അൽ ഖലം - القلم - Al-Qalam

1. നബി(സ്വ)തിരുമേനിയെപ്പറ്റി പരസ്പരവിരുദ്ധമായ വ്യത്യസ്താഭിപ്രായങ്ങള്‍ തൊടുത്തുവിട്ടിരുന്നുവല്ലോ മുശ്‌രിക്കുകള്‍. അതിലൊന്ന് ഭ്രാന്തനാണെന്നതായിരുന്നു. സാധാരണഗതിയില്‍ ആര്‍ക്കും മനസ്സിലാക്കാന്‍ കഴിയുംവിധം പൂര്‍ണ ആരോഗ്യവാനും ന്യൂനതാമുക്ത ജീവിതത്തിനുടമയുമായിരുന്നു തിരുമേനി. ആ അധിക്ഷേപം തികച്ചും ബുദ്ധിശൂന്യവും അടിസ്ഥാന രഹിതവുമാണെന്നാണ് പറയുന്നത്. മനുഷ്യരും മലക്കുകളുമെല്ലാം എഴുതുന്ന പേനയും അവര്‍ എഴുതുന്ന കാര്യങ്ങളും കൊണ്ടാണ് ഇവിടെ സത്യം ചെയ്തു പറയുന്നത്.

2. വലീദുബ്‌നുല്‍മുഗീറ എന്ന ധനാഢ്യ-ധിക്കാരി മുശ്‌രിക്കിന്റെ സംഹാര പ്രവര്‍ത്തനങ്ങള്‍ക്ക് കൈയും കണക്കുമില്ലായിരുന്നു. ഇവനെപ്പോലെ സത്യനിഷേധിയായി രംഗത്തുള്ള ഒരാളെയും താങ്കള്‍ അനുസരിക്കരുതെന്ന് നബി(സ്വ)യെ ഉണര്‍ത്തുകയാണ്. ഇതില്‍ അവസാനം പറഞ്ഞ ജാരസന്തതി എന്ന വിശേഷണം അയാള്‍ക്ക് തന്നെ അറിയില്ലായിരുന്നു. മാതാവിനെ സമീപിച്ച് നിര്‍ബന്ധിച്ച് ചോദിച്ചപ്പോള്‍ അവര്‍ അത് സമ്മതിച്ചതായി ചരിത്രങ്ങളിലുണ്ട്. നീച വ്യക്തികളുടെ ദുഃസ്വഭാവങ്ങളും ന്യൂനതകളും -അവര്‍ നേതാക്കളാണെങ്കിലും ശരി-ജനങ്ങള്‍ ജാഗ്രത പുലര്‍ത്താനായും തെറ്റിദ്ധരിച്ച് അവരുടെ കെണിയില്‍ കുടുങ്ങാതിരിക്കാനായും പരസ്യപ്പെടുത്താമെന്നതിന് തെളിവാണ് ഈ സൂക്തങ്ങള്‍.

3. പരലോകത്ത് ഈ ധിക്കാരിക്ക് പ്രത്യേകാടയാളം വെക്കുമെന്നാണ് വിവക്ഷ എന്നാണ് ചില മുഫസ്സിറുകള്‍ പറയുന്നത്. എല്ലാ നിഷേധികളുടെയും മുഖങ്ങള്‍ അന്ന് കറുത്തിരുണ്ടതാകുമെന്ന് ഖുര്‍ആനില്‍ ഉണ്ട്. 39:60, 3:106, 10:27, 20:102, 80:40 നോക്കുക. എന്നാല്‍, പ്രത്യേകം പറഞ്ഞതു കൊണ്ട് ദുന്‍യാവില്‍ വെച്ച് എന്നു തന്നെയാണ് ഉദ്ദേശ്യമെന്ന് മറ്റുചിലര്‍ വിശദീകരിച്ചിട്ടുണ്ട്. ബദ്ര്‍ യുദ്ധത്തില്‍ ഈ ദുഷ്ടന്റെ മൂക്കിന് വെട്ടേല്‍ക്കുകയും അതിന്റെ അപമാനകരമായ അടയാളം മരണം വരെ നിലനില്‍ക്കുകയും ചെയ്തിരുന്നു.

4. 'ഒന്നും ഒഴിവാക്കിപ്പറയാതെ' എന്നു വെച്ചാല്‍ 'ഇന്‍ശാ അല്ലാഹ്' ഇല്ലാതെ എന്നാണ് ഒരു വിശദീകരണം. തങ്ങളുടെ പിതാവിന്റെ ജീവിത കാലത്ത് പാവപ്പെട്ടവര്‍ക്കും മറ്റും ദാനമായി നല്‍കിവന്നിരുന്ന വിഹിതം ഒഴിവാക്കാതെ എന്നാണ് മറ്റൊരു വ്യാഖ്യാനം. സാധുക്കള്‍ക്ക് ഒന്നും നല്‍കാതിരിക്കാനായിരുന്നു ഈ ഗൂഢാലോചന അവര്‍ ആവിഷ്‌കരിച്ചതു തന്നെ. പക്ഷേ, അവര്‍ അമ്പേ തോറ്റുപോയി.

5. വേദവിശ്വാസിയായ ഒരു ഉത്തമമനുഷ്യന്റേതായിരുന്നു ഈ തോട്ടം. വിളവെടുപ്പിന്റെ സമയത്തും മറ്റും പാവങ്ങള്‍ക്കയാള്‍ നന്നായി ദാനം ചെയ്തിരുന്നു. മക്കള്‍ അനന്തരാവകാശികളായപ്പോള്‍ ബാപ്പ പോഴനായിരുന്നുവെന്ന് വിലയിരുത്തി പാവങ്ങളുടെ വിഹിതം നല്‍കാതിരിക്കാന്‍ ഗൂഢാലോചന നടത്തി. ഫലമോ? ഇടിത്തീയേറ്റ് തോട്ടം ഒന്നടങ്കം കത്തിച്ചാമ്പലായി. ഹീനമായ ഗൂഢാലോചന ആവരണം ചെയ്യുക അതിന്റെയാളുകളെ തന്നെയായിരിക്കും. 35:43. ഈ ഭീകര ദൃശ്യം കണ്ട് പുത്തന്‍ അവകാശികള്‍ ഇടിത്തീയേറ്റവരെപ്പോലെയായി. കണ്ണീരും വേവലാതിയും പശ്ചാത്താപവും തന്നെ. പക്ഷേ, എന്തുഫലം? സമയം കഴിഞ്ഞുപോയല്ലോ.

6. ഇസ്‌ലാമും ഖുര്‍ആനും പറയുന്നതു പോലെയൊന്നുമല്ല കാര്യം. മരിച്ചുപോയി ഒരു പുനരുത്ഥാനമുണ്ടെന്നു വാദത്തിനുവേണ്ടി സമ്മതിച്ചാല്‍ തന്നെ, ദുന്‍യാവിലെന്ന പോലെ തങ്ങള്‍ക്കവിടെയും ഉന്നത പദവിയുണ്ടാകുമെന്ന് മുശ്‌രിക്കുകള്‍ ജല്‍പിച്ചിരുന്നു. 41:50, 18:36 നോക്കുക. അതിന്റെ ഖണ്ഡനമാണിത്.

7. സത്യനിഷേധികളുടെ വിതണ്ഡവാദങ്ങള്‍ മുന്നില്‍ വെച്ചുകൊണ്ടുള്ള പരിഹാസാത്മകമായ ചോദ്യശരങ്ങളാണിവ. അല്ലാഹുവിന്റെ വിശുദ്ധ വേദത്തിനും അവന്റെ ദൂതന്‍ സമര്‍പ്പിക്കുന്ന സിദ്ധാന്തങ്ങള്‍ക്കും കടകവിരുദ്ധമായി നിങ്ങള്‍ വെച്ചുപുലര്‍ത്തുന്ന മതദര്‍ശനത്തിന്റെ സ്രോതസ്സ് എന്താണെന്നാണ് ചോദ്യം. അങ്ങനെ ഒന്നുംതന്നെയില്ലെന്ന് വിശ്വാസികള്‍ക്ക് മാത്രമല്ല, അവിശ്വാസികള്‍ക്കും നന്നായറിയാം. അപ്പോള്‍, സ്വേച്ഛയും താന്തോന്നിത്തവുമാണ് നിങ്ങളുടെ മതം എന്ന് വ്യാജവാദികളെ സലക്ഷ്യം ഉദ്‌ബോധിപ്പിക്കുകയാണ്.

8. എന്നെയും അവരെയും വിടൂ എന്നത് ഒരു പ്രയോഗമാണ്. അവരെ ഞാന്‍ പാഠം പഠിപ്പിക്കാം എന്ന് വ്യംഗ്യഭാഷ്യം. ദുര്‍നടപ്പിലും അഹങ്കാരത്തിലുമായി കഴിയുന്നവര്‍ കൂടുതല്‍ കഠിനമനസ്‌കരും ധിക്കാരികളുമായി മാറുന്നത് സാര്‍വത്രിക കാഴ്ചയാണ്. എത്രവരെ കഠോരനാകുമെന്ന ദൈവിക പരീക്ഷണമാണിത്. തത്സമയം, തന്നെ നിയന്ത്രിക്കാന്‍ ഒരു ശക്തിക്കുമാവില്ല എന്ന് അവര്‍ തെറ്റിദ്ധരിക്കുന്നു. 37:186, 10:11, 15:72, 23:75, 27:4 മുതലായവ നോക്കുക.
സത്യവിശ്വാസികള്‍ വളരെ ഗൗരവത്തോടെ മനസ്സിലാക്കേണ്ടതാണിത്. തിരുനബി(സ്വ) പഠിപ്പിച്ചു: പാപപങ്കിലമായ ജീവിതം നയിക്കുന്ന ഒരാള്‍ക്ക് അല്ലാഹു അനുഗ്രഹങ്ങള്‍ ചെയ്തുകൊണ്ടിരിക്കുന്നതായി നീ കണ്ടാല്‍ ക്രമപ്രവൃദ്ധമായി പിടികൂടപ്പെടാന്‍ പോകുന്നവനാണവന്‍ എന്ന് മനസ്സിലാക്കണം- ഇതു പറഞ്ഞ് അവിടന്ന് ഈ നാല്‍പത്തിനാലാം സൂക്താന്ത്യം പാരായണം ചെയ്യുകയുണ്ടായി (അഹ്മദ്).

9. സന്മാര്‍ഗം കാണിച്ചു കൊടുക്കുന്നതിനു പകരം നബി(സ്വ) അവരോട് പണം ചോദിക്കുകയും അതിന്റെ പേരില്‍ അവര്‍ക്ക് സാമ്പത്തിക പരാധീനത വന്നുഭവിക്കുകയും ചെയ്തിട്ടുണ്ടോ എന്നാണ് ചോദിക്കുന്നത്. മറ്റെന്തെങ്കിലും കാരണവശാല്‍ നബി(സ്വ)യെ അവഗണിക്കേണ്ടതായി വരുന്നില്ല എന്നാണിതിലൂടെ സൂചിപ്പിക്കുന്നത്.

10. യൂനുസ് നബി(അ) അല്ലാഹുവിന്റെ സമ്മതമില്ലാതെ സ്വന്തം ജനതയെ വിട്ടു പോയതും കടല്‍യാത്രാമധ്യേ തിമിംഗലം വിഴുങ്ങിയതും പലേടത്തും പറഞ്ഞുപോയിട്ടുണ്ട്. (37:139, 21:87). സ്വന്തം ജനത്തിന്റെ നിഷേധവും പ്രതിലോമ പ്രവര്‍ത്തനങ്ങളും കാരണമായി അങ്ങനെയുള്ള അക്ഷമയും സഹനരാഹിത്യവും അങ്ങയില്‍ നിന്നുണ്ടാകരുത് എന്ന് നബി(സ്വ)യെ ഉണര്‍ത്തുകയാണ്.

11. അതിരൂക്ഷമായി, ഭീഷണമാംവിധം നോക്കുക എന്നാണ് വിവക്ഷ എന്നു ചില വ്യാഖ്യാതാക്കള്‍ പറയുന്നു. വേറെ ചിലര്‍ 'കണ്ണേറ്' (കരിങ്കണ്ണ്) എന്നതാണിവിടെ ഉദ്ദേശ്യമെന്ന് വിശദീകരിച്ചതായി കാണാം. അറബികളില്‍ ചില ഗോത്രങ്ങള്‍ ഇതില്‍ കുപ്രസിദ്ധരായിരുന്നു. ഇസ്‌ലാം ആ വസ്തുത അംഗീകരിച്ചിട്ടുണ്ട്. തിരുനബി(സ്വ) പ്രസ്താവിച്ചു: ഏതെങ്കിലുമൊരു വസ്തുവിന്ന് അല്ലാഹുവിന്റെ വിധിയെ മറികടക്കാനാകുമെങ്കില്‍ അത് കരിങ്കണ്ണായിരിക്കും (മുസ്‌ലിം). ഹസന്‍, ഹുസൈന്‍ എന്നീ പൗത്രന്മാരെ നബി(സ്വ) മന്ത്രിച്ചപ്പോള്‍ കരിങ്കണ്ണില്‍ നിന്ന് കാവല്‍ തേടിയതായും ഹദീസിലുണ്ട്(ബുഖാരി). തിരുമേനി(സ്വ)ക്ക് രോഗമായപ്പോള്‍ ജിബ്‌രീല്‍(അ) മന്ത്രിച്ചിരുന്നു; അതിലും കരിങ്കണ്ണില്‍ നിന്നും അസൂയാലുക്കളില്‍ നിന്നും അല്ലാഹുവോട് കാവല്‍ തേടിയതായി കാണാം (അഹ്മദ്). സൂറത്തുയൂസുഫിലെ 33-ാം കുറിപ്പും നോക്കുക.

12. പ്രതിലോമകാരികള്‍ ഭൗതിക മാനദണ്ഡങ്ങള്‍ കൊണ്ടാണ് തങ്ങളെ അളക്കുന്നത്. തിരുനബി(സ്വ)യുടെ നിയോഗമാകട്ടെ, പരമമായി പാരത്രിക നേട്ടം വെച്ചുള്ളതാണ്. ആ നേട്ടത്തിനുള്ള മാര്‍ഗദര്‍ശനമാണ് ഈ ഖുര്‍ആനിലുള്ളത്. മനുഷ്യരും ജിന്നുകളുമായ സകലര്‍ക്കും ഇത് വിജയപാത വെട്ടിത്തെളിച്ചുകൊടുക്കും.