അന്നൂർ - النور - An-Nur

നിങ്ങള്‍ ചിന്തിച്ചുഗ്രഹിക്കുന്നതിനായി, നാം അവതരിപ്പിക്കുകയും നിയമമാക്കിവെക്കുകയും സ്പഷ്ട ദൃഷ്ടാന്തങ്ങള്‍ സമര്‍പ്പിക്കുകയും ചെയ്ത ഒരധ്യായമത്രേ ഇത്.¹

വ്യഭിചാരിയെയും വ്യഭിചാരിണിയെയും-അവരില്‍ ഓരോരുത്തരെയും-നിങ്ങള്‍ നൂറുവീതം അടിക്കുക. അല്ലാഹുവിലും അന്ത്യനാളിലും വിശ്വസിക്കുന്നുവെങ്കില്‍ അവന്റെ മതശാസനാനിര്‍വഹണത്തില്‍ അവരോടുള്ള ഒരുവിധ ദയാവായ്പും നിങ്ങളെ ബാധിക്കരുത്. അവരുടെ ശിക്ഷ നടപ്പാക്കുന്നിടത്ത് ഒരു സംഘം സത്യവിശ്വാസികള്‍ സന്നിഹിതരാവുകയും വേണം.²
വ്യഭിചാരിണിയെയോ ബഹുദൈവവിശ്വാസിനിയെയോ മാത്രമേ വ്യഭിചാരി വിവാഹം ചെയ്യാറുള്ളൂ. (അതുപോലെ) വ്യഭിചാരിയോ ബഹുദൈവ വിശ്വാസിയോ മാത്രമേ വേശ്യയെ കല്യാണം കഴിക്കൂ. ഇത് സത്യവിശ്വാസികള്‍ക്ക് നിഷിദ്ധമത്രേ.³
നാലു സാക്ഷികളെ ഹാജറാക്കാതെ, പതിവ്രതകളെ വ്യഭിചാരാരോപണം നടത്തുന്നവരെ നിങ്ങള്‍ എണ്‍പത് പ്രാവശ്യം പ്രഹരിക്കുക; അവരുടെ സാക്ഷ്യം ഒരിക്കലും സ്വീകരിക്കയുമരുത്. അധര്‍മകാരികള്‍ തന്നെയാണവര്‍-വഴിയെ, പശ്ചാത്തപിക്കുകയും ഉത്തമന്മാരായിത്തീരുകയും ചെയ്തവരൊഴികെ. നിശ്ചയം അല്ലാഹു ഏറെ പൊറുക്കുന്നവനും കരുണാമയനുമത്രേ.⁴

സ്വപത്‌നിമാരുടെ മേല്‍ വ്യഭിചാരാരോപണം നടത്തുകയും മറ്റു സാക്ഷികളൊന്നുമില്ലാതിരിക്കുകയും ചെയ്യുന്നവര്‍ ആരോ, അവര്‍ നിര്‍വഹിച്ചിരിക്കേണ്ട സാക്ഷ്യ സമര്‍പ്പണം ഇപ്രകാരമാണ്-താന്‍ സത്യസന്ധന്മാരില്‍ പെട്ടവന്‍ തന്നെയാകുന്നു എന്ന് നാലു പ്രാവശ്യം സാക്ഷ്യം പറയുക; അഞ്ചാമതായി, വ്യാജമാണു ബോധിപ്പിക്കുന്നതെങ്കില്‍ അല്ലാഹുവിന്റെ ശാപം എന്റെ മേല്‍ വര്‍ഷിച്ചുകൊള്ളട്ടെ എന്നും പറയണം.

അവന്‍ നുണയന്മാരില്‍ പെട്ടവന്‍ തന്നെയാണ് എന്ന് നാലുവട്ടം സാക്ഷ്യം വഹിക്കുകയും അഞ്ചാമതായി 'അവന്‍ സത്യസന്ധരില്‍ പെട്ടവനാണെങ്കില്‍ അല്ലാഹുവിന്റെ ക്രോധം തന്റെ മേല്‍ വര്‍ഷിച്ചുകൊള്ളട്ടെ' എന്നു പറയുകയും ചെയ്താല്‍ അവളില്‍ നിന്നത് ശിക്ഷയെ പ്രതിരോധിക്കുന്നതാണ്.

അല്ലാഹുവിന്റെ ഔദാര്യവും കാരുണ്യവും നിങ്ങള്‍ക്കില്ലാതിരിക്കുകയും അവന്‍ വലിയ പശ്ചാത്താപസ്വീകര്‍ത്താവും യുക്തിമാനും അല്ലാതിരിക്കുകയും ചെയ്തിരുന്നെങ്കില്‍(നിങ്ങള്‍ നശിച്ചിരുന്നേനെ!)⁵

നിശ്ചയം, ആ വ്യാജവൃത്താന്തം ഇറക്കുമതി ചെയ്തവര്‍ നിങ്ങളില്‍ പെട്ട ഒരു സംഘം തന്നെയത്രേ. സ്വന്തത്തിന്നത് ദോഷകരമാണെന്നു നിങ്ങള്‍ ധരിക്കേണ്ട, ഗുണകരം തന്നെയാണ്⁶
അവരില്‍ ഓരോ വ്യക്തിക്കും താനാര്‍ജിച്ച പാപമുണ്ടാകും, എന്നാല്‍ അതിന്റെ കുഞ്ചികസ്ഥാനം വഹിച്ചയാള്‍ക്ക് ഗുരുതര ശിക്ഷയാണുണ്ടാവുക!⁷
സത്യവിശ്വാസികളും സത്യവിശ്വാസിനികളും അതു കേട്ടമാത്രയില്‍, സ്വന്തക്കാരെപ്പറ്റി എന്തുകൊണ്ട് ഉദാത്ത ധാരണ പുലര്‍ത്തുകയും 'ഇതു പ്രസ്പഷ്ട വ്യാജം തന്നെ' എന്ന് പറയുകയും ചെയ്തില്ല? ആരോപകര്‍ എന്തുകൊണ്ടതിന്ന് നാലു സാക്ഷികളെ ഹാജറാക്കിയില്ല? സാക്ഷികളെ കൊണ്ടുവരായ്ക മൂലം അല്ലാഹുവിങ്കല്‍ അവര്‍ തന്നെയത്രേ വ്യാജന്മാര്‍. ഐഹിക-പാരത്രിക ലോകത്ത് അല്ലാഹുവിന്റെ ഔദാര്യവും കാരുണ്യവും നിങ്ങള്‍ക്കില്ലായിരുന്നുവെങ്കില്‍, ഈ വൃത്താന്തത്തിലേര്‍പ്പെട്ടതിനാല്‍ ഘോരശിക്ഷ നിങ്ങളെ പിടികൂടിയിരുന്നേനെ! സ്വജിഹ്വകള്‍ കൊണ്ട് അതേറ്റുപാടുകയും ഒരു വിവരവുമില്ലാതെ സ്വന്തം വായകൊണ്ടത് ഉച്ചരിക്കുകയും ചെയ്തത് ഒന്നോര്‍ത്തുനോക്കൂ! അതൊരു നിസ്സാര വിഷയമെന്നു നിങ്ങള്‍ കരുതുന്നു; എന്നാല്‍ അല്ലാഹുവിങ്കല്‍ അത് ഗൗരവമത്രേ⁸

അതു ശ്രവിച്ച മാത്രയില്‍ 'ഞങ്ങള്‍ക്കിതിനെക്കുറിച്ച് സംസാരിക്കാന്‍ പാടില്ല, (അല്ലാഹുവേ) നീ എത്ര പരിശുദ്ധന്‍! അത്യന്തം ഹീനമായ ഒരപവാദം തന്നെയത്രേ ഇത്' എന്ന് എന്തുകൊണ്ട് നിങ്ങള്‍ പ്രതികരിച്ചില്ല? തത്തുല്യമായൊരു കാര്യം മേലില്‍ ആവര്‍ത്തിക്കാതിരിക്കാനായി നിങ്ങള്‍ക്ക് അല്ലാഹു ഉപദേശം തരികയും ദൃഷ്ടാന്തങ്ങള്‍ വിവരിക്കുകയുമാണ്-സത്യവിശ്വാസികളാണ് നിങ്ങള്‍ എങ്കില്‍! സര്‍വജ്ഞനും യുക്തിമാനുമാണ് അല്ലാഹു. സത്യവിശ്വാസികളില്‍ ഹീനകൃത്യം വ്യാപിക്കുന്നത് ഇഷ്ടപ്പെടുന്നതാരോ അവര്‍ക്ക് ഐഹിക-പാരത്രിക ലോകത്ത് വേദനയുറ്റ ശിക്ഷയുണ്ട്, തീര്‍ച്ച. അല്ലാഹു അറിയുന്നു, നിങ്ങള്‍ അറിയുന്നില്ല. നിങ്ങള്‍ക്ക് അല്ലാഹുവിന്റെ ഔദാര്യവും കാരുണ്യവും ഉണ്ടാകാതിരിക്കുകയും അവന്‍ വത്സലനും കരുണാമയനും ആകാതിരിക്കുകയും ചെയ്തിരുന്നുവെങ്കില്‍ (നിങ്ങളെ കഠോര ശിക്ഷ പിടികൂടിയിരുന്നേനെ!)

സത്യവിശ്വാസികളേ, പിശാചിന്റെ കാല്‍പാടുകള്‍ നിങ്ങള്‍ അനുധാവനം ചെയ്യരുത്. ആരെങ്കിലും അവന്റെ കാലടികള്‍ പിന്‍പറ്റുന്നുവെങ്കില്‍, അവന്റെ ശാസന ദുര്‍വൃത്തിയും ഹീനകൃത്യവും അനുവര്‍ത്തിക്കാനായിരിക്കും. നിങ്ങള്‍ക്ക് അല്ലാഹുവിന്റെ ഔദാര്യവും കാരുണ്യവും ഇല്ലായിരുന്നുവെങ്കില്‍ നിങ്ങളിലൊരാള്‍ പോലും ഒരിക്കലും വിശുദ്ധി നേടുമായിരുന്നില്ല. എന്നാല്‍ താനുദ്ദേശിക്കുന്നവര്‍ക്ക് അല്ലാഹു പരിശുദ്ധി നല്‍കുന്നു. അവന്‍ എല്ലാം കേള്‍ക്കുന്നവനും അറിയുന്നവനുമത്രേ. നിങ്ങളില്‍ മഹത്ത്വവും സാമ്പത്തിക ശേഷിയുമുള്ളവര്‍, കുടുംബക്കാര്‍ക്കും പാവപ്പെട്ടവര്‍ക്കും ദൈവമാര്‍ഗത്തില്‍ എല്ലാം വെടിഞ്ഞ് നാടുവിടുന്നവര്‍ക്കും ഒന്നും ദാനം ചെയ്കയില്ലെന്ന് ശപഥം ചെയ്യരുത്⁹
മാപ്പരുളുകയും വിട്ടുവീഴ്ച ചെയ്യുകയുമാണു വേണ്ടത്. അല്ലാഹു പൊറുത്തു തരുന്നത് നിങ്ങളിഷ്ടപ്പെടുകയില്ലേ? അവന്‍ ഏറെ പൊറുക്കുന്നവനും കരുണാമയനുമത്രേ.

ചാരിത്ര്യവതികളും ദുര്‍നടപ്പിനെപ്പറ്റി നിനക്കുകപോലും ചെയ്യാത്തവരുമായ സത്യവിശ്വാസിനികളെക്കുറിച്ച് അപവാദം പറയുന്നതാരോ, ഐഹിക-പാരത്രിക ലോകങ്ങളില്‍ അവര്‍ അഭിശപ്തരായിക്കഴിഞ്ഞിരിക്കുന്നു; തങ്ങളുടെ ചെയ്തികളെപ്പറ്റി അവരുടെ നാവുകളും കരചരണങ്ങളും പ്രതികൂല സാക്ഷ്യം വഹിക്കുന്ന ദിനം ഘോരശിക്ഷയാണവര്‍ക്കുണ്ടാവുക. തങ്ങളുടെ യഥാര്‍ഥ പ്രതിഫലം അവര്‍ക്കു അല്ലാഹു നിറവേറ്റിക്കൊടുക്കുന്നതാണ്; പ്രത്യക്ഷമായ സത്യം അല്ലാഹു തന്നെയാണെന്ന് അവര്‍ അറിയുകയും ചെയ്യും.¹⁰

ദുര്‍വൃത്തരായ സ്ത്രീകള്‍ ദുര്‍വൃത്തന്മാരായ പുരുഷന്മാര്‍ക്കും ദുര്‍വൃത്തന്മാരായ പുരുഷന്മാര്‍ ദുര്‍വൃത്ത സ്ത്രീകള്‍ക്കുമാകുന്നു; ഉദാത്തരായ വനിതകള്‍ ഉദാത്തന്മാരായ ആണുങ്ങള്‍ക്കും ഉദാത്തന്മാരായ ആണുങ്ങള്‍ ഉദാത്ത വനിതകള്‍ക്കുമത്രേ. ഈ ഹീനരുടെ അപവാദങ്ങളില്‍ നിന്നു ഉദാത്തര്‍ വിമോചിതരാകുന്നു. അവര്‍ക്ക് പാപവിമുക്തിയും സമാദൃതമായ ഉപജീവനവുമുണ്ട്.¹¹

സത്യവിശ്വാസികളേ, അനുമതിയാവശ്യപ്പെടുകയും സലാം പറയുകയും ചെയ്തല്ലാതെ സ്വന്തമല്ലാത്ത അന്യവീടുകളില്‍ നിങ്ങള്‍ പ്രവേശിക്കരുത്. ഈ രീതിയാണ് ഉത്തമം-നിങ്ങള്‍ ചിന്തിച്ചുഗ്രഹിക്കുന്നുവെങ്കില്‍. ഇനി, ഒരാളെയുമവിടെ കണ്ടില്ലെങ്കില്‍, അനുമതി ലഭിക്കുന്നതുവരെ നിങ്ങളങ്ങോട്ട് കടക്കരുത്. തിരിച്ചുപോയ്‌ക്കൊള്ളൂ എന്നു നിര്‍ദേശിക്കപ്പെടുകയാണെങ്കില്‍ മടങ്ങിപ്പോകണം-അതാണ് നിങ്ങള്‍ക്ക് ഉദാത്തം.¹²
നിങ്ങളുടെ പ്രവൃത്തികളെക്കുറിച്ച് നന്നായറിയുന്നവനാണ് അല്ലാഹു. എന്നാല്‍ ജനവാസമില്ലാത്തതും നിങ്ങളുടെ സാധനങ്ങളുള്ളതുമായ ഗൃഹങ്ങളില്‍ കടക്കുന്നതുകൊണ്ട് നിങ്ങള്‍ക്കു കുറ്റമില്ല.¹³
നിങ്ങള്‍ സ്പഷ്ടമാക്കുന്നതും ഗോപ്യമാക്കുന്നതും അല്ലാഹു അറിയുന്നുണ്ട്.

ഓ നബീ, തങ്ങളുടെ ദൃഷ്ടികള്‍ താഴ്ത്താനും ഗുഹ്യഭാഗങ്ങള്‍ കാത്തുസൂക്ഷിക്കാനും സത്യവിശ്വാസികളോട് താങ്കളനുശാസിക്കുക. അവര്‍ക്കേറ്റം പവിത്രമായത് അതത്രേ. അവരുടെ ചെയ്തികളെക്കുറിച്ചു സൂക്ഷ്മജ്ഞാനിയാണ് അല്ലാഹു. സത്യവിശ്വാസികളോടും തങ്ങളുടെ നയനങ്ങള്‍ താഴ്ത്താനും ഗുഹ്യഭാഗങ്ങള്‍ കാത്തുസൂക്ഷിക്കാനും സ്വയമേവ വെളിവാകുന്നതൊഴിച്ചുള്ള അലങ്കാരം പ്രത്യക്ഷപ്പെടുത്താതിരിക്കാനും താങ്കള്‍ കല്‍പിക്കുക; തങ്ങളുടെ മക്കനകള്‍ കുപ്പായമാറുകള്‍ക്കു മീതെ അവര്‍ താഴിത്തിയിടുകയും വേണം.¹⁴
തങ്ങളുടെ ഭര്‍ത്താക്കള്‍, പിതാക്കള്‍, ഭര്‍തൃപിതാക്കള്‍, പുത്രന്മാര്‍, ഭര്‍തൃപുത്രന്മാര്‍, സഹോദരന്മാര്‍, സഹോദരപുത്രന്മാര്‍, സഹോദരീ പുത്രന്മാര്‍, മുസ്‌ലിം സ്ത്രീകള്‍, സ്വന്തം അടിമകള്‍.¹⁵
വികാരമില്ലാത്ത പുരുഷഭൃത്യര്‍, പെണ്ണുങ്ങളുടെ ലൈംഗിക രഹസ്യങ്ങള്‍ ഗ്രഹിച്ചിട്ടില്ലാത്ത കുട്ടികള്‍ എന്നിവരല്ലാത്ത വേറൊരാള്‍ക്കും തങ്ങളുടെ അലങ്കാരം അവര്‍ വെളിവാക്കരുത്; ഗുപ്തസൗന്ദര്യം അറിയപ്പെടാനായി കാലിട്ടടിക്കയുമരുത്. സത്യവിശ്വാസികളേ, നിങ്ങള്‍ സര്‍വരും-വിജയപ്രാപ്തരാകാനായി-അല്ലാഹുവിങ്കലേക്കു ഖേദിച്ചുമടങ്ങുക.

നിങ്ങളില്‍ നിന്നു ഇണകളില്ലാത്തവരെയും അടിമകളായ ഉത്തമ സ്ത്രീപുരുഷന്മാരെയും നിങ്ങള്‍ രക്ഷിതാക്കള്‍ വിവാഹ ബന്ധത്തിലേര്‍പ്പെടുത്തുക. അവര്‍ ദരിദ്രരാണെങ്കില്‍, തന്റെ ഔദാര്യത്താല്‍ അല്ലാഹു അവരെ ഐശ്വര്യരാക്കും. വിപുലമായ കഴിവുറ്റവനും സര്‍വജ്ഞനുമത്രേ അല്ലാഹു. വിവാഹം ചെയ്യാന്‍ കഴിവില്ലാത്തവര്‍ തന്റെ ഔദാര്യത്താല്‍ അല്ലാഹു കഴിവു നല്‍കുന്നതു വരെ തങ്ങളുടെ ചാരിത്ര്യം കാത്തുസൂക്ഷിച്ചുകൊള്ളട്ടെ. നിങ്ങളുടെ അടിമകളില്‍ നിന്നു വിമോചനക്കരാറിലേര്‍പ്പെടാനാവശ്യപ്പെടുന്നവര്‍ക്ക്-അവരില്‍ നന്മയുണ്ടെന്നറിഞ്ഞാല്‍-നിങ്ങള്‍ മോചനപത്രമെഴുതിക്കൊടുക്കുക. അല്ലാഹു നിങ്ങള്‍ക്കു നല്‍കിയ ധനത്തില്‍ നിന്ന് അവര്‍ക്ക് നല്‍കുകയും വേണം. നിങ്ങളുടെ അടിയാത്തികളെ-ചാരിത്ര്യവതികളാകാന്‍ അവരാഗ്രഹിക്കുമ്പോള്‍-ഭൗതിക വിഭവം കാംക്ഷിച്ച് വേശ്യാടനത്തിനു നിങ്ങള്‍ നിര്‍ബന്ധിക്കരുത്.¹⁶
അവരെ ആരെങ്കിലും അങ്ങനെ അടിച്ചേല്‍പിക്കുന്നുവെങ്കില്‍, ആ നിര്‍ബന്ധിതാവസ്ഥക്കു ശേഷം അല്ലാഹു അവര്‍ക്ക് ഏറെ പൊറുക്കുന്നവനും കരുണ വര്‍ഷിക്കുന്നവനുമത്രേ.

നിങ്ങള്‍ക്കു നാം സ്പഷ്ടമായ ദൃഷ്ടാന്തങ്ങളും മുന്‍ഗാമികളുടെ ഉപമകളും സൂക്ഷ്മാലുക്കള്‍ക്കുള്ള സദുപദേശവും അവതരിപ്പിച്ചുതരികതന്നെ ചെയ്തിരിക്കുന്നു.

ഭുവന-വാനങ്ങളുടെ പ്രകാശമാണ് അല്ലാഹു. അവന്റെ പ്രകാശത്തിന്റെ ഉപമ ഇതാണ്: വിളക്കുവെച്ചിരിക്കുന്ന ഒരു വിളക്കുമാടം. നക്ഷത്രതുല്യം ജാജ്ജ്വല്യമാനമായ ഒരു സ്ഫടികത്തിനകത്താണ് വിളക്ക്. പാശ്ചാത്യമോ പൗരസ്ത്യമോ അല്ലാത്ത ഒരനുഗൃഹീത ഒലീവു ചെടിയുടെ എണ്ണയാണതിന്റെ ഇന്ധനം.¹⁷
തീ സ്പര്‍ശിച്ചിട്ടില്ലെങ്കില്‍ തന്നെ അതിന്റെ എണ്ണ സ്വയം പ്രകാശിക്കുമാറാകുന്നതാണ്-മേല്‍ക്കുമേല്‍ പ്രകാശം. താനുദ്ദേശിക്കുന്നവരെ തന്റെ പ്രകാശത്തിലേക്ക് അല്ലാഹു നയിക്കുകയും ജനങ്ങള്‍ക്കു ഉപമകള്‍ പ്രതിപാദിക്കുകയും ചെയ്യുന്നു. സര്‍വകാര്യങ്ങളെ സംബന്ധിച്ചും നന്നായറിയുന്നവനത്രേ അല്ലാഹു. പടുത്തുയര്‍ത്തപ്പെടാനും തന്റെ നാമം അവിടെയനുസ്മരിക്കപ്പെടാനും അല്ലാഹു അനുമതി നല്‍കിയ ചില ഗേഹങ്ങളിലത്രേ ആ പ്രകാശം.¹⁸
പ്രഭാത-പ്രദോഷങ്ങളില്‍ ചില പുരുഷന്മാര്‍ അവന്റെ മഹത്ത്വം അവിടെ പ്രകീര്‍ത്തിച്ചുകൊണ്ടിരിക്കുന്നതാണ്. ദൈവസ്മരണയിലോ നമസ്‌കാരം യഥാക്രമം അനുഷ്ഠിക്കുന്നതിലോ സകാത്ത് നല്‍കുന്നതിലോ നിന്ന് ക്രയവിക്രയ-വാണിഭങ്ങള്‍ അവരെ അശ്രദ്ധരാക്കുന്നതല്ല. ഹൃദയങ്ങളും ദൃഷ്ടികളും കീഴ്‌മേല്‍ മറിയുന്ന ഒരു ദിനം ഭയന്നുകൊണ്ടിരിക്കുന്നവരാണവര്‍. ഇത്, തങ്ങള്‍ അനുഷ്ഠിച്ച കര്‍മങ്ങള്‍ക്കായി അല്ലാഹു അവര്‍ക്ക് ഉദാത്തമായ കൂലികൊടുക്കാനും തന്റെ വര്‍ധിതാനുഗ്രഹം നല്‍കാനുമത്രേ. താനുദ്ദേശിക്കുന്നവര്‍ക്ക് കണക്കില്ലാതെ അല്ലാഹു നല്‍കുന്നതാണ്.

സത്യനിഷേധികളുടെ അനുഷ്ഠാനങ്ങള്‍ മരുഭൂമിയിലെ മരീചികാതുല്യമത്രേ-ദാഹാര്‍ത്തന്‍ അത് വെള്ളമാണെന്നു വിചാരിക്കും. അങ്ങനെ അതിനു സമീപത്തേക്ക് ചെല്ലുമ്പോള്‍ അപ്രകാരമൊന്നുള്ളതായി അവനു കാണാനേ കഴില്ല; തന്റെയടുത്ത് അല്ലാഹുവിനെയവന്‍ കാണും. തല്‍സമയം കണക്കുതീര്‍ത്ത് അല്ലാഹു അവന് നല്‍കുന്നതാണ്! അതിദ്രുതം കണക്കുനോക്കുന്നവനത്രേ അല്ലാഹു. അല്ലെങ്കില്‍ ആഴക്കടലിലെ അന്ധകാരങ്ങള്‍ക്കു തുല്യമാണ് സത്യനിഷേധികളുടെ പ്രവര്‍ത്തനങ്ങള്‍. തിരമാല ആഴിയെ ആവരണം ചെയ്യുന്നുണ്ട്. അതിനുമീതെ പിന്നെയും തിരമാലയും കാര്‍മേഘവും-മേല്‍ക്കുമേല്‍ അന്ധകാരങ്ങള്‍! സ്വഹസ്തം പുറത്തേക്കു നീട്ടിയാല്‍ പോലും കാണുമാറാകില്ല. ആരൊരാള്‍ക്ക് അല്ലാഹു പ്രകാശം നല്‍കിയിട്ടില്ലയോ അവനു യാതൊരുവിധ വെളിച്ചവുമുണ്ടാവുകയില്ല.

ഭുവന-വാനങ്ങളിലുള്ളവരും ചിറകുവിടര്‍ത്തിപ്പിടിച്ചുകൊണ്ടു പക്ഷികളും അല്ലാഹുവിന്റെ മഹത്ത്വം പ്രകീര്‍ത്തിച്ചുകൊണ്ടിരിക്കുന്നത് താങ്കള്‍ കാണുന്നില്ലേ! എല്ലാവര്‍ക്കും അവരവരുടെ പ്രാര്‍ഥനയും പ്രകീര്‍ത്തനവും നന്നായറിയാം¹⁹
അവരുടെ പ്രവൃത്തികളെപ്പറ്റി ഉത്തമജ്ഞാനിയത്രേ അല്ലാഹു. ഭുവന-വാനങ്ങളുടെ രാജാധിപത്യം അല്ലാഹുവിനാകുന്നു. അവങ്കലേക്കാണ് എല്ലാറ്റിന്റെയും മടക്കം.

താങ്കള്‍ കാണുന്നില്ലേ: അല്ലാഹു മേഘത്തെ തെളിച്ചുകൊണ്ടുവരികയും എന്നിട്ടവ കൂട്ടിച്ചേര്‍ക്കുകയും കൂമ്പാരമാക്കുയും ചെയ്യുന്നു. അപ്പോള്‍ അതിനിടയിലൂടെ മഴ ബഹിര്‍ഗമിക്കുന്നതു കാണാം. ആകാശത്തെ മേഘപര്‍വതങ്ങളില്‍ നിന്നു അവന്‍ ആലിപ്പഴം വര്‍ഷിക്കയും താനുദ്ദേശിക്കുന്ന ചിലര്‍ക്കത് വീഴ്ത്തുകയും മറ്റുചിലരില്‍ നിന്നത് തിരിച്ചുവിടുകയും ചെയ്യുന്നു. അതിന്റെ മിന്നല്‍പ്രഭ കണ്ണുകളെ റാഞ്ചിയെടുക്കുമാറാകുന്നതാണ്. രാപ്പകലുകള്‍ അല്ലാഹു മാറ്റിമറിച്ചുകൊണ്ടിരിക്കുന്നു. കണ്ണുകളുള്ളവര്‍ക്ക് അതില്‍ തീര്‍ച്ചയായും പാഠങ്ങളുണ്ട്²⁰

എല്ലാ ജീവജാലങ്ങളെയും വെള്ളത്തില്‍ നിന്നാണ് അല്ലാഹു സൃഷ്ടിച്ചിട്ടുള്ളത്. ഉദരത്തിലിഴഞ്ഞു സഞ്ചരിക്കുന്നവയും രണ്ടുകാലിലും നാലുകാലിലും നടക്കുന്നവയും അവയിലുണ്ട്. താന്‍ ഉദ്ദേശിക്കുന്നത് അല്ലാഹു സൃഷ്ടിക്കുന്നു. അവന്‍ സര്‍വകാര്യങ്ങള്‍ക്കും കഴിവുറ്റവനത്രേ. സ്പഷ്ടമാകുന്ന ദൃഷ്ടാന്തങ്ങള്‍ നാം അവതരിപ്പിക്കുക തന്നെ ചെയ്തിട്ടുണ്ട്; താനുദ്ദേശിക്കുന്നവരെ അല്ലാഹു സല്‍പന്ഥാവിലേക്ക് നയിക്കുന്നു.²¹

ഞങ്ങള്‍ അല്ലാഹുവിലും ദൂതനിലും വിശ്വാസമര്‍പ്പിക്കുകയും അവരോടനുസരണയുള്ളവരാവുകയും ചെയ്തിരിക്കുന്നു എന്നു കപടവിശ്വാസികള്‍ പറയും. തദനന്തരവും അവരിലൊരു വിഭാഗം പിന്തിരിഞ്ഞുപോകുന്നു; അവര്‍ വിശ്വാസികളേയല്ല. തങ്ങള്‍ക്കിടയില്‍ വിധികല്‍പിക്കാനായി അല്ലാഹുവിലേക്കും റസൂലിലേക്കും ക്ഷണിക്കപ്പെടുമ്പോള്‍ അവരതാ അവഗണിച്ചുകളയുന്നു! എന്നാല്‍ സത്യം തങ്ങള്‍ക്കനുകൂലമാണെങ്കിലോ, നബിസന്നിധിയിലേക്കവര്‍ വിധേയത്വമുള്ളവരായി വന്നെത്തുന്നതുമാണ്! അവരുടെ ഹൃദയങ്ങളില്‍ എന്തെങ്കിലും രോഗമുണ്ടോ? അതോ, സംശയഗ്രസ്തരാണോ അവര്‍? അതുമല്ല, തങ്ങളോട് അല്ലാഹുവും റസൂലും അനീതികാട്ടുമെന്ന പേടിയുണ്ടോ അവര്‍ക്ക്? അതൊന്നുമല്ല, അക്രമികള്‍ തന്നെയാണവര്‍.²²

തങ്ങളുടെ കാര്യങ്ങളിലെ വിധി പ്രസ്താവത്തിനായി അല്ലാഹുവിലേക്കും റസൂലിങ്കലേക്കും വിളിക്കപ്പെടുമ്പോള്‍ സത്യവിശ്വാസികളുടെ നിലപാട് ഇതുമാത്രമേ ആകാവൂ: 'ഞങ്ങള്‍ കേള്‍ക്കുകയും അനുസരിക്കുകയും ചെയ്തിരിക്കുന്നു.' അവര്‍ തന്നെയാണു വിജയികള്‍. ആര് അല്ലാഹുവിനെയും റസൂലിനെയും അനുസരിക്കുകയും അല്ലാഹുവിനെ ഭയപ്പെടുകയും സൂക്ഷിക്കുകയും ചെയ്യുന്നുവോ അവര്‍ തന്നെയത്രേ വിജയം കൈവരിച്ചവര്‍.²³

അങ്ങ് കല്‍പിക്കുന്നുവെങ്കില്‍ യുദ്ധത്തിന്നു പുറപ്പെടുക തന്നെ ചെയ്യുമെന്ന് അവര്‍ പരമാവധി അല്ലാഹുവിനെപ്പിടിച്ച് ആണയിട്ടുറപ്പിച്ചു പറയുന്നു. താങ്കള്‍ പ്രതികരിക്കുക: നിങ്ങള്‍ ശപഥമൊന്നും ചെയ്യേണ്ട; ഉദാത്തമായ അനുസരണമാണാവശ്യം. നിങ്ങളുടെ ചെയ്തികളെപ്പറ്റി സൂക്ഷ്മജ്ഞന്‍ തന്നെയാണ് അല്ലാഹു.²⁴
അങ്ങ് പ്രഖ്യാപിക്കുക: അല്ലാഹുവിനെയും റസൂലിനെയും നിങ്ങള്‍ അനുസരിക്കുക. ഇനി, നിങ്ങള്‍ പിന്തിരിയുന്നുവെങ്കിലോ? തന്നെ ഭരമേല്‍പിക്കപ്പെട്ട വിഷയത്തിലേ റസൂലിനു കടപ്പാടുള്ളൂ; നിങ്ങള്‍ ചുമതലപ്പെടുത്തപ്പെട്ടതിലാണ് നിങ്ങളുടെ ബാധ്യത. റസൂലിനെ അനുസരിക്കുന്നുവെങ്കില്‍ നിങ്ങള്‍ക്കു സന്മാര്‍ഗപ്രാപ്തരാകാം. സ്പഷ്ടമായ പ്രബോധനമേ അവിടത്തേക്കു ഉത്തരാദിത്വമുള്ളൂ.²⁵

നിങ്ങളില്‍ നിന്ന് സത്യവിശ്വാസം വരിക്കുകയും സല്‍കര്‍മങ്ങളനുഷ്ഠിക്കുകയും ചെയ്തവര്‍ക്കിതാ ദൈവികവാഗ്ദാനം: പൂര്‍വികര്‍ക്കെന്ന പോലെ ഇവര്‍ക്കും ഭൂമിയിലവന്‍ പ്രാതിനിധ്യം നല്‍കും; അവര്‍ക്കവന്‍ സംതൃപ്തമായി സമര്‍പ്പിച്ച മതകാര്യത്തില്‍ ഇവര്‍ക്കും സ്വാധീനമേകും; ഭയപ്പാടുകള്‍ക്കു ശേഷം ഇവര്‍ക്ക് നിര്‍ഭയത്വം പകരം വെക്കും. എന്നെയാകണം ഇവരാരാധിക്കേണ്ടത്; മറ്റാരെയും എന്റെ പങ്കാളികളാക്കരുത്. ഈ വാഗ്ദാന ശേഷവും ആരെങ്കിലും നിഷേധം വച്ചുപുലര്‍ത്തുന്നുവെങ്കില്‍ അധര്‍മകാരികള്‍ അവര്‍ തന്നെയത്രേ.²⁶

നിങ്ങള്‍ നമസ്‌കാരം യഥാവിധി നിര്‍വഹിക്കുകയും സകാത്ത് കൊടുക്കുകയും തിരുദൂതരെ അനുസരിക്കുകയും ചെയ്യുക-നിങ്ങള്‍ക്കു കരുണ ചെയ്യപ്പെടാന്‍ വേണ്ടി. ഭൂമുഖത്ത് സത്യനിഷേധികള്‍ അല്ലാഹുവെ ദുര്‍ബലനാക്കുന്നവരാണെന്ന് നിങ്ങള്‍ ധരിക്കേണ്ട; നരകമാണവരുടെ ആവാസകേന്ദ്രം. ആ താമസസ്ഥലം എത്ര നികൃഷ്ടം!

സത്യവിശ്വാസികളേ, നിങ്ങളുടെ അടിമകളും പ്രായപൂര്‍ത്തിയാകാത്തവരും മൂന്ന് അവസരങ്ങളില്‍ പ്രവേശനാനുമതി വാങ്ങണം-സുബ്ഹ് നമസ്‌കാരത്തിനു മുമ്പും ഉച്ചയുറക്കത്തിന് വസ്ത്രം മാറിയിരിക്കുമ്പോഴും ഇശാനമസ്‌കാരാനന്തരവും. നിങ്ങളുടെ മൂന്നു സ്വകാര്യതകളാണപ്പോള്‍. ഇവയല്ലാത്ത മറ്റു നേരങ്ങളില്‍ സങ്കലന ജീവിതത്തിനു കുഴപ്പമില്ല; നിങ്ങള്‍ പരസ്പരം ചുറ്റിപ്പറ്റി നടക്കുന്നവരാണല്ലോ. ഇപ്രകാരം നിങ്ങള്‍ക്ക് അല്ലാഹു തെളിവുകള്‍ പ്രതിപാദിച്ചുതരുന്നു; അവന്‍ സര്‍വജ്ഞനും യുക്തിമാനുമത്രേ.²⁷

നിങ്ങളുടെ കുട്ടികള്‍ പ്രായപൂര്‍ത്തി പ്രാപിച്ചാല്‍, വലിയവരെപ്പോലെത്തന്നെ അവരും അനുമതി തേടണം. ഇപ്രകാരം തന്റെ സൂക്തങ്ങള്‍ അല്ലാഹു നിങ്ങള്‍ക്കു പ്രതിപാദിച്ചുതരികയാണ്. സര്‍വജ്ഞനും യുക്തിമാനുമാണവന്‍. വിവാഹജീവിതമാശിക്കാത്ത വൃദ്ധകള്‍ അലങ്കാര പ്രകടനമില്ലാത്തവരായി മേല്‍വസ്ത്രങ്ങള്‍ അഴിച്ചുവെക്കുന്നതില്‍ കുറ്റമില്ല. തങ്ങളുടെ ലജ്ജാശീലം കാത്തുസൂക്ഷിക്കുന്നതു തന്നെയാണവര്‍ക്ക് ഉത്തമം. സര്‍വവും കേള്‍ക്കുകയും അറിയുകയും ചെയ്യുന്നവനാണ് അല്ലാഹു.²⁸

അന്ധനോ മുടന്തനോ രോഗിക്കോ ധര്‍മസമരമൊഴിവാക്കുന്നതില്‍ കുറ്റമില്ല.²⁹
സ്വഗൃഹങ്ങളില്‍ നിന്നോ പിതാക്കളുടെയോ മാതാക്കളുടെയോ സഹോദരീ-സഹോദരന്മാരുടെയോ പിതൃസഹോദരന്മാരുടെയോ അമ്മായി-അമ്മാവന്മാരുടെയോ മാതൃസഹോദരിമാരുടെയോ വസതികളില്‍ നിന്നോ നിങ്ങളുടെ കൈവശം താക്കോല്‍ നിക്ഷിപ്തമായ വീടുകളില്‍ നിന്നോ സ്‌നേഹിതരുടെ ഭവനങ്ങളില്‍ നിന്നോ ഒന്നിച്ചോ വെവ്വേറെയോ ആഹാരം കഴിക്കുന്നതില്‍ നിങ്ങള്‍ക്ക് കുഴപ്പമില്ല.³⁰
വീടുകളിലേക്കു കടക്കുമ്പോള്‍ അല്ലാഹുവിങ്കല്‍ നിന്നുള്ള അനുഗൃഹീതവും ഉദാത്തവുമായ ഉപഹാരമെന്ന നിലക്ക് നിങ്ങള്‍ പരസ്പരം സലാം പറയണം. ചിന്തിച്ചു ഗ്രഹിക്കാനായി ഇവ്വിധം അല്ലാഹു നിങ്ങള്‍ക്ക് ദൃഷ്ടാന്തങ്ങള്‍ പ്രതിപാദിച്ചു തരികയാണ്.³¹

അല്ലാഹുവിലും അവന്റെ ദൂതരിലും വിശ്വാസമര്‍പ്പിച്ചവര്‍ മാത്രമാണ് സത്യവിശ്വാസികള്‍.അവര്‍ നബിയൊന്നിച്ച് ഏതെങ്കിലും പൊതുകാര്യത്തില്‍ വ്യാപൃതരാവുകയാണെങ്കില്‍ അവിടത്തോടനുമതി തേടാതെ പിരിഞ്ഞുപോകില്ല. ഇങ്ങനെ, അങ്ങയോട് അനുമതിതേടുന്നവര്‍ തന്നെയാണ് അല്ലാഹുവിലും ദൂതനിലും വിശ്വസിക്കുന്നവര്‍. ഏതെങ്കിലും കാര്യത്തിന്ന് അങ്ങയോടവര്‍ സമ്മതം ചോദിച്ചാല്‍ താങ്കളുദ്ദേശിക്കുന്നവര്‍ക്കത് നല്‍കുകയും അവര്‍ക്കു പാപമോചനമര്‍ഥിക്കുകയും ചെയ്യുക. ഏറെ പൊറുക്കുന്നവനും കരുണാമയമനുമത്രേ അല്ലാഹു.³²

റസൂലിനോടുള്ള അഭിസംബോധന നിങ്ങള്‍ പരസ്പരം വിളിക്കുന്നതുപോലെയാകരുത്. അന്യന്റെ മറപിടിച്ച് നിങ്ങളുടെ കൂട്ടത്തില്‍ നിന്ന് ഊര്‍ന്നിറങ്ങുന്നവരെ അല്ലാഹു അറിയുന്നുണ്ട്. അതുകൊണ്ട്, നബിയുടെ ശാസനക്ക് എതിരുചെയ്യുന്നവര്‍ തങ്ങള്‍ക്കെന്തെങ്കിലും ആപത്തുവരികയോ വേദനാജനകമായ ശിക്ഷ ബാധിക്കുകയോ ചെയ്യുന്നതില്‍ ജാഗ്രതപുലര്‍ത്തിക്കൊള്ളട്ടെ.³³

അറിയണം, ഭുവന-വാനങ്ങളിലുള്ളവയത്രയും അല്ലാഹുവിന്റേതാണ്. നിങ്ങളുടെ നിലപാട് എന്തെന്നും അവങ്കലേക്ക് അവര്‍ തിരിച്ചയക്കപ്പെടുന്ന നാളും അവന്നറിയാം. അപ്പോള്‍, അവരനുവര്‍ത്തിച്ചിരുന്ന കാര്യങ്ങളെക്കുറിച്ച് അവരെയവന്‍ അറിയിക്കുന്നതാണ്. സര്‍വകാര്യങ്ങളെക്കുറിച്ചും ജ്ഞാനിയത്രേ അല്ലാഹു.³⁴