അൽ അൻകബൂത് - العنكبوت - Al-Ankabut

അലിഫ് ലാം മീം. ഞങ്ങള്‍ സത്യവിശ്വാസികളായിരിക്കുന്നു എന്ന കേവല പ്രസ്താവം കൊണ്ട്, പരീക്ഷണ വിധേയരാകാതെ വിട്ടേക്കപ്പെടുമെന്ന് ആളുകള്‍ ധരിച്ചുവെച്ചിരിക്കകുകയാണോ! അവരുടെ പൂര്‍വികരെ നാം പരീക്ഷിച്ചു- അങ്ങനെ, സത്യനിഷ്ഠ പുലര്‍ത്തിയവരെയും വ്യാജന്മാരെയും അല്ലാഹു കണ്ടറിയുക തന്നെ ചെയ്യും. അതല്ല, നമ്മെ മറികടന്നു കളയാമെന്ന് അധര്‍മകാരികള്‍ വിചാരിക്കുകയാണോ? അവരുടെ ആ വിധി എത്ര ഹീനം.¹

അല്ലാഹുവിനെ കണ്ട് പാരത്രിക പ്രതിഫലം നേടണമെന്ന് ആരെങ്കിലും ആഗ്രഹിക്കുന്നുവെങ്കില്‍, അല്ലാഹുവിന്റെ നിര്‍ണിതാവധി സമാഗതമാകുക തന്നെ ചെയ്യും. എല്ലാം നന്നായി കേള്‍ക്കുകയും കാണുകകയും ചെയ്യുന്നവനത്രേ അവന്‍. ദൈവമാര്‍ഗത്തില്‍ ഒരാള്‍ സമരമനുഷ്ഠിക്കുന്നുവെങ്കില്‍ സ്വനന്മക്കുവേണ്ടി തന്നെയാണ് അവനത് ചെയ്യുന്നത്. നിശ്ചയം സൃഷ്ടികളില്‍ നിന്നൊക്കെ പര്യാപ്തനത്രേ അല്ലാഹു. സത്യവിശ്വാസം കൈവരിക്കുകയും സല്‍കര്‍മങ്ങളനുഷ്ഠിക്കുകയും ചെയ്തവരാരോ, അവരുടെ പാപങ്ങള്‍ നാം പൊറുക്കുക തന്നെ ചെയ്യുന്നതും ഉദാത്ത കര്‍മങ്ങള്‍ക്കുള്ള പ്രതിഫലം തീര്‍ച്ചയായും അവര്‍ക്ക് നല്‍കുന്നതുമാകുന്നു.²

മാതാപിതാക്കളോട് ഉത്തമ സമീപനം വെച്ചുപുലര്‍ത്തണമെന്ന് മനുഷ്യരോട് നാം കല്‍പിച്ചിരിക്കുന്നു. എന്നാല്‍ നിനക്കറിയാത്ത എന്തിനെയെങ്കിലും എന്നോട് പങ്കുചേര്‍ക്കണമെന്ന് നിന്നെയവര്‍ നിര്‍ബന്ധിക്കുന്നുവെങ്കില്‍ തത്സമയം അവരോട് അനുസരണമരുത്³
എന്റെയടുത്തേക്കാണ് നിങ്ങളുടെ മടക്കം. നിങ്ങളുടെ ചെയ്തികളെക്കുറിച്ച് അപ്പോള്‍ നിങ്ങള്‍ക്കു ഞാന്‍ വിവരിച്ചു തരുന്നതാണ്. സത്യവിശ്വാസം കൈക്കൊള്ളുകയും സല്‍കര്‍മങ്ങളനുഷ്ഠിക്കുകയും ചെയ്തവരാരോ, സദ്‌വൃത്തരുടെ ഗണത്തില്‍ അവരെ നാം പ്രവേശിപ്പിക്കുന്നതാകുന്നു.

ഞങ്ങള്‍ അല്ലാഹുവില്‍ വിശ്വസിച്ചിരിക്കുന്നു എന്ന് അവകാശവാദം ഉന്നയിക്കുന്ന ചില മനുഷ്യരുണ്ട്; എന്നാല്‍, ദൈവമാര്‍ഗത്തില്‍ പീഡനങ്ങള്‍ ഏല്‍ക്കേണ്ടതായി വന്നാല്‍ ആളുകളില്‍ നിന്നുണ്ടാകുന്ന മര്‍ദ്ദനം അല്ലാഹുവിന്റെ ശിക്ഷപോലെയാണവര്‍ കണക്കാക്കുക. ഇനി, താങ്കളുടെ രക്ഷിതാവിങ്കല്‍ നിന്നുള്ള എന്തെങ്കിലും സഹായം ലഭ്യമാകുമ്പോള്‍ വിശ്വാസികളോടവര്‍ പറയും: 'നിശ്ചയം, നിങ്ങളൊന്നിച്ചു തന്നെയായിരുന്നു ഞങ്ങള്‍!' ജനമനസ്സുകളിലുള്ളവ സംബന്ധിച്ച് നന്നായി കണ്ടറിയുന്നവന്‍ തന്നെയല്ലേ അല്ലാഹു? യഥാര്‍ത്ഥ വിശ്വാസികളാരാണെന്നും കാപട്യം വെച്ചുപുലര്‍ത്തുന്നവരാരാണെന്നും അവന്‍ വേര്‍തിരിച്ചറിയുക തന്നെ ചെയ്യുന്നതാണ്.⁴

നിഷേധികള്‍ വിശ്വാസികളോട് പറഞ്ഞു: 'ഞങ്ങളുടെ മതം അനുധാവനം ചെയ്യൂ, എങ്കില്‍ നിങ്ങളുടെ പാപങ്ങള്‍ ഞങ്ങള്‍ ഏറ്റെടുക്കാം.' എന്നാല്‍ അവരുടെ പാപങ്ങളില്‍ നിന്ന് ഇവര്‍ ഏറ്റെടുക്കില്ല; നുണ പറയുന്നവര്‍ തന്നെയത്രേ അവര്‍. തങ്ങളുടെ പാപഭാരങ്ങളും സ്വന്തത്തിന്റേതൊന്നിച്ച് മറ്റു പാപഭാരങ്ങളും അവര്‍ വഹിക്കേണ്ടതായി വരും, തീര്‍ച്ച. സ്വന്തമായി കെട്ടിച്ചമച്ചുകൊണ്ടിരുന്ന കൃത്രിമകാര്യങ്ങളെപ്പറ്റി പുനരുത്ഥാനനാളില്‍ അവര്‍ ചോദ്യം ചെയ്യപ്പെടുന്നതാകുന്നു.⁵

സ്വന്തം ജനതയിലേക്ക് നൂഹ് നബിയെ നാം നിയോഗിക്കുകയും തൊള്ളായിരത്തി അമ്പത് വര്‍ഷം അവര്‍ക്കിടയിലദ്ദേഹം കഴിച്ചുകൂട്ടുകയുമുണ്ടായി. അങ്ങനെ, അതിക്രമകാരികളായിരിക്കെ മഹാപ്രളയം അവരെ പിടികൂടി. അപ്പോള്‍ അദ്ദേഹത്തെയും പെട്ടകത്തിലുണ്ടായിരുന്നവരെയും നാം രക്ഷപ്പെടുത്തുകയും ആ സംഭവം ലോകര്‍ക്ക് ഒരു ദൃഷ്ടാന്തമാക്കുകയും ചെയ്തു⁶

ഇബ്‌റാഹീം നബിയെയും നാം ദൂതനാക്കി. താന്‍ സ്വജനതയെ ഇങ്ങനെ ഉദ്‌ബോധിച്ച സന്ദര്‍ഭം സ്മരണീയമത്രേ: നിങ്ങള്‍ അല്ലാഹുവിനെ ആരാധിക്കുകയും സൂക്ഷിക്കുകയും ചെയ്യുക. ബോധമുള്ളവരാണെങ്കില്‍ അതാണ് നിങ്ങള്‍ക്ക് ഉദാത്തമായിട്ടുള്ളത്. അവനെ വിട്ട് നിങ്ങള്‍ ചില ബിംബങ്ങളെ ആരാധിക്കുകയും വ്യാജം കെട്ടിച്ചമക്കുകയുമാണ്. അവനെ വിട്ട് ആരെയാണോ നിങ്ങള്‍ ആരാധിക്കുന്നത്, അവ നിങ്ങളുടെ ജീവനോപാധി സ്വായത്തമാക്കുന്നില്ല; അതുകൊണ്ട് അവങ്കല്‍ നിങ്ങള്‍ ഉപജീവനമാര്‍ഗം അന്വേഷിക്കുകയും അവനെ ആരാധിക്കുകയും അവനു നന്ദി പ്രകാശിപ്പിക്കുകയും ചെയ്യുക. നിങ്ങള്‍ മടക്കപ്പെടുക അവങ്കലേക്കാകുന്നു.⁷
ഇനി എന്നെ നിങ്ങള്‍ വ്യാജനാക്കുന്നുവെങ്കിലോ, നിങ്ങള്‍ക്ക് മുമ്പുള്ള വിവിധ ജനപഥങ്ങള്‍ ദൂതരെ തള്ളിക്കളഞ്ഞിട്ടുണ്ട്. റസൂലിന്റെ ബാധ്യത സ്പഷ്ടമായ പ്രബോധനം മാത്രമാണ്.

അല്ലാഹു സൃഷ്ടി കര്‍മം എങ്ങനെ ആരംഭിക്കുകയും പിന്നീട് എങ്ങനെ ആവര്‍ത്തിക്കുകയും ചെയ്യുന്നു എന്ന് അവര്‍ ആലോചിക്കുന്നില്ലേ? നിശ്ചയം അല്ലാഹുവിന്നത് സുഗമമത്രേ. നബീ, പ്രഖ്യാപിക്കുക: ഭൂമിയില്‍ സഞ്ചരിച്ച് അവന്‍ സൃഷ്ടികര്‍മത്തിന് എങ്ങനെ തുടക്കം കുറിച്ചു എന്ന് ചിന്തിച്ചു നോക്കൂ.ഇനി മറ്റൊരു സൃഷ്ടികര്‍മം കൂടി അവന്‍ നിര്‍വഹിക്കുന്നതാണ്. അവന്‍ സര്‍വകാര്യത്തിനും കഴിവുറ്റവന്‍ തന്നെ, തീര്‍ച്ച⁸
താനുദ്ദേശിക്കുന്നവരെ അവന്‍ ശിക്ഷിക്കുകയും ഉദ്ദേശിക്കുന്നവര്‍ക്ക് കരുണ വര്‍ഷിക്കുകയും ചെയ്യുന്നു. നിങ്ങള്‍ തിരിച്ചയക്കപ്പെടുക അവങ്കലേക്ക് തന്നെ. ഭൂമിയിലോ ആകാശത്തോ അവനെ ദുര്‍ബലനാക്കാന്‍ നിങ്ങള്‍ക്കാവില്ല. അവനല്ലാതെ ഒരു സംരക്ഷകനോ സഹായിയോ നിങ്ങള്‍ക്കില്ല. അല്ലാഹുവിന്റെ ദൃഷ്ടാന്തങ്ങളെയും അവനെ കാണുമെന്നതും നിഷേധിച്ചവര്‍ ആരോ, എന്റെ അനുഗ്രഹത്തില്‍ നിന്നവര്‍ ആശമുറിഞ്ഞവരത്രേ. അവര്‍ക്ക് തന്നെയാണ് വേദനയുറ്റ ശിക്ഷയുള്ളത്⁹

ഇവനെ വധിക്കുകയോ ചുട്ടെരിക്കുകയോ ചെയ്യുക എന്ന് മാത്രമായിരുന്നു ഇബ്‌റാഹീം നബിയുടെ ജനത്തിന്റെ പ്രതികരണം. എന്നാല്‍ അല്ലാഹു തീയില്‍ നിന്ന് അദ്ദേഹത്തിനു സുരക്ഷയേകി. സത്യവിശ്വാസം കൈക്കൊള്ളുന്നവര്‍ക്ക് തീര്‍ച്ചയായും ഇതില്‍ ദൃഷ്ടാന്തങ്ങളുണ്ട്¹⁰
ഇബ്‌റാഹീം നബി അവരോട് പറഞ്ഞു: അല്ലാഹുവിനെ കൂടാതെ ബിംബങ്ങളെ നിങ്ങള്‍ വരിച്ചിട്ടുള്ളത് ഭൗതിക ലോകത്തെ പരസ്പര സ്‌നേഹബന്ധത്തിന്റെയടിസ്ഥാനത്തിലത്രേ. ഇനി, പുനരുത്ഥാനനാളില്‍ നിങ്ങളില്‍ ചിലര്‍ മറ്റു ചിലരെ തള്ളിപ്പറയുന്നതും ശപിക്കുന്നതുമാണ്. നിങ്ങളുടെ അഭയകേന്ദ്രം നരകമായിരിക്കും; ഒരുവിധ സഹായികളും നിങ്ങള്‍ക്കുണ്ടാവില്ല. അങ്ങനെ, ലൂഥ് അദ്ദേഹത്തില്‍ വിശ്വസിച്ചു. ഇബ്‌റാഹീം നബി പ്രഖ്യാപിച്ചു: എല്ലാം വെടിഞ്ഞ് ഞാന്‍ എന്റെ നാഥങ്കലേക്ക് പോവുകയാകുന്നു; അവന്‍ പ്രതാപശാലിയും യുക്തിമാനും തന്നെയത്രേ. അദ്ദേഹത്തിനു ഇസ്ഹാഖിനെയും യഅ്ഖൂബിനെയും നാം കനിഞ്ഞേകുകയും തന്റെ സന്തതീ പരമ്പരയില്‍ പ്രവാചകത്വവും ദിവ്യഗ്രന്ഥവും നല്‍കുകയുമുണ്ടായി¹¹
ഐഹികലോകത്ത് തനിക്ക് നാം പ്രതിഫലം നല്‍കി; പരലോകത്ത് അദ്ദേഹം സജ്ജനങ്ങളുടെ ഗണത്തിലായിരിക്കുക തന്നെ ചെയ്യുന്നതുമാണ്.¹²

ലൂഥ് നബിയെയും നാം റസൂലാക്കി. സ്വജനതയെ താന്‍ ഉദ്‌ബോധിപ്പിച്ച സന്ദര്‍ഭം സ്മരണീയമത്രേ. ലോകരില്‍ നിങ്ങള്‍ക്കു മുമ്പ് ഒരു വ്യക്തി പോലും അനുവര്‍ത്തിച്ചിട്ടില്ലാത്ത നീചകൃത്യം തന്നെയാണ് നിങ്ങള്‍ ചെയ്തുകൊണ്ടിരിക്കുന്നത്- കാമപൂരണത്തിനായി ആണുങ്ങളെ സമീപിക്കുകയും യാത്രക്കാരെ കൊള്ളയടിക്കുകയും ജനസദസ്സുകളില്‍ വെച്ച് മ്ലേച്ഛവൃത്തി ചെയ്യുകയുമാണോ നിങ്ങള്‍?¹³
'നീ സത്യവാന്മാരുടെ ഗണത്തിലാണെങ്കില്‍ ഞങ്ങള്‍ക്ക് അല്ലാഹുവിന്റെ ശിക്ഷ കൊണ്ടുവാ' എന്ന് മാത്രമായിരുന്നു തന്റെ ജനത്തിന്റെ പ്രതികരണം. ലൂഥ് നബി പ്രാര്‍ത്ഥിച്ചു: എന്റെ നാഥാ, വിനാശകാരികളായ ഈ ജനത്തിനെതിരെ എന്നെ നീ സഹായിക്കേണമേ! അങ്ങനെ ഇബ്‌റാഹീം നബിയുടെയടുത്ത് നമ്മുടെ ദൂതന്മാര്‍ ശുഭവൃത്താന്തവുമായി ചെന്നപ്പോള്‍ 'ഞങ്ങള്‍ ഇന്നാട്ടുകാരെ സംഹരിക്കുകയാണ്; നിശ്ചയം, ഇവര്‍ അതിക്രമകാരികളായിരിക്കുന്നു' എന്ന് ദൂതന്മാര്‍ വ്യക്തമാക്കി¹⁴
ലൂഥ് അവിടെയുണ്ടല്ലോ എന്ന് ഇബ്‌റാഹീം നബി ഉണര്‍ത്തിയപ്പോള്‍ അവര്‍ പ്രതികരിച്ചു: അവിടെയുള്ളവരെ കുറിച്ച് ഞങ്ങള്‍ക്ക് നന്നായറിയാം. അദ്ദേഹത്തെയും കുടുംബത്തെയും-തന്റെ ഭാര്യയൊഴികെ; അവള്‍ ശിക്ഷിക്കപ്പെടുന്നവരിലാണ്- ഞങ്ങള്‍ രക്ഷപ്പെടുത്തുക തന്നെ ചെയ്യും, തീര്‍ച്ച.

നമ്മുടെ ദൂതന്മാര്‍ ലൂഥ് നബിയുടെ സമീപമെത്തിയപ്പോള്‍ അവരെ കുറിച്ച് അദ്ദേഹത്തിന് ദുഃഖവും മനഃസംഘര്‍ഷവുമുണ്ടായി. അവര്‍ വ്യക്തമാക്കി: 'താങ്കള്‍ പേടിക്കുകയോ സങ്കടപ്പെടുകയോ വേണ്ട. താങ്കളെയും കുടുംബത്തെയും -താങ്കളുടെ ഭാര്യയൊഴികെ; അവര്‍ ശിക്ഷിക്കപ്പെടുന്നവരിലാണ്-ഞങ്ങള്‍ തീര്‍ച്ചയായും സുരക്ഷിതരാക്കും. ഇന്നാട്ടുകാരില്‍-ഇവരുടെ സ്വയംകൃതാധര്‍മഫലമായി-ഞങ്ങള്‍ ആകാശത്തുനിന്ന് ശിക്ഷയിറക്കുകയാണ്'¹⁵
ചിന്തിക്കുന്ന ജനങ്ങള്‍ക്ക് സ്പഷ്ടമായ ഒരു ദൃഷ്ടാന്തം തീര്‍ച്ചയായും ഇതില്‍ നാം വിട്ടേച്ചുപോയിരിക്കുകയാണ്.¹⁶

മദ്‌യനിലേക്ക് തദ്ദേശീയരുടെ സഹോദരന്‍ ശുഐബ് നബിയെ നാം റസൂലാക്കി. അദ്ദേഹം അവരെ ഉദ്‌ബോധിപ്പിച്ചു: എന്റെ ജനമേ, നിങ്ങള്‍ അല്ലാഹുവിന് ആരാധനകളര്‍പ്പിക്കുകയും അന്ത്യനാളിനെ പ്രതീക്ഷിക്കുകയും ചെയ്യൂ; വിനാശകാരികളായിക്കൊണ്ട് നാട്ടില്‍ കുഴപ്പമുണ്ടാക്കരുത്. തദ്‌സമയം, അവരദ്ദേഹത്തെ വ്യാജനാക്കി; തന്മൂലം അവരെ ഭൂമികുലുക്കം ബാധിച്ചു. അങ്ങനെയവര്‍ സ്വഗൃഹങ്ങളില്‍ മുട്ടുകുത്തിനിന്ന് മരിച്ചവരായിത്തീര്‍ന്നു.¹⁷
ആദ്-സമൂദ് ജനപഥങ്ങളെയും നാം സംഹരിക്കുകയുണ്ടായി. അവരുടെ ആവാസഗേഹങ്ങളില്‍ നിന്ന് നിങ്ങള്‍ക്കത് സ്പഷ്ടമായി സുഗ്രാഹ്യമായതാണ്. തങ്ങളുടെ ചെയ്തികള്‍ പിശാച് അവര്‍ക്ക് അലംകൃതമായി തോന്നിക്കുകയും അങ്ങനെ ഋജുവായ പന്ഥാവില്‍ നിന്ന് അവരെയവന്‍ പ്രതിരോധിക്കുകയും ചെയ്തു. യഥാര്‍ത്ഥത്തില്‍ വസ്തുക്കള്‍ കണ്ടറിയുവാന്‍ കഴിവുറ്റവരായിരുന്നു അവര്‍;(പക്ഷെ, ചെയ്തില്ല.)¹⁸

ഖാറൂന്‍, ഫിര്‍ഔന്‍, ഹാമാന്‍ എന്നിവരെയും നാം സംഹരണവിധേയരാക്കി. സ്പഷ്ട ദൃഷ്ടാന്തങ്ങളുമായി മൂസാനബി സമീപിച്ചപ്പോള്‍ അവര്‍ അഹങ്കരിച്ചു നടക്കുകയാണ് ചെയ്തത്; നമ്മെ അതിജയിക്കുന്നവരായില്ല താനും. അങ്ങനെ ഓരോരുത്തരെയും അവരുടെ പാപങ്ങളുടെ പേരില്‍ നാം പിടികൂടി ശിക്ഷിച്ചു- ചിലരുടെ മേല്‍ ചരല്‍കാറ്റയച്ചു. ചിലരെ ഒരു ഘോരഗര്‍ജ്ജനം പിടികൂടുയകായിരുന്നു. ചിലരെ ഭൂമിയില്‍ ആഴ്ത്തി, ചിലരെ മുക്കിക്കൊന്നു. അല്ലാഹു അവരോട് അക്രമം കാട്ടുകയായിരുന്നില്ല; പ്രത്യുത, അവര്‍ സ്വന്തത്തോടു തന്നെ അക്രമം പ്രവര്‍ത്തിക്കുകയായിരുന്നു.¹⁹

അല്ലാഹുവിനെ വിട്ട് മറ്റു പല സംരക്ഷകരെയും വരിച്ചവരുടെ ഉപമ വലനെയ്ത് ഗേഹമുണ്ടാക്കിയ എട്ടുകാലിയുടേതാണ്. ഏറ്റം ദുര്‍ബലസദനം എട്ടുകാലിയുടേത് തന്നെ. അവര്‍ യാഥാര്‍ത്ഥ്യം ഗ്രഹിച്ചിരുന്നുവെങ്കില്‍...! തന്നെ വിട്ട് അവര്‍ ആരാധിക്കുന്ന ഏതൊരു വസ്തുവിനെയും അല്ലാഹു അറിയുക തന്നെ ചെയ്യുന്നുണ്ട്. പ്രതാപശാലിയും യുക്തിമാനും അവനത്രേ.²⁰
ഈ ഉപമകള്‍ മാനവര്‍ക്കുവേണ്ടി പ്രതിപാദിക്കുകയാണ് നാം. എന്നാല്‍ വിജ്ഞാനികള്‍ മാത്രമേ അവയെ പറ്റി യഥായോഗ്യം ഗ്രഹിക്കുകയുള്ളൂ. ഭുവന-വാനങ്ങള്‍ സത്യനിഷ്ഠമായാണ് അല്ലാഹു സൃഷ്ടിച്ചിരിക്കുന്നത്. സത്യവിശ്വാസികള്‍ക്ക് അതില്‍ ദൃഷ്ടാന്തമുണ്ട്, തീര്‍ച്ച²¹

നബീ, അങ്ങേക്ക് അവതീര്‍ണമായ ഈ ഖുര്‍ആന്‍ പാരായണം ചെയ്യുകയും നമസ്‌കാരം യഥായോഗ്യം നിര്‍വഹിക്കുകയും ചെയ്യുക. നീചവൃത്തികളിലും നിഷിദ്ധകര്‍മങ്ങളിലും നിന്ന് തീര്‍ച്ചയായും നമസ്‌കാരം തടയുന്നതാണ്. അല്ലാഹുവിനെ സ്മരിക്കുക എന്നത് ഏറ്റം മഹത്തായ കാര്യം തന്നെ. നിങ്ങള്‍ എന്തൊക്കെ അനുവര്‍ത്തിക്കുന്നുവോ, അതെല്ലാം അല്ലാഹു അറിയും²²
വേദക്കാരോട് ഏറ്റവും ഉദാത്തരീതിയിലേ നിങ്ങള്‍ സംവദിക്കാവൂ. അവരിലെ ധിക്കാരികളോടൊഴികെ. 'ഞങ്ങള്‍ക്കവതീര്‍ണമായതിലും നിങ്ങള്‍ക്കവതീര്‍ണമായതിലും ഞങ്ങള്‍ വിശ്വാസമര്‍പിച്ചിരിക്കുന്നു; ഞങ്ങളുടെ ദൈവവും നിങ്ങളുടെ ദൈവവും ഒരുവനത്രേ; അവനോട് വിധേയത്വമുള്ളവരാണ് ഞങ്ങള്‍' എന്ന് നിങ്ങള്‍ പ്രഖ്യാപിക്കുക.²³
അപ്രകാരം താങ്കള്‍ക്കും നാം വേദമവതരിപ്പിച്ചുതന്നു, അപ്പോള്‍ നേരത്തെ നാം വേദം നല്‍കിയവര്‍ ഖുര്‍ആന്‍ വിശ്വസിക്കുന്നു; ഈ മക്കക്കാരിലും അത് വിശ്വസിക്കുന്നവരുണ്ട്. അവിശ്വാസികള്‍ മാത്രമേ നമ്മുടെ ദൃഷ്ടാന്തങ്ങള്‍ തള്ളിക്കളയുകയുള്ളൂ.²⁴

താങ്കള്‍ ഇതിനുമുമ്പ് ഏതെങ്കിലും ഗ്രന്ഥം വായിക്കുകയോ സ്വകരം കൊണ്ട് അതെഴുതുകയോ ചെയ്തിരുന്നില്ല. അതുണ്ടായിരുന്നെങ്കില്‍ അസത്യവാദികള്‍ക്ക് സന്ദേഹിക്കാമായിരുന്നു.²⁵
എന്നാല്‍ വിജ്ഞാനികളുടെ മനസ്സുകളില്‍ സ്പഷ്ടമായ ദൃഷ്ടാന്തങ്ങളത്രേ ഖുര്‍ആന്‍. അക്രമികള്‍ മാത്രമേ നമ്മുടെ ദൃഷ്ടാന്തങ്ങളെ നിഷേധിക്കുകയുള്ളൂ. 'മുഹമ്മദിന് തന്റെ രക്ഷിതാവിങ്കല്‍ നിന്ന് ദൃഷ്ടാന്തങ്ങള്‍ അവതരിപ്പിക്കപ്പെടാത്തതെന്തു കൊണ്ട്' എന്ന് നിഷേധികള്‍ ചോദിക്കുന്നു. അങ്ങ് പ്രതികരിക്കുക: ദൃഷ്ടാന്തങ്ങള്‍ അല്ലാഹുവിങ്കല്‍ മാത്രമാണ്; ഞാനാകട്ടെ, കേവലം സ്പഷ്ടമായ ഒരു താക്കീതുകാരനാകുന്നു. ഓതിക്കേള്‍പിക്കപ്പെട്ടുകൊണ്ടിരിക്കുന്ന ഖുര്‍ആന്‍ താങ്കള്‍ക്ക് അവതീര്‍ണമായിരിക്കുന്നു എന്നത് തന്നെ ദൃഷ്ടാന്തമായി പര്യാപ്തമല്ലേ അവര്‍ക്ക്? സത്യവിശ്വാസം കൈക്കൊള്ളുന്ന ജനത്തിന് അതിലനുഗ്രഹവും ഉദ്‌ബോധനവുമുണ്ട്. നബീ, പ്രഖ്യാപിക്കുക: എനിക്കും നിങ്ങള്‍ക്കുമിടയില്‍ സാക്ഷിയായി അല്ലാഹു മതി; ഭുവന-വാനങ്ങളിലുള്ളത് അവനറിയുന്നുണ്ട്. മിഥ്യയില്‍ വിശ്വസിക്കുകയും അല്ലാഹുവിനെ അവിശ്വസിക്കുകയും ചെയ്തവര്‍ തന്നെയത്രേ പരാജിതര്‍.

ശിക്ഷയിറക്കാനായി അങ്ങയോടവര്‍ ധൃതികൂട്ടുകയാണ്. ഒരു നിശ്ചിത അവധിയില്ലായിരുന്നുവെങ്കില്‍ ഇതിനകം തന്നെ ശിക്ഷയവര്‍ക്ക് വന്നുകഴിഞ്ഞേനെ. നിനച്ചിരിക്കാത്തവിധം യാദൃച്ഛികമായി അതവര്‍ക്ക് വരിക തന്നെ ചെയ്യും. ശിക്ഷക്കായി താങ്കളോടവര്‍ ധൃതികൂട്ടുകയാണ്. നരകം അവിശ്വാസികളെ വലയം ചെയ്യുന്നതാണ്, തീര്‍ച്ച²⁶
അവരുടെ മുകളിലും കാലുകള്‍ക്കടിയിലും നിന്ന് ശിക്ഷ അവരെ ആവരണം ചെയ്യുന്ന ദിനം 'സ്വയംകൃതപ്രവര്‍ത്തനങ്ങളുടെ ഫലം നിങ്ങളാസ്വദിച്ചോളൂ' എന്ന് അല്ലാഹു അരുളും.²⁷

സത്യവിശ്വാസം കൈവരിച്ച എന്റെ അടിമകളേ, നിശ്ചയം എന്റെ ഭൂമി പ്രവിശാലമത്രേ; അതുെകൊണ്ട് എനിക്ക് മാത്രം നിങ്ങള്‍ ആരാധനകളര്‍പിക്കുക. ഏതൊരു ശരീരവും മരണം രുചിച്ചുനോക്കും; അനന്തരം നമ്മുടെയടുത്തേക്കാണ് നിങ്ങള്‍ മടക്കപ്പെടുക. സത്യവിശ്വാസം വരിക്കുകയും ഉദാത്തകര്‍മങ്ങള്‍ അനുവര്‍ത്തിക്കുകയും ചെയ്തവര്‍ ആരോ, അവര്‍ക്ക് അടിയിലൂടെ അരുവികള്‍ പ്രവഹിക്കുന്ന സമുന്നത സ്വര്‍ഗസൗധങ്ങളില്‍ നാം നിവാസസൗകര്യമേര്‍പെടുത്തുന്നതും അവിടെയവര്‍ ശാശ്വതരായിരിക്കുന്നതുമാണ്. കര്‍മങ്ങളനുഷ്ഠിക്കുന്നവരുടെ പ്രതിഫലം എത്ര ഉദാത്തം! ക്ഷമ കൈക്കൊള്ളുകയും നാഥനില്‍ തങ്ങളുടെ കാര്യങ്ങള്‍ ഭരമേല്‍പിക്കുകയും ചെയ്യുന്നവരത്രേ അവര്‍.²⁸

എത്രയെത്ര ജീവജാലങ്ങളാണുള്ളത്! അവയൊന്നും സ്വന്തം ആഹാരവും പേറിയല്ല കഴിയുന്നത്. അവര്‍ക്കും നിങ്ങള്‍ക്കും ഭക്ഷണം നല്‍കുന്നത് അല്ലാഹുവത്രേ. എല്ലാം കേള്‍ക്കുകയും അറിയുകയും ചെയ്യുന്നവനാണ് അവന്‍.²⁹
ഭുവന-വാനങ്ങള്‍ പടക്കുകയും സൂര്യ-ചന്ദ്രന്മാരെ അധീനപ്പെടുത്തുകയും ചെയ്തത് ആരാണെന്ന് ബഹുദൈവ വിശ്വാസികളോട് ചോദിച്ചാല്‍ അല്ലാഹുവാണെന്ന് അവര്‍ മറുപടി തരും, തീര്‍ച്ച. പിന്നെ എങ്ങനെയാണവര്‍ വ്യതിചലിപ്പിക്കപ്പെടുന്നത്? തന്റെ അടിമകളില്‍ താനുദ്ദേശിക്കുന്നവര്‍ക്ക് ജീവനോപാധികള്‍ പ്രവിശാലമാക്കുന്നതും താനുദ്ദേശിക്കുന്ന മറ്റു ചിലര്‍ക്കത് സങ്കുചിതമാക്കുന്നതും അല്ലാഹുവാകുന്നു. ഏതൊന്നിനെക്കുറിച്ചും സൂക്ഷ്മജ്ഞനത്രേ അവന്‍³⁰

അന്തരീക്ഷത്തില്‍ നിന്ന് ജലം വര്‍ഷിക്കുന്നതും അചേതനമായിരുന്നതില്‍ പിന്നെ ഭൂമിയെ സചേതനമാക്കുന്നതും ആരാണെന്ന് താങ്കള്‍ ചോദിച്ചാല്‍ അല്ലാഹുവാണെന്ന് അവര്‍ മറുപടി തരും, തീര്‍ച്ച. പറയുക: 'സര്‍വ സ്‌തോത്രവും അല്ലാഹുവിന്നാകുന്നു'. പക്ഷേ, അവരില്‍ മിക്കവരും യാഥാര്‍ത്ഥ്യം മനസ്സിലാക്കുന്നില്ല³¹
ഈ ഭൗതികലോകത്തെ ജീവിതം കളിതമാശകള്‍ മാത്രമാകുന്നു; പരലോകത്തുള്ളതുതന്നെയാണ് സാക്ഷാല്‍ ജീവിതം, തീര്‍ച്ച! അവര്‍ ഈ വസ്തുത ഗ്രഹിച്ചിരുന്നുവെങ്കില്‍! ജലയാനങ്ങളില്‍ കയറിയാല്‍ നിഷ്‌കളങ്കരായി വിധേയത്വമുള്ളവരായി അല്ലാഹുവിനോടവര്‍ പ്രാര്‍ത്ഥിക്കും; അവനവരെ കരയിലേക്ക് രക്ഷപ്പെടുത്തുമ്പോഴോ, അവരതാ അവനു പങ്കുകാരെ വരിക്കുന്നു!³²
ശരി, നാം നല്‍കിയ അനുഗ്രഹങ്ങള്‍ക്ക് ഇങ്ങനെയവര്‍ നന്ദികേട് കാട്ടുകയും സുഖമനുഭവിക്കുകയും ചെയ്യട്ടെ; അതിന്റെ തിക്തഫലം പിന്നീടവര്‍ അറിഞ്ഞുകൊള്ളും!

അവര്‍ക്ക് നിര്‍ഭയത്വമുള്ള ഒരു പവിത്ര സങ്കേതം നാം നിര്‍ണയിച്ചുകൊടുത്തതവര്‍ കാണുന്നില്ലേ? പരിസര പ്രദേശക്കാര്‍ റാഞ്ചിയെടുക്കപ്പെടുന്ന സന്ദര്‍ഭത്തിലാണുതാനും ഇത്. എന്നിട്ടുമവര്‍ മിഥ്യയില്‍ വിശ്വസിച്ച് അല്ലാഹുവിന്റെ അനുഗ്രഹങ്ങള്‍ക്ക് കൃതഘ്‌നത കാട്ടുകയാണോ?³³
അല്ലാഹുവിനെ കുറിച്ച് വ്യാജം കെട്ടിച്ചമക്കുകയും സത്യം വന്നെത്തിയിട്ടും അത് നിഷേധിച്ച് തള്ളുകയും ചെയ്തവനേക്കാള്‍ വലിയ അക്രമിയായി ആരുണ്ട്? സത്യം നിഷേധിക്കുന്നവര്‍ക്ക് നരകത്തില്‍ വാസസ്ഥലം ഇല്ലേ? നമ്മുടെ പന്ഥാവില്‍ ധര്‍മസമരമനുഷ്ഠിക്കുന്നവര്‍ക്ക് നാം നിശ്ചയം, നേര്‍മാര്‍ഗം കാണിച്ചുകൊടുക്കുക തന്നെ ചെയ്യുന്നതാണ്. പുണ്യമനുവര്‍ത്തിക്കുന്നവരോടൊപ്പം തന്നെയാണ് അല്ലാഹു, തീര്‍ച്ച³⁴