ഭുവന-വാനങ്ങളിലുള്ളവയത്രയും അല്ലാഹുവിന്റെ പരിശുദ്ധി പ്രകീര്‍ത്തിച്ചിരിക്കുന്നു. അജയ്യനും യുക്തിമാനുമാണ് അവന്‍. സത്യവിശ്വാസികളേ, നിങ്ങളെന്തിനാണ് പ്രവര്‍ത്തിക്കാത്തത് പറയുന്നത്? ചെയ്യാത്തത് പറയുക എന്നത് അല്ലാഹുവിങ്കല്‍ ഏറെ ക്രോധകരമത്രേ. ദൃഢീകൃതമായ കെട്ടിടമെന്നോണം അണി ചേര്‍ന്നു നിന്നുകൊണ്ട് തന്റെ വഴിയില്‍ അടരാടുന്നവരെ അല്ലാഹു ഇഷ്ടപ്പെടുക തന്നെ ചെയ്യുന്നു.1
1 വിശദീകരണം കാണുക
1. വളരെ സവിശേഷമായ വ്യക്തിത്വത്തിന്റെ ഉടമയാണ്, ആകണം മുസ്‌ലിം. അവന്റെ വാക്കും പ്രവൃത്തിയും ഒന്നാകണം. ഇന്ന് മിക്ക മനുഷ്യരും മറിച്ചാണ്-വാക്കും പ്രവൃത്തിയും തമ്മില്‍ യാതൊരു ബന്ധവുമില്ല. അധര്‍മത്തിനും അനീതിക്കും ചൂഷണത്തിനുമെതിരെ സംസാരിക്കുന്നവര്‍ അതിന്റെയൊക്കെ വാഹകനും പ്രണേതാവുമാവുകയാണ്. അല്ലാഹുവിന്ന് ഏറെ ക്രോധകരമാണിത്.
ഏറ്റം ശ്രേഷ്ഠമായ പുണ്യകര്‍മം ഏതാണെന്നറിഞ്ഞാല്‍ നമുക്കത് ചെയ്യാമായിരുന്നു എന്ന് മുസ്‌ലിംകളില്‍ പലരും പറയുകയും പുണ്യസമരം (ജിഹാദ്) അവ്വിധം പഠിപ്പിക്കപ്പെട്ടപ്പോള്‍ ചിലര്‍ തലയൂരുകയും ചെയ്തു-അപ്പോഴായിരുന്നു സൂക്തങ്ങളിറങ്ങിയത് (തുര്‍മുദി, അഹ്മദ്). തൊട്ടു പിന്നിലെ സൂക്തത്തിലെ, ഒറ്റക്കെട്ടായും ശക്തമായി ഉറച്ചുനിന്നും ധര്‍മസമരമനുഷ്ഠിക്കുന്നവര്‍ അല്ലാഹുവിന്റെ പ്രീതിക്ക് പാത്രീഭൂതരാകുമെന്ന പരാമര്‍ശവും ശ്രദ്ധേയമാണ്. ചാഞ്ചല്യമില്ലാതെ, മനോദാര്‍ഢ്യത്തോടെയാകണം എന്നതിനാണ് ഉറപ്പുള്ള കെട്ടിടം പോലെ എന്ന് ഉദാഹരിച്ചത്.