അൽ വാഖിഅ - الواقعة - Al-Waqiah

ആ ഭയാനക നാള്‍ സംഭവിച്ചുകഴിഞ്ഞാല്‍-അതിന്റെ സംഭവ്യതയെ തള്ളിപ്പറയുന്ന ഒരാളുമുണ്ടാകില്ല-ചിലരെയത് താഴ്ത്തുന്നതും മറ്റുചിലരെ ഉയര്‍ത്തുന്നതുമാണ്.¹
ഭൂമി അതിശക്തമായി പ്രകമ്പിതമാവുകയും മലകള്‍ തകര്‍ക്കപ്പെടുകയും അങ്ങനെയവ വിതറപ്പെട്ട ധൂളിയാവുകയും നിങ്ങള്‍ മൂന്ന് വിഭാഗമാവുകയും ചെയ്യുന്ന ഘട്ടമത്രേ അത്. അപ്പോള്‍ ഒരു കൂട്ടര്‍ വലതുപക്ഷക്കാരായിരിക്കും. വലതുപക്ഷക്കാരുടെ അവസ്ഥ എന്താണ്? മറ്റൊരു കൂട്ടര്‍ ഇടതുപക്ഷക്കാര്‍-എന്താണ് ഇടതുപക്ഷത്തിന്റെ സ്ഥിതി? വിശ്വാസത്തിലും കര്‍മങ്ങളിലും മുന്‍കടന്നവര്‍ മുന്നോക്കക്കാര്‍ തന്നെ.²
ആമോദങ്ങളുടെ സ്വര്‍ഗീയോദ്യാനങ്ങളില്‍ ദിവ്യസാമീപ്യം നേടിയവരാണവര്‍-പൂര്‍വികരില്‍ നിന്ന് ഒരുവിഭാഗവും പില്‍ക്കാലക്കാരില്‍ നിന്ന് കുറച്ചു പേരും.

സ്വര്‍ണനൂലു കൊണ്ട് നെയ്തുണ്ടാക്കപ്പെട്ട കട്ടിലുകളില്‍ ചാരി മുഖാമുഖമായി ഇരിക്കും അവര്‍. ശാശ്വതത്വം നിശ്ചയിക്കപ്പെട്ട ബാലന്മാര്‍ കോപ്പകളും കൂജകളും ഉറവജലം നിറച്ച ചഷകങ്ങളുമായി അവര്‍ക്കിടയില്‍ ചുറ്റിക്കറങ്ങുന്നതാണ്. അത് പാനം ചെയ്യുക വഴി തലവേദനയോ ലഹരിബാധയോ അവര്‍ക്കുണ്ടാവില്ല. തങ്ങള്‍ സ്വേഷ്ട പ്രകാരം തെരഞ്ഞെടുക്കുന്ന പഴവര്‍ഗങ്ങളും ഇച്ഛിക്കുംവിധമുള്ള പക്ഷിമാംസങ്ങളുമായും ആ ബാലന്മാര്‍ ചുറ്റിനടക്കും. ചിപ്പികളില്‍ സൂക്ഷിച്ചുവെക്കപ്പെട്ട മുത്തുപോലുള്ള വിശാലാക്ഷികളായ വെളുത്ത സുന്ദരിമാരും ഉണ്ടാകും-അവരനുഷ്ഠിച്ചിരുന്ന പുണ്യങ്ങള്‍ക്കുള്ള പ്രതിഫലമാണിതൊക്കെയും. ശാന്തി, സമാധാനം എന്നതല്ലാതെ, നിരര്‍ത്ഥകവാക്കുകളോ അധിക്ഷേപങ്ങളോ അവര്‍ക്കവിടെ കേള്‍ക്കാനാവില്ല.

വലതുപക്ഷക്കാര്‍! എന്താണ് വലതുപക്ഷക്കാരുടെ സ്ഥിതി? മുള്ളില്ലാത്ത ഇലന്തമരം,³
പഴങ്ങള്‍ അടുക്കിവെക്കപ്പെട്ട വാഴകള്‍, നീണ്ടു വിസ്തൃതമായ തണല്‍, പ്രവഹിച്ചുകൊണ്ടേയിരിക്കുന്ന ജലം, ശാശ്വതവും നിഷേധിക്കപ്പെടാത്തതുമായ ഒട്ടേറെ പഴവര്‍ഗങ്ങള്‍, ഉയര്‍ന്ന പരവതാനികള്‍ എന്നീ സുഖാസ്വാദനങ്ങളിലാണവര്‍. ആ സ്വര്‍ഗവനിതകളെ സവിശേഷ പ്രകൃതിയില്‍ കന്യകമാരും ഭര്‍ത്താക്കളോട് സ്‌നേഹമുള്ളവരും സമവയസ്‌കരുമാക്കിയാണ് നാം സൃഷ്ടിച്ചിട്ടുള്ളത്. പൂര്‍വികന്മാരില്‍ നിന്ന് ഒരു സംഘവും പില്‍ക്കാലക്കാരില്‍ നിന്ന് ഒരു സംഘവുമുള്‍പ്പെടുന്ന വലതുപക്ഷക്കാര്‍ക്ക് വേണ്ടിയത്രേ ഇത്.⁴

ഇടതുപക്ഷക്കാര്‍! എന്താണ് ഇടതുപക്ഷക്കാരുടെ സ്ഥിതി? അവര്‍ തുളച്ചുകയറുന്ന തീക്കാറ്റിലും തീക്ഷ്ണമായ ചുടുജലത്തിലും തണുത്തതോ സുഖകരമോ അല്ലാത്ത കടുത്ത കരിമ്പുകയുടെ തണലിലുമാകും. നിശ്ചയം, ദുന്‍യാവില്‍ സുഖാഡംബരങ്ങളില്‍ വിലയം പ്രാപിച്ചവരും വന്‍പാപങ്ങളില്‍ ഉറച്ചുനില്‍ക്കുന്നവരുമായിരുന്നു അവര്‍. 'മരിച്ചു മണ്ണും അസ്ഥികളുമായിക്കഴിഞ്ഞിട്ടാണോ ഞങ്ങളും പൂര്‍വപിതാക്കളും ഉയിര്‍ത്തെഴുന്നേല്‍പിക്കപ്പെടുക' എന്നവര്‍ ജല്‍പിക്കുമായിരുന്നു. നബീ, പ്രഖ്യാപിക്കുക: ആദിമന്മാരും അന്തിമന്മാരുമെല്ലാം തന്നെ ഒരു നിശ്ചിത നാളിലെ കൃത്യസമയം സംഗമിപ്പിക്കപ്പെടുക തന്നെ ചെയ്യും.⁵
എന്നിട്ട്, നിഷേധികളായ ദുര്‍മാര്‍ഗികളേ, നിങ്ങള്‍ സഖ്ഖൂം വൃക്ഷത്തില്‍ നിന്ന് വയറുനിറയെ ഭക്ഷിക്കുന്നതും അതിനുമീതെ തിളച്ചുപൊള്ളുന്ന നരകജലത്തില്‍ നിന്ന്-ദാഹിച്ചു വലഞ്ഞ ഒട്ടകങ്ങളെപ്പോലെ-മോന്തിക്കുടിക്കുന്നതുമാകുന്നു. പ്രതിഫലദാനനാളില്‍ ഇതാകും അവരുടെ ആതിഥ്യം.⁶

നാമാണ് നിങ്ങളെ പടച്ചിരിക്കുന്നത്. എന്നിട്ടും എന്റെ വേദം നിങ്ങളെന്താണ് അംഗീകരിക്കാത്തത്? നിങ്ങളില്‍ നിന്ന് സ്ഖലിക്കുന്ന ഇന്ദ്രിയത്തെസംബന്ധിച്ച് ചിന്തിച്ചുനോക്കിയിട്ടുണ്ടോ നിങ്ങള്‍? അതിനെ ഒരു സൃഷ്ടിയായി സംവിധാനിച്ചുണ്ടാക്കുന്നത് നിങ്ങളോ നാമോ?⁷
നിങ്ങള്‍ക്കിടയില്‍ മരണം നിശ്ചയിച്ചിരിക്കുന്നത് നാമാണ്. നിങ്ങള്‍ക്കു പകരം തത്തുല്യരെ കൊണ്ടുവരുന്നതിലും നിങ്ങള്‍ക്കറിവില്ലാത്തവിധം നിങ്ങളെ പുനഃസൃഷ്ടിക്കുന്നതിലും മറ്റാര്‍ക്കും നമ്മെ മറികടക്കാനാവില്ലതന്നെ. ഒന്നാം സൃഷ്ടിപ്പിനെക്കുറിച്ച് നിങ്ങള്‍ക്ക് നന്നായറിയാം, എന്നിട്ടെന്തുകൊണ്ട് നിങ്ങള്‍ ചിന്തിച്ച് ഗ്രഹിക്കുന്നില്ല?⁸

നിങ്ങള്‍ ചെയ്യുന്ന കൃഷിയെക്കുറിച്ച് ചിന്തിച്ചുനോക്കിയിട്ടുണ്ടോ? നിങ്ങളാണോ അത് മുളപ്പിച്ചു വളര്‍ത്തുന്നത്, അതോ നാമോ? നാം വിചാരിച്ചാല്‍ അത് കച്ചിത്തുരുമ്പാക്കാമായിരുന്നു; തത്സമയം, 'ഞങ്ങള്‍ക്ക് കടബാധ്യത വന്നല്ലോ, ഉപജീവനമാര്‍ഗം മുട്ടിയല്ലോ' എന്ന് വിസ്മയം പൂണ്ട് പരിഭവിച്ചു കൊണ്ടിരിക്കുമായിരുന്നു നിങ്ങള്‍.⁹
ഇനി, പാനജലത്തെക്കുറിച്ച് ആലോചിച്ച് നോക്കിയിട്ടുണ്ടോ നിങ്ങള്‍? മേഘത്തില്‍ നിന്ന് അത് വര്‍ഷിച്ചത് നിങ്ങളോ നാമോ? നിങ്ങള്‍ ഉരസിയുല്‍പാദിപ്പിക്കുന്ന അഗ്നിയെക്കുറിച്ച് ചിന്തിച്ചു നോക്കിയിട്ടുണ്ടോ? നിങ്ങളാണോ അതിന്റെ മരമുണ്ടാക്കിയത്, അതോ നാമോ? ആ തീ നാം ഒരു ഉദ്‌ബോധന വിഷയവും യാത്രക്കാര്‍ക്ക് സൗകര്യവുമാക്കി. അതുകൊണ്ട് മഹോന്നതനായ നാഥന്റെ നാമം താങ്കള്‍ പ്രകീര്‍ത്തനം ചെയ്യുക.¹⁰

അല്ല, നക്ഷത്രങ്ങളുടെ അസ്തമന സ്ഥലങ്ങളെക്കൊണ്ട് ഞാന്‍ ശപഥം ചെയ്യുന്നു-നിങ്ങള്‍ കാര്യവിവരമുള്ളവരായിരുന്നുവെങ്കില്‍ മികച്ചൊരു ശപഥം തന്നെയാണത്-¹¹
നിശ്ചയം, ഇത് വിശിഷ്ടമായ ഖുര്‍ആന്‍ തന്നെ. ഒരു സുരക്ഷിത രേഖയിലാണതുള്ളത്. പരിശുദ്ധന്മാരേ അത് സ്പര്‍ശിക്കൂ.¹²
പ്രപഞ്ച നാഥനില്‍ നിന്നവതീര്‍ണമാണത്. എന്നിട്ട്, ഈ വൃത്താന്തമാണോ നിങ്ങള്‍ വ്യാജമാക്കുന്നത്? ആ നിഷേധം നിങ്ങള്‍ ജീവിതവിഹിതമാക്കുകയുമാണോ?

എന്നാല്‍ ആത്മാവ് തൊണ്ടക്കുഴിയിലെത്തുമ്പോള്‍ തത്സമയം നിങ്ങള്‍ നോക്കിക്കൊണ്ടിരുന്നിട്ടും എന്തുകൊണ്ട് പ്രതിരോധിക്കുന്നില്ല. അയാളെ സംബന്ധിച്ച് നിങ്ങളെക്കാള്‍ സമീപസ്ഥന്‍ നാമാണ്; പക്ഷേ, നിങ്ങളത് ഗ്രഹിക്കുന്നില്ല. എന്നാല്‍ അല്ലാഹുവിന് കീഴ്‌പെട്ടവരല്ലെങ്കില്‍ ആ ആത്മാവ് എന്തുകൊണ്ട് തിരിച്ചെടുക്കുന്നില്ല?-സത്യവാദികളാണ് നിങ്ങളെങ്കില്‍!¹³

എന്നാല്‍ ആ പരേതന്‍ ദൈവസാമീപ്യലബ്ധരില്‍ പെട്ടയാളാണെങ്കില്‍ സൗഖ്യവും സന്തുഷ്ടിയും അനുഗൃഹീത സ്വര്‍ഗവുമുണ്ടാകും. ഇനിഅയാള്‍ വലതുപക്ഷക്കാരില്‍ പെട്ടവനായാലോ, 'വലതുപക്ഷക്കാരില്‍ പെട്ട നിനക്ക് സമാധാനമാണുള്ളത്' എന്നു ശുഭവാര്‍ത്തയുണ്ടാകും.¹⁴
പ്രത്യുത, മാര്‍ഗഭ്രഷ്ടരായ സത്യനിഷേധികളില്‍ പെട്ടയാളാണ് അവനെങ്കിലോ, ചുട്ടുതിളക്കുന്ന തീക്ഷ്ണ ജലം കൊണ്ടുള്ള ആതിഥ്യവും നരകാഗ്നി കൊണ്ടുള്ള ജ്വലനവുമാണവനുണ്ടാവുക. നിശ്ചയം ഇത് ദൃഢമായ സത്യം തന്നെയാകുന്നു. അതുകൊണ്ട് താങ്കള്‍ മഹോന്നതനായ നാഥന്റെ തിരുനാമം വാഴ്ത്തുക.