അൽ ഇൻശിഖാഖ് - الانشقاق - Al-Inshiqaq

1. ഖിയാമനാളും മഹ്ശറും വിചാരണയും നിഷേധിച്ചിരുന്ന മുശ്‌രിക്കുകളുടെ മുമ്പിലാണ് വിഷയം അവതരിപ്പിക്കുന്നത്. ഭൂമിയും ആകാശവും മറ്റെല്ലാ വസ്തുക്കളും അന്ന് തകര്‍ന്ന് തരിപ്പണമാകും; ഭൂമിക്കകത്ത് ശ്മശാനങ്ങളില്‍ മറവ്‌ചെയ്യപ്പെട്ടവര്‍, വിവിധതരം ഖനികള്‍-ലോഹങ്ങള്‍ എല്ലാം അന്ന് ബഹിര്‍ഗമിക്കുന്നതാണ്

2. സത്യവിശ്വാസിയുടെ വിചാരണ ലഘുവാണെന്ന് ഇവിടെ സ്പഷ്ടമാക്കിയിരിക്കുന്നു. തിരുനബി (സ്വ) പ്രസ്താവിക്കയുണ്ടായി: സത്യവിശ്വാസിയെ അല്ലാഹു അടുപ്പിക്കുന്നതും ഇങ്ങനെ പറയുന്നതുമാണ്: ദുന്‍യാവില്‍ വെച്ച് ഇന്നയിന്ന പാപങ്ങളൊക്കെ നീ ചെയ്തിരുന്നു; അവ മറച്ചുവെച്ചിരിക്കുകയായിരുന്നു ഞാന്‍; ഇന്ന് അവയത്രയും നിനക്ക് പൊറുത്ത് തന്നിരിക്കുന്നു. ഈ നടപടിക്ക് 'അര്‍ള്' (ക്ലഢ™ഥ) എന്നാണ് ഹദീസുകളിലുള്ളത്. മറ്റൊരു ഹദീസില്‍ ഇങ്ങനെയുണ്ട്: വിചാരണക്ക് ഒരാള്‍ വിധേയനാകുന്നുവെങ്കില്‍ നശിച്ചതു തന്നെ. തത്സമയം ആഇശ ബീവി ചോദിച്ചു: ഹിസാബ് അതീവ ലളിതമാണെന്നല്ലേ? (ഈ 7-9 സൂക്തങ്ങള്‍). നബി(സ്വ) പ്രതികരിച്ചു: ഇത് അര്‍ള് (കേവലാവതരണം) മാത്രമാണ്; ഒരാള്‍ വിചാരണാവിധേയനായാല്‍ അവന്‍ നശിച്ചതു തന്നെ (ബുഖാരി, മുസ്‌ലിം). ഹിസാബ് ഏറെ ദുഷ്‌കരമാണെന്നര്‍ത്ഥം.

3. പരാജിതരായ ആളുകള്‍ക്ക് ഇടതുകൈയിലാണ് ഏട് നല്‍കപ്പെടുക. അത് പിന്‍ഭാഗത്തുകൂടിയാണ് എന്ന് കൂടി ചില സൂക്തങ്ങളില്‍ പരാമര്‍ശിച്ചതു കാണാം. ഭൗതിക ലോകത്ത് അല്ലാഹുവിനെ ധിക്കരിച്ച്, പുനരുത്ഥാനം മറന്ന് ആനന്ദതുന്ദിലരായി കൂട്ടുകുടുംബങ്ങളോടൊപ്പം ആഡംബരജീവിതം നയിച്ചിരുന്നവരാണവര്‍. സ്വന്തം ദൗര്‍ഭാഗ്യവും കഷ്ടപ്പാടും വിളിച്ചു കേണു സങ്കടപ്പെടും അവര്‍. പക്ഷേ, യാതൊരു ഫലവുമുണ്ടാകില്ല.

4. എല്ലാ ജന്തുജാലങ്ങളും രാത്രി സമയത്ത് ആവാസകേന്ദ്രങ്ങളില്‍ സംഗമിക്കും; അപ്പോള്‍ മുഴുജീവജാലങ്ങളെയും പിടിച്ച് സത്യം ചെയ്തതുപോലെയായി. മനുഷ്യന്‍ ആത്മപരിശോധന നടത്തണമെന്നാണ് ഉദ്‌ബോധിപ്പിക്കുന്നത്. ആദ്യം നിശ്ശൂന്യത, പിന്നെ ഇന്ദ്രിയകണം, ഗര്‍ഭസ്ഥശിശു, കുട്ടി, യുവാവ്, മധ്യവയസ്‌കന്‍, വൃദ്ധന്‍ ഇങ്ങനെ ക്രമേണ വളര്‍ന്നു വികസിക്കുകയാണവന്‍. പിന്നെ വീണ്ടും അപ്രത്യക്ഷനാകുന്നു, മേല്‍വിലാസം തന്നെ നിശ്ശേഷം നശിക്കുന്നു. ഇതില്‍ നിന്നൊക്കെ ചിന്താശീലനായ വ്യക്തിക്ക് എന്തെല്ലാം പാഠങ്ങള്‍ ഉള്‍ക്കൊള്ളാനുണ്ട്

5. ദൃഷ്ടാന്തങ്ങള്‍ എന്തൊക്കെയുണ്ടെങ്കിലും മക്കയിലെ ധിക്കാരികളായ മുശ്‌രിക്കുകള്‍ സത്യസന്ദേശം ഉള്‍ക്കൊള്ളുകയില്ലെന്നും അവര്‍ പഴയതേ പാടൂ എന്നുമാണ് പറയുന്നത്. ഖുര്‍ആന്‍ വഴി സത്യവിശ്വാസം കൈക്കൊള്ളുകയും അങ്ങനെ അല്ലാഹുവിനു മുമ്പില്‍ സാഷ്ടാംഗം പ്രണമിക്കുകയുമാണ് യഥാര്‍ത്ഥത്തില്‍ അവര്‍ ചെയ്യേണ്ടത്. പക്ഷേ, അവര്‍ വഴങ്ങുകയില്ല. അതിനാല്‍, താങ്കള്‍ പരിഭവിക്കേണ്ട; താങ്കളുടെ ഉത്തരവാദിത്വം പ്രബോധനനിര്‍വഹണമാണ്. അതു ചെയ്തുകൊള്ളുക. നിഷേധികള്‍ക്ക് നാശവും നരകവുമാണ് ഉണ്ടാവുക എന്ന വിവരമറിയിച്ചുകൊടുക്കുക.