നബീ, താങ്കളെന്തിന് പത്‌നിമാരുടെ സംതൃപ്തി കാംക്ഷിച്ച് അല്ലാഹു അനുവദിച്ചത് നിഷിദ്ധമാക്കുന്നു?1
അവന്‍ ഏറെ പൊറുക്കുന്നവനും കരുണാമയനുമത്രേ. നിങ്ങള്‍ ചെയ്തുപോകുന്ന ശപഥങ്ങള്‍ക്കുള്ള പ്രായശ്ചിത്തം അല്ലാഹു നിശ്ചയിച്ചു തന്നിട്ടുണ്ട്; അവന്‍ നിങ്ങളുടെ സംരക്ഷകനും സര്‍വജ്ഞനും യുക്തിമാനുമാകുന്നു.2
2 വിശദീകരണങ്ങൾ കാണുക
1. ഇസ്‌ലാമില്‍ അനുവദനീയമായൊരു കാര്യം ചില ഭാര്യമാരുടെ താല്‍പര്യം മാനിച്ച് നബി(സ്വ) സ്വന്തത്തിന് നിഷിദ്ധമാക്കി എന്നതാണ് വിഷയം. ഇത് എന്തായിരുന്നു എന്നതില്‍ ഭിന്നപക്ഷങ്ങളുണ്ട്. ചില സംഭവവികാസങ്ങളുടെ പശ്ചാത്തലത്തില്‍, താന്‍ ഇനി തേന്‍ കുടിക്കില്ല എന്ന് അവിടന്ന് തീരുമാനമെടുത്തു- അതാണ് വിവക്ഷ എന്നാണ് ഭൂരിപക്ഷത്തിന്റെ പ്രതിപാദനം. ഈജിപ്തിലെ മുഖൗഖിസ് രാജാവ് തിരുമേനിക്ക് സമ്മാനിച്ചിരുന്ന മാരിയ അല്‍ഖിബ്ഥിയ്യ(റ)യുമായി ബന്ധപ്പെട്ട ചില കാര്യങ്ങളും തനിക്കു ശേഷം അബൂബക്ര്‍, ഉമര്‍(റ) എന്നിവര്‍ ഖലീഫമാരാകുമെന്ന് നബി(സ്വ) ദീര്‍ഘദര്‍ശനം ചെയ്തതുമാണ് 'രഹസ്യം' എന്ന് മറ്റുചിലര്‍ പറയുന്നു. സംഭവമെന്താണെങ്കിലും ഭാര്യമാരുടെ പ്രീതി താങ്കളങ്ങോട്ട് തേടുകയല്ല, അവര്‍ അങ്ങയുടെ പ്രീതി തേടി ഇങ്ങോട്ടു വരികയാണ് വേണ്ടത് എന്ന് താല്‍പര്യം.
2. ഏതെങ്കിലും കാരണത്താല്‍, ഒരനുവദനീയകാര്യം ചെയ്യില്ലെന്നു സത്യം ചെയ്തു പറഞ്ഞാല്‍, അതിന്നു പ്രായശ്ചിത്തം ചെയ്ത് അക്കാര്യമനുവര്‍ത്തിക്കണം. ശപഥം ലംഘിച്ചതിനുള്ള പ്രായശ്ചിത്തം നേരത്തെ വിവരിച്ചിട്ടുണ്ട്. അല്‍മാഇദ 87-89 നോക്കുക.