അശ്ശുഅറാഅ് - الشعراء - Ash-Shuara

ഥാ സീന്‍ മീം. ഇവ സ്പഷ്ടമായ വേദഗ്രന്ഥത്തിലെ വാക്യങ്ങളാണ്. നബീ, ആ നിഷേധികള്‍ സത്യവിശ്വാസം കൈവരിക്കാത്തതിന്റെ പേരില്‍ താങ്കള്‍ ജീവത്യാഗം വരെ ചെയ്‌തേക്കാവുന്നതാണ്.¹
നാമുദ്ദേശിക്കുന്നുവെങ്കില്‍ വാനലോകത്തുനിന്ന് ഒരു ദൃഷ്ടാന്തം അവര്‍ക്കവതരിപ്പിച്ചുകൊടുക്കുകയും തത്സമയം അതിന്നവര്‍ വിധേയരായിത്തീരുകയും ചെയ്യും. കരുണാമയന്റെയടുത്തുനിന്നു ഏതൊരു നവബോധനം വന്നെത്തുമ്പോഴും അതില്‍ നിന്നവര്‍ മുഖം തിരിക്കുകമാത്രമേ ചെയ്തിട്ടുള്ളൂ. അങ്ങനെയവര്‍ സത്യം നിഷേധിച്ചു തള്ളി; തന്മൂലം ഏതൊന്നിനെയവര്‍ പരിഹസിച്ചിരുന്നുവോ, അതു സംബന്ധിച്ച വിവരങ്ങള്‍ അവര്‍ക്ക് വന്നെത്തുന്നതാണ്.²

ഭൂതലത്തിലേക്കവര്‍ നോക്കുന്നില്ലേ? എല്ലാ ഉദാത്ത ജോടികളിലും നിന്ന് എത്രയെത്ര സസ്യലതാദികളെയാണ് നാമതില്‍ മുളപ്പിച്ചിരിക്കുന്നത്! മഹത്തായ ദൃഷ്ടാന്തം അതിലുണ്ടെന്നു തീര്‍ച്ച.³
എന്നാല്‍ അവരില്‍ മിക്കവരും സത്യവിശ്വാസികളായില്ല. താങ്കളുടെ നാഥന്‍ തന്നെയാണ് പ്രതാപശാലിയും കരുണാമയനും.

താങ്കളുടെ നാഥന്‍ മൂസാനബിയെ വിളിച്ച് നിര്‍ദേശിച്ച സന്ദര്‍ഭം സ്മരണീയമത്രേ-അതിക്രമികളായ ആ ജനതയിലേക്ക്, ഫിര്‍ഔന്റെയാളുകളിലേക്ക് താങ്കള്‍ ചെല്ലുകയും അവര്‍ അല്ലാഹുവിനെ സൂക്ഷിക്കുന്നില്ലേ എന്നു ചോദിക്കുകയും ചെയ്യണം.

മൂസാനബി അപേക്ഷിച്ചു: നാഥാ, എന്നെയവര്‍ നിഷേധിച്ചു കളയുമെന്നും എന്റെ മനസ്സിടുങ്ങി നാക്കു വഴങ്ങാതാകുമെന്നും ഞാന്‍ ഭയപ്പെടുകതന്നെ ചെയ്യുന്നുണ്ട്; അതുകൊണ്ട് ഹാറൂനിനെയും റസൂലാക്കി എന്റെ കൂടെ അയക്കണം. അവര്‍ എനിക്കെതിരെ ഒരു കുറ്റമാരോപിക്കുകയും അതുവഴി എന്നെ കൊന്നുകളയുകയും ചെയ്യുമെന്ന് എനിക്ക് പേടിയുണ്ട്.⁴

അല്ലാഹു കല്‍പിച്ചു: ഒരിക്കലുമില്ല, നിങ്ങളിരുവരും നമ്മുടെ ദൃഷ്ടാന്തങ്ങളുമായി പോയ്‌ക്കൊള്ളുക. നിങ്ങളൊന്നിച്ച് എല്ലാം നാം നന്നായി കേള്‍ക്കും. അങ്ങനെ ഫറോവയുടെയടുത്തു ചെന്ന് 'ഇസ്രയേല്യരെ ഞങ്ങളൊന്നിച്ച് വിട്ടുതരാനായി പ്രപഞ്ചനാഥനാല്‍ നിയുക്തരായ ദൂതന്മാരാണു ഞങ്ങള്‍' എന്നു ബോധിപ്പിക്കുക.

ഫറോവ ചോദിച്ചു: കുട്ടിയായിരുന്നപ്പോള്‍ നിന്നെ ഞങ്ങളുടെ കൂടെ നാം വളര്‍ത്തിയില്ലേ? ആയുസ്സില്‍ ഏറെ വര്‍ഷങ്ങള്‍ നീ ഞങ്ങളൊന്നിച്ചു കഴിയുകയുമുണ്ടായി. നന്ദിയില്ലാത്തവനായിക്കൊണ്ട് നീ ചെയ്ത അപ്പണി നടപ്പാക്കുകയും ചെയ്തു.⁵

ഫറോവ ആക്രോശിച്ചു: ഞാനല്ലാത്ത ഏതെങ്കിലും ദൈവത്തെ വരിക്കുന്നുവെങ്കില്‍ നിന്നെ ഞാന്‍ ജയിലിലടക്കുക തന്നെ ചെയ്യും!⁸

മൂസാ നബി പ്രതികരിച്ചു: അന്നു ഞാനത് അബദ്ധവശാല്‍ ചെയ്തുപോയതാണ്. അങ്ങനെ നിങ്ങളെപ്പേടിച്ച് ഞാന്‍ ഒളിച്ചോടി. എന്നിട്ട് നാഥന്‍ എനിക്ക് തത്ത്വജ്ഞാനം നല്‍കുകയും എന്നെ ദൈവദൂതരിലുള്‍പ്പെടുത്തുകയും ചെയ്തു. എന്നോടു കാണിച്ച ഔദാര്യം ഇസ്രയേല്യരെ നീ അടിമകളാക്കിവെച്ചു എന്നതാണല്ലോ!⁶

ഫറോവ ചോദിച്ചു: ഈ ലോകനാഥന്‍ എന്നാല്‍ എന്താണ്? മൂസാ നബി പ്രതികരിച്ചു: ഭുവന-വാനങ്ങളുടെയും അവക്കിടയിലുള്ളതിന്റെയും നാഥനാണവന്‍; നിങ്ങള്‍ ദൃഢവിശ്വാസമുള്ളവരാണെങ്കില്‍. ഫറോവ ചുറ്റുമുള്ളവരോട് പരിഹാസാത്മകമായി ചോദിച്ചു: നന്നായി കേള്‍ക്കുന്നില്ലേ നിങ്ങള്‍! മൂസാ നബി തുടര്‍ന്നു: നിങ്ങളുടെയും ആദിമപിതാക്കളുടെയും നാഥന്‍ അവന്‍ തന്നെ. ഫറോവ: നിങ്ങളിലേക്ക് നിയുക്തനായ ഈ ദൂതന്‍ ഒരു ഭ്രാന്തന്‍ തന്നെ!⁷
മൂസാ നബി മറുപടി നല്‍കി: ഉദയാസ്തമന സ്ഥാനങ്ങളുടെയും അവക്കിടയിലുള്ളതിന്റെയും നാഥനാണവന്‍; നിങ്ങള്‍ ചിന്തിച്ചു ഗ്രഹിക്കുന്നവരാണെങ്കില്‍.
മൂസാ നബി: സ്പഷ്ടമായ ദൃഷ്ടാന്തം നിനക്കു ഞാന്‍ കാണിച്ചു തന്നാലും? ഫറോവ: എങ്കില്‍, നീ സത്യവാദിയാണെങ്കില്‍ അതുകൊണ്ടുവാ..

അപ്പോള്‍ മൂസാ നബി വടി താഴെയിട്ടു. തത്സമയമതാ, അത് വ്യക്തമായൊരു സര്പ്പിമായി പരിണമിച്ചു; കൈ പുറത്തെടുത്തു, അപ്പോഴതാ, ദ്രഷ്ടാക്കള്‍ക്കത് ശുദ്ധ വെള്ള നിറമായിരിക്കുന്നു!

തന്റെ ആഭിചാരവൃത്തി വഴി നിങ്ങളെ നാട്ടില്‍ നിന്ന് ബഹിഷ്‌കരിക്കാനുദ്ദേശിക്കുന്ന അഭിജ്ഞനായ ഒരു ജാലവിദ്യക്കാരന്‍ തന്നെയാണ് ഇവനെന്ന് തനിക്കുചുറ്റുമുള്ള പ്രധാനികളോട് ഫറോവ തട്ടിവിട്ടു⁹
അതിനാല്‍ ഇവന്റെ കാര്യത്തില്‍ നിങ്ങള്ക്കെ്ന്താണു നിര്ദേ്ശിക്കാനുള്ളത്?

അവര്‍ പ്രതികരിച്ചു: തിരുമനസ്സ് അവന്നും സഹോദരന്നും അവസരം നല്കിളയാലും! വ്യത്യസ്ത നാടുകളിലേക്ക് ആഭിചാരകരെ ക്ഷണിക്കാനായി ദൂതരെ അയച്ചാലും. അവര്‍ സര്വവ ആഭിചാര സമ്രാട്ടുക്കളെയും അങ്ങയുടെ സന്നിധിയില്‍ ഹാജരാക്കട്ടെ.

അങ്ങനെ, ഒരു സുജ്ഞാത നാളില്‍ നിശ്ചയിക്കപ്പെട്ടൊരു മുഹൂര്ത്തംി ആഭിചാരകന്മാര്‍ സമ്മേളിച്ചു. ജനങ്ങളോടുള്ള വിളംബരമുയര്ന്നു : നിങ്ങളൊക്കെ ഒറ്റക്കെട്ടാവുകയല്ലേ? ആഭിചാരകന്മാര്‍ വിജയിക്കുകയാണെങ്കില്‍ നമുക്കവരെ അനുധാവനം ചെയ്യാം.¹⁰

അങ്ങനെ ആഭിചാരകര്‍ വന്നെത്തിയപ്പോള്‍, ഫറോവയോടവര്‍ ചോദിച്ചു: വിജയികളാകുന്നത് ഞങ്ങളാണെങ്കില്‍ പ്രതിഫലമുണ്ടായിരിക്കുമോ? അവന്‍ പ്രതികരിച്ചു: അതെ, നിങ്ങളെന്റെ സമീപസ്ഥര്‍ കൂടിയായിരിക്കും.

മൂസാ നബി അവരോടാവശ്യപ്പെട്ടു: നിങ്ങള്‍ക്ക് എന്തൊക്കെയുണ്ടോ, അവയൊക്കെ നിക്ഷേപിച്ചു കൊള്ളുക! അപ്പോഴവര്‍ തങ്ങളുടെ കയറുകളും വടികളും നിലത്തിടുകയും 'ഫറോവയുടെ ആഢ്യത്വം തന്നെ ശപഥം, ഞങ്ങള്‍ തന്നെയാണ് ജേതാക്കളാവുക' എന്നു പ്രഖ്യാപിക്കുകയും ചെയ്തു.¹¹

പിന്നീട് മൂസാ നബി തന്റെ വടി താഴെയിട്ടു. തത്സമയമതാ, അവര്‍ വ്യാജനിര്‍മിതി നടത്തിയവയെല്ലാം അതു വിഴുങ്ങിക്കളയുന്നു! ഉടനെ ആഭിചാരകര്‍ സാഷ്ടാംഗമായി വീഴുകയും, മൂസാ നബിയുടെയും ഹാറൂന്‍ നബിയുടെയും നാഥനായ സര്‍വലോക രക്ഷിതാവില്‍ ഞങ്ങളിതാ വിശ്വസിച്ചിരിക്കുന്നു എന്നു പ്രഖ്യാപിക്കുകയുമുണ്ടായി.

ഫിര്‍ഔന്‍ ആക്രോശിച്ചു: ഞാന്‍ സമ്മതം തരുംമുമ്പേ നിങ്ങളിവനില്‍ വിശ്വസിക്കുകയോ? നിങ്ങള്‍ക്കു മാരണം പഠിപ്പിച്ച തലവനാണിവന്‍. ഇതിന്റെ തിക്തഫലം നിങ്ങളറിയാന്‍ പോകയാണ്. നിങ്ങളുടെ കൈകാലുകള്‍ ഭിന്ന പാര്‍ശ്വങ്ങളില്‍ നിന്നു ഞാന്‍ ഛേദിച്ചുകളയുകയും നിങ്ങളെയൊന്നടങ്കം കുരിശില്‍ തറച്ചു കൊല്ലുകയും ചെയ്യും, തീര്‍ച്ച. അവര്‍ പ്രതികരിച്ചു: യാതൊരു കുഴപ്പവുമില്ല; ഞങ്ങള്‍ നിശ്ചയം, രക്ഷിതാവിന്റെ സന്നിധിയിലേക്ക് തിരിച്ചുപോവുകയാകുന്നു. പ്രഥമ വിശ്വാസീ വൃന്ദമായതുകൊണ്ട് ഞങ്ങളുടെ ദോഷങ്ങള്‍ നാഥന്‍ പൊറുത്തുതരുമെന്നാണ് ഞങ്ങള്‍ പ്രത്യാശിക്കുന്നത്.¹²

മൂസാ നബിക്ക് നാം ബോധനം നല്‍കി: 'എന്റെ അടിമകളുമായി താങ്കള്‍ നിശാസഞ്ചാരം നടത്തുക. ശത്രുക്കളാല്‍ പിന്തുടരപ്പെടാന്‍ പോവുക തന്നെയാണു നിങ്ങള്‍'. തത്സമയം, ജനങ്ങളെ സംഗമിപ്പിക്കാനായി പട്ടണങ്ങളിലേക്ക് ഫിര്‍ഔന്‍ ദൂതരെ അയച്ചു. ഇസ്രയേല്യര്‍ ചെറുസംഘവും എന്നാല്‍ നമ്മെ പ്രകോപിതരാക്കിയവരുമാണ്; നാമാകട്ടെ, ഒറ്റക്കെട്ടും ജാഗ്രതയുള്ളവരുമാണ് എന്നവന്‍ ശിങ്കിടികളില്‍ വിളംബരപ്പെടുത്തി.¹³

അങ്ങനെ ഫറോവയെയും സംഘത്തെയും അവരുടെ ഉദ്യാനങ്ങളിലും അരുവികളിലും ഭണ്ഡാരങ്ങളിലും വിശിഷ്ട സങ്കേതങ്ങളിലും നിന്നു നാം പുറം തള്ളി; പിന്നീട് അവയത്രയും ഇസ്രയേല്യര്‍ക്ക് അവകാശപ്പെടുത്തിക്കൊടുത്തു.¹⁴

എന്നിട്ട് ഫറോവയും സംഘവും സൂര്യോദയവേളയില്‍ ഇസ്രയേല്യരുടെ തൊട്ടുപിറകെയെത്തി. ഇരുകൂട്ടരും അന്യോന്യം കണ്ടപ്പോള്‍ 'നാം ശത്രുവിന്റെ പിടിയിലകപ്പെട്ടു പോയതു തന്നെ' എന്നു മൂസാ നബിയുടെയാളുകള്‍ പരിതപിച്ചു. അദ്ദേഹം പ്രതികരിച്ചു: ഇല്ല, ഒരിക്കലുമതുണ്ടാവില്ല! എന്റെ നാഥന്‍ ഞാനൊന്നിച്ചു തന്നെയുണ്ട്; എനിക്കവന്‍ സന്മാര്‍ഗദര്‍ശനം ചെയ്യുന്നതാണ്!

തത്സമയം, 'താങ്കളുടെ വടി കൊണ്ട് കടലില്‍ അടിക്കുക' എന്ന് മൂസാ നബിക്കു നാം സന്ദേശം നല്‍കി. അടിച്ചപ്പോള്‍ അതു പിളരുകയും ഓരോ കടല്‍പാളിയും ഭീമന്‍ മലപോലെയാവുകയും മൂസാ നബിയെയും കൂടെയുള്ളവരെയത്രയും നാം രക്ഷിക്കുകയും ഫറോവാ സംഘത്തെ അതിനു സമീപമെത്തിക്കുകയും പിന്നെയവരെ മുക്കിക്കൊല്ലുകയുമുണ്ടായി. ഇതില്‍ വന്‍ദൃഷ്ടാന്തമുണ്ട്, തീര്‍ച്ച. എന്നിട്ടും മിക്കവരും സത്യവിശ്വാസം കൈക്കൊണ്ടവരായില്ല. താങ്കളുടെ നാഥന്‍ പ്രതാപശാലിയും കരുണാമയനും തന്നെയത്രേ¹⁵

ഇബ്രാഹീം നബിയുടെ വൃത്താന്തം അവര്‍ക്ക് ഓതിക്കൊടുക്കുക. തന്റെ പിതാവിനോടും ജനത്തോടും അദ്ദേഹം ചോദിച്ച സന്ദര്‍ഭം: നിങ്ങള്‍ എന്തിനെയാണ് ആരാധിച്ചു കൊണ്ടിരിക്കുന്നത്? അവര്‍ പ്രതികരിച്ചു: ഞങ്ങള്‍ ചില ബിംബങ്ങള്‍ക്ക് ആരാധനകളര്‍പ്പിക്കുകയും അവയുടെ മുമ്പില്‍ ചടഞ്ഞുകൂടുകയുമാണ്. അദ്ദേഹം ചോദിച്ചു: നിങ്ങള്‍ ആരാധിക്കുമ്പോള്‍ അവയതു ശ്രവിക്കുകയോ നിങ്ങള്‍ക്കു ഉപദ്രവമോ ഉപകാരമോ ഉണ്ടാക്കുകയോ ചെയ്യുമോ? അവര്‍ പ്രതികരിച്ചു: അതല്ല, പൂര്‍വ പിതാക്കള്‍ അങ്ങനെ ചെയ്യുന്നതായാണ് ഞങ്ങള്‍ കണ്ടിരിക്കുന്നത്.¹⁶

ഇബ്രാഹീം നബി ചോദിച്ചു: അപ്പോള്‍, നിങ്ങളും പൂര്‍വ പിതാക്കളും പൂജിച്ചുകൊണ്ടിരിക്കുന്നത് എന്തിനെയാണെന്ന് ആലോചിച്ചുനോക്കിയിട്ടുണ്ടോ നിങ്ങള്‍? എന്റെ വൈരികളാണവയൊക്കെയും. എന്നാല്‍, എന്നെ സൃഷ്ടിക്കുകയും എനിക്ക് നേര്‍വഴി കാട്ടുകയും അന്നപാനാദികള്‍ തരികയും ഞാന്‍ രോഗബാധിതനായാല്‍ ശമിപ്പിക്കുകയും എന്നെ മരിപ്പിക്കുകയും വഴിയെ ജീവിപ്പിക്കുകയും അന്ത്യനാളില്‍ എന്റെ പാപങ്ങള്‍ പൊറുത്തു തരുമെന്ന് ഞാന്‍ പ്രതീക്ഷിക്കുകയും ചെയ്യുന്ന ലോകരക്ഷിതാവായ എന്റെ നാഥന്‍ അങ്ങനെയല്ല.¹⁷

നാഥാ, എനിക്കു നീ തത്ത്വജ്ഞാനം തരികയും സജ്ജനങ്ങളോടൊപ്പം എന്നെ ചേര്‍ക്കുകയും പിന്‍ഗാമികളില്‍ എനിക്ക് സല്‍പേരുണ്ടാക്കുകയും ചെയ്യേണമേ. എന്നെ നീ സുഖാസ്വാദനങ്ങള്‍ നിറഞ്ഞ സ്വര്‍ഗത്തിന്റെ അവകാശികളില്‍ പെടുത്തുകയും എന്റെ പിതാവിന് -അദ്ദേഹം വഴിപിഴച്ചവരില്‍ പെട്ടയാള്‍ തന്നെയായിരിക്കുന്നു-മാപ്പരുളുകയും ചെയ്യേണമേ. സുരക്ഷിത ഹൃദയവുമായി അല്ലാഹുവിങ്കല്‍ ചെല്ലുന്നവര്‍ക്കല്ലാതെ ധനമോ സന്താനങ്ങളോ ഉപകാരപ്പെടാത്ത ഉയിര്‍ത്തെഴുന്നേല്‍പ് നാളില്‍ എന്നെ നീ അപമാനിക്കരുതേ.¹⁸

സൂക്ഷ്മജീവിതം നയിച്ചവര്‍ക്ക് അന്ന് സ്വര്‍ഗം സമീപസ്ഥമാക്കപ്പെടുന്നതും ദുര്‍മാര്‍ഗികള്‍ക്ക് നരകം പ്രദര്‍ശിപ്പിക്കപ്പെടുന്നതുമാണ്; അല്ലാഹുവിനെ വിട്ട് നിങ്ങളാരാധിച്ചിരുന്ന ദൈവങ്ങളെവിടെ? അവര്‍ നിങ്ങളെ സഹായിക്കുകയോ സ്വയം വിജയം നേടുകയോ ചെയ്യുന്നുണ്ടോ എന്ന് നരകക്കാരോട് ചോദിക്കപ്പെടുന്നതും അങ്ങനെ ആ ആരാധ്യരും മാര്‍ഗ ഭ്രഷ്ടരായ അനുയായികളും പിശാചിന്റെ സേനാനികള്‍ മുഴുക്കെയും നരകത്തില്‍ മൂഖം കുത്തി വീഴ്ത്തപ്പെടുന്നതുമാണ്.¹⁹

നരകത്തില്‍ പരസ്പരം ശണ്ഠ കൂടവേ അവര്‍ പരിതപിക്കും: അല്ലാഹു തന്നെ സത്യം, പ്രപഞ്ചനാഥനോടൊപ്പം നിങ്ങളെ തുല്യരാക്കിയപ്പോള്‍ ഞങ്ങള്‍ സ്പഷ്ട ദുര്‍മാര്‍ഗത്തില്‍ തന്നെയായിരുന്നു. ആ അധര്‍മകാരികള്‍ മാത്രമാണ് ഞങ്ങളെ വഴിപിഴപ്പിച്ചത്. ഇപ്പോള്‍ ശുപാര്‍ശകരോ ആത്മമിത്രങ്ങളോ ആയി ഞങ്ങള്‍ക്ക് യാതൊരാളും ഇല്ല തന്നെ!²⁰

അതിനാല്‍ ഞങ്ങള്‍ക്കൊന്നു ദുന്‍യാവിലേക്കു തിരിച്ചുപോകാനായിരുന്നെങ്കില്‍ എത്ര നന്നായിരുന്നു; എങ്കില്‍ സത്യവിശ്വാസികളുടെ ഗണത്തില്‍ ഞങ്ങള്‍ ഉള്‍പ്പെട്ടേനെ. നിശ്ചയം, ഇതില്‍ വന്‍ ദൃഷ്ടാന്തമുണ്ട്; എന്നാല്‍ മനുഷ്യരില്‍ മിക്കവരും സത്യവിശ്വാസം കൈക്കൊണ്ടവരായില്ല. താങ്കളുടെ നാഥന്‍ പ്രതാപശാലിയും കരുണാമയനും തന്നെയത്രേ.²¹

നൂഹ് നബിയുടെ ജനം ദൈവദൂതരെ നിഷേധിച്ചു കളഞ്ഞു. തങ്ങളുടെ സഹോദരന്‍ നൂഹ് നബി അവരോട് പറഞ്ഞ സന്ദര്‍ഭം സ്മരണീയമത്രേ: നിങ്ങള്‍ ജീവിതത്തില്‍ സൂക്ഷ്മത പുലര്‍ത്തുന്നില്ലേ? നിങ്ങളിലേക്കുള്ള വിശ്വസ്തനായ ഒരു ദൈവദൂതന്‍ തന്നെയാണു ഞാന്‍. അതുകൊണ്ട് നിങ്ങള്‍ അല്ലാഹുവിനെ സൂക്ഷിക്കുകയും എന്നെ അനുസരിക്കുകയും ചെയ്യുക. ഈ സത്യപ്രബോധനത്തിന്റെ പേരില്‍ യാതൊരു കൂലിയും ഞാന്‍ നിങ്ങളോട് ചോദിക്കുന്നില്ല; എന്റെ പ്രതിഫലം പ്രപഞ്ചനാഥങ്കല്‍ മാത്രമാണ്. അതിനാല്‍ അല്ലാഹുവിനോട് നിങ്ങള്‍ ഭയഭക്തിയുള്ളവരാവുകയും ഞാന്‍ നിര്‍ദേശിക്കുന്നത് അനുസരിക്കുകയും ചെയ്യുക.²²

അവര്‍ ചോദിച്ചു: നിന്നെ അനുധാവനം ചെയ്തിരിക്കുന്നവര്‍ ഏറ്റം അധഃസ്ഥിതരാണെന്നിരിക്കെ ഞങ്ങളെങ്ങനെ നിന്നില്‍ വിശ്വസിക്കും? അദ്ദേഹം പ്രതികരിച്ചു: അവരെന്തൊക്കെയാണ് പ്രവര്‍ത്തിച്ചുകൊണ്ടിരിക്കുന്നത് എന്നതു സംബന്ധിച്ച് എനിക്ക് എന്തറിയും? അവരെക്കുറിച്ച കണക്കെടുപ്പിന്റെ ചുമതല എന്റെ നാഥനു മാത്രമാണ്. നിങ്ങള്‍ വസ്തുതകള്‍ ഗ്രഹിച്ചിരുന്നുവെങ്കില്‍...! സത്യവിശ്വാസികളെ ആട്ടിയകറ്റാന്‍ എനിക്കാവില്ല; സ്പഷ്ടമായ മുന്നറിയിപ്പുകാരന്‍ മാത്രമാണു ഞാന്‍.²³

ജനം ആക്രോശിച്ചു: നൂഹേ, ഈ ഏര്‍പ്പാടില്‍ നിന്ന് വിരമിക്കുന്നില്ലെങ്കില്‍ നീ എറിഞ്ഞുകൊല്ലപ്പെടുന്നവരിലായിപ്പോകും, തീര്‍ച്ച! അദ്ദേഹം അപേക്ഷിച്ചു: നാഥാ, സ്വജനത എന്നെ വ്യാജനാക്കുക തന്നെ ചെയ്തിരിക്കയാണ്; അതിനാല്‍ എനിക്കും അവര്‍ക്കും മധ്യേ നീയൊരു വിജയ തീരുമാനമുണ്ടാക്കുകയും എന്നെയും സഹചാരികളായ വിശ്വാസികളെയും രക്ഷപ്പെടുത്തുകയും ചെയ്യേണമേ.

അപ്പോള്‍ അദ്ദേഹത്തെയും സഹചാരികളെയും നിര്‍ഭരമായ ജലയാനത്തില്‍ നാം രക്ഷിച്ചു. ശിഷ്ടജനത്തെ പിന്നീട് നാം മുക്കിക്കൊന്നു. നിശ്ചയം ഇതില്‍ വന്‍ ദൃഷ്ടാന്തമുണ്ട്. എന്നാല്‍, മനുഷ്യരില്‍ മിക്കവരും സത്യവിശ്വാസം കൈക്കൊണ്ടവരായില്ല. താങ്കളുടെ നാഥന്‍ പ്രതാപശാലിയും കരുണാമയനും തന്നെയത്രേ.²⁴

ആദ് ഗോത്രം ദൈവദൂതന്മാരെ വ്യാജരാക്കി- നിങ്ങള്‍ അല്ലാഹുവിനെ സൂക്ഷിച്ചു ജീവിക്കുന്നില്ലേ എന്നു സ്വസഹോദരന്‍ ഹൂദ് നബി അവരോടു ചോദിച്ചപ്പോള്‍. ഞാന്‍ നിങ്ങളിലേക്ക് നിയുക്തനായ വിശ്വസ്ത ദൂതന്‍ തന്നെയാണ്; അതുകൊണ്ട് നിങ്ങള്‍ അല്ലാഹുവിനെ സൂക്ഷിക്കുകയും എന്നെ അനുസരിക്കുകയും ചെയ്യുക എന്നദ്ദേഹം പറഞ്ഞ സന്ദര്‍ഭം സ്മരണീയമത്രേ:²⁵
ഇതിന്റെ പേരില്‍ യാതൊരു കൂലിയും നിങ്ങളോട് ഞാന്‍ ചോദിക്കുന്നില്ല; പ്രപഞ്ചനാഥങ്കല്‍ മാത്രമാണ് എന്റെ പ്രതിഫലം. വെറുതെ തന്‍പോരിമ കാട്ടാനായി ഓരോ കുന്നിന്‍പുറത്തും നിങ്ങള്‍ ഗോപുരം പണിയുകയാണോ? ശാശ്വതമായി നിവസിക്കാമെന്നു ധരിച്ച് നിങ്ങള്‍ രമ്യഹര്‍മങ്ങള്‍ നിര്‍മിക്കുകയാണോ? ജനങ്ങളോടു ബലപ്രയോഗം നടത്തുന്നുവെങ്കില്‍ അതിനിഷ്ഠുരന്മാരായാണോ നിങ്ങളതു ചെയ്യുന്നത്? അതുകൊണ്ട് നിങ്ങള്‍ അല്ലാഹുവിനെ സൂക്ഷിക്കുകയും എന്നെ അനുസരിക്കുകയും വേണം. നിങ്ങള്‍ക്കു നന്നായറിയുന്ന പോലെ, കാലികളും സന്താനങ്ങളും ഉദ്യാനങ്ങളും അരുവികളും കനിഞ്ഞേകി നിങ്ങളെ അനുഗ്രഹിച്ച അല്ലാഹുവിനെ സൂക്ഷിച്ചു ജീവിക്കുക; ഭീകരമായ ഒരു നാളിലെ ശിക്ഷ നിങ്ങളെ ബാധിക്കുമെന്നു ഞാന്‍ ഭയപ്പെടുകയാണ്.²⁶

ജനം പ്രതികരിച്ചു: 'നീ ഉപദേശം നല്‍കിയാലും ഇല്ലെങ്കിലും ഞങ്ങള്‍ക്കു തുല്യമാണ്. പൂര്‍വികന്മാരുടെ ആചാര രീതികള്‍ മാത്രമാണ് ഞങ്ങളീ ചെയ്യുന്നത്; തന്മൂലം ഞങ്ങള്‍ ശിക്ഷിക്കപ്പെടുകയൊന്നുമില്ല!' അങ്ങനെ അദ്ദേഹത്തെയവര്‍ നിഷേധിച്ചു തള്ളി. തന്നിമിത്തം അവരെ നാം സംഹരിച്ചു കളഞ്ഞു. ഇതില്‍ വന്‍ ദൃഷ്ടാന്തമുണ്ട്, തീര്‍ച്ച. എന്നാല്‍, മനുഷ്യരില്‍ മിക്കവരും സത്യവിശ്വാസം കൈക്കൊണ്ടവരായില്ല. താങ്കളുടെ നാഥന്‍ കരുണാമയനും പ്രതാപശാലിയും തന്നെയത്രേ.²⁷

സമൂദ് ഗോത്രം ദൈവദൂതന്മാരെ വ്യാജരാക്കി- സ്വന്തം സഹോദരന്‍ സ്വാലിഹ് നബി അവരോട് പറഞ്ഞ സന്ദര്‍ഭം: നിങ്ങള്‍ സൂക്ഷ്മത പുലര്‍ത്തി ജീവിക്കുന്നില്ലേ? ഞാന്‍ നിങ്ങളിലേക്കു നിയുക്തനായ വിശ്വസ്ത ദൂതന്‍ തന്നെയാണ്; അതുകൊണ്ട് നിങ്ങള്‍ അല്ലാഹുവിനെ സൂക്ഷിക്കുകയും എന്നെ അനുസരിക്കുകയും ചെയ്യുക. ഇതിന്റെ പേരില്‍ യാതൊരു കൂലിയും നിങ്ങളോടു ഞാന്‍ ചോദിക്കുന്നില്ല; പ്രപഞ്ചനാഥങ്കല്‍ മാത്രമാണ് എന്റെ പ്രതിഫലം. ഈ ഭൗതിക ജീവിതത്തില്‍ വിശ്വസ്തരായി, ഈ ഉദ്യാനങ്ങളിലും അരുവികളിലും കൃഷിയിടങ്ങളിലും വന്‍കുലകള്‍ തൂങ്ങുന്ന ഈന്തമരങ്ങളിലും വിട്ടേക്കപ്പെടുമെന്നാണോ നിങ്ങളുടെ വിചാരം? ആഹ്ലാദപ്രമത്തരായി മലകള്‍ തുരന്നുവീടുകള്‍ നിര്‍മിക്കയാണോ നിങ്ങള്‍?²⁸

അതുകൊണ്ട് നിങ്ങള്‍ അല്ലാഹുവിനെ സൂക്ഷിക്കുകയും എന്നെ അനുസരിക്കുകയും ചെയ്യുക; നാട്ടില്‍ കുഴപ്പമുണ്ടാക്കുകയും ഒരുവിധ നന്മയും അനുവര്‍ത്തിക്കാതിരിക്കുകയും ചെയ്യുന്ന അതിക്രമകാരികളെ അനുസരിച്ചു പോകരുത്.²⁹

അവര്‍ പ്രതികരിച്ചു: ഒരു മാരണബാധിതന്‍ മാത്രമാണ് നീ. ഞങ്ങളെപ്പോലെ ഒരു കേവല മനുഷ്യനല്ലാതെ നീ മറ്റൊന്നുമല്ല. അതുകൊണ്ട്, സത്യവാനാണു നീയെങ്കില്‍ എന്തെങ്കിലും ദൃഷ്ടാന്തം കൊണ്ടുവാ!³⁰

സ്വാലിഹ് നബി പറഞ്ഞു: ഇതാ, അത്യത്ഭുതകരമായ ഒരൊട്ടകം! അതിന്റെ ജലപാനത്തിന് ഒരു ഊഴമുണ്ട്; നിര്‍ണിത നാളില്‍ നിങ്ങള്‍ക്കുമുണ്ടൊരു ഊഴം. ഒരുവിധ പീഡനവും നിങ്ങളതിന് ഏല്‍പിക്കരുത്. അങ്ങനെ സംഭവിക്കുന്നുവെങ്കില്‍ ഒരു കഠോരനാളിലെ ശിക്ഷ നിങ്ങളെ പിടികൂടുന്നതാണ്. എന്നാല്‍ അവരതിനെ കുത്തിയറുത്തു. അങ്ങനെയവര്‍ നെടുംഖേദത്തിലാണ്ടു. തല്‍ക്ഷണം ശിക്ഷ അവരെ പിടികൂടി.³¹
ഇതില്‍ വലിയ ദൃഷ്ടാന്തമുണ്ട്, തീര്‍ച്ച; പക്ഷേ, മനുഷ്യരില്‍ മിക്കവരും വിശ്വാസം കൈവരിക്കുന്നവരായില്ല. നിശ്ചയം, താങ്കളുടെ നാഥന്‍ തന്നെയത്രേ പ്രതാപശാലിയും കരുണാമയനും.³²

ലൂത്ത് നബിയുടെ ഗോത്രവും ദൈവദൂതന്മാരെ വ്യാജരാക്കി-തങ്ങളുടെ സോദരന്‍ ലൂത്ത് നബി അവരോട് ഉണര്‍ത്തിയ സന്ദര്‍ഭം സ്മരണീയമത്രേ: നിങ്ങള്‍ അല്ലാഹുവിനെ സൂക്ഷിക്കുന്നില്ലേ? നിങ്ങളിലേക്കുള്ള വിശ്വസ്ത ദൂതന്‍ തന്നെയാണു ഞാന്‍. അതുകൊണ്ട് നിങ്ങള്‍ അല്ലാഹുവിനെ സൂക്ഷിക്കുകയും എന്നെ അനുസരിക്കുകയും ചെയ്യുക. ഈ ദൗത്യനിര്‍വഹണത്തിന് ഒരുവിധ പ്രതിഫലവും നിങ്ങളോടു ഞാനാവശ്യപ്പെടുന്നില്ല. പ്രപഞ്ചസംരക്ഷകന്റെയടുത്താണ് എന്റെ പ്രതിഫലം. നിങ്ങള്‍ മാലോകരില്‍ നിന്ന് ആണുങ്ങളെ പ്രാപിക്കുകയും, നാഥന്‍ നിങ്ങള്‍ക്ക് സൃഷ്ടിച്ചുണ്ടാക്കിയ പെണ്ണിണകളെ വര്‍ജിക്കുകയുമാണോ? അല്ല, അതിക്രമികളായൊരു കൂട്ടര്‍ തന്നെയത്രേ നിങ്ങള്‍!³³

അവര്‍ ആക്രോശിച്ചു: ലൂത്തേ, ഇപ്പണി നിര്‍ത്തുന്നില്ലെങ്കില്‍ നിന്നെ ഞങ്ങള്‍ നാട്ടില്‍ നിന്ന് പുറത്താക്കുക തന്നെ ചെയ്യുന്നതാണ്! അദ്ദേഹം പ്രതികരിച്ചു: നിങ്ങളുടെ ഈ ഹീനവൃത്തിയോട് എനിക്ക് വല്ലാത്ത വിദ്വേഷം തന്നെയുണ്ട്. 'നാഥാ, എന്നെയും കുടുംബത്തെയും ഇവരുടെ ഹീനവൃത്തിയില്‍ നിന്ന് നീ രക്ഷപ്പെടുത്തേണമേ!' അങ്ങനെ അദ്ദേഹത്തെയും കുടുംബത്തെയും ഒന്നടങ്കം-പിന്തിരിഞ്ഞുനിന്ന ഒരു വൃദ്ധയൊഴിച്ച്-³⁴
നാം രക്ഷപ്പെടുത്തി. പിന്നെ ശേഷിച്ചവരെ നാം സംഹരിച്ചുകളഞ്ഞു. അവര്‍ക്കു മീതെ നാമൊരു മഴ വര്‍ഷിപ്പിച്ചു. ഭീഷണിപ്പെടുത്തപ്പെട്ടിരുന്ന ആ സമൂഹത്തിനു മീതെ ചൊരിഞ്ഞ ആ മഴ എത്രമേല്‍ ഹീനം!³⁵
ഇതില്‍ വലിയ ദൃഷ്ടാന്തമുണ്ട്, തീര്‍ച്ച. പക്ഷേ, മനുഷ്യരില്‍ മിക്കവരും വിശ്വാസം വരിക്കുന്നവരായില്ല. നിശ്ചയം, താങ്കളുടെ നാഥന്‍ തന്നെയത്രേ പ്രതാപശാലിയും കരുണാമയനും.

ഐക്കത്തു കാരും ദൈവദൂതന്മാരെ വ്യാജരാക്കി.³⁶
ശുഐബ് നബി അവരോട് ഉണര്‍ത്തിയ ഘട്ടം സ്മരണീയമത്രേ: നിങ്ങള്‍ അല്ലാഹുവിനെ സൂക്ഷിക്കുന്നില്ലേ? നിങ്ങളിലേക്കുള്ള വിശ്വസ്ത ദൂതന്‍ തന്നെയാണു ഞാന്‍. അതുകൊണ്ട് നിങ്ങള്‍ അല്ലാഹുവിനെ സൂക്ഷിക്കുകയും എന്നെ അനുസരിക്കുകയും ചെയ്യുക. ഈ ദൗത്യനിര്‍വഹണത്തിനു ഒരുവിധ പ്രതിഫലവും നിങ്ങളോട് ഞാനാവശ്യപ്പെടുന്നില്ല. പ്രപഞ്ചസംരക്ഷകന്റെയടുത്താണ് എന്റെ പ്രതിഫലം. നിങ്ങള്‍ അളവ് പൂര്‍ണമായി നല്‍കണം; ആളുകള്‍ക്ക് നഷ്ടം വരുത്തുന്നവരാകരുത്; നേരെചൊവ്വേയുള്ള ത്രാസ് കൊണ്ട് വേണം തൂക്കാന്‍. ആളുകള്‍ക്ക് അവരുടെ വസ്തുക്കളില്‍ കുറവ് വരുത്തരുത്. വിനാശകാരികളായി നിങ്ങള്‍ നാട്ടില്‍ അതിക്രമം കാട്ടരുത്. നിങ്ങളെയും പൂര്‍വിക തലമുറകളെയും പടച്ച നാഥനെ സൂക്ഷിക്കുക.³⁷

അവര്‍ പ്രതികരിച്ചു: ഒരു മാരണബാധിതന്‍ മാത്രമാണു നീ; ഞങ്ങളെപ്പോലെ ഒരു കേവല മനുഷ്യനല്ലാതെ മറ്റാരുമല്ല. നീ നുണയന്മാരില്‍ പെട്ടവന്‍ തന്നെയാണെന്നാണ് ഞങ്ങള്‍ മനസ്സിലാക്കുന്നത്. അതുകൊണ്ട് സത്യവാദിയാണെങ്കില്‍ ആകാശത്തിന്റെ കഷ്ണങ്ങള്‍ ഞങ്ങള്‍ക്കു മീതെ വീഴ്ത്തൂ!³⁸

ശുഐബ് നബി പ്രതികരിച്ചു: നിങ്ങളുടെ ദുഷ്‌ചെയ്തികളെക്കുറിച്ച് എന്റെ നാഥന്‍ സൂക്ഷ്മജ്ഞനത്രേ. അങ്ങനെ അദ്ദേഹത്തെയവര്‍ വ്യാജനാക്കി. തന്മൂലം മേഘത്താല്‍ ആവരണം ചെയ്തനാളിന്റെ ഘോരശിക്ഷ അവരെ ബാധിച്ചു.³⁹
ഒരു ഭയാനക നാളിന്റെ കഠോരശിക്ഷ തന്നെയായിരുന്നു അത്. ഇതില്‍ വലിയ ദൃഷ്ടാന്തമുണ്ട്, തീര്‍ച്ച. പക്ഷേ, മനുഷ്യരില്‍ മിക്കവരും വിശ്വാസം വരിക്കുന്നവരായില്ല. നിശ്ചയം, താങ്കളുടെ നാഥന്‍ തന്നെയത്രേ പ്രതാപശാലിയും കരുണാമയനും.

നിശ്ചയം, ഈ ഖുര്‍ആന്‍ പ്രപഞ്ചനാഥന്‍ അവതരിപ്പിച്ചത് തന്നെയാണ്! അങ്ങയുടെ ഹൃദയത്തില്‍ ജിബ്‌രീല്‍ അതുമായി ഇറങ്ങിയിരിക്കുന്നു. സ്ഫുടമായ അറബി ഭാഷയില്‍ താക്കീതു നല്‍കുന്നവരില്‍ താങ്കള്‍ ആയിരിക്കാന്‍ വേണ്ടിയത്രേ അത്. പൂര്‍വഗാമികളുടെ വേദങ്ങളിലും ഖുര്‍ആന്റെ പരാമര്‍ശങ്ങളുണ്ട്.⁴⁰
ഇസ്രയേലീ വിദ്വാന്മാര്‍ക്ക് ഇതിനെപ്പറ്റി അറിയാമെന്ന വസ്തുത ഈ നിഷേധികള്‍ക്കെന്താണ് ദൃഷ്ടാന്തമാകാത്തത്? ഏതെങ്കിലും ഒരു അനറബിക്ക് നാം ഇതവതരിപ്പിക്കുകയും അയാള്‍ അവര്‍ക്കത് പാരായണം ചെയ്തുകൊടുക്കുകയും ചെയ്തിരുന്നുവെങ്കില്‍ അതിലവര്‍ ഒട്ടുമേ വിശ്വസിക്കുമായിരുന്നില്ല.⁴¹

അധര്‍മകാരികളുടെ ഹൃദയത്തില്‍ ഇങ്ങനെയാണ് നാം ഖുര്‍ആന്‍ സന്നിവേശിപ്പിച്ചത്- കഠിനശിക്ഷ വന്നെത്തുന്നതു വരെയും അവരത് വിശ്വസിക്കയില്ല. അങ്ങനെ, നിനച്ചിരിക്കാത്തവിധം യദൃച്ഛയാ ശിക്ഷ വന്നെത്തുമ്പോള്‍ 'ഞങ്ങള്‍ക്കല്‍പം അവധി കിട്ടുമോ' എന്നവര്‍ കേഴും. എന്നിട്ടും നമ്മുടെ ശിക്ഷയ്ക്ക് ധൃതി കൂട്ടുകയാണോ അവര്‍?!⁴²

നിങ്ങളൊന്നു പറയൂ- നാമവര്‍ക്ക് നീണ്ട വര്‍ഷങ്ങള്‍ സുഖാസ്വാദനങ്ങള്‍ നല്‍കുകയും തദനന്തരം, താക്കീതു നല്‍കപ്പെട്ടിരുന്ന ശിക്ഷ അവരെ പിടികൂടുകയും ചെയ്യുന്നുവെങ്കില്‍, ആ സുഖസൗകര്യങ്ങള്‍ യാതൊരു നേട്ടവും അവര്‍ക്ക് കൈവരിച്ചു കൊടുക്കുമായിരുന്നില്ല.⁴³

താക്കീതു നല്‍കുന്നവരുണ്ടായിട്ടല്ലാതെ ഒരു നാടും നാം സംഹരിച്ചിട്ടില്ല- ആ സംഹരണം തന്നെ മറ്റുള്ളവര്‍ക്ക് ഉദ്‌ബോധനമായിട്ടാണ്; നാം അക്രമമനുവര്‍ത്തിക്കുന്നവരായിട്ടില്ല. ഈ ഖുര്‍ആനുമായി പിശാചുക്കള്‍ ഇറങ്ങിവന്നിട്ടില്ല; അവര്‍ക്കത് പാടില്ലാത്തതാണ്, സാധിക്കുന്നതുമല്ല. നിശ്ചയം, ദിവ്യസന്ദേശ ശ്രവണത്തില്‍ നിന്നു ദൂരീകൃതരത്രേ അവര്‍.⁴⁴

അതുകൊണ്ട്, അല്ലാഹുവൊന്നിച്ച് മറ്റൊരു ദൈവത്തെയും താങ്കള്‍ ആരാധിക്കരുത്. അങ്ങനെ ചെയ്താല്‍ അങ്ങ് ശിക്ഷാവിധേയനാകും. അടുത്ത ബന്ധുക്കള്ക്ക്് താങ്കള്‍ താക്കീതുനല്കുടകയും അനുധാവനം ചെയ്ത സത്യവിശ്വാസികളോട് ആര്ദ്രക സമീപനം പുലര്ത്തു കയും ചെയ്യുക; ഇനി അവര്‍ അനുസരണരാഹിത്യം കാട്ടുന്നുവെങ്കില്‍ 'നിങ്ങളുടെ ചെയ്തികളില്‍ നിന്ന് ഞാനൊഴിവാണ്' എന്നു പറയുക.⁴⁷

നമസ്‌കരിക്കുമ്പോള്‍ നിറുത്തത്തിലും സുജൂദിലാകുമ്പോഴുമൊക്കെ താങ്കളെ കണ്ടുകൊണ്ടിരിക്കുന്ന കരുണാമയനും പ്രതാപശാലിയുമായ അല്ലാഹുവിന്റെ മേല്‍ മുഴുകാര്യങ്ങളും ഭരമേല്പിിക്കുക. നിശ്ചയം, സര്വംജ ശ്രദ്ധിക്കുന്നവനും അറിയുന്നവനുമത്രേ അവന്‍.⁴⁸

നബീ, പ്രഖ്യാപിക്കുക: പിശാചുക്കളുടെ അവരോഹണം ആരിലേക്കാണുണ്ടാവുക എന്ന് നിങ്ങള്ക്ക്ല ഞാനറിയിച്ചു തരട്ടെയോ? മഹാവ്യാജരും കുറ്റവാളികളുമായ സകലരുടെ മേലും പിശാച് ഇറങ്ങുന്നതാണ്. തങ്ങള്‍ കേട്ടത് മറ്റുള്ളവരിലേക്കവര്‍ നിക്ഷേപിക്കുന്നു; എന്നാല്‍ മിക്കവരും നുണയന്മാരാണ്. കവികളോ, അവരെ അനുധാവനം ചെയ്യുക ദുര്മാപര്ഗിലകളാണ്. താങ്കള്ക്കരറിയാമല്ലോ, അവര്‍ സര്വമതാഴ്‌വരകളിലും അലഞ്ഞുതിരിഞ്ഞു നടക്കുകയും അനുവര്തിര ക്കാത്തത് പറയുകയും ചെയ്യും

എന്നാല്‍ സത്യവിശ്വാസം കൈക്കൊള്ളുകയും സല്‍കര്‍മങ്ങളനുഷ്ഠിക്കുകയും അല്ലാഹുവിനെ അനല്‍പമായനുസ്മരിക്കുകയും അക്രമവിധേയരായതിനു ശേഷമായി ആത്മസുരക്ഷാ നടപടികള്‍ കൈക്കൊള്ളുകയും ചെയ്തവര്‍ ഇവരില്‍ പെടില്ല.⁴⁵
തങ്ങളുടെ തിക്തമായ പരിണതി എന്തായിരിക്കുമെന്ന് അക്രമകാരികള്‍ക്ക് അനുഭവബോധ്യമായിക്കൊള്ളുന്നതാണ്.⁴⁶