29–35
അങ്ങനെ മൂസാനബി നിശ്ചിതാവധി പൂര്‍ത്തീകരിക്കുകയും കുടുംബവുമൊത്ത് യാത്രയാവുകയും ചെയ്തപ്പോള്‍ സീനാമലയുടെ പാര്‍ശ്വത്തുനിന്ന് ഒരു അഗ്നി കണ്ടു. താന്‍ കുടുംബത്തോട് പറഞ്ഞു. 'നിങ്ങളിവിടെ നില്‍ക്കൂ. ഞാനൊരു തീ കണ്ടിരിക്കുന്നു; അവിടെ നിന്ന് എന്തെങ്കിലും വിവരമോ ഒരു തീക്കൊള്ളിയോ ഞാന്‍ കൊണ്ടുവന്നു തന്നേക്കാം, നിങ്ങള്‍ക്ക് തീക്കായാമല്ലോ'14
അങ്ങനെ അദ്ദേഹം അതിനു സമീപമെത്തിയപ്പോള്‍ അനുഗൃഹീത പ്രദേശത്തെ താഴ്‌വരയുടെ വലതുഭാഗത്തെ ഒരു മരത്തില്‍ നിന്ന് അശരീരി വിളിച്ചു. 'ഓ മൂസാ, നിശ്ചയം, പ്രപഞ്ച പരിപാലകനായ അല്ലാഹുവാണ് ഞാന്‍. നിങ്ങളുടെ വടി താഴെയിടുക!' എന്നിട്ട് ഒരു സര്‍പ്പം കണക്കെ അത് ഇഴയുന്നത് കണ്ടപ്പോള്‍ അദ്ദേഹം പിന്തിരിഞ്ഞോടി; തിരിഞ്ഞു നോക്കിയതേയില്ല! അല്ലാഹു നിര്‍ദ്ദേശിച്ചു. ഓ മൂസാ, മുന്നോട്ടു വരൂ, ഭയപ്പെടുകയേ വേണ്ട; നിശ്ചയം, നിങ്ങള്‍ സുരക്ഷിതനാകുന്നു. നിങ്ങളുടെ കൈ കുപ്പായമാറിലേക്കിടൂ, ഒരു വിധ ദൂഷ്യവുമില്ലാതെ ശുഭ്രമായി അതു പുറത്തുവരും15
ആശങ്കയുണ്ടായാല്‍ പാര്‍ശ്വഭാഗം ശരീരത്തോട് ചേര്‍ത്തുപിടിക്കുക. ഈ രണ്ടു ദൃഷ്ടാന്തങ്ങളും ഫിര്‍ഔന്നും അവന്റെ ശിങ്കിടികള്‍ക്കുമുള്ള, നിങ്ങളുടെ നാഥന്റെ പ്രമാണങ്ങളാണ്. നിശ്ചയം അവര്‍ ധിക്കാരികളായ ഒരു കൂട്ടരായിക്കഴിഞ്ഞിരിക്കുന്നു16
അദ്ദേഹം ബോധിപ്പിച്ചു. നാഥാ, അവരിലൊരു വ്യക്തിയെ ഞാന്‍ വധിച്ചുകളഞ്ഞിരിക്കയാല്‍ അവരെന്നെ കൊല്ലുമെന്ന് ഞാന്‍ ഭയപ്പെടുന്നുണ്ട്. എന്നെക്കാള്‍ സ്പഷ്ടമായ സംസാരവൈഭവമുള്ളയാളാണ് എന്റെ സഹോദരന്‍ ഹാറൂന്‍. അതുകൊണ്ട് എന്നെ പിന്തുണക്കുന്ന സഹായിയായി അദ്ദേഹത്തെ ഞാനൊന്നിച്ച് നിയോഗിക്കേണമേ. അവരെന്നെ വ്യാജനാക്കിത്തള്ളുമെന്ന് നിശ്ചയം ഞാന്‍ ഭയപ്പെടുന്നു17
അല്ലാഹു പ്രതികരിച്ചു. സ്വസഹോദരന്‍ വഴി നിങ്ങള്‍ക്ക് നാം പിന്‍ബലമേകുകയും ഒരു അജയ്യശേഷി നിങ്ങളിരുവര്‍ക്കും നാം തരികയും ചെയ്യും; അപ്പോള്‍ നിങ്ങളെ പ്രാപിക്കാന്‍ അവര്‍ക്കാകില്ല. നമ്മുടെ ദൃഷ്ടാന്തങ്ങള്‍ മുഖേന നിങ്ങളിരുവരും അനുധാവകരും തന്നെയാകും ജേതാക്കള്‍!18
5 വിശദീകരണങ്ങൾ കാണുക
14. മൂസാനബി(അ) പത്തുവര്‍ഷം തന്നെ ശുഐബ് നബിയൊന്നിച്ചു താമസിച്ചു എന്നാണ് മിക്ക മുഫസ്സിറുകളും രേഖപ്പെടുത്തുന്നത്. പിന്നീടദ്ദേഹം കുടുംബസമേതം സ്വന്തം നാടായ ഈജിപ്തിലേക്ക് പുറപ്പെട്ടു. സീനാ പര്‍വതനിരകള്‍ക്കു സമീപത്തുകൂടിയായിരുന്നു യാത്ര. ഇടക്ക് അവര്‍ക്ക് വഴിതെറ്റി. കഠിന ശൈത്യവുമുണ്ട്. അപ്പോഴാണ് വലതുഭാഗത്ത് ഒരു മലയില്‍ നിന്ന് തീ കാണുന്നത്.
15. മൂസാനബി(അ)യെ തന്റെ റസൂലായി നിയോഗിക്കാന്‍ പോവുകയാണ് അല്ലാഹു. പ്രഥമവും പ്രധാനവുമായ ദൗത്യം ഫറോവയെ അഭിമുഖീകരിക്കലാണ്. അതിന്നാവശ്യമായ പരിശീലനങ്ങളും മുഅ്ജിസത്തുകളും പരിചയപ്പെടുത്തേണ്ടത് അനിവാര്യമാണല്ലോ. തന്റെ കൈയിലുള്ള വടി നിലത്തിട്ടാല്‍ വന്‍സര്‍പ്പമായി മാറുക, സ്വകരം കുപ്പായമാറിനകത്തിട്ട് പുറത്തെടുത്താല്‍ ചന്ദ്രബിംബം പോലെ പ്രകാശിക്കുക എന്നിവയാണ് രണ്ട് മുഅ്ജിസത്തുകള്‍.
16. തിളങ്ങുന്ന കൈ പൂര്‍വസ്ഥിതിയിലാകാന്‍ മാത്രമല്ല, ഏതുവിധ ഭയം പിടികൂടുമ്പോഴും കൈ ഉള്ളിലേക്കിട്ട് പുറത്തെടുത്താല്‍ ഭയപ്പാടുകള്‍ നീങ്ങും; തിളങ്ങുന്ന കൈ പൂര്‍വസ്ഥിതിയിലാവുകയും ചെയ്യും.
17. സഹോദരന്‍ ഹാറൂന്‍ നബി(അ)യെക്കൂടി താനൊന്നിച്ച് റസൂലാക്കുന്നതിന് രണ്ട് കാരണങ്ങളാണ് മൂസാനബി(അ) പറയുന്നത്-ഒന്ന്, താന്‍ ഖിബ്ഥിയെ കൊന്നതുകൊണ്ട് അവരെന്നെ വധിക്കും. രണ്ട്, എനിക്ക് സംസാര വൈഭവമോ വിഷയാവതരണ നൈപുണ്യമോ ഇല്ല; ഹാറൂന്‍ നബിക്ക് അതുണ്ട്. അപേക്ഷിച്ചതനുസരിച്ച് സ്വസഹോദരനെയും അല്ലാഹു റസൂലാക്കി.
18. ഞാന്‍ നിങ്ങള്‍ക്ക് സവിശേഷമായ ദിവ്യശേഷി നല്‍കുന്നതുകൊണ്ട് ഒട്ടും ഭയപ്പെടേണ്ടതില്ലെന്നും വിജയം നിങ്ങള്‍ക്കും സത്യവിശ്വാസികള്‍ക്കുമായിരിക്കുമെന്നും അല്ലാഹു ഉറപ്പുകൊടുക്കുകയാണ്. കാര്യങ്ങള്‍ അങ്ങനെത്തന്നെയാണല്ലോ കലാശിച്ചത്.
۞ فَلَمَّا قَضَىٰ مُوسَى ٱلۡأَجَلَ وَسَارَ بِأَهۡلِهِۦٓ ءَانَسَ مِن جَانِبِ ٱلطُّورِ نَارٗاۖ قَالَ لِأَهۡلِهِ ٱمۡكُثُوٓاْ إِنِّيٓ ءَانَسۡتُ نَارٗا لَّعَلِّيٓ ءَاتِيكُم مِّنۡهَا بِخَبَرٍ أَوۡ جَذۡوَةٖ مِّنَ ٱلنَّارِ لَعَلَّكُمۡ تَصۡطَلُونَ ٢٩
فَلَمَّآ أَتَىٰهَا نُودِيَ مِن شَٰطِيِٕ ٱلۡوَادِ ٱلۡأَيۡمَنِ فِي ٱلۡبُقۡعَةِ ٱلۡمُبَٰرَكَةِ مِنَ ٱلشَّجَرَةِ أَن يَٰمُوسَىٰٓ إِنِّيٓ أَنَا ٱللَّهُ رَبُّ ٱلۡعَٰلَمِينَ ٣٠
وَأَنۡ أَلۡقِ عَصَاكَۚ فَلَمَّا رَءَاهَا تَهۡتَزُّ كَأَنَّهَا جَآنّٞ وَلَّىٰ مُدۡبِرٗا وَلَمۡ يُعَقِّبۡۚ يَٰمُوسَىٰٓ أَقۡبِلۡ وَلَا تَخَفۡۖ إِنَّكَ مِنَ ٱلۡأٓمِنِينَ ٣١
ٱسۡلُكۡ يَدَكَ فِي جَيۡبِكَ تَخۡرُجۡ بَيۡضَآءَ مِنۡ غَيۡرِ سُوٓءٖ وَٱضۡمُمۡ إِلَيۡكَ جَنَاحَكَ مِنَ ٱلرَّهۡبِۖ فَذَٰنِكَ بُرۡهَٰنَانِ مِن رَّبِّكَ إِلَىٰ فِرۡعَوۡنَ وَمَلَإِيْهِۦٓۚ إِنَّهُمۡ كَانُواْ قَوۡمٗا فَٰسِقِينَ ٣٢
قَالَ رَبِّ إِنِّي قَتَلۡتُ مِنۡهُمۡ نَفۡسٗا فَأَخَافُ أَن يَقۡتُلُونِ ٣٣
وَأَخِي هَٰرُونُ هُوَ أَفۡصَحُ مِنِّي لِسَانٗا فَأَرۡسِلۡهُ مَعِيَ رِدۡءٗا يُصَدِّقُنِيٓۖ إِنِّيٓ أَخَافُ أَن يُكَذِّبُونِ ٣٤
قَالَ سَنَشُدُّ عَضُدَكَ بِأَخِيكَ وَنَجۡعَلُ لَكُمَا سُلۡطَٰنٗا فَلَا يَصِلُونَ إِلَيۡكُمَا بِـَٔايَٰتِنَآۚ أَنتُمَا وَمَنِ ٱتَّبَعَكُمَا ٱلۡغَٰلِبُونَ ٣٥
