ഭ്രമണപഥങ്ങളുള്ള ആകാശം, ആ വാഗ്ദത്ത മഹ്ശര്‍ദിനം, സാക്ഷികളാകുന്ന പ്രവാചകര്‍, സാക്ഷ്യം വഹിക്കപ്പെടുന്ന അന്ത്യനാള്‍ എന്നിവ തന്നെ ശപഥം1
വിറകുനിറച്ച അഗ്നിയുള്ള കിടങ്ങിന്റെയാള്‍ക്കാര്‍-സത്യവിശ്വാസികളെക്കൊണ്ട് തങ്ങള്‍ ചെയ്യുന്ന നിഷ്ഠുര കൃത്യത്തിന്ന് ദൃക്‌സാക്ഷികളായിരിക്കവേ-അഭിശപ്തരായിരിക്കുന്നു! അജയ്യനും ശ്ലാഘനീയനും ഭുവന-വാനങ്ങളുടെ അധിപനുമായ അല്ലാഹുവില്‍ വിശ്വസിച്ചു എന്നത് മാത്രമായിരുന്നു ആ വിശ്വാസികളുടെ മേല്‍ അവര്‍ കണ്ട അപരാധം. സര്‍വകാര്യങ്ങള്‍ക്കും അല്ലാഹു സാക്ഷിയാകുന്നു2
2 വിശദീകരണങ്ങൾ കാണുക
1. ശാസ്ത്രത്തിന്റെ പരിമിത ജ്ഞാനം വെച്ചു തന്നെ ആകാശലോകങ്ങള്‍ മഹാദ്ഭുതമാണ്. കോടാനുകോടി നക്ഷത്രങ്ങളും അവക്കൊക്കെ ഭ്രമണപഥങ്ങളും നിശ്ചിത ഉദയാസ്തമനങ്ങളുമുണ്ട്. അവയെ പിടിച്ചാണ് ഒന്നാം ശപഥം. രണ്ടാമത്തേത് മഹ്ശര്‍ ദിനമാണ്. 4:78, 6:12, 42:7 നോക്കുക. തിരുനബി(സ്വ)യും മറ്റു ദൂതന്മാരും തങ്ങളുടെ സമൂഹങ്ങളുടെ മേല്‍ സാക്ഷിനില്‍ക്കുന്ന കാര്യമാണ് മൂന്നാം ശപഥത്തിലെ സൂചന-16:89. ഖിയാമനാളിനെക്കുറിച്ച് സക്ഷ്യം വഹിക്കപ്പെടുന്ന ദിനമാണതെന്ന് 11:103ല്‍ കാണാം.
2. സത്യം ചെയ്തു പറയുന്ന കാര്യം ഹൃദയഭേദകവും അതീവനിഷ്ഠുരവുമായ ഒരു സംഭവത്തിലേക്കുള്ള സൂചനയാണ്. സത്യവിശ്വാസികളെ കഠിനമായി മര്‍ദിച്ച ഒരു രാജാവ് ലക്ഷ്യം കാണാതെ വന്നപ്പോള്‍ വലിയ അഗ്നികുണ്ഡമുണ്ടാക്കി വിശ്വാസം വലിച്ചെറിയാന്‍ തയ്യാറാവാത്തവരെ ജീവനോടെ അതില്‍ തള്ളാന്‍ തുടങ്ങി. അവസാനം കൈക്കുഞ്ഞുമായൊരു സ്ത്രീ ഹാജറാക്കപ്പെട്ടു. വിശ്വാസം കൈവെടിയുന്നില്ലെങ്കില്‍, ശിര്‍ക്കിന്റെ മതം സ്വീകരിക്കുന്നില്ലെങ്കില്‍ നിന്നെ അഗ്നിയില്‍ തള്ളുമെന്ന് അവര്‍ അന്ത്യശാസനം നല്‍കി. പിഞ്ചു കുഞ്ഞിനെയോര്‍ത്ത്, -ഒരു ദുര്‍ബലനിമിഷത്തില്‍- സത്യം കൈവെടിഞ്ഞാലോ എന്നവര്‍ ആലോചിക്കാന്‍ തുടങ്ങി. തത്സമയം കൈക്കുഞ്ഞ് സംസാരിച്ചു: ഉമ്മാ, ക്ഷമ കൈക്കൊണ്ട് പാദമിടറാതെ ഉറച്ചു നിന്നോളു; നിങ്ങള്‍ സത്യവഴിയില്‍ തന്നെയാകുന്നു! പിഞ്ചുകുഞ്ഞിനെയും മാതാവിനെയും ഒന്നിച്ച് അവര്‍ തീകുണ്ഡത്തില്‍ തള്ളി (മുസ്‌ലിം 7703, അഹ്മദ്-മുസ്‌നദ്). അല്ലാഹുവില്‍ വിശ്വസിച്ചുവെന്നല്ലാതെ ആ പീഡിതര്‍ യാതൊരു അപരാധവും ചെയ്തിട്ടില്ലായിരുന്നു. ആ ക്രൂരഹൃദയര്‍ക്ക് പരലോകത്ത് കഠിനമായ നരകശിക്ഷയുണ്ട്; ദൈവശാപം വേറെയും.