പുതച്ചു മൂടിക്കിടക്കുന്ന നബീ, എഴുന്നേറ്റ് രാത്രിയുടെ കുറഞ്ഞ സമയമൊഴിച്ച് താങ്കള്‍ നിശാനമസ്‌കാരം നിര്‍വഹിക്കുക-അതായത് രാത്രിയുടെ പകുതി; അല്ലെങ്കില്‍ അല്‍പം കൂട്ടുകയോ കുറക്കുകയോ ചെയ്യുക1
അവധാനതയോടെ ഖുര്‍ആനോതുക. നിശ്ചയം താങ്കളിലേക്കു നാം ഒരു കനപ്പെട്ട ഭാഷ്യം നിക്ഷേപിക്കാന്‍ പോകയാണ്. ഉറക്കത്തില്‍ നിന്നുണര്‍ന്നുള്ള നിശാനമസ്‌കാരം അതിശക്തമായ ഹൃദയസാന്നിധ്യദായകവും വാക്കുകള്‍ സ്പഷ്ടമാക്കുന്നതുമാണ്. പകല്‍നീളേ താങ്കള്‍ക്ക് സുദീര്‍ഘമായ ജോലിത്തിരക്കുകളുണ്ട്. നാഥനെ അനുസ്മരിക്കുകയും അവനിലേക്ക് ശ്രദ്ധ തിരിക്കുകയും ചെയ്യുക. ഉദയാസ്തമന സ്ഥലങ്ങളുടെ രക്ഷിതാവാണവന്‍. അവനല്ലാതെ യാതൊരു ദൈവവുമില്ല. അതുകൊണ്ട് കാര്യങ്ങള്‍ ഭരമേല്‍പിക്കപ്പെടേണ്ടവനായി താങ്കള്‍ അവനെ വരിക്കുക; നിഷേധികളുടെ ജല്‍പനങ്ങള്‍ സഹിക്കുകയും സുന്ദരമായി അവരെ മാറ്റി നിര്‍ത്തുകയും ചെയ്യുക2
2 വിശദീകരണങ്ങൾ കാണുക
1. അല്‍മുസ്സമ്മില്‍ എന്നത് നബി(സ്വ)യുടെ ഒരു വിശേഷണ നാമമാണ്. ഇവിടെ വിവക്ഷ നബി(സ്വ) തന്നെയാണെന്നതില്‍ ആര്‍ക്കും തര്‍ക്കമില്ല. എന്നാല്‍ മൂടിപ്പുതച്ചത് എപ്പോഴായിരുന്നു എന്നതില്‍ പണ്ഡിതന്മാര്‍ക്ക് ഏകാഭിപ്രായമല്ല ഉള്ളത്. നുബുവ്വത്ത് ലഭിച്ച് അധികം കഴിയും മുമ്പേ അവതരിച്ച ഒരു അധ്യായമാണിത്. നബി(സ്വ)യും സ്വഹാബത്തും അന്ന് നീണ്ട സമയം തന്നെ തഹജ്ജുദ് നിര്‍വഹിക്കുമായിരുന്നുവെന്നും അന്നത് നിര്‍ബന്ധമായിരുന്നുവെന്നും പിന്നീട് ഉമ്മത്തിനെ നിര്‍ബന്ധത്തില്‍ നിന്നൊഴിവാക്കിയതാണെന്നും പണ്ഡിതന്മാര്‍ വിശദീകരിച്ചിട്ടുണ്ട്. രാത്രിയുടെ മൂന്നിലൊന്ന്/ പാതി/ അതിനേക്കാള്‍ കുറച്ചു കൂടി എന്നീ അളവിലാണ് അന്നവര്‍ നമസ്‌കരിച്ചിരുന്നത്. പിന്നീടത് ലഘൂകരിച്ചു.
2. വിശുദ്ധ ഖുര്‍ആനും ഇസ്‌ലാമിക ശരീഅത്തിന്റെ നിയമ സംഹിതകളുമാണ് നബി(സ്വ)ക്ക് നല്‍കപ്പെടാന്‍ പോകുന്ന ഭാരിച്ച ഭാഷ്യം. നിശാനമസ്‌കാരം വിശ്വാസിയുടെ മനസ്സിന് കരുത്തും കര്‍മങ്ങള്‍ക്ക് ഊര്‍ജ്ജസ്വലതയും വര്‍ധിപ്പിക്കും. നിഷേധികള്‍ എന്തൊക്കെ ജല്‍പിച്ചാലും പ്രതിബന്ധങ്ങളുണ്ടാക്കിയാലും മുഴുവന്‍ കാര്യങ്ങളും അല്ലാഹുവില്‍ ഭരമേല്‍പിച്ച് മുന്നോട്ടു നീങ്ങണം.