അൽ ഖമർ - القمر - Al-Qamar

അന്ത്യനാള്‍ സമീപസ്ഥമാവുകയും ചന്ദ്രന്‍ പിളരുകയും ചെയ്തു-ഏതൊരു ദൃഷ്ടാന്തം കാണുകയാണെങ്കിലും അവര്‍ അവഗണിക്കുകയും ഇത് സുസ്ഥിരമായ ആഭിചാരവേലയാണെന്നു തട്ടിവിടുകയും നിഷേധിച്ചു തള്ളുകയും സ്വേച്ഛകള്‍ പിന്തുടരുകയും ചെയ്യുന്നു. ഓരോ കാര്യവും സുസ്ഥിരമായി സംഭവിക്കും.¹

ധിക്കാരത്തില്‍ നിന്നു മാറിനില്‍ക്കാന്‍ മതിയായ വൃത്താന്തങ്ങള്‍-സമ്പുര്‍ണ ജ്ഞാനം- അവര്‍ക്ക് ലഭിക്കുക തന്നെ ചെയ്തിട്ടുണ്ട്; എന്നാല്‍ മുന്നറിയിപ്പുകള്‍ പര്യാപ്തമാകുന്നില്ല. അതുകൊണ്ട് നബീ, അങ്ങ് അവരെ അവഗണിക്കുക. അഹിതകരമായ ഒരു വന്‍ സംഭവത്തിലേക്ക് ഇസ്‌റാഫീല്‍ വിളിക്കുന്ന ദിവസം, കണ്ണുകള്‍ താഴ്ന്നവരായി പാറിപ്പരന്നു വ്യാപിച്ച വെട്ടുകിളികളെന്ന വിധം ശ്മശാനങ്ങളില്‍ നിന്ന് ആ വിളിക്കുന്നയാളിലേക്ക് അതിദ്രുതം അവര്‍ ചെന്നെത്തും. ഇതൊരു പ്രയാസകരമായ ദിനമാണ് എന്നു നിഷേധികള്‍ സങ്കടപ്പെടും.²

ഇവര്ക്കു മുമ്പ് നൂഹ് നബിയുടെ ജനം നിഷേധികളാവുകയും നമ്മുടെ അടിമയെ വ്യാജനാക്കുകയും ഭ്രാന്തനെന്നു വിളിക്കുകയുമുണ്ടായി. അദ്ദേഹം വിരട്ടിയോടിക്കപ്പെടുകയും ചെയ്തു.³
തത്സമയമദ്ധേഹം തന്റെ നാഥനെ വിളിച്ച് 'ഞാന്‍ കീഴ്‌പെടുത്തപ്പെട്ടതിനാല്‍ എന്നെ സഹായിക്കേണമേ' എന്നു കേണപേക്ഷിക്കുകയും, കുത്തിച്ചൊരിയുന്ന വെള്ളവുമായി വാനകവാടങ്ങള്‍ നാം തുറക്കുകയും ഭൂമിയില്‍ ഉറവകളൊഴുക്കുകയുമുണ്ടായി. അങ്ങനെ നിശ്ചയിക്കപ്പെട്ട ഒരു ഗുരുതര വിഷയത്തിനായി ആ ജലം സംഗമിക്കുകയും-നിഷേധിത ദൂതനുള്ള പ്രതിഫലമായി-നമ്മുടെ ദൃഷ്ടിപഥത്തില്‍ സഞ്ചരിക്കുന്നതും പലകകളും ആണികളുമുള്ളതുമായ ഒരു ജലയാനത്തില്‍ അദ്ദേഹത്തെ നാം വഹിക്കുകയും ചെയ്തു. ആ പ്രളയമഹാസംഭവം ഒരു ദൃഷ്ടാന്തമായി നാമവശേഷിപ്പിച്ചു;⁴
എന്നാല്‍ ചിന്തിച്ചു ഗ്രഹിക്കുന്നവരായി ആരെങ്കിലുമുണ്ടോ? അപ്പോള്‍ എന്റെ ശിക്ഷയും മുന്നറിയിപ്പുകളും എങ്ങനെയുണ്ടായിരുന്നു? നിശ്ചയം, ഈ ഖുര്‍ആന്‍ ചിന്തിച്ചുഗ്രഹിക്കാന്‍ നാം സുഗമമാക്കിയിട്ടുണ്ട്; പക്ഷേ, സുചിന്തിതമായി കാര്യങ്ങള്‍ ഗ്രഹിക്കുന്ന ആരെങ്കിലുമുണ്ടോ?⁵

ആദ് സമുദായം സത്യസന്ദേശം വ്യാജമാക്കി. എന്നിട്ട് നോക്കൂ, എന്റെ ശിക്ഷയും മുന്നറിയിപ്പുകളും എങ്ങനെയുണ്ടായിരുന്നു? സുസ്ഥിരമായൊരു ദുഃശകുനനാളില്‍ ഒരത്യുഗ്രന്‍ കാറ്റ് അവര്‍ക്കു നേരെ നാം അയക്കുകയും കടപുഴകി നിലംപതിക്കുന്ന ഈന്തത്തടികളെന്ന വിധം അത് മനുഷ്യരെ പറിച്ചെറിയുകയും ചെയ്തു.⁶
നോക്കൂ, എന്റെ ശിക്ഷയും മുന്നറിയിപ്പുകളും എങ്ങനെയുണ്ടായിരുന്നു! നിശ്ചയം, ഈ ഖുര്‍ആന്‍ ചിന്തിച്ചു ഗ്രഹിക്കാന്‍ നാം സുഗമമാക്കിയിട്ടുണ്ട്; പക്ഷേ, സുചിന്തിതമായി കാര്യങ്ങള്‍ ഗ്രഹിക്കുന്ന ആരെങ്കിലുമുണ്ടോ?

സമൂദ് ഗോത്രം മുന്നറിയിപ്പുകള്‍ കള്ളമാക്കുകയും 'നമ്മില്‍ പെട്ട ഒരൊറ്റയാനെ പിന്‍പറ്റുകയാണെങ്കില്‍ വന്‍ദുര്‍മാര്‍ഗത്തിലും അവിവേകത്തിലും തന്നെയാണ് നാം നിപതിക്കുക, നമുക്കിടയില്‍ നിന്ന് അവനുമാത്രമായി ഉദ്‌ബോധനം ലഭിച്ചുവെന്നോ, അഹങ്കാരിയായ ഒരു പെരും നുണയനാണവന്‍' എന്ന് അവര്‍ തട്ടിവിടുകയുംചെയ്തു.⁷
എന്നാല്‍ 'അഹങ്കാരിയായ പെരുംനുണയന്‍' ആരാണെന്ന് വഴിയെ അവര്‍ വിവരമറിയും. അവരുടെ ദൂതന്‍ സ്വാലിഹ് നബിയോട് നാമരുളി. അവര്‍ക്കൊരു പരീക്ഷണമായി നാം ഒട്ടകത്തെ നിയോഗിക്കുക തന്നെയാണ്. താങ്കള്‍ ക്ഷമാപൂര്‍വം അവരെ നിരീക്ഷണവിധേയരാക്കുകയും 'നാട്ടിലെ വെള്ളം അവര്‍ക്കും ഒട്ടകത്തിനുമിടയില്‍ പങ്കിടപ്പെട്ടതാണ്; ഓരോ കക്ഷിയും സ്വന്തം ഊഴത്തില്‍ വരണം' എന്ന് അറിയിക്കുകയും ചെയ്യുക.⁸
അങ്ങനെ തങ്ങളുടെ കൂട്ടാളിയെ അവര്‍ വിളിക്കുകയും അവനതേറ്റെടുക്കുകയും ഒട്ടകത്തെ അറുകൊല നടത്തുകയും ചെയ്തു. അപ്പോള്‍ എന്റെ ശിക്ഷയും മുന്നറിയിപ്പുകളും എങ്ങനെയുണ്ടായിരുന്നു? അവര്‍ക്കു നേരെ നാമൊരു കഠോരശബ്ദമയച്ചു. അപ്പോഴവര്‍ ആലപണിയുന്നവന്റെ ചുള്ളിക്കമ്പുകള്‍ പോലെയായി.⁹
നിശ്ചയം, ഈ ഖുര്‍ആന്‍ ചിന്തിച്ചു ഗ്രഹിക്കാന്‍ നാം സുഗമമാക്കിയിട്ടുണ്ട്; പക്ഷേ, സുചിന്തിതമായി കാര്യങ്ങള്‍ ഗ്രഹിക്കുന്ന ആരെങ്കിലുമുണ്ടോ?

ലൂഥ് നബിയുടെ ജനത മുന്നറിയിപ്പുകള്‍ വ്യാജമാക്കി; അവരിലേക്ക് നാമൊരു ചരല്‍കാറ്റടിപ്പിച്ചു-ലൂഥ് നബിയുടെ കുടുംബം അതില്‍ നിന്നു മുക്തരായി, നിശയുടെ അന്തിമയാമത്തില്‍ അവരെ നമ്മുടെ അനുഗ്രഹമായി രക്ഷപ്പെടുത്തി. നന്ദിപ്രകാശിപ്പിച്ചവര്‍ക്ക് അങ്ങനെയാണ് നാം പ്രതിഫലം നല്‍കുക. നാം പിടികൂടുമെന്ന് ലൂഥ് നബി അവര്‍ക്ക് മുന്നറിയിപ്പ് നല്‍കിയിരുന്നുവെങ്കിലും അവരതു സംബന്ധിച്ച് സംശയ ഗ്രസ്തരായി കുതര്‍ക്കങ്ങള്‍ നടത്തുകയായിരുന്നു. അദ്ദേഹത്തോട് തന്റെ അതിഥികളെ മ്ലേച്ഛവൃത്തിക്ക് വിട്ടുകൊടുക്കാനവര്‍ ശഠിക്കുകയും ചെയ്തു. തത്സമയം അവരുടെ നേത്രങ്ങള്‍ നാം തുടച്ചു നീക്കുകയും 'എന്റെ ശിക്ഷയും മുന്നറിയിപ്പുകളും ആസ്വദിച്ചോളൂ' എന്നരുളുകയും ചെയ്തു. സ്ഥായിയായ ശിക്ഷ അതിരാവിലെ അവര്‍ക്കു വന്നെത്തുകയും 'എന്റെ ശിക്ഷയും താക്കീതുകളും ആസ്വദിച്ചുകൊള്ളുക' എന്ന് നാം പറയുകയും ചെയ്തു.¹⁰
നിശ്ചയം, ഈ ഖുര്‍ആന്‍ ചിന്തിച്ചു ഗ്രഹിക്കാന്‍ നാം സുഗമമാക്കിയിട്ടുണ്ട്; പക്ഷേ, സുചിന്തിതമായി കാര്യങ്ങള്‍ ഗ്രഹിക്കുന്ന ആരെങ്കിലുമുണ്ടോ?

ഫറോവയുടെയാള്‍ക്കാര്‍ക്കും മുന്നറിയിപ്പുകള്‍ ലഭിച്ചു. നമ്മുടെ ദൃഷ്ടാന്തങ്ങളത്രയും വ്യാജമാക്കിയപ്പോള്‍ അവരെ നാം പിടികൂടി-അജയ്യനും അതിശക്തനുമായ ഒരുവന്റെ പിടിത്തം! ഹേ ഖുറൈശ്, നിങ്ങളിലെ നിഷേധികള്‍ മേല്‍പറഞ്ഞവരേക്കാളേറെ കേമന്മാരാണോ? അതല്ല, വേദങ്ങളില്‍ നിങ്ങള്‍ക്കായി എന്തെങ്കിലും വിട്ടുവീഴ്ചയുണ്ടോ?¹¹
അതുമല്ല, തങ്ങള്‍ സുസംഘടിതരും ഉപരോധശേഷിയുള്ളവരുമാണെന്ന് അവര്‍ക്ക് വാദമുണ്ടോ? എന്നാല്‍ ഈ സംഘം പരാജിതരാകുന്നതും പിന്തിരിഞ്ഞോടുന്നതുമാകുന്നു;¹²
എന്നല്ല, അന്ത്യനാളാണ് അവരുടെ നിര്‍ണിത മുഹൂര്‍ത്തം. അത്യന്തം ഭയവിഹ്വലവും കൈപ്പേറിയതുമത്രേ അത്.

നിശ്ചയം, അധര്‍മകാരികള്‍ ദുര്‍മാര്‍ഗത്തിലും അവിവേകത്തിലുമാണ്. അഗ്നിയിലൂടെ കമിഴ്ത്തി വലിക്കപ്പെടുന്ന നാളില്‍ 'നരകത്തിന്റെ തലോടലാസ്വദിച്ചോളൂ' എന്ന് അവരോട് പറയപ്പെടും. വ്യവസ്ഥാപിതമായിത്തന്നെയാണ് ഓരോ വസ്തുവും നാം സൃഷ്ടിച്ചിരിക്കുന്നത്. കണ്ണിമയ്ക്കും വിധം ഒരൊറ്റവിളംബരമാണ് നമ്മുടേത്-(തല്‍ക്ഷണമത് സംഭവിക്കും). നിഷേധികളേ, നിങ്ങളുടെ വിഭാഗത്തെ എത്രയോ നാം സംഹരിച്ചിട്ടുണ്ട്! അതുകൊണ്ട്, മനസ്സിരുത്തി ചിന്തിക്കുന്ന ആരെങ്കിലുമുണ്ടോ?¹³
അവരനുവര്‍ത്തിച്ച സര്‍വ കാര്യങ്ങളും രേഖകളിലുണ്ട്; ചെറുതും വലുതുമായ ഏതും ഉല്ലേഖിതമാണ്. ജീവിതത്തില്‍ സൂക്ഷ്മത പുലര്‍ത്തിയവര്‍ സ്വര്‍ഗീയാരാമങ്ങളിലും അരുവികളിലുമായി ശക്തനായ രാജാവിന്റെയടുത്ത് സത്യസന്ധതയുടെ ഇരിപ്പിടത്തിലായിരിക്കും.