അൽ മുഅ്മിനൂൻ - المؤمنون - Al-Muminun

തങ്ങളുടെ നമസ്‌കാരത്തില്‍ ഭയപ്പാടുള്ളവരും വ്യര്‍ത്ഥ വിഷയങ്ങളില്‍ നിന്നു തിരിഞ്ഞു കളയുന്നവരും സകാത്ത് നിര്‍വഹിക്കുന്നവരും.¹
ഭാര്യമാര്‍, സ്വന്തം അടിമ സ്ത്രീകള്‍ എന്നിവരില്‍ നിന്നൊഴികെ ജനനേന്ദ്രിയങ്ങള്‍ കാത്തു സൂക്ഷിക്കുക വഴി അനധിക്ഷേപാര്‍ഹരും-ഇതിനപ്പുറം ആരെങ്കിലും ആഗ്രഹിച്ചാല്‍ അവര്‍ അതിക്രമകാരികള്‍ തന്നെ.²
തങ്ങളുടെ ഉത്തരവാദിത്വങ്ങളും കരാറുകളും പാലിക്കുന്നവരും³
നമസ്‌കാരത്തില്‍ നിഷ്ഠ പുലര്‍ത്തുന്നവരുമായ സത്യവിശ്വാസികള്‍ വിജയം വരിക്കുക തന്നെ ചെയ്തിരിക്കുന്നു. ഇവര്‍ തന്നെയാണ് സമുന്നത സ്വര്‍ഗമായ ഫിര്‍ദൗസ് അനന്തരാവകാശമായി സ്വായത്തമാക്കുന്നവര്‍; അതിലവര്‍ ശാശ്വത വാസികളായിരിക്കും.⁴

നിശ്ചയം മനുഷ്യനെ കളിമണ്ണിന്റെ സത്തില്‍ നിന്നു നാം സൃഷ്ടിക്കുകയും പിന്നീട് ശുക്ലമാക്കി ഒരു ഭദ്ര സ്ഥലത്ത് നിക്ഷേപിക്കുകയും ചെയ്തു. അനന്തരം ആ ശുക്ലത്തെ രക്ത പിണ്ഡമായും അതിനെ മാംസ പിണ്ഡമായും തുടര്‍ന്ന് അതിനെ അസ്ഥികൂടമായും രൂപപ്പെടുത്തി. അനന്തരമത് മാംസം കൊണ്ട് ആവരണം ചെയ്തു. പിന്നീട് മറ്റൊരു സൃഷ്ടിയായി നാമവന് അസ്തിത്വമേകി. അപ്പോള്‍ ഏറ്റം ഉദാത്തമായി സൃഷ്ടി കര്‍മം നടത്തുന്ന അല്ലാഹു അനുഗ്രഹ പൂര്‍ണനത്രേ. തദനന്തരം നിങ്ങള്‍ മരണ വിധേയരാവുന്നതും പിന്നീട് പുനരുത്ഥാന നാളില്‍ ഉയിര്‍ത്തെഴുന്നേല്‍പിക്കപ്പെടുന്നതുമാണ്, തീര്‍ച്ച.⁵

നിങ്ങള്‍ക്കു മീതെ ഏഴു മാര്‍ഗങ്ങള്‍ നാം പടച്ചുണ്ടാക്കുക തന്നെ ചെയ്തു. സൃഷ്ടികളെ പറ്റി നാം അശ്രദ്ധരാവുകയേ ചെയ്തിട്ടില്ല.⁶
നാം അന്തരീക്ഷത്തില്‍ നിന്നു ഒരു നിശ്ചിത അളവില്‍ മഴ വര്‍ഷിക്കുകയും ഭൂമിയിലത് കെട്ടി നിര്‍ത്തുകയുമുണ്ടായി-അതിനെ ഉന്മൂലനം ചെയ്യാന്‍ നമുക്ക് സാധിക്കുക തന്നെ ചെയ്യും-അങ്ങനെ ആ ജലം മുഖേന ഈത്തപ്പനകളുടെയും മുന്തിരി വള്ളികളുടെയും തോട്ടങ്ങള്‍ നിങ്ങള്‍ക്ക് നാം ഉത്പാദിപ്പിച്ചു തന്നു. അവയില്‍ സമൃദ്ധമായി പഴങ്ങളുണ്ട്; അവ നിങ്ങള്‍ ആഹരിക്കുന്നു. സീനാ മലനിരകളിലെ ഒലീവ് മരവും നാമുല്‍പാദിപ്പിച്ചു-ആഹരിക്കുന്നവര്‍ക്ക് എണ്ണയും കറിയും അത് നല്‍കുന്നു. കാലികളിലും നിങ്ങള്‍ക്ക് ഗുണ പാഠമുണ്ട്, തീര്‍ച്ച. അവയുടെ ഉദരങ്ങളിലുള്ളതില്‍ നിന്ന് നിങ്ങള്‍ക്ക് നാം പാല്‍ കുടിപ്പിക്കുന്നു. അവയില്‍ നിങ്ങള്‍ക്ക് വേറെയും ഒട്ടേറെ ഉപകാരങ്ങളുണ്ട്. അവയില്‍ നിന്ന് നിങ്ങള്‍ മാംസം ഭുജിക്കുകയും അവയുടെ പുറത്തും ജലയാനങ്ങളിലുമായി നിങ്ങള്‍ വാഹനമേറുകയും ചെയ്യുന്നു.⁷

തന്റെ ജനതയിലേക്ക് നൂഹ് നബിയെ നാം ദൂതനായി നിയോഗിക്കുകയുണ്ടായി. അദ്ദേഹം ഉദ്‌ബോധിപ്പിച്ചു: എന്റെ ജനമേ, നിങ്ങള്‍ അല്ലാഹുവിനെ ആരാധിക്കണം; അവനല്ലാതെ യാതൊരു ദൈവവും ഇല്ല. നിങ്ങള്‍ അവനെ സൂക്ഷിക്കുന്നില്ലേ?⁸
അപ്പോള്‍ തന്റെ സമൂഹത്തിലെ അവിശ്വാസികളായ സാരഥികള്‍ തട്ടിവിട്ടു; നിങ്ങളെ പോലുള്ള ഒരാള്‍ മാത്രമാണിവന്‍, നിങ്ങള്‍ക്കു മീതെ മഹത്ത്വമാര്‍ജിച്ചെടുക്കണമെന്നാണിവന്റെ വിചാരം. അല്ലാഹു ഉദ്ദേശിച്ചാല്‍ ദൂതരായി മലക്കുകളെ അയക്കുമായിരുന്നു. ഇങ്ങനെ ഒരു ഏകദൈവത്വം പൂര്‍വ പിതാക്കളില്‍ നാം ശ്രവിച്ചിട്ടില്ല. ഇവന്‍ ഭ്രാന്ത് പിടിച്ച ഒരാള്‍ മാത്രമാണ്. അതു കൊണ്ട് ഇവന്റെ കാര്യത്തില്‍ നിങ്ങള്‍ ഒരല്‍പ കാലം കാത്തിരിക്കുക⁹

നൂഹ് നബി പ്രാര്‍ത്ഥിച്ചു: എന്റെ നാഥാ, ഇവര്‍ എന്നെ വ്യാജനാക്കി കളഞ്ഞിരിക്കയാല്‍ എന്നെ നീ സഹായിക്കേണമേ! തത്സമയമദ്ദേഹത്തിനു നാം ഇങ്ങനെ സന്ദേശം നല്‍കി: നമ്മുടെ മേല്‍നോട്ടത്തിലും ബോധനമനുസരിച്ചും താങ്കള്‍ ജലയാനം പണിയുക. നമ്മുടെ ശാസന വന്നെത്തുകയും അടുപ്പില്‍ നിന്നു ഉറവ പൊട്ടി ജലമൊലിക്കുകയും ചെയ്താല്‍ മുഴുജീവികളില്‍ നിന്നും രണ്ട് ഇണകളെയും സ്വകുടുംബത്തെയും-അവരില്‍ നിന്നു ശിക്ഷാ വിധി മുന്‍ കടന്നവരെയൊഴികെ-അതില്‍ കയറ്റുക. അതിക്രമികളെ പറ്റി എന്നോട് മിണ്ടരുത്; അവര്‍ മുക്കി കൊല്ലപ്പെടുന്നതു തന്നെയാണ്.¹⁰
അങ്ങനെ താങ്കളും കൂടെയുള്ളവരും ജലയാനമേറിയാല്‍ ഇങ്ങനെ പറയുക: അക്രമികളില്‍ നിന്ന് ഞങ്ങളെ രക്ഷപ്പെടുത്തിയ അല്ലഹുവിനാണ് സര്‍വ സ്‌തോത്രങ്ങളും. നാഥാ, അനുഗൃഹീതമായ ഒരവരോഹണം എനിക്കു നീ സൗകര്യപ്പെടുത്തി തരേണമേ. ഉദാത്തമാം വിധം ഇറക്കി തരുന്നവന്‍ നീയാണല്ലോ. ആ മഹാപ്രളയത്തില്‍ ഒട്ടേറെ ദൃഷ്ടാന്തങ്ങളുണ്ട്. നാമവരെ പരീക്ഷിക്കുക തന്നെയായിരുന്നു.¹¹

അനന്തരം അവരുടെ വഴിയെ മറ്റൊരു തലമുറ നാം വളര്‍ത്തിയുണ്ടാക്കി. തങ്ങളില്‍നിന്നു തന്നെയുള്ള ഒരു ദുതനെ നാം നിയോഗിച്ചു. അദ്ദേം പറഞ്ഞു: അല്ലാഹുവിനെ ആരാധിക്കുക, നിങ്ങള്‍ക്ക് അവനല്ലാതെ ഒരു ദൈവവും ഇല്ല. അവനെ സൂക്ഷിക്കുന്നില്ലേ നിങ്ങള്‍?¹²
തന്റെ ജനത്തിലെ നിഷേധികളും പരലോകസാന്നിധ്യം വ്യാജമാക്കിയവരും ഭൗതിക ജീവിതത്തില്‍ നാം സുഖാഡംബരങ്ങള്‍ കൊടുത്തവരുമായ പ്രമാണിമാര്‍ തട്ടിവിട്ടു: നിങ്ങളെപ്പോലുള്ളൊരു മനുഷ്യന്‍ മാത്രമാണിവന്‍. നിങ്ങളുടെ അന്നപാനാദികള്‍ തന്നെയാണ് ഇവനും കഴിക്കുന്നത്. സ്വന്തത്തെ പോലുള്ള ഒരാളെ അനുസരിക്കുകയാണെങ്കില്‍, അപ്പോള്‍ പരാജിതര്‍ തന്നെയായിപ്പോവും നിങ്ങള്‍, തീര്‍ച്ച. മരിച്ച് മണ്ണും എല്ലുകളുമായിക്കഴിഞ്ഞാല്‍ പിന്നെയും പുനര്‍ജീവിപ്പിക്കപ്പെടുമെന്നാണോ നിങ്ങളോടിവന്‍ വാഗ്ദാനം ചെയ്യുന്നത്? അതീവ വിദൂരം തന്നെയാണ് ഈ വാഗ്ദത്ത കാര്യം!¹³
ജീവിതമെന്നത് ഈ ഐഹിക ലോകത്തേത് മാത്രമത്രേ-നാം മനുഷ്യര്‍ മരിക്കുന്നു, ജീവിക്കുന്നു; ഉയിര്‍ത്തെഴുന്നേല്‍പിക്കപ്പെടുന്നവരേയല്ല. അല്ലാഹുവിന്റെ പേരില്‍ വ്യാജം കെട്ടിച്ചമച്ച ഒരാള്‍ മാത്രമാണിവന്‍. ഞങ്ങളിവനെ വിശ്വസിക്കുകയേ ചെയ്യില്ല.¹⁴

അദ്ദേഹം പ്രാര്‍ത്ഥിച്ചു: നാഥാ, എന്നെ ഇവര്‍ വ്യാജനാക്കിയിരിക്കയാല്‍ നീ സഹായിക്കേണമേ! അല്ലാഹു പ്രതികരിച്ചു: ഒട്ടും താമസിയാതെ അവര്‍ കൊടും ഖേദത്തിലകപ്പെടുക തന്നെചെയ്യുന്നവരാകുന്നു. അങ്ങനെ, സത്യവിധിയുടെ ഒരു ഘോര മുഴക്കം അവരെ പിടികൂടുകയും നാമവരെ ചപ്പുചവറുകളാക്കുകയുമുണ്ടായി.¹⁵
അതിക്രമികള്‍ ദൂരെപ്പതിച്ചു പോകട്ടെ. പിന്നെ അവരുടെ വഴിയെ മറ്റു ജനപഥങ്ങളെ നാം വളര്‍ത്തി. ഒരു ജനസഞ്ചയവും അതിന്റെ പരിധിവിട്ട് മുന്നോട്ടോ പിന്നോട്ടോ പോകില്ല. അനന്തരം നമ്മുടെ ദൂതരെ തുടര്‍ച്ചയായി നാം നിയോഗിച്ച് കൊണ്ടിരുന്നു. ഓരോ ജനപഥത്തിനടുത്തും തങ്ങളുടെ ദൂതന്‍ ചെന്നപ്പോഴൊക്കെ അവരദ്ദേഹത്തെ വ്യാജനാക്കുകയാണുണ്ടായത്. അപ്പോള്‍, ഒന്നിനു പുറകെ മറ്റൊന്ന് എന്ന നിലക്ക് നാമവരെ സംഹരിക്കുകയും കഥനവൃത്താന്തങ്ങളാക്കുകയുമുണ്ടായി. സത്യവിശ്വാസം കൈക്കൊള്ളാത്ത ജനസഞ്ചയങ്ങള്‍ നിപതിച്ചു പോകട്ടെ.¹⁶

അനന്തരം മൂസാ നബിയെയും സഹോദരന്‍ ഹാറൂന്‍ നബിയെയും നമ്മുടെ ദൃഷ്ടാന്തങ്ങളും സ്പഷ്ട പ്രമാണങ്ങളും സഹിതം ഫിര്‍ഔന്റെയും പൗരപ്രമുഖരുടെയുമടുത്തേക്ക് നാം നിയോഗിച്ചു. എന്നാല്‍ അഹങ്കാരം കാട്ടുകയാണവര്‍ ചെയ്തത്. തന്‍പോരിമക്കാരായ ഒരു സംഘമായിരുന്നു അവര്‍. തന്മൂലമവര്‍ തട്ടിവിട്ടു: നമ്മെ പോലുള്ള രണ്ടു പേരെ നാം വിശ്വസിക്കുകയോ? അവരുടെയാളുകളാവട്ടെ നമുക്ക് ദാസ്യവേല ചെയ്യന്നവരാണു താനും!. അങ്ങനെ രണ്ടുപേരെയും അവര്‍ വ്യാജരാക്കി. തന്മൂലമവര്‍ ഉന്മൂലനം ചെയ്യപ്പെട്ടവരായി.¹⁷

ഇസ്രയേല്യര്‍ സന്മാര്‍ഗ പ്രാപ്തരാകാന്‍ വേണ്ടി മൂസാ നബിക്ക് നാം തൗറാത്ത് നല്‍കുകയുണ്ടയി. ഈസാ നബിയെയും മര്‍യം ബീവിയെയും നാം ഒരു ദൃഷ്ടാന്തമാക്കുകയും ആവാസയോഗ്യവും ജലസാന്നിധ്യമുള്ളതുമായ ഉയര്‍ന്നൊരു പ്രദേശത്ത് അവരിരുവര്‍ക്കും അഭയം നല്‍കുകയുമുണ്ടായി. നാം അരുളി: ഹേ ദൂതരേ, ഉദാത്ത വസ്തുക്കളില്‍ നിന്ന് നിങ്ങള്‍ ആഹരിക്കുകയും സല്‍ക്കര്‍മങ്ങളനുഷ്ഠിക്കുകയും ചെയ്യുക, നിങ്ങളുടെ പ്രവൃത്തികളെപ്പറ്റി ഞാനറിയുക തന്നെ ചെയ്യുന്നുണ്ട്. നിശ്ചയം, ഇതാണു നിങ്ങളുടെ സമുദായം; ഒറ്റ സമുദായം. ഞാനാണ് നിങ്ങളുടെ നാഥന്‍. അതു കൊണ്ട് എന്നെ നിങ്ങള്‍ സൂക്ഷിക്കുക.¹⁸
എന്നിട്ട് സ്വന്തം കാര്യങ്ങളില്‍ പരസ്പര ഭിന്നരായി ജനം കക്ഷികളായി വേര്‍പിരിഞ്ഞു. ഓരോ ചേരിയും തങ്ങളുടെ നയനിലപാടുകളില്‍ സംതൃപ്തരാണ്. അതു കൊണ്ട് നബീ, തങ്ങളുടെ ദുര്‍മാര്‍ഗത്തിലായിക്കൊണ്ട് ഒരു നിശ്ചിതാവധി വരെ അവരെ വിട്ടേക്കുക. സ്വത്തും സന്താനങ്ങളുമായി നാമവര്‍ക്ക് നല്‍കിക്കൊണ്ടിരിക്കുന്നത്, ധൃതിപ്പെട്ട് നാം നന്മ ചൊരിയുകയാണെന്നാണോ അവര്‍ ധരിക്കുന്നത്? അല്ല, അവര്‍ വസ്തുത എന്തെന്ന് മനസ്സിലാക്കുന്നില്ല.¹⁹

തങ്ങളുടെ നാഥനെ കുറിച്ച ഭയത്താല്‍ ശിക്ഷാ ഭീതിയുള്ളവരും അവന്റെ ദൃഷ്ടാന്തങ്ങളില്‍ വിശ്വസിക്കുന്നവരും അവനോട് മറ്റൊന്നിനെയും പങ്കു ചേര്‍ക്കാത്തവരും അവന്റെ സന്നിധിയിലേക്ക് തിരിച്ചു ചെല്ലേണ്ടവരാണ് തങ്ങളെന്നു മനസ്സില്‍ ഭയപ്പാടുള്ളതോടൊപ്പം വേണ്ടതൊക്കെ ദാനം ചെയ്യുന്നവരും ആരോ അവരത്രേ നന്മകളില്‍ തത്രപ്പെടുന്നവര്‍. അതിലേക്ക് മുന്‍ കടന്നവരാണവര്‍.²⁰
ഒരാളോടും തനിക്കാകുന്നതല്ലാതെ നാം കല്‍പിക്കുന്നതല്ല. സത്യം വെളിപ്പെടുത്തുന്ന ഒരു ലിഖിതം നമ്മുടെ വശമുണ്ട്; മനുഷ്യരോട് അനീതി കാണിക്കപ്പെടുകയില്ല. എന്നാല്‍ അവരുടെ ഹൃദയങ്ങള്‍ ഇതു സംബന്ധിച്ച് അശ്രദ്ധയിലത്രേ. അതല്ലാത്ത മറ്റ് കുറെ ചെയ്തികളാണവരുടേത്. അവയനുവര്‍ത്തിക്കുകയാണവര്‍.²¹

അങ്ങനെ അവരിലെ ആഡംബരപ്രിയരെ നാം ശിക്ഷാവിധേയരാക്കിക്കഴിയുമ്പോള്‍ അവരതാ വിലപിക്കുകയായി. തത്സമയം നാം പറയും: ഇവിടെ നിങ്ങള്‍ നിലവിളി കൂട്ടേണ്ട; നമ്മുടെ ഭാഗത്തു നിന്നു നിങ്ങള്‍ സഹായിക്കപ്പെടുന്നതേയല്ല. എന്റെ സൂക്തങ്ങള്‍ നിങ്ങള്‍ക്ക് പാരായണം ചെയ്യപ്പെടറുണ്ടായിരുന്നല്ലോ, തത്സമയം അഹന്ത നടിച്ച് അവഗണിച്ച് കളയുകയായിരുന്നു നിങ്ങള്‍; ഒരു രാക്കഥയെന്നവണ്ണം ഖുര്‍ആനെപ്പറ്റി നിങ്ങള്‍ അനാവശ്യം തട്ടിവിട്ടു.²²

ഈ ഖുര്‍ആന്‍ വചനങ്ങള്‍ എന്തുകൊണ്ട് അവര്‍ ചിന്താവിധേയമാക്കുന്നില്ല? അതോ തങ്ങളുടെ പൂര്‍വ്വ പിതാക്കള്‍ക്ക് ലഭിച്ചിട്ടില്ലാത്തതാണോ അവര്‍ക്ക് വന്നെത്തിയിരിക്കുന്നത്? അതോ തങ്ങളുടെ റസൂല്‍ അപരിചിതനായതു കൊണ്ടാണോ അവരദ്ദേഹത്തെ നിഷേധിക്കുന്നത്? അതുമല്ല, പ്രവാചകനു ഭ്രാന്തുണ്ടെന്നാണോ അവരുടെ വാദം? ഇതൊന്നുമല്ല കാര്യം; സത്യവും കൊണ്ട് നബി അവരെ സമീപിച്ചു; അവരില്‍ ചിലരാവട്ടെ സത്യത്തെ വെറുക്കുന്നവരാകുന്നു.²³
സത്യപ്രസ്ഥാനം അവരുടെ സ്വേച്ഛകളനുസരിച്ചായിരുന്നെങ്കില്‍ ഭുവന-വാനങ്ങളും അവയിലുളളവരും ശിഥിലമായേനെ. വസ്തുതയതല്ല; അവര്‍ക്കുളള ഉദ്‌ബോധനവുമായി നാമവരെ സമീപിച്ചു; പക്ഷേ ആ ഉദ്‌ബോദനത്തില്‍ നിന്ന് അവര്‍ വ്യതിചലിച്ച് പോവുകയാണ്. അതല്ല നബീ, താങ്കളവരോട് എന്തെങ്കിലും പ്രതിഫലം ആവശ്യപ്പെടുന്നുണ്ടോ? എങ്കില്‍ അങ്ങയുടെ നാഥനില്‍ നിന്നുളള പ്രതിഫലമത്രേ അത്യുദാത്തം. ഉപജീവനമേകുന്നവരില്‍ ഏറ്റം ഉത്തമനത്രേ അവന്‍.²⁴

താങ്കള്‍ ഋജുവായ പന്ഥാവിലേക്ക് തന്നെയാണ് അവരെ ക്ഷണിക്കുന്നത്, തീര്‍ച്ച; എന്നാല്‍ പാരത്രിക ലോകത്തില്‍ അവിശ്വസിക്കുന്നവര്‍ ആ നേര്‍വഴിയില്‍ നിന്ന് വ്യതിചലിച്ച് പോവുകതന്നെയത്രേ. ഇനി അവര്‍ക്ക് നാം കരുണ ചെയ്യുകയും ദുരിതമകറ്റുകയും ചെയ്താല്‍ തങ്ങളുടെ ദുര്‍മാര്‍ഗത്തില്‍ വിലയം പ്രാപിച്ചു കൊണ്ട് തന്നെ അവരതില്‍ ആഴ്ന്നിറങ്ങും.²⁵
അവരെ നാം ശിക്ഷാവിധേയരാക്കുക തന്നെ ചെയ്തു. എന്നിട്ടും അവര്‍ തങ്ങളുടെ നാഥന് വിധേയത്വം കാട്ടുകയോ വിനയപ്രകടനം നടത്തുകയോ ചെയ്തില്ല. അങ്ങനെ കഠോര ശിക്ഷയുടെ ഒരു വാതായനം അവര്‍ക്കു നേരെ നാം തുറന്നപ്പോള്‍ അവരതാ ഭഗ്നാശരായി പരിണമിക്കുന്നു.!²⁶

നിങ്ങളക്ക് കേള്‍വിയും കാഴ്ചകളും ഹൃദയങ്ങളുമുണ്ടാക്കി തന്നത് അവനാണ് ; വളരെ തുച്ഛമായേ നിങ്ങള്‍ കൃതജ്ഞരാവുന്നുള്ളൂ. ഭൂതലത്തില്‍ നിങ്ങളെ പടച്ചുണ്ടാക്കിയതും അവനാണ്; നിങ്ങള്‍ ഒരുമിച്ച് കൂട്ടപ്പെടുന്നതും അവങ്കലേക്കു തന്നെ. ജീവിപ്പിക്കുന്നതും മരിപ്പിക്കുന്നതും അവനാണ്. രാത്രിയുടെയും പകലിന്റെയും ഏറ്റക്കുറച്ചിലുകളും അവന്റെ നിയന്ത്രണത്തില്‍ തന്നെ-ഇതൊന്നും നിങ്ങള്‍ ചിന്തിച്ച് ഗ്രഹിക്കുന്നില്ലേ?²⁷

അല്ല, പൂര്‍വികരുടേതെന്ന പോലെ ഇവരും തട്ടിവിടുകയാണ്-അവര്‍ ജല്‍പിച്ചു: മരണപ്പെട്ട് മണ്ണും അസ്ഥികളുമായിക്കഴിഞ്ഞാല്‍ ഞങ്ങള്‍ പുനര്‍ജീവിപ്പിക്കപ്പെടുമോ? ഞങ്ങളോടും മുമ്പ് ഞങ്ങളുടെ പിതാക്കളോടും ഇങ്ങനെ വാഗ്ദാനം ചെയ്യപ്പെട്ടിരുന്നു; പൂര്‍വികരുടെ കെട്ടുകഥകളാണിതൊക്കെയും. നബീ, ചോദിക്കുക: ഭൂമിയും അതിലുള്ളതും ആര്‍ക്ക് വേണ്ടിയുള്ളതാണ്? നിങ്ങള്‍ക്കറിയാമെങ്കില്‍ മറുപടി തരൂ! അവര്‍ പ്രതികരിക്കും, അല്ലാഹുവിനുള്ളതാണ്. താങ്കള്‍ ചോദിക്കുക: എങ്കില്‍ നിങ്ങള്‍ ചിന്തിച്ചു ഗ്രഹിക്കുന്നില്ലേ? സപ്തവാനങ്ങളുടെയും മഹത്തായ സിംഹാസനത്തിന്റെയും ഉടമസ്ഥന്‍ ആരാണ്? അവര്‍ പ്രതികരിക്കും: അല്ലാഹുവിനുള്ളതാണ്. താങ്കള്‍ ചോദിക്കുക: നിങ്ങള്‍ അവനെ ഭയപ്പെടുന്നില്ലേ? സമസ്ത കാര്യങ്ങളിലും പരമാധികാരിയും അഭയദാതാവും തനിക്കു പ്രതികൂലമായി മറ്റാരാലും അഭയം നല്‍കപ്പെടാത്തവനും ആരാണ് എന്ന് നിങ്ങള്‍ക്ക് അറിയാമെങ്കില്‍ പറയൂ. ഈ ഗുണങ്ങളത്രയും അല്ലാഹുവിനുള്ളതാണ് എന്ന് അവര്‍ പ്രതികരിക്കും. അങ്ങ് ചോദിക്കുക: എന്നിട്ടും നിങ്ങളെന്താണിങ്ങനെ വഞ്ചിതരായിത്തീരുന്നത്?!²⁸

അവര്‍ പറയുന്നതല്ല ശരി, സത്യവുമായി അവരുടെയടുത്ത് നാം ചെന്നു; അവരാകട്ടെ, അത് വ്യാജമാക്കുന്നവര്‍ തന്നെയാകുന്നു. അല്ലാഹു ഒരു സന്താനത്തെയും വരിച്ചിട്ടില്ല; ഒരു ദൈവവും അവനൊന്നിച്ച് ഉണ്ടായിട്ടുമില്ല. അങ്ങനെ ഭവിച്ചിരുന്നുവെങ്കില്‍ ഓരോ ദൈവവും താന്‍ പടച്ചുണ്ടാക്കിയതുമായി പോവുകയും അവര്‍ പരസ്പരം സര്‍വാധിപത്യം ചെലുത്തുകയും ചെയ്തിരുന്നേനെ.അവരുടെ ജല്‍പനങ്ങളില്‍ നിന്നൊക്കെ ദൃശ്യവും അദൃശ്യവുമറിയുന്ന അല്ലാഹു എത്ര വിശുദ്ധന്‍! അവര്‍ പങ്കു ചേര്‍ക്കുന്നതില്‍ നിന്നെല്ലാം അതീതനാണവന്‍.²⁹

നബീ, പ്രാര്‍ത്ഥിക്കുക: നാഥാ, ഇവര്‍ക്ക് താക്കീതു നല്‍കപ്പെടുന്ന ശിക്ഷ എനിക്കു ഗോചരീഭവിപ്പിക്കുകയാണെങ്കില്‍ അക്രമികളായ ജനപഥത്തില്‍ എന്നെ നീ ഉള്‍പ്പെടുത്തിക്കളയരുതേ! അവര്‍ക്കു താക്കീതുചെയ്ത ശിക്ഷ താങ്കള്‍ക്ക് കാണിക്കാന്‍ നാം കഴിവുറ്റവര്‍ തന്നെയാകുന്നു, തീര്‍ച്ച!³⁰
ഏറ്റം ഉദാത്തമേതോ അതുകൊണ്ട് താങ്കള്‍ തിന്മ പ്രതിരോധിക്കുക.അവരുടെ ജല്‍പനങ്ങളെപ്പറ്റി നമുക്ക് നന്നായി അറിയുന്നതാണ്. അങ്ങ് പ്രാര്‍ത്ഥിക്കുക: എന്റെ നാഥാ, പിശാചുക്കളുടെ ദുര്‍ബോധനങ്ങളില്‍ നിന്നും അവര്‍ എന്നെ സമീപിക്കുന്നതില്‍ നിന്നും നിന്നോട് ഞാന്‍ ശരണമര്‍ത്ഥിക്കുന്നു.³¹

അങ്ങനെ അവരിലൊരാള്‍ക്ക് മരണം ആസന്നമായിക്കഴിയുമ്പോള്‍ അവന്‍ അപേക്ഷിക്കും: നാഥാ, എനിക്കു കൈവിട്ടു പോയ പുണ്യങ്ങളനുവര്‍ത്തിക്കാനായി എന്നെ ജീവിതത്തിലേക്ക് തിരിച്ചയക്കേണമേ! എന്നാല്‍ അതൊരിക്കലും സംഭവിക്കില്ല, അവന്‍ ഉരുവിടുന്ന ഒരു പാഴ് വചനം മാത്രമാണത്. പുനരുത്ഥാനനാള്‍ വരെ അവര്‍ക്കപ്പുറമൊരു മറയുണ്ടായിരിക്കും.³²
എന്നാല്‍ കാഹളത്തില്‍ ഊതപ്പെട്ടാല്‍ അന്നവര്‍ക്കിടയില്‍ രക്ത ബന്ധങ്ങളൊന്നുമുണ്ടാവില്ല; പരസ്പരം അന്വേഷിക്കുക പോലും ചെയ്യില്ല. അപ്പോള്‍ പുണ്യങ്ങളുടെ തുലാസുകള്‍ ആരുടേതാണോ കനമുണ്ടായത് അവര്‍ തന്നെയാകും വിജയികള്‍. ആരുടെ തുലാസുകള്‍ കനം കുറഞ്ഞതായോ , സ്വന്തത്തിനു തന്നെ നഷ്ടം വരുത്തിയവരും നരകത്തിലെ നിത്യവാസികളുമാവും അവര്‍. നരകത്തീ അവരുടെ വദനങ്ങള്‍ കരിച്ചു കളയുന്നതും അവരതില്‍ പല്ലിളിച്ചവരായിരിക്കുന്നതുമാണ്.³³

അവരോട് ചോദിക്കപ്പെടും: എന്റെ സൂക്തങ്ങള്‍ നിങ്ങളോട് പാരായണം ചെയ്യപ്പെട്ടിരുന്നില്ലേ? തത്സമയം നിങ്ങളത് നിഷേധിക്കുകയായിരുന്നല്ലോ? അവര്‍ പ്രതികരിക്കും: നാഥാ, ദൗര്‍ഭാഗ്യം ഞങ്ങളെ കീഴ്‌പെടുത്തുകയും മാര്‍ഗഭ്രംശമേറ്റ ഒരു വിഭാഗമായി ഞങ്ങള്‍ മാറുകയും ചെയ്തു. നാഥാ, ഈ നരകത്തില്‍ നിന്ന് ഞങ്ങളെ പുറത്ത് കൊണ്ട് വരേണമേ; ഇനിയും അധര്‍മ ജീവിതത്തിലേക്ക് തിരിച്ച് പോവുന്നുവെങ്കില്‍ ഞങ്ങള്‍ അതിക്രമികള്‍ തന്നെ, തീര്‍ച്ച.³⁴
അല്ലാഹു അരുളും: അതില്‍ തന്നെ നിങ്ങള്‍ നിത്യരായിക്കഴിഞ്ഞോളൂ,എന്നോട് മിണ്ടിപ്പോവരുത്. എന്റെ അടിമകളില്‍ ഒരു കൂട്ടര്‍, 'നാഥാ സത്യവിശ്വാസം വരിച്ചിരിക്ക കൊണ്ട് ഞങ്ങള്‍ക്ക് നീ പൊറുത്ത് തരികയും കരുണ വര്‍ഷിക്കുകയും ചെയ്യേണമേ, കാരുണികരില്‍ ഉദാത്തനാണു നീ' എന്നു പ്രാര്‍ത്ഥിക്കുമായിരുന്നു; തല്‍സമയം നിങ്ങളവരെ പരിഹസിക്കകയാണ് ചെയ്തത്. എത്രവരെയെന്നാല്‍ അവരെ പറ്റിയുള്ള അവഹേളന മനസ്‌കത എന്നെകുറിച്ച സ്മരണ പോലും നിങ്ങളില്‍ വിസ്മൃതമാക്കി.³⁵
നിങ്ങളവരെ കളിയാക്കിച്ചിരിക്കുകയായിരുന്നു. സഹനം കൈകൊണ്ടത് മൂലം ഞാനവര്‍ക്ക് ഇന്നിതാ പ്രതിഫലം നല്‍കിയിക്കുകയാണ്-അവര്‍ തന്നെയാണ് വിജയം വരിച്ചവര്‍.³⁶

അല്ലാഹു ചോദിക്കും: ഭൂമിയില്‍ നിങ്ങള്‍ എത്ര വര്‍ഷം നിവസിച്ചു? അവര്‍ പ്രതികരിക്കും: ഒരു ദിവസമോ ഒരു ഭാഗിക നാളോ കഴിച്ച് കൂട്ടിയിരിക്കും-കണക്ക് വെക്കുന്നവരോട് നീ അന്വേഷിക്കുക. അല്ലാഹു പ്രതികരിക്കും: വളരെ കുറച്ചു മാത്രമേ നിങ്ങള്‍ കഴിച്ച് കൂട്ടിയിട്ടുള്ളൂ. നിങ്ങള്‍ വസ്തുത ഗ്രഹിച്ചിരുന്നെങ്കില്‍ എത്ര നന്നായിരുന്നു?³⁷
നാം നിങ്ങളെ നിരര്‍ത്ഥകമായി പടച്ചു വിട്ടതാണെന്നും നമ്മുടെയടുത്തേക്ക് തിരിച്ചയക്കപ്പെടില്ലെന്നും നിങ്ങള്‍ വിചാരിച്ചിരിക്കുകയാണോ?³⁸

സാക്ഷാല്‍ രാജാവായ അല്ലാഹു ഉന്നതനാണ്. അവനല്ലാതെ ഒരു ദൈവമില്ല. സമാദരണീയ സിംഹാസനത്തിന്റെ അധിപനത്രേ അവന്‍. അല്ലാഹുവിനോടൊപ്പം മറ്റൊരു ദൈവത്തെ ആരെങ്കിലും ആരാധിക്കുന്നുവെങ്കില്‍ അതിന് യാതൊരു തെളിവും അവന്റെ പക്കലില്ല തന്നെ.³⁹
അവന്റെ കണക്കെടുപ്പ് തന്റെ നാഥന്റെയടുത്ത് തന്നെയായിരിക്കും. സത്യ നിഷേധികള്‍ വിജയപ്രാപ്തരാവുകയേയില്ല, തീര്‍ച്ച. നബീ പറയുക: നാഥാ, എനിക്ക് പൊറുത്ത് തരികയും കരുണ ചൊരിയുകയും ചെയ്താലും! കാരുണ്യവാന്‍മാരില്‍ ഏറ്റം ഉല്‍കൃഷ്ടനാണല്ലോ നീ.⁴⁰