അൽ ഫജ്റ് - الفجر - Al-Fajr

പ്രഭാതം, പത്ത് രാത്രികള്‍, ഇരട്ടയും ഒറ്റയും, സഞ്ചരിച്ചു കൊണ്ടിരിക്കുന്ന രാത്രി എന്നിവ തന്നെ ശപഥം, ഇവയില്‍ ബുദ്ധിമാന്മാര്‍ക്ക് പര്യാപ്തമായ ശപഥമുണ്ടോ?¹

ആദ് സമൂഹത്തെ-നാട്ടിലെങ്ങും തത്തുല്യര്‍ സൃഷ്ടിക്കപ്പെട്ടിട്ടില്ലാത്തവരും ഉന്നത സൗധങ്ങളുള്ളവരുമായ ഇറം ഗോത്രത്തെ-യും താഴ്‌വരകളില്‍ പാറവെട്ടിത്തുരന്ന് വീടുണ്ടാക്കിയ സമൂദ് ഗോത്രത്തെയും ആണികളടിച്ച് ശിക്ഷിച്ച ഫിര്‍ഔനെയും താങ്കളുടെ നാഥന്‍ ചെയ്തതെങ്ങനെ എന്ന് കണ്ടിട്ടുണ്ടോ? അവരൊക്കെ നാടുകളില്‍ അതിക്രമം കാട്ടുകയും ധാരാളം കുഴപ്പങ്ങളുണ്ടാക്കുകയും ചെയ്തു; തന്മൂലം അങ്ങയുടെ നാഥന്‍ അവര്‍ക്കു മേല്‍ ശിക്ഷയുടെ ചാട്ടവാര്‍ വര്‍ഷിച്ചു. അങ്ങയുടെ രക്ഷിതാവ് പതിസ്ഥലത്തുതന്നെയുണ്ട്²

എന്നാല്‍ മനുഷ്യനെ നാഥന്‍ പരീക്ഷണ വിധേയനാക്കുകയും അങ്ങനെ അവന് ബഹുമാനമേകുകയും സുഖാഡംബരങ്ങള്‍ നല്‍കുകയും ചെയ്താല്‍ രക്ഷിതാവ് എന്നെ ആദരിച്ചിരിക്കുന്നു എന്ന് അവന്‍ പ്രതികരിക്കും; ഇനിയവനെ പരീക്ഷണ വിധേയനാക്കി ഉപജീവന മാര്‍ഗങ്ങള്‍ ഇടുങ്ങിയതാക്കിയാല്‍ നാഥന്‍ എന്നെ അവഹേളിച്ചിരിക്കുന്നു എന്നാണവന്‍ പറയുക. അങ്ങനെയല്ല, നിങ്ങള്‍ അനാഥയെ ബഹുമാനിക്കുകയോ പാവപ്പെട്ടവന്ന് ഭക്ഷണം നല്‍കാന്‍ അന്യോന്യം പ്രേരണ നല്‍കുകയോ ചെയ്യുന്നില്ല, അനന്തരാവകാശ സ്വത്ത് നിങ്ങള്‍ കൂട്ടിക്കുഴച്ച് തിന്നുകയും ധനത്തെ അമിതമായി സ്‌നേഹിക്കുകയും ചെയ്യുന്നു³

അതല്ല, ഭൂമി ഇടിച്ചുപൊളിച്ചു പൊടിയാക്കപ്പെടുകയും താങ്കളുടെ രക്ഷിതാവും അണിയൊപ്പിച്ച മലക്കുകളും ആഗതരാവുകയും ആ ദിവസം നരകം ഹാജറാക്കപ്പെടുകയും ചെയ്താല്‍ അന്ന് മനുഷ്യന്ന് ബോധോദയമുണ്ടാകും. ആ നേരത്ത് ഓര്‍മവന്നതുകൊണ്ട് എന്തു ഫലം? അവന്‍ പരിഭവിക്കും. സ്വന്തം ജീവിതവിജയത്തിന്നായി ഞാന്‍ നേരത്തേ സല്‍കര്‍മങ്ങള്‍ അനുഷ്ഠിച്ചെങ്കില്‍ എത്ര നന്നായിരുന്നു! അന്ന് അല്ലാഹു ശിക്ഷിക്കുന്നതു പോലെ മറ്റൊരാളും ശിക്ഷിക്കുകയോ അവന്‍ ബന്ധനസ്ഥനാക്കുന്നതുപോലെ വേറെയാതൊരാളും പിടിച്ചുകെട്ടുകയോ ചെയ്യുന്നതല്ല⁴

അരുളപ്പെടും. മനഃശാന്തി കൈവരിച്ച ആത്മാവേ, രക്ഷിതാവിങ്കലേക്ക് സ്വയം സംതൃപ്തനായും ദിവ്യസംതൃപ്തിക്ക് വിധേയനായും നീ തിരിച്ചു പോവുകയും എന്റെ അടിമകളുടെ കൂട്ടത്തില്‍ പ്രവേശിക്കുകയും എന്റെ സ്വര്‍ഗത്തില്‍ കടക്കുകയും ചെയ്തുകൊള്ളുക⁵