അൽ മആരിജ് - المعارج - Al-Maarij

1. അല്‍മആരിജ് എന്നാല്‍ മലക്കുകള്‍ വാനലോകങ്ങളിലേക്ക് കയറിപ്പോകുന്ന വഴികളാണ്. അതാണ് ഈ സൂറയുടെ പേര്. മക്കാ മുശ്‌രിക്കുകളുടെ നേതാക്കളിലൊരാളായിരുന്ന നള്‌റുബ്‌നുല്‍ഹാരിസ് എന്ന കൊടിയ ധിക്കാരി നബി(സ്വ) മുന്നറിയിപ്പ് നല്‍കിയിരുന്ന ദൈവിക ശിക്ഷ ഉടനെത്തന്നെ കൊണ്ടു വരാന്‍ ആവശ്യപ്പെട്ടതാണ് അവതരണ കാരണം.

2. പെട്ടെന്നുള്ള ദൈവികശിക്ഷ വരുന്നില്ലെങ്കില്‍ തന്നെ, അന്ത്യനാള്‍ വരുമെന്നും അതിന്റെ ഭയാനകത ഗൗരവതരമായിരിക്കുമെന്നുമാണ് പറയുന്നത്. നബിയുടെ സാന്നിധ്യത്തില്‍ സ്വന്തം അനുയായികളെ ശിക്ഷിക്കില്ല എന്നതാണ് അല്ലാഹുവിന്റെ നയം-8:33. ഖിയാമനാളിന്റെ ദൈര്‍ഘ്യമാണിവിടെ അമ്പതിനായിരം വര്‍ഷം എന്നു പറഞ്ഞിട്ടുള്ളത്-32:5ഉം കാണുക. എന്നാല്‍, സത്യവിശ്വാസികള്‍ക്കിത് ഒരു ഫര്‍ള് നമസ്‌കാരം നിര്‍വഹിക്കുന്ന സമയമായേ അനുഭവപ്പെടൂ എന്ന് നബി(സ്വ) പറഞ്ഞിട്ടുണ്ട് (അഹ്മദ്).

3. അല്ലാഹുവിന്റെ ശിക്ഷക്ക് ധൃതികൂട്ടേണ്ട, ഇന്നല്ലെങ്കില്‍ നാളെ ധിക്കാരികളെ അത് പിടികൂടുക തന്നെ ചെയ്യും. അത്തരക്കാരുടെ ചില ലക്ഷണങ്ങളാണ് വഴിയെ പറയുന്നത്. സാമ്പത്തിക പരീക്ഷണം സത്യവിശ്വാസി അഭിമുഖീകരിക്കേണ്ട ഒരു പ്രധാന കാര്യമാണെന്നാണ് സൂചിപ്പിക്കുന്നത്. ധനം എന്ന അനുഗ്രഹം ലഭിച്ചിട്ടുണ്ടെങ്കില്‍ നിര്‍ബന്ധവും അല്ലാത്തതുമായ പുണ്യവഴികളില്‍ അത് വ്യയം ചെയ്ത് മനസ്സിന്റെ ലുബ്ധ് സ്ഫുടം ചെയ്‌തെടുക്കണം.

4. വിശ്വസ്തതയും വാഗ്ദാനപാലനവും മനുഷ്യന്റെ സമുന്നതമായ സ്വഭാവ വിശേഷണങ്ങളായി ലോകത്തേതൊരാളും അംഗീകരിക്കും. ഇവ സത്യവിശ്വാസിയുടെ ലക്ഷണങ്ങളായും ഇവയുടെ വിപരീതം കപടന്മാരുടെ വിശേഷണങ്ങളായും ഖുര്‍ആനിലും ഹദീസിലും പഠിപ്പിക്കപ്പെട്ടതാണ്. ഇന്ന് പക്ഷേ, ചതിയും വഞ്ചനയും കബളിപ്പിക്കലും വാഗ്ദാനലംഘനവും നേതൃമ്മന്യന്മാരുടെയും ഭേദപ്പെട്ടവരുടെയും സ്ഥിരശൈലിയും രീതിയുമായിരിക്കുന്നു, കഷ്ടം!

5. അല്‍പമെങ്കിലും ചിന്തിക്കാന്‍ തയ്യാറാകാതെ എപ്പോഴും ബഹളംവെച്ച് കൊട്ടും കുരവയുമായി നടക്കുകയാണ് മുശ്‌രിക്കുകള്‍. കണ്ണുരുട്ടി നോക്കിയും കോപ്രായങ്ങള്‍ കാണിച്ചും അക്രമണത്തിനു മുതിര്‍ന്നും നബി(സ്വ)യുടെ നേരെ പാഞ്ഞടുക്കുകയാണവര്‍ എപ്പോഴും. എന്തൊരു മൗഢ്യവും അല്‍പത്വവുമാണിത്!

6. ധിക്കാരവും അഹങ്കാരവുമാണ് മുശ്‌രിക്കുകളുടെ കൈമുതല്‍. എന്നാല്‍ അതിനുമാത്രം വല്ല മഹത്ത്വവും ഇവര്‍ക്കുണ്ടോ? കുത്തനെ ചെന്ന് സ്വര്‍ഗത്തില്‍ കയറാമെന്നാണോ ഇവരുടെ വ്യാമോഹം? തങ്ങള്‍ക്ക് അല്ലാഹുവിങ്കല്‍ ശ്രേഷ്ഠതയും പരിഗണനയുമൊക്കെ ഉണ്ടെന്നാണ് അവരുടെ ജല്‍പനം- അന്നഹ്ല്‍ 62. വളരെ ഹീനവും നിസ്സാരവുമായ ഇന്ദ്രിയ കണത്തില്‍ നിന്നാണ് തങ്ങള്‍ സൃഷ്ടിക്കപ്പെട്ടിരിക്കുന്നതെന്ന് അവര്‍ക്ക് തന്നെ അറിയില്ലേ? പച്ചയായി ആ വസ്തുത പറയാതെ, വളരെ ശ്രദ്ധേയവും മാന്യവുമായ ഒരു ശൈലിയിലൂടെയാണ് ഖുര്‍ആന്‍ ഇതവതരിപ്പിക്കുന്നത്.

7. അഹന്ത പരിധിവിടുകയാണെങ്കില്‍ ചിലപ്പോള്‍ അല്ലാഹു കഠോര ശിക്ഷയിറക്കി ദാക്ഷിണ്യലേശമന്യേ ഉന്മൂലനംചെയ്യും. അതിനു കാരണക്കാര്‍ അപ്പോള്‍ അവര്‍ തന്നെയായിരിക്കും. ചരിത്രത്തിന്റെ നാള്‍വഴിയില്‍ കാണുന്ന ഉന്മൂലിത സമൂഹങ്ങളുടെ സ്ഥിതി അതായിരുന്നു. കൂട്ടസംഹരണത്തിന് വിധേയരാക്കപ്പെട്ട ശേഷം അവര്‍ക്ക് പകരം പുതിയ ജനപഥങ്ങളെ സര്‍വശക്തന്‍ രംഗത്തിറക്കുകയായിരുന്നു.

8. ഓരോന്നിനും അല്ലാഹുവിങ്കല്‍ ഒരു കണക്കും നിര്‍ണയവുമുണ്ടായിരിക്കും- 54:49. ധിക്കാരികളായ നിഷേധീ സമൂഹങ്ങളുടെ ഉന്മൂലനവും ഇങ്ങനെ തന്നെ. അപ്പോള്‍, ആ മുഹൂര്‍ത്തം വരുന്നതു വരെയും അവരെ അല്ലാഹു ഒഴിച്ചുവിടും; ആയുസ്സും സൗകര്യങ്ങളും കൂടുതല്‍ നല്‍കും. കുടിച്ച് മദിച്ച് രമിച്ച് കൂത്താടിയങ്ങനെ നടക്കട്ടെ, കാണിച്ചു കൊടുക്കാം എന്നര്‍ത്ഥം.

9. ഖിയാമനാള്‍ വന്നുകഴിഞ്ഞാല്‍ അവരുടെയെല്ലാം മട്ടും ഭാവവും മാറും. മഹ്ശറിലേക്ക് വിളിക്കപ്പെട്ടാല്‍ തത്രപ്പെട്ട് ഓടുകയാണവര്‍, പണ്ട് ബിംബങ്ങളുടെയും ബഹുദൈവങ്ങളുടെയുമടുത്തേക്ക് അഹമഹമികയാ ഓടിയിരുന്നതു പോലെ. എന്തേ അവര്‍ക്ക് ഒളിച്ചുമാറി നില്‍ക്കാന്‍ ശ്രമിച്ചുകൂടെ? അപമാനവും ശിക്ഷയും ഏറ്റുവാങ്ങാന്‍ മത്സരിച്ചോടുകയോ? നിന്ദ്യരായി അന്നവര്‍ ദൃഷ്ടികള്‍ താഴ്ത്തും. പ്രതികൂല സാഹചര്യങ്ങളും ശിക്ഷയുടെ പശ്ചാതലങ്ങളും അവരെ വരിഞ്ഞുമുറുക്കും. ആയുഷ്‌കാലമത്രയും ദുന്‍യാവില്‍ അവര്‍ നിഷേധിച്ചുനടന്നിരുന്ന ആ അന്ത്യദിനമിതാ സമാഗതമായിരിക്കുന്നു!