12–15
സത്യവിശ്വാസം വരിച്ച ആണുങ്ങളുടെയും പെണ്ണുങ്ങളുടെയും മുമ്പിലും വലതുഭാഗത്തും അവരുടെ പ്രഭാപ്രസരം താങ്കള്‍ കാണുന്ന ദിനം അവരോടരുളപ്പെടും: ഇന്ന് നിങ്ങള്‍ക്കുള്ള ശുഭവാര്‍ത്ത അടിയിലൂടെ ആറുകളൊഴുകുന്ന സ്വര്‍ഗീയാരാമങ്ങളത്രേ. നിങ്ങളതില്‍ ശാശ്വതവാസികളാണ്. അതിമഹത്തായ സൗഭാഗ്യം തന്നെയാണത്. കപടവിശ്വാസം വരിച്ച സ്ത്രീ പുരുഷന്മാര്‍ (സ്വിറാത്ത് പാലം കടക്കുന്ന) സത്യവിശ്വാസികളോട്, 'ഞങ്ങളെയൊന്ന് നോക്കേണമേ, നിങ്ങളുടേതില്‍ നിന്ന് ഞങ്ങളല്‍പം പ്രകാശമാര്‍ജിക്കട്ടെ' എന്നപേക്ഷിക്കുമ്പോള്‍ പ്രതികരിക്കപ്പെടും: 'നിങ്ങള്‍ പിന്നോട്ടു തന്നെ തിരിച്ചു പോയി പ്രകാശം തെരഞ്ഞുപിടിക്കുക!' തത്സമയം, ഒരു കവാടമുള്ള മതില്‍കൊണ്ട് അവര്‍ക്കിടയില്‍ മറയിടപ്പെടും-അതിന്റെ അന്തര്‍ഭഗത്ത് അനുഗ്രഹവും ബാഹ്യഭാഗത്ത് ശിക്ഷയുമാണുണ്ടാവുക.5
ഞങ്ങള്‍ ദുന്‍യാവില്‍ നിങ്ങളൊന്നിച്ചുതന്നെയായിരുന്നില്ലേ എന്ന് കപടന്മാര്‍ ചോദിക്കുന്നതും വിശ്വാസികള്‍ ഇങ്ങനെ പ്രതികരിക്കുന്നതുമാണ്. അതെ; പക്ഷേ, നിങ്ങള്‍ സ്വന്തത്തെത്തന്നെ അപകടത്തിലാക്കുകയും നബിയെയും വിശ്വാസികളെയും വിനാശപ്പെടുത്താന്‍ തക്കംപാര്‍ത്തിരിക്കുകയും മതകാര്യങ്ങളില്‍ സംശയാലുക്കളാവുകയും മരിക്കുവോളം വ്യാമോഹങ്ങളില്‍ വഞ്ചിതരാവുകയും മഹാവഞ്ചകനായ പിശാച് അല്ലാഹുവിന്റെ കാര്യത്തില്‍ നിങ്ങളെ ചതിയില്‍ വീഴ്ത്തുകയും ചെയ്തു.6
അതുകൊണ്ട് ഇന്ന് നിങ്ങളുടെയോ സത്യനിഷേധികളുടെയോ പക്കല്‍നിന്ന് ഒരുവിധ പ്രായശ്ചിത്തവും സ്വീകരിക്കപ്പെടില്ല. നരകമാണ് നിങ്ങളുടെ ആവാസകേന്ദ്രം. നിങ്ങള്‍ക്ക് ഏറ്റം അനുയോജ്യം അതാണ്! ആ മടക്കസ്ഥലം എത്ര ഹീനം!
2 വിശദീകരണങ്ങൾ കാണുക
5. ഇരട്ട മുഖവുമായി കപടജീവിതം നയിച്ച മുനാഫിഖുകള്‍ക്ക് അതീവഗുരുതരമായ ശിക്ഷയാണുണ്ടാവുക-4:145 നോക്കുക. സത്യവിശ്വാസികള്‍ സ്വിറാത്ത് പാലം കടന്ന് സ്വര്‍ഗത്തിലേക്ക് പോകാനൊരുങ്ങുമ്പോഴാണ് കപടവിശ്വാസികളുടെ ഈ അപേക്ഷ. പിന്നോട്ടുതന്നെ പോയി വെളിച്ചം തെരഞ്ഞുപിടിച്ചോളൂ എന്നത് അവരോടുള്ള പരിഹാസമാണ്. മറയിടപ്പെട്ടാല്‍ അതിന്റെയുള്ളിലുള്ളത് സ്വര്‍ഗമാണ്-അനുഗ്രഹം; പുറത്തുള്ളത് നരകവും-ശിക്ഷ.
6. മുനാഫിഖുകളുടെ സ്ഥിതിഗതികളും നിലപാടുകളും പരിശോധിച്ചാല്‍ ഇപ്പറഞ്ഞതിനൊക്കെ ധാരാളം തെളിവുകള്‍ കാണാം. അവരുടെ സാരഥി ഇബ്‌നുസലൂല്‍ നബി(സ്വ)യുടെ കുപ്പായം വാങ്ങിയതും മയ്യിത്ത് നമസ്‌കരിക്കാന്‍ മകന്‍ അവിടത്തെ ക്ഷണിച്ചതും ഉദാഹരണം. സൂറത്തുത്തൗബ 84 നോക്കുക. ഭൗതിക ഭ്രമം അവരെ അപകടത്തില്‍ വീഴ്ത്തുകയായിരുന്നു.
يَوۡمَ تَرَى ٱلۡمُؤۡمِنِينَ وَٱلۡمُؤۡمِنَٰتِ يَسۡعَىٰ نُورُهُم بَيۡنَ أَيۡدِيهِمۡ وَبِأَيۡمَٰنِهِمۖ بُشۡرَىٰكُمُ ٱلۡيَوۡمَ جَنَّٰتٞ تَجۡرِي مِن تَحۡتِهَا ٱلۡأَنۡهَٰرُ خَٰلِدِينَ فِيهَاۚ ذَٰلِكَ هُوَ ٱلۡفَوۡزُ ٱلۡعَظِيمُ ١٢
يَوۡمَ يَقُولُ ٱلۡمُنَٰفِقُونَ وَٱلۡمُنَٰفِقَٰتُ لِلَّذِينَ ءَامَنُواْ ٱنظُرُونَا نَقۡتَبِسۡ مِن نُّورِكُمۡ قِيلَ ٱرۡجِعُواْ وَرَآءَكُمۡ فَٱلۡتَمِسُواْ نُورٗاۖ فَضُرِبَ بَيۡنَهُم بِسُورٖ لَّهُۥ بَابُۢ بَاطِنُهُۥ فِيهِ ٱلرَّحۡمَةُ وَظَٰهِرُهُۥ مِن قِبَلِهِ ٱلۡعَذَابُ ١٣
يُنَادُونَهُمۡ أَلَمۡ نَكُن مَّعَكُمۡۖ قَالُواْ بَلَىٰ وَلَٰكِنَّكُمۡ فَتَنتُمۡ أَنفُسَكُمۡ وَتَرَبَّصۡتُمۡ وَٱرۡتَبۡتُمۡ وَغَرَّتۡكُمُ ٱلۡأَمَانِيُّ حَتَّىٰ جَآءَ أَمۡرُ ٱللَّهِ وَغَرَّكُم بِٱللَّهِ ٱلۡغَرُورُ ١٤
فَٱلۡيَوۡمَ لَا يُؤۡخَذُ مِنكُمۡ فِدۡيَةٞ وَلَا مِنَ ٱلَّذِينَ كَفَرُواْۚ مَأۡوَىٰكُمُ ٱلنَّارُۖ هِيَ مَوۡلَىٰكُمۡۖ وَبِئۡسَ ٱلۡمَصِيرُ ١٥
