അർ റഹ്മാൻ - الرحمن - Ar-Rahman

കൃപാലുവായ അല്ലാഹു ഈ ഖുര്‍ആന്‍ അഭ്യസിപ്പിച്ചിരിക്കുന്നു. അവന്‍ മനുഷ്യനെ സൃഷ്ടിക്കുകയും സംസാരിക്കാന്‍ പഠിപ്പിക്കുകയും ചെയ്തു.¹
സൂര്യ-ചന്ദ്ര സഞ്ചാരം ഒരു നിശ്ചിത കണക്കുപ്രകാരമാണ്; വൃക്ഷ-ലതകള്‍ അല്ലാഹുവിനു സാഷ്ടാംഗമര്‍പ്പിക്കുന്നുണ്ട്. വാനലോകങ്ങളെ അവന്‍ ഉയര്‍ത്തുകയും തൂക്കത്തില്‍ നിങ്ങള്‍ ക്രമക്കേട് കാട്ടാതിരിക്കാന്‍ നീതിയുടെ തുലാസ് സ്ഥാപിക്കുകയും ചെയ്തിരിക്കുന്നു. നിങ്ങള്‍ നീതിയോടെ തൂക്കം ശരിപ്പെടുത്തുകയും തുലാസില്‍ കുറവുവരുത്താതിരിക്കുകയും വേണം.²

ഭൂമിയെ അല്ലാഹു മനുഷ്യര്‍ക്ക് വേണ്ടിയുണ്ടാക്കി. അതില്‍ പഴങ്ങളും കൂമ്പാളകളുള്ള ഈന്തവൃക്ഷങ്ങളും വൈക്കോലുള്ള ധാന്യങ്ങളും സുഗന്ധച്ചെടികളുമുണ്ട്. അപ്പോള്‍ നിങ്ങള്‍ ഇരു(ജിന്ന്, മനുഷ്യര്‍)കൂട്ടരുടെയും നാഥന്റെ ഔദാര്യങ്ങളില്‍ നിന്ന് ഏതാണ് നിങ്ങള്‍ വ്യാജമാക്കുക?³
കലം പോലെ, മുട്ടിയാല്‍ മുഴങ്ങുന്ന ഉണക്കക്കളിമണ്ണില്‍ നിന്ന് മനുഷ്യനെയും പുകയില്ലാത്ത തീജ്വാലയില്‍ നിന്ന് ജിന്നിനെയും അല്ലാഹു പടച്ചു; അപ്പോള്‍ നിങ്ങളിരുകൂട്ടരുടെയും നാഥന്റെ ഔദാര്യത്തില്‍ നിന്ന് ഏതാണ് നിങ്ങള്‍ വ്യാജമാക്കുക? രണ്ട് വീതം ഉദയസ്ഥാനങ്ങളുടെയും അസ്തമനസ്ഥാനങ്ങളുടെയും രക്ഷിതാവാണവന്‍.⁴
അപ്പോള്‍ നിങ്ങളിരുവരുടെയും നാഥന്റെ ഏതനുഗ്രഹമാണ് നിങ്ങള്‍ വ്യാജമാക്കുക? ഇരുജലാശയങ്ങള്‍ അന്യോന്യം സംഗമിക്കുംവിധം അവന്‍ അയച്ചുവിട്ടു- അവ രണ്ടിനും മധ്യേ അതിക്രമിച്ചുകടക്കാത്ത ഒരു പ്രതിരോധമുണ്ട്. അപ്പോള്‍ നിങ്ങളിരുകൂട്ടരുടെയും നാഥന്റെ ഏത് ഔദാര്യമാണ് നിങ്ങള്‍ നിഷേധിക്കുക? ആ രണ്ട് ജലാശയങ്ങളില്‍ നിന്ന് മുത്തും പവിഴവും പുറത്തുവരും.⁵
അപ്പോള്‍ നിങ്ങളിരുവരുടെയും രക്ഷിതാവിന്റെ ഏതനുഗ്രഹമാണ് നിങ്ങള്‍ വ്യാജമാക്കുക? പര്‍വതതുല്യം സമുദ്രോപരിതലത്തിലോടുന്ന ജലയാനങ്ങള്‍ അവന്റെ നിയന്ത്രണത്തിലാണ്. അപ്പോള്‍ നിങ്ങളിരുകൂട്ടരുടെയും നാഥന്റെ ഏത് ഔദാര്യമാണ് നിങ്ങള്‍ നിഷേധിക്കുക?

ഭൂതലത്തിലുള്ള സര്‍വരും നശിച്ചു പോകുന്നതും താങ്കളുടെ മഹോന്നതനും അത്യുദാരനുമായ രക്ഷിതാവ് മാത്രം അവശേഷിക്കുന്നതുമാണ്. അപ്പോള്‍ നിങ്ങളിരുവിഭാഗത്തിന്റെയും നാഥന്റെ അനുഗ്രഹങ്ങളില്‍ ഏതാണ് നിങ്ങള്‍ വ്യാജമാക്കുക? ഭുവന-വാനങ്ങളിലുള്ളവര്‍ അവനോട് അപേക്ഷിച്ചുകൊണ്ടിരിക്കുന്നു; ദിവസം മുഴുക്കെയും നാനാവിധ വിഷയനിര്‍വഹണത്തിലാണവന്‍.⁶
അപ്പോള്‍ നിങ്ങള്‍ ഇരുകൂട്ടരുടെയും രക്ഷിതാവിന്റെ അനുഗ്രഹങ്ങളില്‍ ഏതാണ് നിങ്ങള്‍ നിഷേധിക്കുക?

ഓ മനുഷ്യ-ജിന്ന് സമൂഹമേ, നിങ്ങള്‍ക്കുവേണ്ടി നാം ഒഴിഞ്ഞിരിക്കുന്നതാണ്. അപ്പോള്‍ നിങ്ങളിരുകക്ഷികളുടെയും നാഥന്റെ ഏത് ഔദാര്യമാണ് നിങ്ങള്‍ നിഷേധിക്കുക? മനുഷ്യ-ജിന്ന് സമൂഹമേ, ഭുവന-വാനങ്ങളുടെ വൃത്തങ്ങളില്‍ നിന്ന് പുറത്തുകടക്കാന്‍ നിങ്ങള്‍ക്ക് കഴിയുമെങ്കില്‍ പോയിക്കൊള്ളുക- ഒരു ആധിപത്യശേഷിയുണ്ടായിട്ടുമാത്രമേ നിങ്ങള്‍ക്ക് പോകാനാകൂ.⁷
അപ്പോള്‍ നിങ്ങള്‍ ഇരുവിഭാഗങ്ങളുടെയും രക്ഷിതാവിന്റെ ഔദാര്യങ്ങളില്‍ ഏതാണ് നിങ്ങള്‍ വ്യാജമാക്കുക? നിങ്ങളിരുവരുടെ മേലിലും തീജ്വാലയും ഉരുക്കിയ ചെമ്പും വിക്ഷേപിക്കപ്പെടുന്നതും തത്സമയം നിങ്ങള്‍ക്ക് സുരക്ഷിതത്വം കൈവരിക്കാനാകാതെ വരുന്നതുമാണ്. അപ്പോള്‍ നിങ്ങളിരുകക്ഷികളുടെയും നാഥന്റെ ഔദാര്യങ്ങളില്‍ ഏതാണ് നിഷേധിക്കുക?

എന്നാല്‍ ആകാശം പിളര്‍ന്ന് പനിനീര്‍പൂ വര്‍ണമുള്ള കുഴമ്പുസമാനമായാല്‍ (വല്ലാത്ത ഭീഷണഘട്ടമായിരിക്കുമത്). അപ്പോള്‍ നിങ്ങള്‍ ഇരുവരുടെയും രക്ഷിതാവിന്റെ ഏതനുഗ്രഹമാണ് തള്ളിപ്പറയുക? അന്ന് തന്റെ പാപത്തെക്കുറിച്ച് ഒരു മനുഷ്യനോടോ ജിന്നിനോടോ ചോദ്യം ചെയ്യപ്പെടേണ്ടതുണ്ടാവില്ല.⁸
അപ്പോള്‍ നിങ്ങളിരുവരുടെയും രക്ഷിതാവിന്റെ ഔദാര്യങ്ങളില്‍ ഏതാണ് നിഷേധിക്കുക? അടയാളം കൊണ്ട് അധര്‍മകാരികളെ തിരിച്ചറിയപ്പെടുന്നതും മൂര്‍ദ്ധാവുകളിലും കാലുകളിലുമായി അവര്‍ പിടികൂടപ്പെടുന്നതുമാണ്. അപ്പോള്‍ നിങ്ങള്‍ രണ്ടു വിഭാഗങ്ങളുടെയും നാഥന്റെ ഏത് ഔദാര്യമാണ് നിഷേധിക്കുക? അധര്‍മകാരികള്‍ വ്യാജമാക്കുന്ന നരകം ഇതാകുന്നു. തിളച്ചുപൊങ്ങുന്ന തീക്ഷ്ണജലത്തിനും ആ നരകത്തിനുമിടയ്ക്ക് അവര്‍ ചുറ്റിക്കറങ്ങും.⁹
അപ്പോള്‍, രണ്ടു കക്ഷികളുടെയും നാഥന്റെ അനുഗ്രഹങ്ങളില്‍ ഏതാണ് നിങ്ങള്‍ തള്ളിക്കളയുക?

തന്റെ നാഥന്റെ തിരുസന്നിധിയെ പേടിക്കുന്നവന്ന് രണ്ട് സ്വര്‍ഗങ്ങളുണ്ടാകും. അപ്പോള്‍ ഇരുവിഭാഗത്തിന്റെയും രക്ഷിതാവിന്റെ ഔദാര്യങ്ങളില്‍ ഏതാണ് നിങ്ങള്‍ നിഷേധിക്കുക? ആ ഇരട്ട സ്വര്‍ഗം വിവിധ സുഖാഡംബരങ്ങളുള്ളതായിരിക്കും.¹⁰
അപ്പോള്‍ രണ്ട് കക്ഷികളുടെയും നാഥന്റെ അനുഗ്രഹങ്ങളില്‍ ഏതാണ് നിങ്ങള്‍ തള്ളിപ്പറയുക? അവയില്‍ ഒഴുകിക്കൊണ്ടിരിക്കുന്ന രണ്ടു അരുവികളുണ്ട്. അപ്പോള്‍ നിങ്ങളിരുകൂട്ടരുടെയും രക്ഷിതാവിന്റെ ഔദാര്യങ്ങളില്‍ ഏതാണ് നിങ്ങള്‍ വ്യാജമാക്കുക? ആ രണ്ടു സ്വര്‍ഗങ്ങളിലും ഓരോ പഴവര്‍ഗത്തില്‍ നിന്നും രണ്ടുവീതം ഇനങ്ങളുണ്ടായിരിക്കും. അപ്പോള്‍ നിങ്ങള്‍ ഇരുവിഭാഗത്തിന്റെയും നാഥന്റെ ഏതനുഗ്രഹമാണ് നിങ്ങള്‍ തള്ളിപ്പറയുക? ആ സ്വര്‍ഗക്കാര്‍ ഉള്ളില്‍ കട്ടിപ്പട്ട് നിറയ്ക്കപ്പെട്ട മെത്തകളില്‍ ചാരിയിരിക്കുന്നവരാകും; ആ രണ്ട് ആരാമങ്ങളിലെയും ഫലങ്ങള്‍ വളരെ സമീപസ്ഥമാകുന്നു. അപ്പോള്‍ നിങ്ങള്‍ ഇരുവിഭാഗത്തിന്റെയും നാഥന്റെ ഔദാര്യങ്ങളില്‍ ഏതാണ് നിങ്ങള്‍ വ്യാജമാക്കുക?

ആ സ്വര്‍ഗങ്ങളില്‍ ഇതുവരെയും ഒരു മനുഷ്യനും ജിന്നും സ്പര്‍ശിച്ചിട്ടില്ലാത്തവരും കണ്ണുകള്‍ നിയന്ത്രിക്കുന്നവരുമായ മഹിളകളുണ്ടായിരിക്കും. അപ്പോള്‍ നിങ്ങളിരുകക്ഷിയുടെയും രക്ഷിതാവിന്റെ ഔദാര്യങ്ങളില്‍ ഏതാണ് നിങ്ങള്‍ വ്യാജമാക്കുക? ആ ഹൂറികള്‍ മാണിക്യ-പവിഴ സദൃശരായിരിക്കും. അപ്പോള്‍ ഇരുവിഭാഗത്തിന്റെയും നാഥന്റെ ഏതനുഗ്രഹമാണ് നിങ്ങള്‍ തള്ളിപ്പറയുക? ഉദാത്ത കര്‍മങ്ങള്‍ക്കുള്ള പ്രതിഫലം നല്ലതു ചെയ്തുകൊടുക്കല്‍ മാത്രമല്ലേ?¹¹
അപ്പോള്‍ ഇരുകൂട്ടരുടെയും നാഥന്റെ ഔദാര്യങ്ങളില്‍ ഏതൊന്നിനെയാണ് നിങ്ങള്‍ നിഷേധിക്കുക? മേല്‍പറഞ്ഞ രണ്ടുമല്ലാതെ വേറെയുമുണ്ട് ഉദ്യാനദ്വയങ്ങള്‍! അപ്പോള്‍, നിങ്ങള്‍ രണ്ടുവിഭാഗങ്ങളുടെയും രക്ഷിതാവിന്റെ ഔദാര്യങ്ങളില്‍ ഏതാണ് നിങ്ങള്‍ വ്യാജമാക്കുക? ആ ഇരട്ട ഉദ്യാനങ്ങള്‍ കടുംപച്ചയായിരിക്കും. അപ്പോള്‍, നിങ്ങളിരുവരുടെയും നാഥന്റെ ഔദാര്യങ്ങളില്‍ ഏതിനെയാണ് നിങ്ങള്‍ കള്ളമാക്കുക? അവയില്‍ ജലം ചീറ്റുന്ന രണ്ട് അരുവികളുണ്ട്. അപ്പോള്‍ ഇരുവിഭാഗത്തിന്റെയും രക്ഷിതാവിന്റെ ഏതനുഗ്രഹമാണ് നിങ്ങള്‍ തള്ളിപ്പറയുക? ആ ഉദ്യാനദ്വയങ്ങളില്‍ വിവിധതരം പഴങ്ങളും ഈന്തമരങ്ങളും ഉറുമാനുമുണ്ട്. അപ്പോള്‍ നിങ്ങള്‍ ഇരുകൂട്ടരുടെയും രക്ഷിതാവിന്റെ അനുഗ്രഹങ്ങളില്‍ ഏതിനെയാണ് നിങ്ങള്‍ വ്യാജമാക്കുക? ഉദാത്തരും സുന്ദരികളുമായ തരുണികള്‍ അവയിലുണ്ട്.¹²
അപ്പോള്‍ ഇരുവിഭാഗത്തിന്റെയും നാഥന്റെ ഏത് ഔദാര്യമാണ് നിങ്ങള്‍ തള്ളിപ്പറയുക? തമ്പുകളില്‍ കാത്തുസൂക്ഷിക്കപ്പെടുന്ന വെളുത്ത ഹൂറിസുന്ദരിമാര്‍! അപ്പോള്‍ നിങ്ങള്‍ ഇരുകക്ഷികളുടെയും രക്ഷിതാവിന്റെ അനുഗ്രഹങ്ങളില്‍ ഏതാണ് നിങ്ങള്‍ വ്യാജമാക്കുക? മുമ്പ് ഒരു മനുഷ്യനോ ജിന്നോ അവരെ തൊട്ടിട്ടേയില്ല. അപ്പോള്‍, നിങ്ങള്‍ രണ്ടുകൂട്ടരുടെയും നാഥന്റെ ഏത് ഔദാര്യമാണ് നിങ്ങള്‍ തള്ളിക്കളയുക? ഹരിതാഭമായ ഉറകളിട്ട തലയണകളിലും വശ്യമായ പരവതാനികളിലും ചാരിയിരിക്കുന്നവരാകും അവര്‍. അപ്പോള്‍, നിങ്ങള്‍ ഇരുവിഭാഗത്തിന്റെയും രക്ഷിതാവിന്റെ അനുഗ്രഹങ്ങളില്‍ ഏതിനെയാണ് നിങ്ങള്‍ തള്ളിപ്പറയുക? താങ്കളുടെ മഹോന്നതനും അത്യുദാരനുമായ നാഥന്റെ അഭിധാനം അനുഗ്രഹപൂര്‍ണമത്രേ.¹³