ത്തുകയോ അല്ലാഹുവിനെയും മലക്കുകളെയും കൂട്ടം കൂട്ടമായി ഹാജറാക്കുകയോ നിനക്കൊരു സ്വര്‍ണത്തിന്റെ വീടുണ്ടാവുകയോ ചെയ്യണം. അതുമല്ലെങ്കില്‍ നീ വാനലോകത്തേക്ക് കയറിപ്പോകണം; എന്നാല്‍ ഞങ്ങള്‍ക്കു പാരായണം ചെയ്യാവുന്ന ഒരു ഗ്രന്ഥം അവിടന്നു ഇറക്കിക്കൊണ്ടുവരുവോളം നിന്റെ വാനാരോഹണം ഞങ്ങള്‍ വിശ്വസിക്കുകയേ ഇല്ല, തീര്‍ച്ച. നബിയേ, പ്രതികരിക്കുക: എന്റെ നാഥന്‍ മഹാ പരിശുദ്ധന്‍ തന്നെ, ദിവ്യദൂതനായ ഒരു മനുഷ്യന്‍ മാത്രമല്ലേ ഞാന്‍!⁴¹

സന്മാര്‍ഗം വന്നുകിട്ടിയപ്പോള്‍ അതു വിശ്വസിക്കുന്നതിനു മനുഷ്യര്‍ക്കു പ്രതിബന്ധമായത്, അല്ലാഹു ദൂതനായി അയച്ചിരിക്കുന്നത് ഒരു മനുഷ്യനെയാണോ എന്ന അവരുടെ ജല്‍പനം മാത്രമായിരുന്നു. നബീ, പ്രതികരിക്കുക: അടങ്ങിയൊതുങ്ങി നടക്കുന്ന മലക്കുകളാണ് ഭൂമിയിലുണ്ടായിരുന്നതെങ്കില്‍ വാനലോകത്തു നിന്ന് ഒരു മലക്കിനെത്തന്നെ അവരിലേക്ക് നാം ഇറക്കുമായിരുന്നു.⁴²
പറയുക: എനിക്കും നിങ്ങള്‍ക്കുമിടയില്‍ സാക്ഷിയായി അല്ലാഹു തന്നെ ധാരാളം! തന്റെ അടിമകളെക്കുറിച്ച് സൂക്ഷ്മമായി അറിയുന്നവനും കാണുന്നവനും തന്നെയാണ് അല്ലാഹു.

അല്ലാഹു ആരെ നേര്‍വഴിയിലാക്കുന്നുവോ അവനാണ് സന്മാര്‍ഗ പ്രാപ്തന്‍; ആരെയവന്‍ ദുര്‍മാര്‍ഗത്തിലാക്കുന്നുവോ അവര്‍ക്ക് മറ്റു സഹായികളെയൊന്നും താങ്കള്‍ക്ക് കണ്ടെത്താനാവില്ല, തീര്‍ച്ച. പുനരുത്ഥാന ദിനം മുഖം കുത്തിയവരായും അന്ധരും ഊമകളും ബധിരരുമായും അവരെ നാം ഒരുമിച്ചു കൂട്ടുന്നതാണ്. നരകമാണവരുടെ സങ്കേതം. അതണഞ്ഞുപോകുമ്പോഴൊക്കെയും നാമവര്‍ക്ക് കൂടുതല്‍ ജ്വലിപ്പിച്ചുകൊടുക്കും. അവര്‍ നമ്മുടെ ദൃഷ്ടാന്തങ്ങള്‍ തള്ളിക്കളഞ്ഞതിനും 'എല്ലുകളും ജീര്‍ണാവശിഷ്ടങ്ങളും ആയതിനു ശേഷം പുതിയൊരു സൃഷ്ടിയായി ഞങ്ങള്‍ ഉയിര്‍ത്തെഴുന്നേല്‍പിക്കപ്പെടുമോ'⁴³
അദ്ദേഹം ഇസ്രയേല്യരെ സമീപിക്കുകയും 'മൂസാ, നീ മാരണവിധേയനാണെന്നു തന്നെയാണ് ഞാന്‍ വിചാരിക്കുന്നത്' എന്നു ഫിര്‍ഔന്‍ തട്ടിവിടുകയും ചെയ്തതിനെപ്പറ്റി അവരോടു താങ്കള്‍ ചോദിച്ചു നോക്കുക. അദ്ദേഹം ഫറോവയോടു പ്രതികരിച്ചു: നിന്റെ കണ്ണു തുറപ്പിക്കുന്ന ഈ ദൃഷ്ടാന്തങ്ങള്‍ ഇറക്കിയത് ഭുവന-വാനങ്ങളുടെ നാഥന്‍ തന്നെയാണെന്നു നിനക്കു നന്നായറിയാം.
എന്നു ജല്‍പിച്ചതിനുമുള്ള പ്രതിഫലമത്രേ അത്. ഭുവന - വാനങ്ങള്‍ സൃഷ്ടിച്ച അല്ലാഹു തങ്ങളെപ്പോലുള്ളവരെയും പടക്കാന്‍ കഴിവുള്ളവനാണെന്ന് അവര്‍ ഗ്രഹിക്കുന്നില്ലേ? അവര്‍ക്കവന്‍ ഒരവധി നിര്‍ണയിച്ചിട്ടുണ്ട്; അതില്‍ സന്ദേഹമേയില്ല. എന്നാല്‍ കൃതഘ്‌നത കാട്ടുക മാത്രമാണവര്‍ ചെയ്തത്. നബീ, പറയുക: എന്റെ നാഥന്റ അനുഗ്രഹ ഖജാനകള്‍ ഉടമപ്പെടുത്തുന്നത് നിങ്ങളായിരുന്നുവെങ്കില്‍ ചെലവഴിച്ചുതീരുമെന്നു പേടിച്ച് നിങ്ങള്‍ പിശുക്കിപ്പിടിക്കുക തന്നെ ചെയ്യുമായിരുന്നു. മഹാലുബ്ധനത്രേ മനുഷ്യന്‍!⁴⁴

നിശ്ചയം മൂസാ നബിക്ക് നാം ഒമ്പത് സ്പഷ്ട ദൃഷ്ടാന്തങ്ങള്‍ നല്‍കുകയുണ്ടായി.⁴⁵
ഹേ ഫിര്‍ഔന്‍, നീ നാശമടഞ്ഞവന്‍ തന്നെ എന്നാണ് ഞാന്‍ മനസ്സിലാക്കുന്നത്. തത്സമയം, ഇസ്രയേല്യരെ നാട്ടില്‍ നിന്ന് ആട്ടിപ്പായിക്കാനാണവന്‍ ഉദ്ദേശിച്ചത്. തന്മൂലം അവനെയും കൂടെയുള്ളവരെയും ഒന്നടങ്കം നാം മുക്കിക്കൊന്നുകളഞ്ഞു. തദനന്തരം ഇസ്രയേല്യരോട് നാം ഉത്തരവിട്ടു: നിങ്ങള്‍ ഈജിപ്തില്‍ താമസിച്ചോളൂ. ഇനി, പരലോക വാഗ്ദാനം വന്നുകഴിഞ്ഞാല്‍ നിങ്ങളെയൊന്നടങ്കം കൂട്ടത്തോടെ നാം ഹാജരാക്കുന്നതാണ്.⁴⁷⁴⁶

സത്യസമേതമാണ് നാം ഖുര്‍ആന്‍ അവതരിപ്പിച്ചിട്ടുള്ളത്; അത് ഇറങ്ങിയിരിക്കുന്നതും സത്യബദ്ധമായിത്തന്നെ. ശുഭവാര്‍ത്താവാഹകനും താക്കീതുകാരനുമായി മാത്രമാണ് അങ്ങയെ നാം നിയോഗിച്ചിരിക്കുന്നത്. മനുഷ്യര്‍ക്ക് താങ്കള്‍ സാവകാശം പാരായണം ചെയ്തുകൊടുക്കാന്‍ വേണ്ടി ഖുര്‍ആനെ നാം പലഭാഗങ്ങളാക്കുകയും ക്രമേണ ഇറക്കുകയും ചെയ്തു.⁴⁸
നബീ, പ്രഖ്യാപിക്കുക: നിങ്ങള്‍ ഖുര്‍ആനില്‍ വിശ്വസിക്കുകയോ അവിശ്വസിക്കുകയോ ചെയ്യുക. ഇതിനുമുമ്പ് വേദജ്ഞാനം നല്‍കപ്പെട്ടവരാരോ, അവര്‍ക്കത് പാരായണം ചെയ്യപ്പെട്ടാല്‍ സാഷ്ടാംഗം ചെയ്തുകൊണ്ട് അവര്‍ മുഖംകുത്തി വീഴുന്നതും 'ഞങ്ങളുടെ രക്ഷിതാവ് എത്ര പരിശുദ്ധന്‍, അവന്റെ വാഗ്ദാനം പാലിക്കപ്പെടുന്നതു തന്നെ' എന്ന് പറയുന്നതുമാണ്. അവര്‍ കരഞ്ഞു മുഖംകുത്തി വീഴുകയും അതവര്‍ക്ക് വിനയം വര്‍ധിപ്പിക്കുകയും ചെയ്യും.⁴⁹

നബീ, പറയുക: നിങ്ങള്‍ അല്ലാഹു എന്നോ അര്‍റഹ്മാന്‍ എന്നോ സംബോധന ചെയ്യുക. എന്തു തന്നെ വിളിക്കുകയാണെങ്കിലും അവനുള്ളത് ഉദാത്തനാമങ്ങളാണ്⁵⁰
താങ്കളുടെ നമസ്‌കാരത്തിലെ പാരായണം അത്യുച്ചത്തിലോ തീരെപ്പതുക്കെയോ ആക്കരുത്; രണ്ടിനുമിടയിലെ മധ്യരീതി സ്വീകരിച്ചുകൊള്ളുക.⁵¹
മക്കളെ വരിക്കാത്തവനും രാജാധികാരത്തില്‍ പങ്കാളിയില്ലാത്തവനും ഹീനതയില്‍ നിന്നു രക്ഷപ്പെടുത്താന്‍ സംരക്ഷകന്‍ വേണ്ടാത്തവനുമായ അല്ലാഹുവിനു സ്‌തോത്രം എന്നു താങ്കള്‍ പറയുകയും അവനെ നല്ലവണ്ണം മഹത്ത്വവല്‍ക്കരി ക്കുകയും ചെയ്യുക.⁵²