സത്യവിശ്വാസികളേ, എന്റെയും നിങ്ങളുടെയും ശത്രുക്കളായിട്ടുള്ളവരോട് സൗഹൃദം പുലര്‍ത്തി നിങ്ങളവരെ മിത്രങ്ങളാക്കരുത്-നിങ്ങള്‍ക്ക് ലഭിച്ച സത്യം നിഷേധിച്ചിരിക്കയാണവര്‍. നാഥനായ അല്ലാഹുവില്‍ വിശ്വസിക്കുന്നുവെന്നതിനാല്‍ റസൂലിനെയും നിങ്ങളെയുമവര്‍ നാട്ടില്‍ നിന്ന് ബഹിഷ്‌കരിച്ചിരിക്കുകയാണ്. എന്റെ വഴിയില്‍ ധര്‍മസമരം ചെയ്യാനും എന്റെ സംതൃപ്തിയന്വേഷിക്കാനുമാണ് നിങ്ങള്‍ നാടുവിട്ടിരിക്കുന്നതെങ്കില്‍ അത് ചെയ്യരുത്. രഹസ്യമായി അവരോടു നിങ്ങള്‍ സൗഹൃദം പുലര്‍ത്തുകയാണ്. നിങ്ങള്‍ രഹസ്യമായും പരസ്യമായും ചെയ്യുന്നതൊക്കെ ഞാന്‍ നന്നായറിയും. നിങ്ങളിലൊരാള്‍ അങ്ങനെ ചെയ്യുന്നുവെങ്കില്‍ അവന്‍ സന്മാര്‍ഗത്തില്‍ നിന്ന് വ്യതിചലിക്കുക തന്നെ ചെയ്തു.1
അവസരമൊത്തുകിട്ടിയാല്‍ അവര്‍ നിങ്ങളുടെ ശത്രുക്കളാവുകയും ദുഷ്ടലാക്കോടെ നിങ്ങള്‍ക്കു നേരെ കൈകളും നാക്കുകളും നീട്ടുകയും നിങ്ങള്‍ സത്യനിഷേധികളായിരുന്നുവെങ്കില്‍ എന്ന് അഭിലഷിക്കുകയും ചെയ്യും. നിഷേധീസൗഹൃദത്തില്‍ അവരുമായുള്ള രക്തബന്ധങ്ങളോ സ്വസന്തതികളോ നിങ്ങള്‍ക്ക് ഫലദായകമാവുകയേ ഇല്ല. അന്ത്യനാളില്‍ അല്ലാഹു നിങ്ങള്‍ക്കിടയില്‍ വേര്‍പെടുത്തും. നിങ്ങളുടെ പ്രവൃത്തികള്‍ കണ്ടറിയുന്നവനാണവന്‍.2
2 വിശദീകരണങ്ങൾ കാണുക
1. ബദ്‌റില്‍ പങ്കെടുത്ത ശ്രേഷ്ഠ സ്വഹാബിയായ ഹാഥിബുബ്‌നുഅബീബല്‍തഅ(റ) മദീനയിലെത്തിയ മുഹാജിറാണ്. തിരുനബി(സ്വ) മക്കാഫത്ഹിനുള്ള തയ്യാറെടുപ്പുകള്‍ നടത്തിയപ്പോള്‍ അത് വേണ്ടപ്പെട്ടവരെ അറിയിക്കാനായി ഒരു യാത്രക്കാരി വശം അദ്ദേഹമൊരു എഴുത്ത് മക്കയിലേക്ക് കൊടുത്തയക്കുകയും അത് പിടിക്കപ്പെടുകയും താന്‍ പ്രതിക്കൂട്ടിലാവുകയും ചെയ്തു. തനിക്കിതില്‍ നബിക്കോ ഇസ്‌ലാമിനോ എതിരായ യാതൊരുവിധ ദുരുദ്ദേശ്യവുമില്ലെന്ന് പറഞ്ഞ് അദ്ദേഹം വിശദീകരണം നടത്തി. തല്‍സമയമാണ് ഈ സൂക്തങ്ങള്‍ അവതരിച്ചത് (ബുഖാരി, മുസ്‌ലിം).
2. തീര്‍ത്തും അകാരണമായാണ് ഖുറൈശ് നിങ്ങളെ നാട്ടില്‍ നിന്ന് ബഹിഷ്‌കരിച്ചത്. പിന്നെയെന്തിന് അവരോട് നിങ്ങള്‍ ചങ്ങാത്തവും സൗഹൃദവും പുലര്‍ത്തണം? ദീനിന്റെ ശത്രുവുമായുള്ള ബന്ധം ഒരുവിധ ഗുണവും നിങ്ങള്‍ക്ക് നേടിത്തരില്ല; നിങ്ങളുടെ ബന്ധുക്കളോ മക്കളോ കുടുംബങ്ങളോ ആര് അക്കൂട്ടത്തിലുണ്ടെങ്കിലും ശരി. പരലോകത്താകട്ടെ, സര്‍വരും സ്വന്തം കാര്യത്തില്‍ ഭയവിഹ്വലരായിരിക്കും. നിഷേധികള്‍ക്ക് പരാജയം നേരില്‍ ബോധ്യപ്പെടുന്ന ദിവസമാണല്ലോ അത്. 80:33-37 നോക്കുക.