അൽ മുദ്ദസ്സിർ - المدثر - Al-Muddaththir

ഹേ മൂടിപ്പുതച്ച നബീ, എഴുന്നേറ്റ് സമൂഹത്തിന് മുന്നറിയിപ്പ് നല്‍കുകയും നാഥനെ മഹത്ത്വവല്‍ക്കരിക്കുകയും ഉടയാടകള്‍ ശുദ്ധിയാക്കുകയും ബിംബസംസ്‌കാരം വര്‍ജിക്കുകയും ചെയ്യുക¹
കൂടുതല്‍ തിരിച്ചുകിട്ടണമെന്ന് മോഹിച്ച് ദാനം ചെയ്യരുത്. നാഥനു വേണ്ടി എല്ലാം സഹിക്കുക. എന്നാല്‍ കാഹളത്തില്‍ ഊതപ്പെട്ടാല്‍ അന്ന് നിഷേധികള്‍ക്ക് എളുപ്പമുള്ളതല്ലാത്ത ഒരു ദുഷ്‌കര ദിനമായിരിക്കും.

എന്നെയും ഏകനായി ഞാന്‍ സൃഷ്ടിച്ച ഒരാളെയും വിട്ടേക്കൂ; ഞാനവന്ന് സമൃദ്ധമായ സമ്പത്തും സര്‍വസജ്ജരായ സന്താനങ്ങളെയും നല്‍കുകയും ഒട്ടേറെ സൗകര്യങ്ങളൊരുക്കുകയും ചെയ്തു. ഇനിയും ഞാന്‍ വര്‍ധന നല്‍കണമെന്നാണവന്റെ വ്യാമോഹം! കാര്യമങ്ങനെയല്ല, നമ്മുടെ സൂക്തങ്ങളോട് അവന്‍ മാത്സര്യ മനഃസ്ഥിതി കാട്ടുകയാണുണ്ടായത്²
ദുഷ്‌കരമായ മലകയറ്റത്തിന്ന് നാമവനെ നിര്‍ബന്ധിക്കാന്‍ പോകയാണ്. നിശ്ചയം, അവനൊന്നു ആലോചിച്ചു നോക്കുകയും കണക്കുകൂട്ടുകയുമുണ്ടായി. തുലയട്ടെ അവന്‍! എന്താണവന്‍ കണക്കു കൂട്ടിയത്? വീണ്ടും അവന്ന് നാശം ഭവിക്കട്ടെ; എങ്ങനെയാണവന്‍ കണക്കു കൂട്ടിയത്? പിന്നെയും അവന്‍ ഒന്ന് ചിന്തിക്കുകയും മുഖം ചുളിക്കുകയും കറുപ്പിക്കുകയും ചെയ്ത് പിന്നോട്ട് മാറി അഹങ്കാര പ്രകടനം നടത്തിയിട്ട് ജല്‍പിച്ചു: ഉദ്ധരിക്കപ്പെടുന്ന ഒരു ആഭിചാരം മാത്രമാണ് ഈ ഖുര്‍ആന്‍; മനുഷ്യവചനമല്ലാതെ മറ്റൊന്നുമല്ല ഇത്³

അവനെ നാം സഖര്‍ എന്ന നരകത്തിലിട്ട് ജ്വലിപ്പിക്കും! എന്താണ് 'സഖര്‍' എന്ന് താങ്കള്‍ക്കറിയുമോ? അത് യാതൊന്നും വിട്ടുകളയുകയോ അവശേഷിപ്പിക്കുകയോ ചെയ്യില്ല. ചര്‍മം കരിച്ച് വികൃതരൂപമാക്കും; പത്തൊമ്പത് പേര്‍ അതിന്റെ മേല്‍നോട്ടത്തിനുണ്ടായിരിക്കും.

നരകത്തിന്റെ കാര്യദര്‍ശികളായി മലക്കുകളെയേ നാം നിശ്ചയിച്ചിട്ടുള്ളു. സത്യനിഷേധികള്‍ക്ക് ഒരു പരീക്ഷണവിഷയം മാത്രമാണവരുടെ എണ്ണം- വേദക്കാര്‍ക്ക് ദൃഢവിശ്വാസമുണ്ടാകാനും മുഅ്മിനുകളുടെ വിശ്വാസ വര്‍ധനക്കും വേദക്കാരും വിശ്വാസികളും സന്ദേഹികളാകാതിരിക്കാനും 'ഈ ഉദാഹരണം കൊണ്ട് അല്ലാഹുവിന്റെ ഉദ്ദേശ്യമെന്താണ്' എന്ന് കപടന്മാരും നിഷേധികളും പരിഹസിക്കാനും വേണ്ടി⁴
ഇപ്രകാരം താനുദ്ദേശിക്കുന്നവരെ അല്ലാഹു വഴിതെറ്റിക്കുകയും ഉദ്ദേശിക്കുന്ന മറ്റുചിലരെ സന്മാര്‍ഗത്തിലാക്കുകയും ചെയ്യുന്നു. താങ്കളുടെ നാഥന്റെ സൈന്യങ്ങളെ അവനു മാത്രമേ അറിയൂ. മനുഷ്യര്‍ക്കുള്ള ഒരു ഉദ്‌ബോധനം മാത്രമാണ് ഈ നരകം⁵

അവരുടെ ധാരണയല്ല ശരി, ചന്ദ്രനെയും രാത്രി പിന്നിടുമ്പോള്‍ അതിനെയും പ്രഭാതം പുലരുമ്പോള്‍ അതിനെയും തന്നെ ശപഥം, മാനവതക്കുള്ള ഒരു മുന്നറിയിപ്പെന്ന നിലയില്‍ ആ നരകം ഒരതിഭീകരസംഭവം തന്നെയത്രേ- നിങ്ങളില്‍ നിന്ന് മുന്നോട്ടോ പിന്നോട്ടോ പോകാനുദ്ദേശിക്കുന്നവര്‍ക്ക്. തന്റെ കര്‍മഫലങ്ങള്‍ക്ക് കടപ്പെട്ടവനാണ് ഓരോ വ്യക്തിയും⁶

എന്നാല്‍ വലതുപക്ഷക്കാര്‍ ചില സ്വര്‍ഗീയാരാമങ്ങളിലായിരിക്കും. അധര്‍മകാരികളെക്കുറിച്ച് അവര്‍ അന്വേഷിച്ചറിയും, നിങ്ങളെ നരകത്തില്‍ കടത്തിയത് എന്തു നിലപാടാണെന്ന്. അവര്‍ പ്രതികരിക്കും: ഞങ്ങള്‍ നമസ്‌കാരം നിലനിര്‍ത്തുന്നവരുടെ ഗണത്തിലാവുകയോ അഗതികള്‍ക്ക് ഭക്ഷണം കൊടുക്കുകയോ ചെയ്തില്ല. പാപകൃത്യങ്ങളില്‍ വിലയിച്ചിരുന്നവരോടൊപ്പം ഞങ്ങളും മുഴുകുകയും അന്ത്യനാളിനെ നിഷേധിക്കുകയും ചെയ്തു. അങ്ങനെ കഴിയവെ ഞങ്ങള്‍ക്ക് മരണം വന്നെത്തി.

ഇനി, അവര്‍ക്കു ശുപാര്‍ശകന്മാരുടെ ശുപാര്‍ശയൊന്നും ഫലം ചെയ്യില്ല. വസ്തുത ഇതായിട്ടും എന്തു സംഭവിച്ചു ഇവര്‍ക്ക്! സിംഹത്തില്‍ നിന്ന് ഓടിയകലുന്ന പരിഭ്രാന്തരായ കാട്ടുകഴുതകളെ പോലെ ഈ ഖുര്‍ആനില്‍ നിന്ന് അവര്‍ പിന്തിരിഞ്ഞു കളയുന്നു⁷
അല്ല, അവരില്‍ ഓരോ വ്യക്തിയുടെയും അഭിലാഷം തനിക്ക് സ്വന്തമായി തുറന്ന ദൈവികവേദം കിട്ടണമെന്നാണ്⁸
എന്നല്ല, പാരത്രിക ലോകത്തെ പേടിക്കുന്നില്ല അവര്‍; അല്ല, ഇത് ഒരു ഉദ്‌ബോധനമാണ്, ഇഷ്ടമുള്ളവര്‍ അനുസ്മരിച്ചു കൊള്ളട്ടെ. അല്ലാഹു ഉദ്ദേശിക്കുന്നുവെങ്കിലേ അവര്‍ ഓര്‍മിക്കുന്നവരാകൂ. ഭയഭക്തിയും പാപമോചനവും നല്‍കാന്‍ അവകാശപ്പെട്ടവന്‍ അവനാകുന്നു⁹