അൽ ഫുർഖാൻ - الفرقان - Al-Furqan

തന്റെ അടിമ മുഹമ്മദ് നബിക്ക്-അവിടന്ന് ലോകര്‍ക്കു താക്കീതുകാരനാവാന്‍ വേണ്ടി-സത്യാസത്യ വിവേചക വേദം അവതരിപ്പിച്ചവന്‍ അനുഗ്രഹപൂര്‍ണനത്രേ. ഭുവന-വാനങ്ങളുടെ അധിപനും സന്താനത്തെ വരിക്കാത്തവനും രാജാധികാരത്തില്‍ ഒരുവിധ പങ്കാളിയുമില്ലാത്തവനുമാണ് അല്ലാഹു. അവന്‍ സമസ്ത വസ്തുക്കളെയും സൃഷ്ടിക്കുകയും ശരിയായ രീതിയില്‍ വ്യവസ്ഥപ്പെടുത്തുകയും ചെയ്തിരിക്കുന്നുചെയ്തിരിക്കുന്നു¹

അല്ലാഹുവല്ലാത്ത മറ്റുപല ദൈവങ്ങളെയും അവര്‍ വരിച്ചു; അവ യാതൊന്നിനെയും സൃഷ്ടിക്കുന്നില്ല! അവതന്നെ പടച്ചുണ്ടാക്കപ്പെട്ടിരിക്കുകയാണ്. സ്വന്തത്തിനു പോലും ഉപകാരമോ ഉപദ്രവമോ അവ സ്വായത്തമാക്കുന്നില്ല; മരണമോ ജീവിതമോ ഉയിര്‍ത്തെഴുന്നേല്‍പോ അധീനമാക്കുന്നില്ല.²

ഖുര്‍ആന്‍ മുഹമ്മദ് കെട്ടിച്ചമച്ച വ്യാജം മാത്രമാണ്, മറ്റുചിലര്‍ അതിനവനെ സഹായിച്ചിട്ടുമുണ്ട് എന്ന് സത്യനിഷേധികള്‍ ജല്‍പിച്ചു. ന്യായരഹിതവും നുണയുമായ പ്രസ്താവം മാത്രമാണവര്‍ നടത്തിയിരിക്കുന്നത്! പൂര്‍വികരുടെ കെട്ടുകഥകളാണിത്, അതവന്‍ രേഖപ്പെടുത്തിവെച്ചിരിക്കയാണ്; എന്നിട്ട് പ്രഭാത-പ്രദോഷങ്ങളില്‍ അതവന്ന് വായിച്ചുകൊടുക്കപ്പെടുകയാണ് എന്നും അവര്‍ തട്ടിവിട്ടു.³

നബീ, പ്രഖ്യാപിക്കുക: ഭുവന-വാനങ്ങളിലെ രഹസ്യങ്ങളറിയുന്നവനാണ് ഇതവതരിപ്പിച്ചത്. ഏറെ പൊറുക്കുന്നവനും കരുണാമയനുമത്രേ അവന്‍.

നിഷേധികള്‍ ജല്‍പിച്ചു: ഇതെന്തു റസൂല്‍? ഇയാള്‍ ആഹാരം കഴിക്കുകയും അങ്ങാടികളില്‍ നടക്കുകയും ചെയ്യുന്നുണ്ടല്ലോ. താനൊന്നിച്ചൊരു മുന്നറിയിപ്പുകാരനായിരിക്കുമാറ് ഒരു മാലാഖയെ ഇയാളിലേക്കിറക്കപ്പെടാത്തതെന്ത്? അഥവാ എന്തുകൊണ്ടിയാള്‍ക്ക് ഒരു നിക്ഷേപം നല്‍കപ്പെടുന്നില്ല? അല്ലെങ്കില്‍ ഫലഭോജനത്തിനുതകുംവിധം ഒരു തോട്ടമുണ്ടാകുന്നില്ല? ആഭിചാരവിധേയനായൊരു വ്യക്തിയെ മാത്രമാണ് നിങ്ങള്‍ പിന്‍പറ്റുന്നത് എന്ന് അക്രമികള്‍ തട്ടിവിട്ടു.⁴

എന്തൊക്കെ ഉപമകളാണ് അങ്ങയെക്കുറിച്ച് നിഷേധികള്‍ നിരത്തിയതെന്ന് നോക്കൂ; അങ്ങനെയവര്‍ വഴിതെറ്റിപ്പോയി. അതിനാല്‍ അവര്‍ക്ക് സന്മാര്‍ഗം കണ്ടെത്തുവാന്‍ ഒട്ടുമേ ആകില്ല. ഒരു നാഥന്‍ അനുഗ്രഹപൂര്‍ണനത്രേ-അവനുദ്ദേശിച്ചിരുന്നുവെങ്കില്‍ അവരുന്നയിച്ച ഭൗതിക വിഭവങ്ങളെക്കാള്‍ ഉദാത്തമായത്, അഥവാ അടിയിലൂടെ ആറുകളൊഴുകുന്ന ആരാമങ്ങളും കൊട്ടാരങ്ങളും താങ്കള്‍ക്കവന്‍ നിര്‍മിച്ചു തരും.⁵

അല്ല, അന്ത്യനാളിനെ നിഷേധിക്കയാണവര്‍ ചെയ്യുന്നത്; അതിനെ വ്യാജമാക്കുന്നവര്‍ക്ക് നാം നരകം സജ്ജീകരിച്ചിട്ടുണ്ട്. അതവരെ വിദൂരതയില്‍ വെച്ച് കാണുമ്പോള്‍ തന്നെ ക്ഷോഭിച്ചു പ്രകമ്പിതമാകുന്നതും ഇരമ്പുന്നതും അവര്‍ കേള്‍ക്കുന്നതാണ്. അതിലെ കുടുസ്സായൊരിടത്ത് വിലങ്ങുകളില്‍ ബന്ധിതരായി വലിച്ചെറിയപ്പെട്ടാല്‍ അഹോ, എന്തൊരു നാശം എന്നവര്‍ വിളിച്ചുകേഴും. (തത്സമയ മറുപടിയുണ്ടാകും:) ഇവിടെ ഒരു നാശത്തെയല്ല, ഒട്ടേറെ നാശങ്ങളെ വിളിച്ചോളൂ!⁶

നബീ, ചോദിക്കുക: ഇതാണോ ഉദാത്തം; അതോ സൂക്ഷ്മാലുക്കള്‍ക്കുള്ള വാഗ്ദത്ത നിത്യസ്വര്‍ഗമോ? അവര്‍ക്കുള്ള പ്രതിഫലവും ആവാസകേന്ദ്രവുമതാണ്; തങ്ങളിച്ഛിക്കുന്നതെന്തും അവിടെയുണ്ട്. അതിലവര്‍ ശാശ്വത നിവാസികളായിരിക്കും. അപേക്ഷിക്കപ്പെടാവുന്നതും താങ്കളുടെ നാഥന്‍ ഏറ്റെടുത്ത വാഗ്ദാനവുമാണത്.

ആ നിഷേധികളെയും അല്ലാഹുവിനെ വിട്ട് അവര്‍ ആരാധിക്കുന്നവയെയും അവന്‍ സംഗമിപ്പിക്കുന്ന ദിനം സ്മരണീയമത്രേ. എന്നിട്ടവന്‍ ആരാധ്യരോടു ചോദിക്കും: നിങ്ങളാണോ എന്റെ ഈ അടിമകളെ വഴിതെറ്റിച്ചത്, അതോ അവര്‍ക്ക് സ്വയം മാര്‍ഗഭ്രംശം സംഭവിച്ചതോ? ആരാധ്യര്‍ പ്രതികരിക്കും: നീ എത്ര പരിശുദ്ധന്‍! നീയല്ലാത്ത മറ്റു രക്ഷാധികാരികളെ വരിക്കുക എന്നത് ഞങ്ങള്‍ക്ക് ഉചിതമല്ല. എന്നാല്‍ അവര്‍ക്കും അവരുടെ പൂര്‍വികര്‍ക്കും നീ സുഖാസ്വാദനങ്ങളേകി. അങ്ങനെയവര്‍ ഉദ്‌ബോധനം വിസ്മരിക്കുകയും നശിച്ച ഒരു ജനവിഭാഗമായിത്തീരുകയും ചെയ്തു.

(തല്‍സമയം, ആരാധകരോട് അല്ലാഹു പറയും:) നിങ്ങളുടെ ജല്‍പനം ഇവര്‍ നിഷേധിച്ചിരിക്കുന്നു. ശിക്ഷ തിരിച്ചുവിടാനോ എന്തെങ്കിലും സഹായം നേടാനോ ഇനി നിങ്ങള്‍ക്കു കഴിയുന്നതല്ല! നിങ്ങളില്‍ അക്രമം ചെയ്തവരാരോ അവര്‍ക്ക് നാം കഠിന ശിക്ഷ ആസ്വദിപ്പിക്കും⁷

ആഹാരം കഴിക്കുകയും അങ്ങാടികളിലൂടെ സഞ്ചരിക്കുകയും ചെയ്യുന്നവരായി മാത്രമേ അങ്ങേക്കു മുമ്പ് ഏതൊരു ദൂതനെയും നാമയച്ചിട്ടുള്ളൂ. നിങ്ങളില്‍ ചിലരെ മറ്റു ചിലര്‍ക്ക് നാമൊരു പരീക്ഷണമാക്കും-നിങ്ങള്‍ ക്ഷമ കൈക്കൊള്ളുമോ എന്ന് നിരീക്ഷിക്കാനാണത്. താങ്കളുട നാഥന്‍ സസൂക്ഷ്മം കാണുന്നവനത്രേ.⁸

നാമുമായുള്ള കൂടിക്കാഴ്ചയില്‍ വിശ്വാസമില്ലാത്തവര്‍ തട്ടിവിട്ടു: 'നമ്മിലേക്ക് മലക്കുകള്‍ ഇറക്കപ്പെടാത്തതെന്ത്, നാം രക്ഷിതാവിനെ നേരില്‍ കാണാതിരിക്കുന്നതെന്ത്?' നിശ്ചയം, അവര്‍ സ്വയം അഹങ്കാരം നടിക്കുകയും കടുത്ത ധിക്കാരം കാട്ടുകയുമാണ് ചെയ്തിരിക്കുന്നത്.⁹
മലക്കുകളെ അവര്‍ കാണുന്ന ദിനം (വരുന്നുണ്ട്;) അധര്‍മകാരികള്‍ക്ക് അന്നേ ദിവസം യാതൊരു ശുഭ വാര്‍ത്തയുമുണ്ടാകില്ല. 'കര്‍ശന വിലക്ക് ' എന്നാണവരോട് മലക്കുകള്‍ ആക്രോശിക്കുക. അവരനുവര്‍ത്തിച്ച കര്‍മങ്ങളിലേക്കു നാം തിരിയുന്നതും അവ വിതറപ്പെട്ട ധൂളിപോലെയാകുന്നതുമാണ്.¹⁰
അന്ന് ഉദാത്തമായ വാസസ്ഥലവും മെച്ചപ്പെട്ട വിശ്രമസങ്കേതവുമുള്ളവര്‍ സ്വര്‍ഗക്കാരായിരിക്കും.

ആകാശം പൊട്ടിപ്പിളര്‍ന്ന് വെളുത്ത ലോല മേഘം ബഹിര്‍ഗമിക്കുകയും കൂട്ടം കൂട്ടമായി മലക്കുകള്‍ ഇറക്കപ്പെടുകയും ചെയ്യുന്ന ദിനം സംഭ്രമ ജനകമത്രേ. യഥാര്‍ത്ഥ മേല്‍ക്കോയ്മ അന്ന് കരുണാമയനായ അല്ലാഹുവിന്നായിരിക്കും. സത്യനിഷേധികള്‍ക്ക് അത്യന്തം കഠോരമായ ദിവസമാകും അത്¹¹

ആ അധര്‍മകാരി തന്റെ കൈകള്‍ കടിക്കുന്ന നാള്‍ സ്മരണീയമത്രേ. അവന്‍ സങ്കടപ്പെടും: റസൂലിന്റെയൊപ്പം ഞാനാമാര്‍ഗം സ്വീകരിച്ചിരുന്നുവെങ്കില്‍...! ഹാ, കഷ്ടം, ഇന്നയാളെ ഞാന്‍ മിത്രമാക്കിയിട്ടില്ലായിരുന്നുവെങ്കില്‍...! ഖുര്‍ആനിക സന്ദേശം കൈവന്ന ശേഷം അതില്‍ നിന്ന് എന്നെ വഴിതെറ്റിച്ചത് അവനായിരുന്നു. മനുഷ്യനെ ദുര്‍മാര്‍ഗിയാക്കുന്നവനത്രേ പിശാച്.¹²

അന്ന് ദൈവദൂതന്‍ പരിഭവിക്കും: 'നാഥാ, എന്റെ ജനം ഈ ഖുര്‍ആനെ അവഗണിച്ചിരിക്കുന്നു.' അങ്ങനെ, ഓരോ പ്രവാചകന്നും അധര്‍മകാരികളില്‍ നിന്നു ചില പ്രതിയോഗികളെ നാം നിശ്ചയിച്ചിട്ടുണ്ട്. വഴികാട്ടിയും സഹായിയുമായി താങ്കള്‍ക്കു നാഥന്‍ തന്നെ ധാരാളം!¹³

സത്യനിഷേധികള്‍ ജല്‍പിച്ചു: 'ഇയാള്‍ക്ക് ഒറ്റത്തവണയായി ഖുര്‍ആന്‍ അവതീര്‍ണമാകാത്തതെന്ത്?' എന്നാല്‍, താങ്കളുടെ ഹൃദയത്തെ ദൃഢീകരിക്കാനായി, അത് ഇങ്ങനെത്തന്നെയാണ് ഇറക്കേണ്ടത്. വ്യത്യസ്ത ഘട്ടങ്ങളിലായി അവധാനതയോടെ നാമതവതരിപ്പിച്ചു. ഏതു ഉപമയുമായി താങ്കളുടെയടുത്ത് നിഷേധികള്‍ വരികയാണെങ്കിലും (അതിന്റെ മുനയൊടിക്കുന്ന) ഉദാത്ത പ്രതിപാദനമുള്ള സത്യമായ മറുപടി താങ്കള്‍ക്കു നാമവതരിപ്പിച്ചുതരാതിരിക്കില്ല. മുഖംകുത്തി ഇഴഞ്ഞു നരകത്തിലേക്ക് തെളിക്കപ്പെടുന്നവരാണ് ഏറ്റം ഹീനസ്ഥലത്തുള്ളവരും മാര്‍ഗഭ്രംശം സംഭവിച്ചവരും.¹⁴

മൂസാനബിക്കു നാം വേദഗ്രന്ഥം നല്‍കുകയും സഹോദരന്‍ ഹാറൂന്‍ നബിയെ താനൊന്നിച്ച് സഹായിയായി നിശ്ചയിക്കുകയും 'നമ്മുടെ ദൃഷ്ടാന്തങ്ങളെ വ്യാജമാക്കിയ ഒരു ജനതയിലേക്ക് നിങ്ങളിരുവരും പോകുകക' എന്ന് അനുശാസിക്കുകയും ചെയ്തു. പിന്നീട് ആ ജനസഞ്ചയത്തെ നാം തകര്‍ത്തു തരിപ്പണമാക്കി.¹⁵

ദൈവദൂതന്മാരെ വ്യാജരാക്കി തള്ളിയപ്പോള്‍ നൂഹ് നബിയുടെ ജനത്തെയും നാം മുക്കി നശിപ്പിക്കുകയും അവരെ മാനുഷ്യകത്തിന് ദൃഷ്ടാന്തമാക്കുകയും ചെയ്തു. അതിക്രമകാരികള്‍ക്ക് വേദനയുറ്റ പാരത്രിക ശിക്ഷ നാം സജ്ജീകരിച്ചിട്ടുണ്ട്. ആദ്-സമൂദ്-റസ്സ് സമുദായങ്ങളെയും അവയ്ക്കിടയില്‍ വിവിധ തലമുറകളെയും നം സംഹരിച്ചിട്ടുണ്ട്-സര്‍വര്‍ക്കും ഉപമകള്‍ നാം പ്രതിപാദിച്ചു നല്‍കിയിരുന്നു; അവ നിഷേധിച്ചപ്പോള്‍ നാമവരെ ഉന്മൂലനം ചെയ്തു.¹⁶

ഹീനമായ ആ പേമാരി വര്‍ഷിച്ച പ്രദേശത്തുകൂടി അവര്‍ വന്നിട്ടുണ്ട്; എന്നിട്ടും അവരത് വീക്ഷിച്ചിരുന്നില്ലേ?¹⁷
അല്ല, പുനരുത്ഥാനത്തില്‍ വിശ്വാസമില്ലാത്തവരായിരുന്നു അവര്‍. അല്ലാഹു റസൂലായി നിയോഗിച്ചിട്ടുള്ളത് ഇവനെയാണോ എന്ന് അങ്ങയെ കേവലം പരിഹാസ പാത്രമാക്കി ചോദിക്കുക മാത്രമാണവര്‍ ചെയ്യുക.¹⁸
'നമ്മുടെ ആരാധ്യരുടെ വിഷയത്തില്‍ ക്ഷമാപൂര്‍വം ഉറച്ചു നിന്നിട്ടില്ലെങ്കില്‍ ഇവന്‍ നമ്മെ മാര്‍ഗഭ്രഷ്ടരാക്കിയേക്കുക തന്നെ ചെയ്യും' എന്നും അവര്‍ ജല്‍പിച്ചു. എന്നാല്‍, പാരത്രിക ശിക്ഷ നേരില്‍ കാണുമ്പോള്‍, ഏറ്റവും വഴിതെറ്റിയവര്‍ ആരാണെന്നവര്‍ക്ക് ബോധ്യപ്പെടും.

സ്വന്തം ദേഹേച്ഛയെ ദൈവമാക്കിയവനെക്കുറിച്ച് താങ്കള്‍ ചിന്തിച്ചിരിക്കുന്നുവോ? അവന്റെ വക്കാലത്തേല്‍ക്കാന്‍ അങ്ങേക്കാകുമോ? അവരില്‍ മിക്കവരും ശ്രവിക്കുകയോ ഗ്രഹിക്കുകയോ ചെയ്യുന്നുണ്ടെന്നു താങ്കള്‍ ധരിക്കുന്നുണ്ടോ? വെറും കാലികളെപ്പോലെ-അല്ല, അവയെക്കാള്‍ വഴിപിഴച്ചവര്‍-മാത്രമാണ് അവര്‍.¹⁹

താങ്കളുടെ നാഥന്‍ നിഴലിനെ നീട്ടിപ്പരത്തിത്തരുന്നത് ഏതുപ്രകാരമാണെന്ന് ചിന്തിച്ചുനോക്കിയിട്ടില്ലേ? താനുദ്ദേശിച്ചിരുന്നുവെങ്കില്‍ അതിനെയവന്‍ ചലിക്കാത്തതാക്കുമായിരുന്നു. പിന്നീട് സൂര്യനെ ആ നിഴലിന്റെ അടയാളമാക്കി; പിന്നെ നമ്മിലേക്കതിനെ അല്‍പാല്‍പമായി ചുരുക്കിക്കൊണ്ടുവരുന്നു.²⁰

നിങ്ങള്‍ക്കായി രാത്രിയെ ഒരു വസ്ത്രവും നിദ്രയെ വിശ്രമവുമാക്കിത്തന്നവന്‍ അല്ലാഹുവത്രേ; പകലിനെ അവന്‍ നവോന്മേഷ ഘട്ടവുമാക്കി. തന്റെ കാരുണ്യത്തിനു മുന്നോടിയായി കാറ്റുകളെ ശുഭസൂചകമായി അയച്ചതും അവനാണ്. നിര്‍ജീവ പ്രദേശങ്ങള്‍ക്ക് സജീവത നല്‍കുവാനും നാം പടച്ച ഒട്ടേറെ കാലികള്‍ക്കും മനുഷ്യര്‍ക്കും കുടിപ്പിക്കാനുമായി അന്തരീക്ഷത്തില്‍ നിന്നു ശുദ്ധജലം നാം വര്‍ഷിക്കുകയുമുണ്ടായി.²¹

മനുഷ്യര്‍ ചിന്തിക്കുന്നതിനായി സത്യസന്ദേശങ്ങള്‍ അവര്‍ക്കിടയില്‍ നാം പ്രചരിപ്പിച്ചു; എന്നാല്‍ മിക്കവര്‍ക്കും കൃതഘ്‌നരാകാനേ കഴിഞ്ഞുള്ളൂ! നാമുദ്ദേശിച്ചിരുന്നുവെങ്കില്‍ ഓരോ നാട്ടിലേക്കും ഓരോ താക്കീതുകാരനെ അയച്ചേനെ. അതുകൊണ്ട്, സത്യനിഷേധികളെ താങ്കള്‍ അനുസരിച്ചുപോകരുത്; ഈ ഖുര്‍ആന്‍ കൊണ്ട് അവരുമായി വന്‍ ജിഹാദ് നടത്തുക.²²

രണ്ടു ജലാശയങ്ങള്‍-ഒന്നു തെളിഞ്ഞ ശുദ്ധ വെള്ളവും മറ്റേത് കവര്‍പ്പുള്ള ഉപ്പുവെള്ളവും-കൂട്ടിക്കലര്‍ത്തിയത് അല്ലാഹുവാണ്. ശക്തമായൊരു മറയും കരുത്തുള്ളൊരു തടസ്സവും അവരണ്ടിനുമിടയ്ക്ക് അവനുണ്ടാക്കുകയും ചെയ്തു. ഇന്ദ്രിയത്തില്‍ നിന്ന് മനുഷ്യനെ പടക്കുകയും എന്നിട്ടവനെ രക്തബന്ധവും വൈവാഹികബന്ധവുമുള്ളവനാക്കുകയും ചെയ്തതും അവനത്രേ. താങ്കളുടെ നാഥന്‍ ഏറെ കഴിവുറ്റവനാകുന്നു.²³

അല്ലാഹുവിനെ വിട്ട്, താങ്കള്‍ക്ക് ഉപകാരമോ ഉപദ്രവമോ ചെയ്യാനാകാത്തവയെ അവര്‍ ആരാധിക്കുന്നു. സത്യനിഷേധി തന്റെ രക്ഷിതാവിനെതിരെ പിശാചിനെ സഹായിക്കുന്നവനായിരിക്കുകയാണ്!²⁴

നബീ, ശുഭവാര്‍ത്താവാഹകനും താക്കീതുകാരനും മാതമായാണ് താങ്കളെ നാം അയച്ചിരിക്കുന്നത്. അങ്ങ് പ്രഖ്യാപിക്കുക: ഈ സത്യസന്ദേശപ്രചാരണത്തിന്ന് ഒരു പ്രതിഫലവും നിങ്ങളോട് നാം ആവശ്യപ്പെടുന്നില്ല; തന്റെ നാഥങ്കലേക്കുള്ള മാര്‍ഗം സ്വീകരിക്കണമെന്ന് ആരെങ്കിലും ഉദ്ദേശിക്കുന്നുവെങ്കില്‍ അതാകാമെന്നു മാത്രം.²⁵

അമരനായി, എന്നും ജീവിച്ചിരിക്കുന്ന അല്ലാഹുവിനെ താങ്കള്‍ കാര്യങ്ങളൊക്കെയും ഭരമേല്‍പിക്കുക. അവനെ സ്തുതിച്ചുകൊണ്ട് പ്രകീര്‍ത്തിക്കുക. തന്റെ അടിമകളുടെ കുറ്റകൃത്യങ്ങളെപ്പറ്റി സൂക്ഷ്മജ്ഞാനിയായി അവന്‍ തന്നെ ധാരാളം! ഭുവന-വാനങ്ങളും അവക്കിടയിലുള്ളതും ആറു നാളുകളിലായി പടച്ചുണ്ടാക്കിയവനത്രേ അവന്‍; പിന്നീട് സിംഹാസനത്തില്‍ ആധിപത്യം ചെലുത്തി. പരമകാരുണികനാണവന്‍. സൂക്ഷ്മജ്ഞാനിയോടു തന്നെ ഇതിനെക്കുറിച്ച് അന്വേഷിക്കുക²⁶

സാഷ്ടാംഗപ്രണാമം കരുണാമയനായ അല്ലാഹുവിന്ന് അര്‍പ്പിക്കൂ എന്ന് ബഹുദൈവ വിശ്വാസികളോട് പറയപ്പെട്ടാല്‍, എന്താണ് ഈ കരുണാമയന്‍, നീ കല്‍പിക്കുന്നതിന്നു ഞങ്ങള്‍ സുജൂദ് ചെയ്യുകയോ എന്ന് അവര്‍ ചോദിക്കുന്നു. അതവര്‍ക്ക് ധിക്കാരം വര്‍ധിപ്പിക്കുകയുണ്ടായി.²⁷

ആകാശത്ത് നക്ഷത്ര ഭ്രമണപഥങ്ങള്‍ സൃഷ്ടിച്ചവന്‍ അനുഗ്രഹ സമ്പൂര്‍ണനത്രേ. അതിലവന്‍ ഒരു സൂര്യവിളക്കും പ്രകാശദായകമായ ചന്ദ്രനെയും സൃഷ്ടിച്ചു. ചിന്തിച്ചു ഗ്രഹിക്കുകയോ കൃതജ്ഞത പ്രകാശിപ്പിക്കുകയോ ചെയ്യാനുദ്ദേശിക്കുന്നവര്‍ക്ക് ദൃഷ്ടാന്തമായി, രാപ്പകലുകള്‍ മാറിമാറിവരുന്നതാക്കിയതും അവനാണ്.²⁸

കരുണാമയനായ അല്ലാഹുവിന്റെ ദാസന്മാര്‍ വിനയാന്വിതരായി ഭൂമിയില്‍ സഞ്ചരിക്കുന്നവരും അവിവേകികള്‍ തങ്ങളോട് അഭിമുഖ സംഭാഷണം നടത്തിയാല്‍ സമാധാനപൂര്‍വം പ്രതികരിക്കുന്നവരുമാകുന്നു. തങ്ങളുടെ നാഥന് സാഷ്ടാംഗം ചെയ്തും നമസ്‌കരിച്ചും കൊണ്ട് രാത്രി കഴിച്ചുകൂട്ടുകയും ചെയ്യും അവര്‍. നാഥാ, ഞങ്ങളില്‍ നിന്ന് നരകശിക്ഷ തിരിച്ചുവിടേണമേ, അതൊരു ഹീനമായ ആസ്ഥാനവും പാര്‍പ്പിടവും ശാശ്വതത്വമുള്ളതുമത്രേ എന്നു അവര്‍ പ്രാര്‍ഥിക്കുന്നതും ധനം ചെലവഴിക്കുമ്പോള്‍ അമിതവ്യയമോ ലുബ്‌ധോ കാണിക്കാതെ മിതത്വം പാലിക്കുന്നതുമാണ്.²⁹

അല്ലാഹുവിനോടൊപ്പം മറ്റൊരു ദൈവത്തെ ആരാധിക്കാത്തവരും അവന്‍ വിശുദ്ധികല്‍പിച്ച ഒരു ജീവനെ അന്യായമായി വധിക്കാത്തവരും വ്യഭിചരിക്കാത്തവരുമാണവര്‍; ആരൊരാള്‍ ഇവ അനുവര്‍ത്തിക്കുന്നുവോ അവന്‍ കഠോര ശിക്ഷ കണ്ടെത്തുന്നതും അന്ത്യനാളില്‍ ഇരട്ടി ശിക്ഷ നല്‍കപ്പെടുന്നതും ഹീനനായി അവനതില്‍ ശാശ്വതവാസം നയിക്കുന്നതുമാണ്; എന്നാല്‍ പശ്ചാത്തപിക്കുകയും സത്യവിശ്വാസം കൈക്കൊള്ളുകയും സല്‍ക്കര്‍മങ്ങളനുഷ്ഠിക്കുകയും ചെയ്തവര്‍ ഇതില്‍നിന്നൊഴിവാണ്; അവരുടെ പാപങ്ങള്‍ക്കു അല്ലാഹു സല്‍കര്‍മങ്ങള്‍ പകരമാക്കിക്കൊടുക്കും.³⁰
ഏറെ മാപ്പരുളുന്നവനും കരുണാമയനുമത്രെ അല്ലാഹു. ആരെങ്കിലും പാപമോചനമര്‍ഥിക്കുകയും സല്‍കര്‍മങ്ങളനുവര്‍ത്തിക്കുകയും ചെയ്യുന്നുവെങ്കില്‍ നേരാംവണ്ണം അല്ലാഹുവിലേക്ക് മടങ്ങുകതന്നെയാണവന്‍.

കള്ളസാക്ഷ്യം പറയാത്തവരും അനാവശ്യവൃത്തികള്‍ക്കടുത്തുകൂടി പോകുമ്പോള്‍ മാന്യന്മാരായി നടന്നുനീങ്ങുന്നവരും തങ്ങളുടെ നാഥന്റെ ദൃഷ്ടാന്തങ്ങള്‍ അനുസ്മരിപ്പിക്കപ്പെട്ടാല്‍ ബധിരന്മാരെയും അന്ധന്മാരെയും പോലെയായി അവയെ അവഗണിക്കാത്തവരുമാണവര്‍.³¹
നാഥാ, സ്വന്തം സഹധര്‍മിണിമാരിലും സന്താനങ്ങളിലും നിന്ന് ഞങ്ങള്‍ക്കു നീ ആനന്ദം നല്‍കുകയും സൂക്ഷ്മാലുക്കളായി ജീവിതം നയിക്കുന്നവര്‍ക്ക് ഞങ്ങളെ മാതൃകയാക്കുകയും ചെയ്യേണമേ എന്നു പ്രാര്‍ത്ഥിക്കുകയും ചെയ്യും അവര്‍.³²
ക്ഷമയവലംബിച്ചതിന്റെ പേരില്‍ അവര്‍ക്ക് ഉന്നതമായ സ്വര്‍ഗീയ സൗധം പ്രതിഫലം നല്‍കപ്പെടും. അവരതില്‍ ശാശ്വത വാസികളായിരിക്കുന്നതാണ്. എത്ര ഉദാത്തമായ ആസ്ഥാനവും ആവാസഗേഹവുമാണത്!³³

നബീ, പ്രഖ്യാപിക്കുക: നിങ്ങള്‍ പ്രാര്‍ത്ഥിക്കുന്നില്ലെങ്കില്‍ എന്റെ നാഥന്‍ യാതൊരു വിധ പരിഗണനയും നിങ്ങള്‍ക്കു നല്‍കുന്നതല്ല! എന്നാല്‍ നിങ്ങള്‍ സത്യ സന്ദേശം വ്യാജമാക്കി തള്ളിക്കളഞ്ഞിരിക്കുകയാണ്. തന്മൂലം അതിനുള്ള ശിക്ഷ അനിവാര്യമാകുന്നു.³⁴