അത്താരിഖ് - الطارق - At-Tariq

1. മലക്കുകളാണ് വിവക്ഷ. മനുഷ്യരെ അപകടങ്ങളില്‍ നിന്ന് സംരക്ഷിക്കാനും നന്മ-തിന്മകള്‍ രേഖപ്പെടുത്താനും മറ്റുമായി മലക്കുകളുടെ നിരന്തര സാന്നിധ്യമുണ്ടാകും. നന്മയോ തിന്മയോ അവന്‍ അനുവര്‍ത്തിക്കുന്ന ഏതുകാര്യവും മലക്കുകള്‍ രേഖപ്പെടുത്തിവെക്കും. ആ രേഖയാണ് മഹ്ശറില്‍ അവന്‍ വായിക്കേണ്ടിവരിക.

2. മനുഷ്യ പ്രജനനം അത്യത്ഭുതകരവും ചിന്തോദ്ദീപകവുമായ ഒരു മഹാ അധ്യായമാണ്. ഒട്ടേറെ വിസ്മയങ്ങള്‍ ശാസ്ത്രം തദ്വിഷയകമായി കണ്ടുപിടിച്ചുകഴിഞ്ഞിട്ടുണ്ട്. എന്നാല്‍ അതിലേറെ സ്‌തോഭജനകമായ വിഷയങ്ങള്‍ ദൈനംദിനം പുതുതായി കണ്ടുപിടിക്കപ്പെട്ടുകൊണ്ടിരിക്കുകയാണ്. പുരുഷന്റെ ഇന്ദ്രിയത്തില്‍ മില്യണ്‍കണക്കില്‍ ബീജങ്ങളാണുണ്ടാവുക. അതില്‍ കേവലം ഒന്ന് മാത്രമാണ് സ്ത്രീയുടെ അണ്ഡവുമായി സംഗമിക്കുന്നത്. വഴിയെ പെറ്റുപെരുകുന്ന കോശങ്ങളാണ് മനുഷ്യശരീര നിര്‍മിതിയുടെ ഭാരിച്ച ഉത്തരവാദിത്വങ്ങള്‍ ഏറ്റെടുക്കുന്നത്. ക്രമപ്രവൃദ്ധമായ വളര്‍ച്ചയിലൂടെ വളരെ ആസൂത്രിതമായാണ് പൂര്‍ണശിശു പുറത്തേക്കുവരുന്നത്.

3. ആവര്‍ത്തന പ്രക്രിയയെപ്പറ്റി ഭിന്നവീക്ഷണങ്ങളുണ്ട്. സമുദ്രങ്ങളിലും ജലാശയങ്ങളിലും നിന്നു ജലം നീരാവിയായി പൊങ്ങി മേഘങ്ങളില്‍ സംഗമിച്ച് മഴയായി ഭൂമിയിലേക്കു തന്നെ വര്‍ഷിക്കുന്നു. പിന്നെയും ഈ പ്രക്രിയ തന്നെ തുടരുകയാണ്. ഈ നിരന്തര പ്രക്രിയയിലൂടെ ലഭിക്കുന്ന മഴയിലാണല്ലോ മനുഷ്യജീവന്റെ അസ്തിത്വം തന്നെ. മഴ ലഭിക്കുന്ന ഭൂമി ലോലവും മൃദുവുമാകുകയും ധാന്യങ്ങളും വിത്തുകളും മുളച്ച് വളര്‍ന്ന് മനുഷ്യന്റെ ആരാഹം തയ്യാറാക്കപ്പെടുകയും ചെയ്യുന്നു-പച്ചക്കറികളും ധാന്യങ്ങളും കായ്കനികളുമായി. മനുഷ്യന്‍ അഗാധമായി ചിന്തിച്ച് പാഠമുള്‍ക്കൊള്ളാനാണ് ഇവയെ പിടിച്ച് ശപഥം ചെയ്യുന്നത്.

4. നിഷേധികളുടെ ഏത് ഗൂഢാലോചനയും തകരും; അല്ലാഹു അതിന്ന് പ്രതിക്രിയ ചെയ്യും. ലോകചരിത്രവും നിഷേധികളുടെ നാള്‍വഴികളും അതിനു സാക്ഷിയാണ്. തിരുനബി(സ്വ)യുടെ സാന്നിധ്യത്തില്‍, ആദ്-സമൂദിനെ സംഹരിച്ചതു പോലുള്ള ശിക്ഷ വരില്ല. അതുകൊണ്ട് അല്‍പകാലം ക്ഷമിക്കുക എന്നാണ് നിര്‍ദേശിക്കുന്നത്.