അൽ ഹാഖ്ഖ - الحاقة - Al-Haqqah

അന്ത്യനാള്‍ എന്ന ആ അനിവാര്യസംഭവം! എന്താണ് ആ യഥാര്‍ത്ഥ സംഗതി? സത്യമായി പുലരുന്ന അക്കാര്യത്തെക്കുറിച്ച് താങ്കള്‍ക്ക് എന്തറിയാം?¹
സമൂദ്-ആദ് സമുദായങ്ങള്‍ ആ ഭയാനകസംഭവം വ്യാജമാക്കി. സമൂദ് അതീവഭയങ്കരമായ ഒരു ശിക്ഷമൂലം സംഹരിക്കപ്പെട്ടു. എന്നാല്‍ അതിശക്തമായി ആഞ്ഞടിച്ച കൊടുങ്കാറ്റ് കൊണ്ടാണ് ആദ് സമൂഹം ഉന്മൂലിതരായത്. ഏഴുരാത്രിയും എട്ടുപകലും അല്ലാഹു അതവര്‍ക്കു നേരെ അഴിച്ചുവിട്ടു. അപ്പോള്‍ കടപുഴകിവീണ ഈന്തത്തടികള്‍ പോലെ അവര്‍ നിലംപതിച്ചു കിടന്നതായി കാണാം. ഇനി, അവരുടെ എന്തെങ്കിലും അവശിഷ്ടം താങ്കള്‍ കാണുന്നുണ്ടോ?

ഫറോവയും അവനുമുമ്പുള്ളവരും അടിമുടി മറിഞ്ഞ നാടുകളും പാപകൃത്യങ്ങളനുവര്‍ത്തിക്കുകയും അങ്ങനെ തങ്ങളുടെ നാഥന്റെ ദൂതനെ ധിക്കരിക്കുകയും ചെയ്തു. തത്സമയം അവന്‍ അതിശക്തമായൊരു പിടിത്തം അവരെ പിടിച്ചു. സര്‍വസീമകളും ലംഘിച്ച് പ്രളയജലം അടിച്ചുകയറിയപ്പോള്‍ നിങ്ങളെ ജലയാനത്തില്‍ കയറ്റി നാം രക്ഷപ്പെടുത്തി. നിങ്ങള്‍ക്കതൊരു ഉദ്‌ബോധനമാക്കാനും സാകൂതം ശ്രവിക്കുന്ന കാതുകള്‍ അത് ശ്രദ്ധിച്ചു മനസ്സിലാക്കാനും വേണ്ടി.²

അങ്ങനെ കാഹളത്തില്‍ ഒരു പ്രാവശ്യം ഊതപ്പെടുകയും ഭൂമിയും മലകളും പൊക്കിയെടുത്ത് കൂട്ടിയിടിച്ച് ധ്വംസിക്കപ്പെടുകയും ചെയ്താല്‍, അന്ന് ആ അന്ത്യനാള്‍ സംഭവിക്കും. ആകാശം-അന്നത് ബലശൂന്യമാകും-പൊട്ടിപ്പിളര്‍ന്ന് മലക്കുകള്‍ അതിന്റെ വിവിധ ഭാഗങ്ങളിലായുണ്ടാകും. താങ്കളുടെ നാഥന്റെ സിംഹാസനം അന്ന് എട്ടു മലക്കുകള്‍ തങ്ങള്‍ക്കു മീതെ വഹിക്കുന്നതാണ്.³
അന്നു നിങ്ങള്‍ ഹാജറാക്കപ്പെടും; ഒരു രഹസ്യ കാര്യവും അന്നു നിങ്ങളില്‍ നിന്ന് അപ്രത്യക്ഷമാകില്ല.

അപ്പോള്‍ വലതുകൈയില്‍ സ്വന്തം പ്രമാണം നല്‍കപ്പെട്ടവന്‍ ആഹ്ലാദം രേഖപ്പെടുത്തും. 'ഇതാ എന്റെ ഗ്രന്ഥം പാരായണം ചെയ്യൂ, ഈ വിചാരണ നേരിടണമെന്ന് എനിക്കുറപ്പുണ്ടായിരുന്നു.' തന്മൂലമവന്‍ അടുത്തു വരുന്ന പഴങ്ങളുള്ള സമുന്നത സ്വര്‍ഗത്തില്‍ സംതൃപ്ത ജീവിതത്തിലായിരിക്കും. അവരോട് അരുളപ്പെടും. പോയകാലത്ത് മുന്‍കൂട്ടി ചെയ്ത കര്‍മഫലമായി നിങ്ങള്‍ സാമോദം അന്നപാനാദികള്‍ കഴിച്ചുകൊള്ളുക!⁴

എന്നാല്‍ ഇടതുകൈയില്‍ സ്വന്തം പ്രമാണം നല്‍കപ്പെട്ടവന്‍ ഇങ്ങനെ സഹതപിക്കും: 'ഹാ കഷ്ടം, ഈ ഗ്രന്ഥം എനിക്ക് നല്‍കപ്പെട്ടിട്ടില്ലായിരുന്നുവെങ്കില്‍...! ഈ വിചാരണ എന്താണെന്ന് ഞാന്‍ അറിഞ്ഞിട്ടില്ലായിരുന്നെങ്കില്‍...! മരണം എല്ലാറ്റിന്റെയും പരിസമാപ്തിയായിരുന്നെങ്കില്‍...! സ്വന്തം ധനം എനിക്ക് ഉപകാരപ്പെട്ടില്ല, അധികാരം വിനഷ്ടമായിപ്പോയി.'⁵
കല്‍പനയുണ്ടാകും: നിങ്ങള്‍ അവനെ പിടിച്ചുകെട്ടുകയും കത്തിജ്ജ്വലിക്കുന്ന നരകാഗ്നിയില്‍ കടത്തുകയും എഴുപതു മുഴം നീളമുള്ള ചങ്ങലയില്‍ ബന്ധിക്കുകയും ചെയ്യുക! കാരണം, അവന്‍ മഹോന്നതനായ അല്ലാഹുവില്‍ വിശ്വസിക്കാതിരിക്കുകയും സാധുക്കള്‍ക്ക് ആഹാരം നല്‍കാന്‍ പ്രേരിപ്പിക്കാതിരിക്കുകയും ചെയ്തിരുന്നു. അതുകൊണ്ട്, ഇന്ന് അവന്നിവിടെ ഒരാത്മമിത്രമോ മഹാപാപികളല്ലാതെ കഴിക്കാത്ത, നരകക്കാരുടെ ചീഞ്ചലമൊഴികെയുള്ള ഭക്ഷണമോ ഇല്ലതന്നെ.⁶

അതിനാല്‍ നിങ്ങള്‍ക്ക് ഗോചരീഭവിക്കുന്നതും അല്ലാത്തതുമായ വസ്തുക്കള്‍ കൊണ്ട് ഞാന്‍ ശപഥം ചെയ്യുന്നു. നിശ്ചയം, ഈ ഖുര്‍ആന്‍ സമാദരണീയനായ ഒരു ദൂതന്‍ പാരായണം ചെയ്യുന്ന വചനങ്ങളാണ്; ഇതൊരു കവിഭാഷ്യമോ-വളരെ കുറച്ചേ നിങ്ങള്‍ വിശ്വസിക്കുന്നുള്ളു-ജ്യോത്സ്യ പ്രവചനമോ-വളരെ അപൂര്‍വമായേ നിങ്ങള്‍ ഗ്രഹിക്കുന്നുള്ളു-അല്ല തന്നെ; പ്രപഞ്ച സംരക്ഷകനായ അല്ലാഹുവിങ്കല്‍ നിന്ന് അവതീര്‍ണമാണിത്.⁷

ഏതെങ്കിലും വചനങ്ങള്‍ നമ്മുടെ പേരില്‍ നിര്‍മിച്ചു പറഞ്ഞിരുന്നെങ്കില്‍, നബിയെ നാം വലതുകൈ കൊണ്ട് പിടികൂടി ജീവനാഡി ഛേദിച്ചു കളയുമായിരുന്നു; തത്സമയം നിങ്ങളിലൊരാള്‍ക്കും അത് പ്രതിരോധിക്കാനാവില്ല.⁸
ഈ ഖുര്‍ആന്‍ ഭക്തജനങ്ങള്‍ക്കുള്ള ഒരുദ്‌ബോധനം തന്നെ, തീര്‍ച്ച. നിങ്ങളിലിത് വ്യാജമാക്കുന്നവരുണ്ടെന്ന് നമുക്ക് നന്നായറിയാം; നിഷേധികള്‍ക്കത് നെടുംഖേദകാരണമാകും. ഇത് സുദൃഢമായ വസ്തുത തന്നെയാണ്; അതുകൊണ്ട് താങ്കളുടെ മഹോന്നതനായ നാഥന്റെ വിശുദ്ധി പ്രകീര്‍ത്തിച്ചുകൊള്ളുക.⁹