Sunday, 11 October 2026 Hijri: — 11:47:54 am
MalayalamQuran.in
മുത്തുവേൽ പാണ്ഡ്യൻ വരുന്നു; 'ജയിലർ 2' കേരള അഡ്വാൻസ് ബുക്കിംഗ് ഇന്ന് മുതൽ — Asianet News Malayalam രാജി വിവാദം: ആർ ശ്രീലേഖയുടെ വിശദീകരണം ഇന്നുണ്ടായേക്കും, സമൂഹ മാധ്യമത്തിലൂടെയാവും വിശദീകരണം — Asianet News Malayalam 'ഇന്ന് മറ്റൊരിടം ജന്തർ മന്തറാകും' ഗ്യാനേഷിനെയോ യുവാക്കളെയോ ജയിലിലിടുക? സമരാഹ്വാനവുമായി നേഹ ബോറ — Asianet News Malayalam മുത്തുവേൽ പാണ്ഡ്യൻ വരുന്നു; 'ജയിലർ 2' കേരള അഡ്വാൻസ് ബുക്കിംഗ് ഇന്ന് മുതൽ — Asianet News Malayalam രാജി വിവാദം: ആർ ശ്രീലേഖയുടെ വിശദീകരണം ഇന്നുണ്ടായേക്കും, സമൂഹ മാധ്യമത്തിലൂടെയാവും വിശദീകരണം — Asianet News Malayalam 'ഇന്ന് മറ്റൊരിടം ജന്തർ മന്തറാകും' ഗ്യാനേഷിനെയോ യുവാക്കളെയോ ജയിലിലിടുക? സമരാഹ്വാനവുമായി നേഹ ബോറ — Asianet News Malayalam
Quran translation reader

നൂഹ് نوح Nuh

Surah 71 മക്കിയ്യ • مكية • Makkiyah 28 ആയത്തുകൾ • 28 Ayahs

സൂറത്ത് നൂഹ് (Nuh), ഖുർആൻ അധ്യായം 71 — അറബി ആയത്തുകളും മലയാളം വിവർത്തനവും ഉൾപ്പെടെ 28 ആയത്തുകൾ വായിക്കുക. Read Surah Nuh with Arabic text and മലയാളം translation.

بِسْمِ ٱللَّهِ ٱلرَّحْمَٰنِ ٱلرَّحِيمِ
1

നിശ്ചയം, നൂഹ് നബിയെ തന്റെ ജനതയിലേക്ക്-വേദനയുറ്റ ശിക്ഷ വന്നെത്തും മുമ്പ് സ്വന്തക്കാര്‍ക്ക് മുന്നറിയിപ്പ് നല്‍കുക എന്ന സന്ദേശവുമായി-നാം നിയോഗിച്ചു1

1 വിശദീകരണം കാണുക

1. ശൈഖുല്‍അമ്പിയാ എന്ന സ്ഥാനപ്പേരുള്ള നൂഹ് നബിക്കും ആദിപിതാവ് ആദംനബി(അ)നുമിടയില്‍ ആയിരം വര്‍ഷക്കാലമുണ്ടായിരുന്നുവെന്ന് ഇമാം ഇബ്‌നുഅബ്ബാസ്(റ) പ്രസ്താവിച്ചിട്ടുണ്ട്. അക്കാലമത്രയും ആദംനബി(അ) പഠിപ്പിച്ച തൗഹീദിലായിരുന്നു മനുഷ്യര്‍-2:213 കാണുക. പിന്നീട് ക്രമേണ ചിത്രങ്ങളിലേക്കും പ്രതിഷ്ഠകളിലേക്കും നീങ്ങി ബിംബങ്ങളിലെത്തി ആരാധന തുടങ്ങി. അപ്പോഴാണ് നൂഹ് നബി(അ)നെ റസൂലാക്കി നിയോഗിക്കുന്നത്.

إِنَّآ أَرۡسَلۡنَا نُوحًا إِلَىٰ قَوۡمِهِۦٓ أَنۡ أَنذِرۡ قَوۡمَكَ مِن قَبۡلِ أَن يَأۡتِيَهُمۡ عَذَابٌ أَلِيمٞ ۝١
2–4

അദ്ദേഹം പ്രഖ്യാപിച്ചു: എന്റെ ജനമേ, ഞാന്‍ നിങ്ങള്‍ക്ക് സ്പഷ്ടമായ മുന്നറിയിപ്പ് നല്‍കുന്നവന്‍ തന്നെയാകുന്നു. നിങ്ങള്‍ അല്ലാഹുവിനെ ആരാധിക്കുകയും സൂക്ഷിക്കുകയും എന്നെ അനുസരിക്കുകയും ചെയ്യുക; എങ്കിലവന്‍ നിങ്ങളുടെ പാപങ്ങള്‍ പൊറുക്കുകയും ഒരു നിശ്ചതാവധി വരെ ആയുസ്സ് തരികയും ചെയ്യും. അല്ലാഹു നിര്‍ണയിച്ച സമയം വന്നെത്തിക്കഴിഞ്ഞാല്‍ അത് പിന്തിക്കപ്പെടുന്നതല്ല. നിങ്ങള്‍ അറിവുള്ളവരാണെങ്കില്‍...

قَالَ يَٰقَوۡمِ إِنِّي لَكُمۡ نَذِيرٞ مُّبِينٌ ۝٢
أَنِ ٱعۡبُدُواْ ٱللَّهَ وَٱتَّقُوهُ وَأَطِيعُونِ ۝٣
يَغۡفِرۡ لَكُم مِّن ذُنُوبِكُمۡ وَيُؤَخِّرۡكُمۡ إِلَىٰٓ أَجَلٖ مُّسَمًّىۚ إِنَّ أَجَلَ ٱللَّهِ إِذَا جَآءَ لَا يُؤَخَّرُۚ لَوۡ كُنتُمۡ تَعۡلَمُونَ ۝٤
5–9

നൂഹ് നബി ബോധിപ്പിച്ചു: എന്റെ നാഥാ, രാപ്പകല്‍ ഭേദമന്യേ സ്വജനതയെ സത്യത്തിലേക്ക് ഞാന്‍ ക്ഷണിക്കുക തന്നെ ചെയ്തു. എന്നാല്‍ എന്റെ ക്ഷണം അവരെ കൂടുതല്‍ അകറ്റുക മാത്രമാണുണ്ടായത്. നിന്റെ പാപമോചനത്തിനായി ഞാനവരെ വിളിക്കുമ്പോഴെല്ലാം വിരലുകള്‍ ചെകിട്ടില്‍ തിരുകുകയും ഉടയാടകള്‍ കൊണ്ട് മൂടിപ്പുതക്കുകയും നിഷേധത്തിലുറച്ചുനില്‍ക്കുകയും മുരത്ത അഹങ്കാരപ്രകടനം നടത്തുകയുമാണവര്‍; പിന്നെയും അവരെ ഉച്ചത്തിലും രഹസ്യമായും പരസ്യമായുമൊക്കെ ഞാന്‍ വിളിച്ചുനോക്കി2

1 വിശദീകരണം കാണുക

2. വളരെ ഹൃദയഭേദകമായ അനുഭവങ്ങളാണ് നൂഹ് നബി(അ)യുടേത്. തൊള്ളായിരത്തി അമ്പത് വര്‍ഷം നിരന്തരം ദഅ്‌വത്ത് നിര്‍വഹിച്ചിട്ടും വളരെക്കുറച്ച് ആളുകള്‍ മാത്രമേ സത്യവിശ്വാസം കൈക്കൊണ്ടുള്ളു. 29:14, 11:36-40 നോക്കുക. സത്യത്തിന്റെ സന്ദേശത്തോടും വാഹകനോടുമുള്ള ആ ജനത്തിന്റെ പ്രതിഷേധം വളരെയേറെ രൂക്ഷതരമായിരുന്നു എന്ന് ഇവിടെ നിന്ന് സുതരാം വ്യക്തമായി ഗ്രഹിക്കാം.

قَالَ رَبِّ إِنِّي دَعَوۡتُ قَوۡمِي لَيۡلٗا وَنَهَارٗا ۝٥
فَلَمۡ يَزِدۡهُمۡ دُعَآءِيٓ إِلَّا فِرَارٗا ۝٦
وَإِنِّي كُلَّمَا دَعَوۡتُهُمۡ لِتَغۡفِرَ لَهُمۡ جَعَلُوٓاْ أَصَٰبِعَهُمۡ فِيٓ ءَاذَانِهِمۡ وَٱسۡتَغۡشَوۡاْ ثِيَابَهُمۡ وَأَصَرُّواْ وَٱسۡتَكۡبَرُواْ ٱسۡتِكۡبَارٗا ۝٧
ثُمَّ إِنِّي دَعَوۡتُهُمۡ جِهَارٗا ۝٨
ثُمَّ إِنِّيٓ أَعۡلَنتُ لَهُمۡ وَأَسۡرَرۡتُ لَهُمۡ إِسۡرَارٗا ۝٩
10–20

ഞാന്‍ അവരെ ഇങ്ങനെ ഉദ്‌ബോധിപ്പിക്കുകയുണ്ടായി: നിങ്ങളുടെ നാഥനോട് മാപ്പിന്നപേക്ഷിക്കൂ. നിശ്ചയം, ധാരാളമായി പാപങ്ങള്‍ പൊറുക്കുന്നവനാണവന്‍; എങ്കില്‍ നിങ്ങള്‍ക്കവന്‍ പേമാരി വര്‍ഷിക്കുകയും സമ്പത്തും സന്താനങ്ങളും കൊണ്ട് അനുഗ്രഹിക്കുകയും ആരാമങ്ങളും അരുവികളും സംവിധാനിച്ചു തരികയും ചെയ്യുന്നതാണ്3
എന്തുപറ്റിപ്പോയി നിങ്ങള്‍ക്ക്? അല്ലാഹുവിന്റെ മഹോന്നത പദവി നിങ്ങള്‍ ഭയപ്പെടുന്നില്ലേ? വ്യത്യസ്ത ഘട്ടങ്ങളായാണല്ലോ നിങ്ങളെയവന്‍ സൃഷ്ടിച്ചിരിക്കുന്നത്. അവന്‍ സപ്തവാനങ്ങളെ തട്ടുകളായി പടച്ചുണ്ടാക്കിയതും അവയില്‍ ചന്ദ്രനെ പ്രകാശവും സൂര്യനെ വിളക്കും ആക്കിയതും എങ്ങനെയാണെന്ന് നിങ്ങള്‍ ചിന്തിച്ചു നോക്കുന്നില്ലേ? അവന്‍ നിങ്ങളെ ഭൂമിയില്‍ നിന്ന് അത്ഭുതകരമായി ഉല്‍പാദിപ്പിച്ച് പിന്നെ അതിലേക്കു തന്നെ മടക്കുകയും പുനര്‍ജീവിപ്പിക്കുകയും ചെയ്യുന്നു. പ്രവിശാല വഴികളിലൂടെ സഞ്ചരിക്കാനായി ഭൂമി അവന്‍ നിങ്ങള്‍ക്കൊരു വിരിപ്പാക്കി4

2 വിശദീകരണങ്ങൾ കാണുക

3. ശിര്‍ക്കിലും പാപങ്ങളിലും നിന്ന് മടങ്ങി നിങ്ങള്‍ സച്ചരിതരാവുകയാണെങ്കില്‍ ഭൗതിക സുഭിക്ഷതയുടെ കവാടങ്ങള്‍ കൂടി നിങ്ങള്‍ക്ക് തുറക്കപ്പെടുമെന്നാണ് നബി(അ) പഠിപ്പിക്കുന്നത്. 7:96 കാണുക. ദുന്‍യാവിലും ആഖിറത്തിലുമുള്ള വിജയമാണല്ലോ മുസ്‌ലിമിന്റെ ജീവിത ലക്ഷ്യം.

4. അത്ഭുതകരമായ പ്രാപഞ്ചിക പ്രതിഭാസങ്ങളിലേക്കും സ്വന്തം സൃഷ്ടിപ്പിന്റെ വിസ്മയങ്ങളിലേക്കും കൂടി സ്വന്തക്കാരുടെ ശ്രദ്ധക്ഷണിക്കുകയാണ് നൂഹ് നബി(അ). ഇന്ദ്രിയകണം, രക്തപിണ്ഡം, മാംസപിണ്ഡം, ഗര്‍ഭസ്ഥശിശു, ഇളം പൈതലല്‍, ബാലന്‍, കുമാരന്‍, യുവാവ്, മധ്യവയസ്‌കന്‍, വൃദ്ധന്‍, പടുകിഴവന്‍ ഇങ്ങനെ വ്യത്യസ്ത ഘട്ടങ്ങളാണ് മനുഷ്യന്. അതുപോലെ വാനലോകങ്ങളും സൂര്യ-ചന്ദ്ര-നക്ഷത്രാദികളുമൊക്കെ ചിന്തിക്കുന്ന മനുഷ്യന്ന് അനന്തമായ പാഠങ്ങളല്ലേ നല്‍കുക? നിങ്ങള്‍ അതൊക്കെ ചിന്തിക്കണമെന്നാണ് നൂഹ് നബി(അ) അവരെ ഉപദേശിക്കുന്നത്.

فَقُلۡتُ ٱسۡتَغۡفِرُواْ رَبَّكُمۡ إِنَّهُۥ كَانَ غَفَّارٗا ۝١٠
يُرۡسِلِ ٱلسَّمَآءَ عَلَيۡكُم مِّدۡرَارٗا ۝١١
وَيُمۡدِدۡكُم بِأَمۡوَٰلٖ وَبَنِينَ وَيَجۡعَل لَّكُمۡ جَنَّٰتٖ وَيَجۡعَل لَّكُمۡ أَنۡهَٰرٗا ۝١٢
مَّا لَكُمۡ لَا تَرۡجُونَ لِلَّهِ وَقَارٗا ۝١٣
وَقَدۡ خَلَقَكُمۡ أَطۡوَارًا ۝١٤
أَلَمۡ تَرَوۡاْ كَيۡفَ خَلَقَ ٱللَّهُ سَبۡعَ سَمَٰوَٰتٖ طِبَاقٗا ۝١٥
وَجَعَلَ ٱلۡقَمَرَ فِيهِنَّ نُورٗا وَجَعَلَ ٱلشَّمۡسَ سِرَاجٗا ۝١٦
وَٱللَّهُ أَنۢبَتَكُم مِّنَ ٱلۡأَرۡضِ نَبَاتٗا ۝١٧
ثُمَّ يُعِيدُكُمۡ فِيهَا وَيُخۡرِجُكُمۡ إِخۡرَاجٗا ۝١٨
وَٱللَّهُ جَعَلَ لَكُمُ ٱلۡأَرۡضَ بِسَاطٗا ۝١٩
لِّتَسۡلُكُواْ مِنۡهَا سُبُلٗا فِجَاجٗا ۝٢٠
21–24

നൂഹ് നബി സങ്കടം ബോധിപ്പിച്ചു: നാഥാ, എന്നോടിവര്‍ ധിക്കാരം കാട്ടുകയും, സമ്പത്തും സന്താനങ്ങളും വര്‍ധിത നഷ്ടം മാത്രമുണ്ടാക്കിയവരെ പിന്തുടരുകയും ഇവരെ ആ നേതാക്കള്‍ അതീവ ഗുരുതര വഞ്ചന നടത്തുകയും ചെയ്തിരിക്കുന്നു-അവര്‍ കല്‍പിച്ചു: നിങ്ങളുടെ ദൈവങ്ങളെ, വിശിഷ്യ വദ്ദ്-സുവാഅ്-യഗുസ്-യഊഖ്-നസ്‌റിനെ നിങ്ങള്‍ കൈവെടിയരുത്. ഇവ്വിധം ഒട്ടനേകമാളുകളെ അവര്‍ ദുര്‍മാര്‍ഗത്തിലാക്കുക തന്നെ ചെയ്തു. അതിക്രമകാരികള്‍ക്ക് നീ വഴികേടല്ലാതെ മറ്റൊന്നും വര്‍ധിപ്പിച്ചു കൊടുക്കരുതേ!5

1 വിശദീകരണം കാണുക

5. പ്രതിലോമ പ്രവര്‍ത്തനങ്ങള്‍ക്ക് ധിക്കാരികളും സമ്പന്നരുമായ ചിലരാണ് എല്ലായിടത്തും നേതാക്കളായി ഉണ്ടാവുക. നൂഹ് നബിയുടെ സമൂഹത്തിലും ചിത്രം ഇതുതന്നെയായിരുന്നു. തങ്ങളുടെ പ്രധാനപ്പെട്ട അഞ്ച് ദൈവങ്ങളുടെ പേരെടുത്ത് പറഞ്ഞ്, ഒരു കാരണവശാലും അവയെ കൈവെടിയരുതെന്ന് നേതാക്കള്‍ പ്രത്യേകം അനുയായികളെ ഉപദേശിക്കയാണ്.

قَالَ نُوحٞ رَّبِّ إِنَّهُمۡ عَصَوۡنِي وَٱتَّبَعُواْ مَن لَّمۡ يَزِدۡهُ مَالُهُۥ وَوَلَدُهُۥٓ إِلَّا خَسَارٗا ۝٢١
وَمَكَرُواْ مَكۡرٗا كُبَّارٗا ۝٢٢
وَقَالُواْ لَا تَذَرُنَّ ءَالِهَتَكُمۡ وَلَا تَذَرُنَّ وَدّٗا وَلَا سُوَاعٗا وَلَا يَغُوثَ وَيَعُوقَ وَنَسۡرٗا ۝٢٣
وَقَدۡ أَضَلُّواْ كَثِيرٗاۖ وَلَا تَزِدِ ٱلظَّٰلِمِينَ إِلَّا ضَلَٰلٗا ۝٢٤
25–28

തങ്ങളനുവര്‍ത്തിച്ച മഹാപാതകങ്ങളാല്‍ അവര്‍ മുക്കിക്കൊല്ലപ്പെടുകയും അഗ്നിയില്‍ പ്രവേശിപ്പിക്കപ്പെടുകയുമുണ്ടായി. തത്സമയം അല്ലാഹുവല്ലാത്ത മറ്റൊരു സഹായിയെയും അവര്‍ കണ്ടെത്തിയില്ല6
നൂഹ് നബി കേണുപ്രാര്‍ത്ഥിച്ചു: നാഥാ, സത്യനിഷേധികളില്‍ പെട്ട ഒരാളെയും ഭൂതലത്തില്‍ നീ അവശേഷിപ്പിക്കരുതേ. അങ്ങനെ വിട്ടേക്കുകയാണെങ്കില്‍ അവര്‍ നിന്റെ അടിമകളെ മാര്‍ഗഭ്രഷ്ടരാക്കുന്നതും കേവലം നിഷേധികളായ അധര്‍മകാരികളെ മാത്രം ഉല്‍പാദിപ്പിക്കുന്നതുമാകുന്നു. നാഥാ, എനിക്കും മാതാപിതാക്കള്‍ക്കും സത്യവിശ്വാസം വരിച്ച് എന്റെ ഭവനത്തില്‍ പ്രവേശിച്ചവര്‍ക്കും സകല സത്യവിശ്വാസി-വിശ്വാസിനികള്‍ക്കും നീ പാപങ്ങള്‍ പൊറുത്തു തരേണമേ. അതിക്രമകാരികള്‍ക്ക് നാശമല്ലാതെ മറ്റൊന്നും നീ വര്‍ധിപ്പിക്കരുതേ!7

2 വിശദീകരണങ്ങൾ കാണുക

6. ഫറോവയും സംഘവും മുക്കിക്കൊല്ലപ്പെട്ട ശേഷം ഖബ്ര്‍ ശിക്ഷയുടെ ഭാഗമായുണ്ടാകുന്നതാണ് അഗ്നിപ്രവേശം, നരകമല്ല; അത് ഖിയാമനാളിനും മഹ്ശറിലെ വിചാരണക്കും ശേഷമേ ഉണ്ടാവുകയുള്ളുവല്ലോ. 40:46ല്‍ നിന്ന് ഇത് സ്പഷ്ടമായി ഗ്രഹിക്കാന്‍ കഴിയും. കടലില്‍ എങ്ങനെ അഗ്നിശിക്ഷ എന്ന സംശയം ബാലിശമാണ്. സിംഹത്തിന്റെയോ തിമിംഗലത്തിന്റെയോ വയറ്റിലോ ആഴിയുടെ അഗാധതകളിലോ അകപ്പെട്ടു മരിക്കുന്ന സത്യനിഷേധിക്ക് അവിടം തന്നെയാണ് ഖബ്ര്‍. അവനുണ്ടാകുന്ന ഖബ്‌റിലെ ചോദ്യോത്തരങ്ങളും ശിക്ഷകളും അവിടെ വെച്ചു തന്നെയാണല്ലോ അഭിമുഖീകരിക്കേണ്ടി വരിക.

7. നീണ്ട കാലത്തെ അവിശ്രമ പരിശ്രമങ്ങളിലൂടെ നടത്തിയ ദഅ്‌വത്ത് മഹാഭൂരിഭാഗം ജനങ്ങളിലും സ്വാധീനം ചെലുത്തിയില്ല; അവര്‍ കൂസലന്യേ ധിക്കരിച്ചു. ആകെ എണ്‍പത് പേര്‍ മാത്രമേ വിശ്വസിച്ചിരുന്നുള്ളു എന്നാണ് ഹസ്രത്ത് ഇബ്‌നുഅബ്ബാസ്(റ) പറയുന്നത്. ഈ പശ്ചാത്തലത്തില്‍, ഇനി ഒരൊറ്റ മനുഷ്യനും വിശ്വാസം വരിക്കുകയില്ലെന്ന് നൂഹ് നബി(അ)ന് സ്പഷ്ടമായി ബോധ്യപ്പെട്ടു. അല്ലാഹു അത് ശരിവെക്കുകയും ചെയ്തു-ഹൂദ് 36. അപ്പോഴാണ് ഈ ദുആ നിര്‍വഹിക്കുന്നത്. നൂറ്റാണ്ടുകള്‍ നീണ്ട ഈ മഹാദൗത്യത്തിന്റെ അനുരണനങ്ങള്‍ കൂലങ്കഷമായും വസ്തുതകള്‍ വിലയിരുത്തിയും ചിന്തിക്കുമ്പോള്‍ മാത്രമേ നൂഹ് നബി(അ)ന്റെ തപ്തഹൃദയത്തിന്റെ ചെറിയൊരു ചിത്രമെങ്കിലും ലഭിക്കൂ. നിഷേധികളെ ഇനിയും കയറൂരി വിടപ്പെട്ടാല്‍ നിലവിലുള്ള കൊച്ചുവിശ്വാസീസംഘത്തില്‍ തന്നെ അവര്‍ വിള്ളലുണ്ടാക്കും; അവര്‍ ഉല്‍പാദിപ്പിക്കുന്ന സന്തതികളും പുതുതലമുറയുമാകട്ടെ, മുരത്ത അഹങ്കാരികളും അവിശ്വാസികളുമായി വളരുകയും ചെയ്യും- നബിയുടെ ഹൃദയഭേദകമായ ഈ ദുആ അല്ലാഹു സ്വീകരിച്ചു. മഹാ പ്രളയമുണ്ടായി സകല നിഷേധികളും ചത്തൊടുങ്ങി-11:25-48 കാണുക.

مِّمَّا خَطِيٓـَٰٔتِهِمۡ أُغۡرِقُواْ فَأُدۡخِلُواْ نَارٗا فَلَمۡ يَجِدُواْ لَهُم مِّن دُونِ ٱللَّهِ أَنصَارٗا ۝٢٥
وَقَالَ نُوحٞ رَّبِّ لَا تَذَرۡ عَلَى ٱلۡأَرۡضِ مِنَ ٱلۡكَٰفِرِينَ دَيَّارًا ۝٢٦
إِنَّكَ إِن تَذَرۡهُمۡ يُضِلُّواْ عِبَادَكَ وَلَا يَلِدُوٓاْ إِلَّا فَاجِرٗا كَفَّارٗا ۝٢٧
رَّبِّ ٱغۡفِرۡ لِي وَلِوَٰلِدَيَّ وَلِمَن دَخَلَ بَيۡتِيَ مُؤۡمِنٗا وَلِلۡمُؤۡمِنِينَ وَٱلۡمُؤۡمِنَٰتِۖ وَلَا تَزِدِ ٱلظَّٰلِمِينَ إِلَّا تَبَارَۢا ۝٢٨