അൽ മുല്ക് - الملك - Al-Mulk

രാജാധിപത്യം ആരുടെ കൈവശമാണോ അവന്‍ അനുഗ്രഹപൂര്‍ണനത്രേ. സര്‍വകാര്യത്തിനും കഴിവുറ്റവനാണവന്‍. നിങ്ങളില്‍ ഏറ്റം ഉദാത്തമായ പ്രവര്‍ത്തനങ്ങളനുവര്‍ത്തിക്കുന്നത് ആരാണെന്ന് പരീക്ഷിച്ചറിയാനായി മരണവും ജീവിതവും നിശ്ചയിച്ചവനും ഏറെ അജയ്യനും പൊറുക്കുന്നവനും സപ്തവാനങ്ങളെ അടുക്കുകളായി സൃഷ്ടിച്ചവനുമാണവന്‍.¹
കരുണാമയനായ അവന്റെ സൃഷ്ടിപ്പില്‍ ഒരുവിധ ഏറ്റക്കുറച്ചിലും നിനക്ക് കാണാനാകില്ല. ഒരാവൃത്തി കൂടി നോക്കു, വല്ല വിടവും കാണാനുണ്ടോ? പിന്നെയും രണ്ടുവട്ടം ദൃഷ്ടി തിരിക്കൂ, കണ്ണുകള്‍ തോറ്റ് അവശമായി നിന്നിലേക്കു തന്നെ മടങ്ങിയെത്തുന്നതാണ്.²

ഏറ്റം സമീപസ്ഥമായ വാനത്തെ ചില ദീപങ്ങള്‍ കൊണ്ട് നാം അലങ്കരിക്കുകയും പിശാചുക്കളെ എറിഞ്ഞുതുരത്താനുള്ള ഇടമാക്കുകയും ചെയ്തു; ജ്വലിക്കുന്ന നരകശിക്ഷ അവര്‍ക്കു നാം സജ്ജീകരിച്ചിട്ടുമുണ്ട്. തങ്ങളുടെ നാഥനെ അവിശ്വസിച്ചവര്‍ക്ക് നരകശിക്ഷയുണ്ടാകും; ആ മടക്കസ്ഥലം എത്ര ഹീനം! ആ നരകത്തിലവര്‍ തള്ളപ്പെട്ടാല്‍ അതിന്നവര്‍ ഒരലര്‍ച്ച കേള്‍ക്കുന്നതും അത് തിളച്ചുമറിഞ്ഞുകൊണ്ടിരിക്കുന്നതുമാകുന്നു. രോഷം മൂലം അത് പിളര്‍ന്നു പോകുമാറാകും. ഓരോ സംഘത്തെയും തള്ളപ്പെടുമ്പോള്‍ 'നിങ്ങള്‍ക്ക് താക്കീതുകാരന്‍ വന്നിരുന്നില്ലേ' എന്ന് പാറാവുകാര്‍ ചോദിക്കുന്നതാണ്. അവര്‍ പ്രതികരിക്കും. ഉവ്വ്, വന്നിരുന്നു, അപ്പോള്‍ ഞങ്ങള്‍ വ്യാജമാക്കുകയും 'അല്ലാഹു യാതൊന്നും അവതരിപ്പിച്ചിട്ടില്ല, നിങ്ങള്‍ ഗുരുതരമായ ദുര്‍മാര്‍ഗത്തില്‍ മാത്രമാണ്'³
എന്ന് തട്ടിവിടുകയും ചെയ്തു.

ഞങ്ങള്‍ ശരിയാംവണ്ണം കേള്‍ക്കുകയും ചിന്തിക്കുകയും ചെയ്തിരുന്നുവെങ്കില്‍ ആളിക്കത്തുന്ന ഈ നരകത്തീയിന്റെ ആളുകളില്‍ അകപ്പെടില്ലായിരുന്നു എന്ന് അവര്‍ പരിഭവിക്കും. അങ്ങനെ സ്വന്തം പാപങ്ങള്‍ അവര്‍ ഏറ്റു പറയുന്നതാണ്. നരകാവകാശികള്‍ക്ക് മഹാനാശം!

തങ്ങളുടെ നാഥനെ അഗോചരാവസ്ഥയില്‍ ഭയപ്പെടുന്നവര്‍ക്ക് പാപവിമുക്തിയും മഹത്തായ പ്രതിഫലവുമുണ്ട്. നിങ്ങളുടെ സംസാരം രഹസ്യമോ പരസ്യമോ ആക്കിക്കോളൂ- നിശ്ചയം, അല്ലാഹു ഹൃദയങ്ങളിലുള്ളത് സംബന്ധിച്ച് പോലും നന്നായറിയുന്നവനാകുന്നു.⁴
പടച്ചുണ്ടാക്കിയവന്‍ എല്ലാം അറിയുകയില്ലേ? അവന്‍ സൂക്ഷ്മജ്ഞാനിയും അഭിജ്ഞനുമാകുന്നു.⁵
ഭൂമി നിങ്ങള്‍ക്ക് അധീനപ്പെടുത്തിത്തന്നത് അവനാണ്. അതുകൊണ്ട് അതിന്റെ ഉപരിതലങ്ങളില്‍ നിങ്ങള്‍ സഞ്ചരിക്കുകയും അവന്റെ ഉപജീവന മാര്‍ഗങ്ങളില്‍ നിന്ന് ആഹരിക്കുകയും ചെയ്തുകൊള്ളുക. അവങ്കലേക്കു തന്നെയാണ് പുനരുത്ഥാനം.

വാനലോകത്ത് അധികാരമുള്ളവന്‍ നിങ്ങളെ ഭൂമിയിലാഴ്ത്തിക്കളയുന്നതിനെപ്പറ്റി -തത്സമയമതിനു പ്രകമ്പനമുണ്ടാകും-നിങ്ങള്‍ വിശ്വസ്തരായിരിക്കുന്നുവോ? അതോ, ആകാശത്ത് അധീശത്വമുള്ളവന്‍.⁶
നിങ്ങള്‍ക്കുമേല്‍ ചരല്‍മാരി വര്‍ഷിക്കുന്നതിനെക്കുറിച്ച് നിര്‍ഭയരാണോ നിങ്ങള്‍? അപ്പോള്‍, എന്റെ മുന്നറിയിപ്പ് എങ്ങനെയുണ്ടെന്ന് വഴിയേ നിങ്ങള്‍ അറിയുന്നതാകുന്നു. ഇവരുടെ മുന്‍ഗാമികളും ദൂതരെ വ്യാജമാക്കിയിട്ടുണ്ട്; അപ്പോള്‍ എന്റെ ക്രോധം എങ്ങനെയുണ്ടായിരുന്നു?

ചിറകുവിടര്‍ത്തിയും ചേര്‍ത്തും തങ്ങള്‍ക്കുമീതെ പറക്കുന്ന പക്ഷികളെ അവര്‍ നോക്കിക്കണ്ടിട്ടില്ലേ? കരുണാമയനായ അല്ലാഹു മാത്രമാണവയെ താങ്ങിനിറുത്തുന്നത്.⁷
സര്‍വവും കണ്ടറിയുന്നവനാണ് അവന്‍. കരുണാമയനായ നാഥനല്ലാതെ നിങ്ങള്‍ക്ക് സഹായമേകുന്ന സൈന്യം ആരാണ്? കേവലവഞ്ചനയില്‍ മാത്രമാണ് നിഷേധികളകപ്പെട്ടിരിക്കുന്നത്. അതല്ല, താന്‍ നല്‍കുന്ന ആഹാരം അല്ലാഹു നിര്‍ത്തി വെച്ചാല്‍ നിങ്ങള്‍ക്കതു തരാന്‍ മറ്റാരാണുള്ളത്? പ്രത്യുത, അഹന്തയിലും ദുര്‍മാര്‍ഗത്തിലും നിപതിച്ചിരിക്കയാണവര്‍.

അപ്പോള്‍ തലകീഴായി മുഖത്തിന്മേല്‍ ഇഴയുന്നവനോ, അതോ ഋജുവായ വഴിയിലൂടെ നേരെചൊവ്വേ നടക്കുന്നവനോ ആരാണ് കൂടുതല്‍ സന്മാര്‍ഗ പ്രാപ്തന്‍?⁸
പ്രഖ്യാപിക്കുക. അവനാണ് നിങ്ങളെ പടച്ചുണ്ടാക്കുകയും കേള്‍വിയും കാഴ്ചയും ഹൃദയങ്ങളും നിങ്ങള്‍ക്ക് സംവിധാനിക്കുകയും ചെയ്തവന്‍; വളരെ അപൂര്‍വമായേ നിങ്ങള്‍ കൃതജ്ഞരാകുന്നുള്ളൂ. പറയുക. അവനാണ് നിങ്ങളെ ഭൂമിയില്‍ സൃഷ്ടിച്ച് വ്യാപിപ്പിച്ചവന്‍; അവങ്കലേക്കു തന്നെ നിങ്ങള്‍ സംഗമിപ്പിക്കപ്പെടുകയും ചെയ്യും.

പുനരുത്ഥാനമെന്ന ഈ വാഗ്ദാനം എന്നാണ് സാക്ഷാല്‍കൃതമാവുക, -നിങ്ങള്‍ സത്യസന്ധരാണെങ്കില്‍ എന്നു സത്യനിഷേധികള്‍ ചോദിക്കുന്നു. നബീ, പ്രതികരിക്കുക. അതുസംബന്ധിച്ച കൃത്യവിവരം അല്ലാഹുവിങ്കലാണ്. ഞാന്‍ ഒരു താക്കീതുകാരനല്ലാതെ മറ്റാരുമല്ല. എന്നാല്‍ അത് സമീപസ്ഥമായി കണ്ടാല്‍ അവിശ്വാസികളുടെ വദനങ്ങള്‍ ദുഃഖസാന്ദ്രമാകും. 'നിങ്ങള്‍ ധൃതിപ്പെട്ട് ചോദിച്ചിരുന്നതാണ് ഇത്' എന്ന് അവരോട് പറയപ്പെടും. നബീ, ചോദിക്കുക. പറയൂ, നിങ്ങളുടെ അഭീഷ്ടം പോലെ എന്നെയും അനുയായികളെയും അല്ലാഹു മരിപ്പിക്കുകയോ അല്ലെങ്കില്‍ ഇനിയും ആയുസ്സ് തന്ന് കാരുണ്യം കാട്ടുകയോ ചെയ്താല്‍ നിങ്ങള്‍ക്കെന്തിരിക്കുന്നു?⁹
എന്നാല്‍ വേദനയുറ്റ ശിക്ഷയില്‍ നിന്ന് അവിശ്വാസികളെ ആരാണ് രക്ഷപ്പെടുത്തുക? പറയുക. അവനാണ് കരുണാമയന്‍. ഞങ്ങള്‍ അവനില്‍ വിശ്വസിക്കുകയും ഭരമേല്‍പിക്കുകയും ചെയ്തിരിക്കുന്നു. വ്യക്തമായ ദുര്‍മാര്‍ഗത്തിലകപ്പെട്ടവന്‍ ആരാണെന്ന് വഴിയെ നിങ്ങള്‍ക്ക് അറിയാനിരിക്കുകയാണ്. ചോദിക്കുക. നിങ്ങളുടെ വെള്ളം വറ്റിവരണ്ടുപോയാല്‍ പ്രവാഹജലം ആരാണ് കൊണ്ടുവന്നുതരികയെന്ന് നിങ്ങള്‍ ആലോചിച്ചിട്ടുണ്ടോ?¹⁰