അന്നംൽ - النمل - An-Naml

ഥാ, സീന്‍. ഖുര്‍ആനിലെ, അതായത് വിഷയങ്ങള്‍ വ്യക്തമാക്കുന്ന വേദത്തിലെ വാക്യങ്ങളത്രേ ഇവ. നമസ്‌കാരം യഥായോഗ്യം നിര്‍വഹിക്കുകയും സകാത്ത് കൊടുക്കുകയും പാരത്രിക ജീവിതത്തില്‍ ദൃഢവിശ്വാസം വെച്ചുപുലര്‍ത്തുകയും ചെയ്യുന്ന സത്യവിശ്വാസികള്‍ക്ക് മാര്‍ഗദര്‍ശനവും ശുഭവാര്‍ത്തയുമത്രേ ഇത്¹

പരലോകത്തില്‍ വിശ്വാസമില്ലാത്തവര്‍ക്ക് അവരുടെ കര്‍മങ്ങള്‍ നാം അലംകൃതമാക്കിയിരിക്കയാണ്; അതില്‍ അഭിരമിക്കുകയാണവര്‍. ഹീനശിക്ഷയുള്ളവര്‍ അവരാണ്. പരലോകത്ത് ഏറ്റം നഷ്ടപ്പെട്ടവരും അവര്‍ തന്നെ. നബീ, യുക്തിമാനും സര്‍വജ്ഞനുമായവന്റെയടുത്ത് നിന്നാണ് താങ്കള്‍ക്ക് ഈ ഖുര്‍ആന്‍ അവതരിപ്പിക്കപ്പെടുന്നത്.²

മൂസാ നബി സ്വകുടുംബത്തോടു പറഞ്ഞ സന്ദര്‍ഭം സ്മരണീയമത്രേ: 'ഞാനൊരു അഗ്നി കണ്ടു; അതിനടുത്തു നിന്ന് എന്തെങ്കിലും വിവരമോ തീ കായാനായി അതില്‍ നിന്ന് കത്തിച്ചെടുത്ത ഒരു തീനാളമോ നിങ്ങള്‍ക്കു ഞാന്‍ കൊണ്ടുവരാം.' അങ്ങനെ താനതിനു സമീപമെത്തിയപ്പോള്‍ ഇങ്ങനെ അശരീരിയുണ്ടായി: അഗ്നിക്കടുത്തും പരിസരത്തുമുള്ളവര്‍ അനുഗൃഹീതരാവട്ടെ! പ്രപഞ്ചനാഥനായ അല്ലാഹു പരിശുദ്ധനാകുന്നു. ഓ മൂസാ, പ്രതാപശാലിയും യുക്തിമാനുമായ അല്ലാഹുവാണു ഞാന്‍.³

'താങ്കളുടെ വടി താഴെയിടുക!' തത്സമയമത് ഒരു പാമ്പിനെപ്പോലെ ദ്രുതസഞ്ചാരം നടത്തുന്നതു കണ്ടപ്പോള്‍ അദ്ദേഹം തിരിഞ്ഞുനോക്കാതെ പിന്നോട്ടോടി. അല്ലാഹു പറഞ്ഞു: ഹേ മൂസാ, പേടിക്കേണ്ട; ദൂതന്മാര്‍ എന്റെ സമീപത്ത് ഭയപ്പെടുകയേ വേണ്ടതില്ല. എന്നാല്‍, ആരെങ്കിലും അതിക്രമം ചെയ്യുകയും തിന്മക്കു പകരം പിറകെ നന്മയനുവര്‍ത്തിക്കുകയും ചെയ്യുന്നുവെങ്കില്‍ ഞാന്‍ ഏറെ പൊറുക്കുന്നവനും കരുണ ചൊരിയുന്നവനുമാകുന്നു.⁴

താങ്കള്‍ കുപ്പായമാറിലൂടെ കൈ പ്രവേശിപ്പിക്കുക! യാതൊരു ദൂഷ്യവുമില്ലാതെ വെളുത്തതായി അതു പുറത്തുവരും. ഫറോവക്കും അവന്റെയാളുകളിലേക്കുമുള്ള ഒമ്പതു ദൃഷ്ടാന്തങ്ങളില്‍ പെട്ടതാണിവ. അധര്‍മകാരികളായ ജനതയായിക്കഴിഞ്ഞിരിക്കയാണവര്‍.⁵

അങ്ങനെ ചിന്തോദ്ദീപകമായി നമ്മുടെ ദൃഷ്ടാന്തങ്ങള്‍ വന്നെത്തിയപ്പോള്‍, ഇത് സ്പഷ്ടമായ മാരണവിദ്യയാകുന്നു എന്ന് അവര്‍ ജല്‍പിച്ചു. സ്വമനസ്സാലെ ദൃഢമായി ബോധ്യപ്പെട്ടിട്ടും അതിക്രമവും അഹന്തയും നിമിത്തം അവരത് നിഷേധിച്ചുതളളി. ആ നാശകാരികളുടെ ഭവിഷ്യത്ത് എങ്ങനെയായിരുന്നു എന്ന് താങ്കള്‍ ചിന്തിച്ചുനോക്കൂ!⁶

ദാവൂദ് നബിക്കും സുലൈമാന്‍ നബിക്കും നാം വിജ്ഞാനം കനിഞ്ഞേകുകയുണ്ടായി. തന്റെ സത്യവിശ്വാസികളായ അടിമകളില്‍ മിക്കവരെക്കാളും ഞങ്ങളെ ശ്രേഷ്ഠരാക്കിയ അല്ലാഹുവിനാണ് സര്‍വ സ്തുതിയും എന്ന് അവര്‍ പറഞ്ഞു.⁷
ദാവൂദ് നബിയുടെ അനന്തരാവകാശിയായി സുലൈമാന്‍ നബി വരികയുണ്ടായി. താന്‍ പ്രസ്താവിച്ചു:⁸
ജനങ്ങളേ, നമുക്ക് പക്ഷികളുടെ ഭാഷ അഭ്യസിപ്പിക്കപ്പെടുകയും സര്‍വ അനുഗ്രഹവും നല്‍കപ്പെടുകയും ചെയ്തിരിക്കുന്നു. സ്പഷ്ടമായ ദിവ്യാനുഗ്രഹം തന്നെയത്രേ ഇത്.

സുലൈമാന്‍ നബിക്ക് ജിന്നിലും മനുഷ്യരിലും പക്ഷികളിലും നിന്നുള്ള സൈന്യങ്ങള്‍ സംഗമിപ്പിക്കപ്പെടുകയും ക്രമീകൃതമായി നിറുത്തപ്പെടുകയുമുണ്ടായി. അങ്ങനെയവര്‍ ഉറുമ്പുകളുടെ താഴ്‌വരയിലെത്തിയപ്പോള്‍ ഒരു ഉറുമ്പ് വിളിച്ചുപറഞ്ഞു: 'ഹേ ഉറുമ്പുകളേ, നിങ്ങള്‍ സ്വഗേഹങ്ങളില്‍ കടന്നുകൊള്ളൂ! തങ്ങളറിയാത്തവിധം, സുലൈമാന്‍ നബിയും സേനയും നിങ്ങളെ ചവിട്ടിയരക്കാതിരിക്കട്ടെ!' തത്സമയം അതിന്റെ പ്രസ്താവം കേട്ട് അദ്ദേഹം മന്ദസ്മിതംതൂകിച്ചിരിച്ചു, ഇങ്ങനെ പറഞ്ഞു: നാഥാ, എനിക്കും മാതാപിതാക്കള്‍ക്കും നീ കനിഞ്ഞേകിയ അനുഗ്രഹങ്ങള്‍ക്ക് നന്ദി പ്രകാശിപ്പിക്കാനും നിന്റെ സംതൃപ്തിക്കു പാത്രീഭൂതമാകുന്ന സല്‍കര്‍മങ്ങളനുഷ്ഠിക്കാനും എനിക്കവസരം നല്‍കേണമേ. നിന്റെ സദ്‌വൃത്തരായ അടിമകളിലുള്‍പ്പെടുത്തി എന്നെ അനുഗ്രഹിക്കേണമേ.⁹

അദ്ദേഹം പക്ഷിവിഭാഗത്തെ നിരീക്ഷിച്ചു. എന്നിട്ടുപറഞ്ഞു: എന്തുപറ്റി, മരംകൊത്തിയെ കാണുന്നില്ലല്ലോ? അതോ, അവന്‍ അപ്രത്യക്ഷനായോ? ഈ വീഴ്ചക്കു കാരണമായി സ്പഷ്ടമായ തെളിവു കൊണ്ടുവന്നില്ലെങ്കില്‍ അവനെ ഞാന്‍ കഠിനമായി ശിക്ഷിക്കുകയോ അറുത്തുകളയുക തന്നെയോ ചെയ്യും, തീര്‍ച്ച!¹⁰

എന്നാല്‍, ഏറെ വൈകാതെ മരംകൊത്തി സന്നിഹിതനായി; അത് പറഞ്ഞു: താങ്കള്‍ക്കു പരിജ്ഞാനമില്ലാത്ത ഒരു വിഷയം ഞാന്‍ സൂക്ഷ്മമായി ഗ്രഹിക്കുകയുണ്ടായി. ഷീബാ സാമ്രാജ്യത്തില്‍ നിന്ന് ഒരു നിജവൃത്താന്തവുമായാണ് ഞാന്‍ അങ്ങയുടെയടുത്ത് വന്നെത്തിയിട്ടുള്ളത്. ഒരു വനിത അവരെ ഭരിക്കുന്നതായി ഞാന്‍ കണ്ടു. സര്‍വ കഴിവുകളും അവര്‍ക്ക് നല്‍കപ്പെട്ടിരിക്കുന്നു; ഒരു ഗംഭീര സിംഹാസനവും അവള്‍ക്കുണ്ട്.¹¹
അവളും സ്വജനതയും അല്ലാഹുവിനെ വിട്ട് സൂര്യപ്രണാമം നടത്തുന്നവരായാണ് ഞാന്‍ കണ്ടത്. തങ്ങളുടെ നടപടികള്‍ പിശാച് അവര്‍ക്ക് അലംകൃതമാക്കിക്കൊടുക്കുകയും സന്മാര്‍ഗത്തില്‍ നിന്ന് അവരെയവന്‍ പ്രതിരോധിക്കുകയും ചെയ്തിരിക്കുന്നു. തന്മൂലം ഋജുവായ പന്ഥാവ് കണ്ടെത്തുവാന്‍ അവര്‍ക്കാകുന്നില്ല. ഭുവന-വാനങ്ങളില്‍ ഒളിഞ്ഞുകിടക്കുന്നവ പുറത്തുകൊണ്ടുവരികയും നിങ്ങളുടെ രഹസ്യ-പരസ്യങ്ങള്‍ അറിയുകയും ചെയ്യുന്ന അല്ലാഹുവിന്ന് അവര്‍ സാഷ്ടാംഗം ചെയ്യാതിരിക്കുന്നതെന്ത്? മഹത്തായ 'അര്‍ശി'ന്റെ അധിപനായ അല്ലാഹുവല്ലാതെ മറ്റൊരു ആരാധ്യനുമില്ല.¹²

സുലൈമാന്‍ നബി പ്രതികരിച്ചു: നീ നേരാണോ പറഞ്ഞത്, അതോ നുണയന്മാരില്‍ ഉള്‍പ്പെട്ടുവോ എന്നു നാം പരിശോധിച്ചു നോക്കുന്നതാണ്. എന്റെ ഈ കത്ത് കൊണ്ടുപോയി അവര്‍ക്കു നീ ഇട്ടുകൊടുക്കുക; ശേഷം മാറിനിന്ന് എന്താണവരുടെ പ്രതികരണം എന്നു നിരീക്ഷിക്കുക.

റാണി പറഞ്ഞു: ഹേ വരിഷ്ഠരേ, എനിക്കിതാ മാന്യമായ ഒരു കത്ത് ലഭിച്ചിരിക്കുന്നു.¹³
സുലൈമാന്‍ നബിയുടേതാണത്; ഉള്ളടക്കമിതാണ്: പരമദയാലുവും കരുണാമയനുമായ അല്ലാഹുവിന്റെ നാമത്തില്‍; എനിക്കെതിരെ നിങ്ങള്‍ അഹങ്കാരപ്രകടനം നടത്തേണ്ട, കീഴൊതുങ്ങിക്കൊണ്ട് എന്റെ സന്നിധിയിലേക്കു വരിക!

റാണി അരുളി: ഹേ പ്രമുഖരേ, ഇവ്വിഷയത്തില്‍ എനിക്ക് നിങ്ങളുടെ നിര്‍ദേശങ്ങള്‍ സമര്‍പ്പിക്കൂ. നിങ്ങളില്ലാതെ ഒരു കാര്യത്തിലും ഞാന്‍ ഖണ്ഡിത തീരുമാനം എടുക്കാറില്ലല്ലോ. അവര്‍ പ്രതികരിച്ചു: ശക്തിയും തീവ്ര സമരശേഷിയുമുള്ളവരാണ് നാം. ആധിപത്യം ഭവതിയുടെ കരങ്ങളിലായതുകൊണ്ട് സുചിന്തിതമായി തീരുമാനം കണ്ടാലും!¹⁴

റാണി പ്രസ്താവിച്ചു: രാജാക്കന്മാര്‍ ഒരു നാട്ടില്‍ കടന്നുകയറ്റം നടത്തിയാല്‍ ആ പ്രദേശമവര്‍ സംഹരിച്ചു കളയുകയും അവിടത്തെ പ്രതാപശാലികളെ നിസ്സാരരാക്കുകയും ചെയ്യും. ഇവിടെയും അതു തന്നെയാണവര്‍ അനുവര്‍ത്തിക്കുക. ഞാനവര്‍ക്കൊരു പാരിതോഷികം കൊടുത്തയക്കുകയാണ്; എന്നിട്ട് എന്തു പ്രതികരണവുമായാണ് ദൂതര്‍ വരുന്നതെന്നു നോക്കട്ടെ.¹⁵

അങ്ങനെ ദൂതന്‍ സുലൈമാന്‍ നബിയുടെയടുത്തെത്തിയപ്പോള്‍ അദ്ദേഹം ചോദിച്ചു: നിങ്ങളെനിക്കു ധനം തന്ന് സഹായിക്കുകയാണോ? എന്നാല്‍ എനിക്ക് അല്ലാഹു കനിഞ്ഞേകിയതാണ് നിങ്ങള്‍ക്കവന്‍ തന്നതിനെക്കാള്‍ ഉദാത്തമായത്. പക്ഷേ, സ്വന്തം പാരിതോഷികത്തില്‍ നിങ്ങള്‍ ആഹ്ലാദം കണ്ടെത്തുകയാണ്. നീ അവരുടെയടുത്തേക്കു തന്നെ തിരിച്ചുപോവുക. അവര്‍ക്ക് അഭിമുഖീകരിക്കാനാവാത്ത വിധമുള്ള ഒരു സൈനിക ശേഖരവുമായി നാമങ്ങോട്ട് ചെല്ലുന്നതും നിന്ദ്യരും നിസ്സാരരുമായി അവിടെ നിന്നു അവരെ ബഹിഷ്‌കരിക്കുന്നതുമാണ്.¹⁶

സുലൈമാന്‍ നബി ആവശ്യപ്പെട്ടു: ഹേ വരിഷ്ഠരേ, വിധേയത്വം പ്രകടിപ്പിച്ചവരായിക്കൊണ്ട് എന്റെയടുത്തവര്‍ വന്നെത്തും മുമ്പ് അവളുടെ സിംഹാസനം നിങ്ങളിലാരാണ് എനിക്കു കൊണ്ടുവന്നുതരിക? ജിന്നുകളില്‍ പെട്ട ഒരതിശക്തന്‍ പ്രതികരിച്ചു: 'അങ്ങ് ഈ ദര്‍ബാറില്‍ നിന്ന് എണീക്കുംമുമ്പ് ഞാന്‍ കൊണ്ടുവരാം. അതിന്നു കഴിവുറ്റവനും വിശ്വസ്തനും തന്നെയത്രേ ഞാന്‍!' വേദജ്ഞാനം ലഭ്യമായ ഒരാള്‍ പറഞ്ഞു: 'താങ്കള്‍ കണ്ണിമയ്ക്കും മുമ്പ് ഞാനതു ഹാജരാക്കാം!'¹⁷
അങ്ങനെ തന്റെ മുമ്പാകെയത് നിലയുറപ്പിച്ചതായി കണ്ടപ്പോള്‍ നബി പ്രതികരിച്ചു: ഞാന്‍ കൃതജ്ഞനാകുമോ അതോ കൃതഘ്‌നനാകുമോ എന്നെന്നെ പരീക്ഷിക്കാനായി നാഥന്‍ കനിഞ്ഞേകിയ അനുഗ്രഹങ്ങളില്‍ പെട്ടതത്രേ ഇത്. ഒരാള്‍ നന്ദി കാട്ടുന്നുവെങ്കില്‍ സ്വഗുണത്തിനു വേണ്ടി തന്നെയാണത്; ഇനിയവന്‍ നന്ദികേട് കാട്ടുന്നുവെങ്കിലോ, എന്റെ നാഥന്‍ ഐശ്വര്യനും ഉദാത്തനുമത്രേ.¹⁸

സുലൈമാന്‍ നബി കല്‍പിച്ചു: സിംഹാസനം അവള്‍ക്കു തിരിച്ചറിയാത്തവിധം ഭേദഗതി വരുത്തുക; അവള്‍ യാഥാര്‍ത്ഥ്യം ഗ്രഹിക്കുമോ അതോ വസ്തുത മനസ്സിലാക്കാത്തവരില്‍ പെടുമോ എന്നു നമുക്ക് നിരീക്ഷിക്കണം. അങ്ങനെ ദര്‍ബാറിലെത്തിയപ്പോള്‍ 'ഭവതിയുടെ സിംഹാസനം ഇതുപോലെയാണോ' എന്നു ചോദിക്കപ്പെട്ടു. അവള്‍ പ്രതികരിച്ചു: 'അതുപോലെത്തന്നെയുണ്ട് ഇത്!'¹⁹
ശരിയായ ജ്ഞാനം ഞങ്ങള്‍ക്കു ഇതിനുമുമ്പ് തന്നെ നല്‍കപ്പെടുകയും ഞങ്ങള്‍ മുസ്‌ലിംകളാവുകയും ചെയ്തിട്ടുണ്ട്. അല്ലാഹുവിനെ വിട്ട് തനിക്കുണ്ടായിരുന്ന ആരാധ്യവസ്തുക്കളാണ് അവളെ നേര്‍വഴിയില്‍ നിന്ന് ഉപരോധിച്ചത്. സത്യനിഷേധികളായ സമൂഹത്തില്‍ അകപ്പെട്ടതു തന്നെയായിരുന്നു അവള്‍.²⁰

കൊട്ടാരത്തിലേക്ക് പ്രവേശിക്കാം എന്ന് അവള്‍ ക്ഷണിക്കപ്പെട്ടു; കണ്ടപ്പോള്‍ അതൊരു ജലാശയമാണെന്നവള്‍ വിചാരിക്കുകയും കണങ്കാലുകളില്‍ നിന്ന് വസ്ത്രം പൊക്കുകയുമുണ്ടായി. സുലൈമാന്‍ നബി വ്യക്തമാക്കി: 'പളുങ്ക് മിനുക്കിയുണ്ടാക്കിയ കൊട്ടാരമാണിത്!' അവള്‍ പരിതപിച്ചു: നാഥാ, സ്വന്തത്തോടു തന്നെ അതിക്രമം ചെയ്തിരിക്കയാണു ഞാന്‍; സുലൈമാന്‍ നബിയോടൊപ്പം സര്‍വലോക സംരക്ഷകനായ അല്ലാഹുവിന്ന് ഞാനിതാ കീഴൊതുങ്ങിയിരിക്കുന്നു!²¹

അല്ലാഹുവിനെ മാത്രം നിങ്ങളാരാധിക്കുക എന്ന സന്ദേശവുമായി സമൂദ് സമുദായത്തിലേക്ക് സ്വസഹോദരന്‍ സ്വാലിഹ് നബിയെ നാം നിയോഗിക്കുകയുണ്ടായി. തത്സമയമതാ, രണ്ടു കക്ഷികളായി അവരന്യോന്യം പോരടിക്കുന്നു! അദ്ദേഹം ചോദിച്ചു: എന്റെ ജനമേ, നന്മക്കു മുമ്പായി തിന്മ കിട്ടാന്‍ നിങ്ങളെന്തിനു ധൃതികൂട്ടുന്നു? അല്ലാഹുവോട് നിങ്ങള്‍ പാപമോചനമര്‍ത്ഥിക്കാത്തതെന്ത്? എങ്കില്‍ നിങ്ങളുടെ മേല്‍ കരുണ ചൊരിയപ്പെട്ടേക്കാമല്ലോ?²²

അവര്‍ പ്രതികരിച്ചു: നീയും അനുയായികളും കാരണമായി ഞങ്ങള്‍ക്ക് ശകുനപ്പിഴയേറ്റിരിക്കയാണ്. അദ്ദേഹം മറുപടി നല്‍കി: നിങ്ങളുടെ ദുഃശകുനം അല്ലാഹുവിങ്കല്‍ സ്ഥിരീകൃതമത്രേ. അതല്ല വസ്തുത, ദൈവിക പരീക്ഷണത്തിനു പാത്രീഭവിക്കാന്‍ പോകുന്ന ഒരു ജനസഞ്ചയമത്രേ നിങ്ങള്‍!

നാട്ടില്‍ കുഴപ്പമുണ്ടാക്കുകയും യാതൊരു നന്മയും അനുവര്‍ത്തിക്കാതിരിക്കുകയും ചെയ്യുന്ന ഒരൊമ്പതംഗ നേതൃസംഘം സ്വാലിഹ് നബിയുടെ പട്ടണമായ ഹിജ്‌റിലുണ്ടായിരുന്നു. അവര്‍ പരസ്പരം പറഞ്ഞു: അല്ലാഹുവിനെ പിടിച്ചു ശപഥം ചെയ്യൂ-സ്വാലിഹിനെയും സ്വന്തക്കാരെയും നമുക്ക് നിശാവധം നടത്തുക തന്നെ വേണം. എന്നിട്ട് അവന്റെ അവകാശിയോട് നമുക്കിങ്ങനെ ബോധിപ്പിക്കാം: 'നിന്റെ ബന്ധുവിന്റെ വധത്തില്‍ ഞങ്ങള്‍ പങ്കാളികളായിട്ടില്ല. നേര് തന്നെയാണ് ഞങ്ങള്‍ പറയുന്നത്.' അവര്‍ ഒരു കുതന്ത്രമൊപ്പിച്ചു; നിനച്ചിരിക്കാത്തവിധം അവരോട് നാമതിനു പ്രതിക്രിയയും ചെയ്തു. നോക്കൂ, അവരുടെ കുതന്ത്രത്തിന്റെ പരിണതി എങ്ങനെയായിരുന്നു? അവരെയും സ്വന്തക്കാരെയും ഒന്നടങ്കം നാം സംഹരിച്ചു കളഞ്ഞു. അവരുടെ ഗേഹങ്ങളതാ തകര്‍ന്നടിഞ്ഞു കിടക്കുന്നു-അവര്‍ അതിക്രമം കാട്ടിയതിന്റെ തിക്തഫലമത്രേ അത്. കാര്യവിവരമുള്ളവര്‍ക്ക് ഇതില്‍ ദൃഷ്ടാന്തമുണ്ട്, തീര്‍ച്ച. സത്യവിശ്വാസം കൈക്കൊള്ളുകയും അല്ലാഹുവിനെ സൂക്ഷിക്കുകയും ചെയ്തവരെ നാം രക്ഷപ്പെടുത്തുകയുമുണ്ടായി.²³

ലൂത്ത് നബി തന്റെ ജനതയോടു പറഞ്ഞ സന്ദര്‍ഭം സ്മരണീയമത്രേ: നിങ്ങള്‍ ബോധമുള്ളവരായിക്കൊണ്ട് മ്ലേച്ഛവൃത്തി ചെയ്യുകയാണോ? കാമപൂരണത്തിനായി പെണ്ണുങ്ങളെ വിട്ട് ആണുങ്ങളെ പുല്‍കുകയോ? മൗഢ്യം കാണിക്കുന്ന ഒരു കൂട്ടര്‍ തന്നെയത്രേ നിങ്ങള്‍. ജനത്തിന്റെ പ്രതികരണം ഇതു മാത്രമായിരുന്നു: ലൂത്തിന്റെയാളുകളെ നാട്ടില്‍ നിന്നു പുറന്തള്ളുക! വിശുദ്ധി കാത്തുസൂക്ഷിക്കുന്ന ആളുകളാണവര്‍ എന്നും അവര്‍ പരിഹസിച്ചു. അപ്പോള്‍ അദ്ദേഹത്തെയും-സഹധര്‍മിണിയൊഴിച്ചുള്ള-സ്വന്തക്കാരെയും നാം രക്ഷപ്പെടുത്തി. അവളെ പിന്തിരിഞ്ഞുനിന്നവരിലായാണ് നാം കണക്കാക്കിയിരുന്നത്. അവര്‍ക്കുമീതെ നാമൊരു പേമാരി വര്‍ഷിപ്പിച്ചു. താക്കീതിനു വിധേയരായിരുന്ന ആ ജനതക്കു മേല്‍ നിപതിച്ച ആ മഴ എത്ര ഹീനം!²⁴

നബീ, പ്രഖ്യാപിക്കുക: സമസ്ത സ്‌തോത്രവും അല്ലാഹുവിന്നത്രേ. അവന്റെ സവിശേഷ തെരഞ്ഞെടുപ്പിനു വിധേയരായ അടിമകള്‍ക്കു സുരക്ഷയുണ്ടാകട്ടെ. അല്ലാഹുവാണോ ഉദാത്തന്‍, അതോ അവര്‍ പങ്കാളികളാക്കുന്നവയോ? അതോ ഭുവന-വാനങ്ങള്‍ സൃഷ്ടിക്കുകയും അന്തരീക്ഷത്തില്‍ നിന്നു നിങ്ങള്‍ക്ക് ജലം വര്‍ഷിക്കുകയും ചെയ്യുന്നവനോ? എന്നിട്ട് ആ വെള്ളം മുഖേന സുന്ദരമായ തോട്ടങ്ങള്‍ നാം ഉണ്ടാക്കി. അവയിലെ മരങ്ങള്‍ മുളപ്പിക്കാന്‍ നിങ്ങള്‍ക്കാകുമായിരുന്നില്ല. അല്ലാഹുവൊന്നിച്ച് മറ്റേതെങ്കിലും ആരാധ്യനുണ്ടോ? അല്ല, അവര്‍ സന്മാര്‍ഗവ്യതിയാനം സംഭവിച്ച ഒരു കൂട്ടരത്രേ.²⁵

അതോ ഭൂതലത്തെ നിവാസയോഗ്യമാക്കുകയും അതിനിടയില്‍ നിന്ന് പുഴകളുല്‍പാദിപ്പിക്കുകയും ഭൂമിക്ക് ദാര്‍ഢ്യമേകുന്ന മലകള്‍ സൃഷ്ടിക്കുകയും രണ്ടുവിധം ജലാശയങ്ങള്‍ക്കിടയില്‍ ഒരു മറയുണ്ടാക്കുകയും ചെയ്തവനോ ഉദാത്തന്‍?(അതോ, ബഹുദൈവങ്ങളോ?) അല്ലാഹുവൊന്നിച്ച് വേറെ ഏതെങ്കിലും ആരാധ്യനുണ്ടോ? അല്ല, അവരില്‍ മിക്കവരും യാഥാര്‍ത്ഥ്യം മനസ്സിലാക്കുന്നില്ല.²⁶

അതോ പ്രതിസന്ധിയിലകപ്പെട്ടവന്‍ പ്രാര്‍ത്ഥിച്ചാല്‍ അവനു ഉത്തരമേകുകയും കഷ്ടപ്പാട് ദൂരീകരിക്കുകയും ഭൂമിയില്‍ നിങ്ങളെ പ്രതിനിധികളാക്കുകയും ചെയ്യുന്നവനോ ഉദാത്തന്‍? അല്ലാഹുവൊന്നിച്ച് വേറെ ഏതെങ്കിലും ആരാധ്യന്‍ ഉണ്ടോ? വളരെക്കുറച്ചുമാത്രമേ നിങ്ങള്‍ ചിന്തിക്കുന്നുള്ളൂ.²⁷

അതോ കരയിലെയും കടലിലെയും ഇരുട്ടുകളില്‍ നിങ്ങള്‍ക്ക് വഴികാട്ടുകയും തന്റെ കാരുണ്യമഴക്കു മുമ്പേ സന്തോഷസൂചകമായി കാറ്റടിപ്പിക്കുകയും ചെയ്യുന്നവനോ ഉദാത്തന്‍?(അതോ, ബഹുദൈവങ്ങളോ?) അല്ലാഹുവൊന്നിച്ച് വേറെയേതെങ്കിലും ആരാധ്യനുണ്ടോ? അവര്‍ പങ്കാളികളാക്കുന്നതില്‍ നിന്നൊക്കെ അല്ലാഹു മഹോന്നതനത്രേ. അതോ സൃഷ്ടികര്‍മം തുടങ്ങിവെച്ച് പിന്നീട് ആവര്‍ത്തിക്കുകയും അന്തരീക്ഷത്തിലും ഭൂമിയിലും നിന്ന് നിങ്ങള്‍ക്ക് ആഹാരം തരികയും ചെയ്യുന്നവനോ ഉദാത്തന്‍?(അതോ ബഹുദൈവങ്ങളോ?) അല്ലാഹുവൊന്നിച്ച് വേറെ ഏതെങ്കിലും ആരാധ്യനുണ്ടോ? നബീ, പ്രഖ്യാപിക്കുക: സത്യവാദികളാണെങ്കില്‍ നിങ്ങളുടെ പ്രമാണം ഹാജറാക്കുക!²⁸

നബീ, പ്രഖ്യാപിക്കുക: ഭുവന-വാനങ്ങളിലുള്ളവരൊന്നും മറഞ്ഞ കാര്യമറിയില്ല, അല്ലാഹുവൊഴികെ; തങ്ങളുടെ പുനരുത്ഥാനം എപ്പോഴായിരിക്കുമെന്നും അവര്‍ക്കജ്ഞാതമാണ്. അല്ല, അവരുടെ ജ്ഞാനം എത്തിനില്‍ക്കുന്നത് പരലോക നിഷേധത്തിലാണ്; എന്നല്ല, അതെക്കുറിച്ച സന്ദേഹത്തിലാണവര്‍; അതുമല്ല, അതിനെ സംബന്ധിച്ച് പൂര്‍ണ അന്ധതയിലത്രേ അവര്‍.²⁹

സത്യനിഷേധികള്‍ ചോദിക്കയാണ്: ഞങ്ങളും പൂര്‍വ പിതാക്കളും മരിച്ചു മണ്ണടിഞ്ഞാല്‍ ഉയിര്‍ത്തെഴുന്നേല്‍പിച്ച് പുറത്തുകൊണ്ടുവരപ്പെടുമെന്നോ? ഞങ്ങളോടും നേരത്തെ ഞങ്ങളുടെ പിതാക്കളോടുമുള്ള വാഗ്ദത്തകാര്യം തന്നെയാണിത്. ഇതൊന്നും പൂര്‍വികരുടെ കെട്ടുകഥകളല്ലാതെ മറ്റൊന്നുമല്ല.

നബീ, പറയുക: 'ഭൂമിയില്‍ യാത്ര ചെയ്ത് അധര്‍മകാരികളുടെ പരിണതി എങ്ങനെയായിരുന്നുവെന്ന് ചിന്തിച്ചുനോക്കുക.' ഈ നിഷേധികളുടെ പേരില്‍ അങ്ങ് ദുഃഖിക്കുകയോ അവരുടെ ഗൂഢാലോചനകളെപ്പറ്റി മനഃസംഘര്‍ഷത്തിലാവുകയോ വേണ്ട. അവര്‍ ചോദിക്കുന്നു: നിങ്ങള്‍ സത്യവാദികളാണെങ്കില്‍, ഒന്നുപറയൂ, എപ്പോഴാണ് ഈ വാഗ്ദത്ത ശിക്ഷ സംഭവിക്കുക? അങ്ങ് പ്രതികരിക്കുക: നിങ്ങള്‍ പെട്ടെന്ന് ആവശ്യപ്പെടുന്നവയില്‍ ചിലത് ഒരുവേള, നിങ്ങളുടെ വഴിയെത്തന്നെ വന്നിരിക്കാം.³⁰

നിശ്ചയം താങ്കളുടെ നാഥന്‍ മര്‍ത്യരോട് ഉദാരന്‍ തന്നെ; പക്ഷേ, അവരില്‍ മിക്കവരും കൃതജ്ഞരാകുന്നില്ല. അവരുടെ മാനസങ്ങള്‍ രഹസ്യമാക്കുന്നതും പരസ്യമാക്കുന്നതുമൊക്കെ താങ്കളുടെ നാഥന്‍ അറിയുകതന്നെ ചെയ്യുന്നുണ്ട്. ആകാശത്തിലോ ഭൂമിയിലോ ഉള്ള ഏതൊരു ഗുപ്ത കാര്യവും സ്പഷ്ടമായൊരു രേഖയിലുണ്ട്, തീര്‍ച്ച.³¹

നിശ്ചയം ഈ ഖുര്‍ആന്‍ ഇസ്രയേല്യര്‍ ഭിന്നപക്ഷക്കാരായിരിക്കുന്ന മിക്ക കാര്യങ്ങളും പ്രതിപാദിച്ചു കൊടുക്കുന്നുണ്ട്. സത്യവിശ്വാസികള്‍ക്കിത് മാര്‍ഗദര്‍ശകവും കാരുണ്യവും തന്നെയത്രേ. താങ്കളുടെ നാഥന്‍ തന്റെ ഉത്തരവിലൂടെ അവര്‍ക്കിടയില്‍ വിധി കല്‍പിക്കുക തന്നെ ചെയ്യും, തീര്‍ച്ച. പ്രതാപശാലിയും സര്‍വജ്ഞനുമത്രേ അവന്‍. അതുകൊണ്ട് അങ്ങ് കാര്യങ്ങളത്രയും അല്ലാഹുവില്‍ ഭരമേല്‍പിച്ചുകൊള്ളുക. വ്യക്തമായ സത്യപഥത്തില്‍ തന്നെയാണു താങ്കള്‍.³²

മൃതതുല്യരെയോ, ചെകിടന്മാര്‍ പിന്തിരിഞ്ഞുപോകുന്നുവെങ്കില്‍ അവരെയോ അങ്ങേക്കു വിളി കേള്‍പ്പിക്കാനാവില്ല. അന്ധന്മാരെ അവരുടെ വഴികേടില്‍ നിന്ന് സന്മാര്‍ഗദര്‍ശനം ചെയ്യാനും താങ്കള്‍ക്കാകില്ല;³³
നമ്മുടെ ദൃഷ്ടാന്തങ്ങളില്‍ വിശ്വാസമര്‍പ്പിക്കുകയും അങ്ങനെ ശാസനകള്‍ക്കു വിധേയരാവുകയും ചെയ്യുന്നവരെ മാത്രമേ താങ്കള്‍ക്ക് ശ്രവിപ്പിക്കാനാകൂ.³⁴

ആ നിര്‍ണായക ഉത്തരവ് അവരില്‍ സംജാതമാകുമ്പോള്‍ ഭൂമിയില്‍ നിന്ന് ഒരു ജീവിയെ നാമവരിലേക്ക് പുറപ്പെടുവിക്കുന്നതും 'ജനങ്ങള്‍ നമ്മുടെ ദൃഷ്ടാന്തങ്ങള്‍ ഉറപ്പിക്കാതിരിക്കുകയായിരുന്നു' എന്ന് അവരോടത് സംസാരിക്കുന്നതുമാകുന്നു.³⁵
ഓരോ ജനപഥത്തില്‍ നിന്നും നമ്മുടെ ദൃഷ്ടാന്തങ്ങള്‍ വ്യാജമാക്കിയിരുന്ന ഓരോ സംഘത്തെ നാം സംഗമിപ്പിക്കുന്നതും തടഞ്ഞുനിറുത്തപ്പെടുന്നതുമായ ദിവസം സ്മരണീയമത്രേ. അങ്ങനെ അവര്‍ സന്നിഹിതരായാല്‍ അല്ലാഹു ചോദിക്കും: ചിന്തിച്ചു ഗ്രഹിക്കാതെ എന്റെ ദൃഷ്ടാന്തങ്ങള്‍ വ്യാജമാക്കുകയാണോ നിങ്ങള്‍ ചെയ്തത്? അതല്ല, മറ്റെന്താണ് നിങ്ങളനുവര്‍ത്തിച്ചിരുന്നത്? അക്രമകാരികളായിരുന്നതിനാല്‍ ശിക്ഷാഉത്തരവ് അവരില്‍ സംഭവിച്ചു കഴിയും; അതിനാല്‍ യാതൊന്നുമവര്‍ ഉരുവിടുന്നതല്ല.³⁶
അവര്‍ ചിന്തിച്ചു നോക്കുന്നില്ലേ: നാമവര്‍ക്ക് നിശയെ ശാന്തിനേടാനുള്ള അവസരവും പകലിനെ പ്രകാശനവുമാക്കി. വിശ്വാസം കൈക്കൊള്ളുന്ന ജനത്തിനു ഇതില്‍ ദൃഷ്ടാന്തങ്ങളുണ്ട്, തീര്‍ച്ച.³⁷

കാഹളത്തില്‍ ഊതപ്പെടുന്ന നാള്‍ സ്മരണീയമത്രേ. തത്സമയം-അല്ലാഹു ഉദ്ദേശിച്ചവരൊഴിച്ച്-ഭുവന-വാനങ്ങളിലുള്ളവരെല്ലാം പരിഭ്രമിച്ചു പോകുന്നതും വിനയാന്വിതരായി സര്‍വരും അവന്റെ സന്നിധിയില്‍ വരുന്നതുമാണ്. പര്‍വതങ്ങള്‍ ദൃഷ്ടിയില്‍ പെടുമ്പോള്‍ അടിയുറച്ചു നില്‍ക്കുകയാണെന്നാണ് തോന്നുക. എന്നാലവ മേഘം കണക്കെ ദ്രുതസഞ്ചാരം നടത്തുകയാണ്. മുഴുകാര്യങ്ങളും നന്നായി ദൃഢീകരിച്ച അല്ലാഹുവിന്റെ പ്രവൃത്തിയത്രേ അത്.³⁸
നിങ്ങളനുവര്‍ത്തിക്കുന്നവയെപ്പറ്റി സൂക്ഷ്മജ്ഞനാണവന്‍. ആരൊരാള്‍ നന്മയുമായി സന്നിഹിതനാകുന്നുവോ, അവന്ന് അതിനെക്കാള്‍ ഉദാത്ത പ്രതിഫലമാണുണ്ടാവുക; അന്നവര്‍ പരിഭ്രമത്തില്‍ നിന്ന് സുരക്ഷിതരായിരിക്കുന്നതാണ്. ആരൊരാള്‍ തിന്മയുമായി വന്നെത്തുന്നുവോ, നരകത്തിലവര്‍ മുഖംകുത്തി വീഴ്ത്തപ്പെടും. സ്വയം അനുവര്‍ത്തിച്ചുകൊണ്ടിരുന്ന പ്രവര്‍ത്തനങ്ങള്‍ക്കുള്ള പ്രതിഫലം തന്നെയല്ലേ നിങ്ങള്‍ക്കു നല്‍കപ്പെടുന്നുള്ളൂ എന്നവരോട് ചോദിക്കപ്പെടുന്നതാണ്.³⁹

നബീ, പറയുക: ഈ മക്കാ നാടിനെ പവിത്രവല്‍ക്കരിച്ച നാഥനെ മാത്രം ആരാധിക്കാനാണ് ഞാന്‍ അനുശാസിക്കപ്പെട്ടിരിക്കുന്നത്-സമസ്ത വസ്തുക്കളും അവന്നുള്ളതത്രേ-വിധേയത്വമുള്ളവരുടെ ഗണത്തിലാകണമെന്നും ഖുര്‍ആന്‍ പാരായണം ചെയ്യാനും ഞാന്‍ കല്‍പിക്കപ്പെട്ടിരിക്കുന്നു.⁴⁰
അപ്പോള്‍, ആരെങ്കിലും സല്‍പന്ഥാവ് പ്രാപിക്കുന്നുവെങ്കില്‍ സ്വന്തം നേട്ടത്തിനു തന്നെയാണവന്റെ നേര്‍മാര്‍ഗപ്രാപ്തി. ആരൊരാള്‍ വ്യതിചലിക്കുന്നുവോ, 'ഞാനൊരു മുന്നറിയിപ്പുകാരനല്ലാതെ മറ്റാരുമല്ല' എന്നു താങ്കള്‍ പറയുക. അല്ലാഹുവിനാകുന്നു സര്‍വ സ്‌തോത്രങ്ങളും എന്നു അങ്ങ് പ്രഖ്യാപിക്കുക: തന്റെ ദൃഷ്ടാന്തങ്ങള്‍ നിങ്ങള്‍ക്കവന്‍ ഗോചരീഭവിപ്പിച്ചു തരുന്നതാണ്; തത്സമയം അവ നിങ്ങള്‍ക്ക് സുഗ്രാഹ്യമായിത്തീരും. നിങ്ങളനുവര്‍ത്തിച്ചുകൊണ്ടിരിക്കുന്ന യാതൊന്നിനെപ്പറ്റിയും താങ്കളുടെ നാഥന്‍ അശ്രദ്ധനല്ല തന്നെ.⁴¹