ആ ഭീതിജനകമായ സംഭവം! എന്താണ് ആ ഭയങ്കര വിപത്ത്? ആ ഭീകര സംഭവം എന്താണെന്ന് താങ്കള്‍ക്കറിയാമോ? ആളുകള്‍ അങ്ങിങ്ങ് ചിതറിയ പാറ്റകള്‍ക്കു തുല്യവും മലകള്‍ കടഞ്ഞ രോമസമാനവുമായിത്തീരുന്ന നാള്‍! അപ്പോള്‍, ആരുടെ തുലാസ് നന്മകൊണ്ട് കനം തൂങ്ങിയോ അവന്‍ ആഹ്ലാദനിര്‍ഭരമായ ജീവിതത്തിലായിരിക്കും. ആരുടെ തുലാസ് കനം കുറഞ്ഞതായോ, 'ഹാവിയ' ആയിരിക്കും അവന്റെ ആവാസകേന്ദ്രം. അതെന്താണെന്നോ? അതിതീക്ഷ്ണമായ ചൂടുള്ള നരകം!1
1 വിശദീകരണം കാണുക
1. അന്ത്യനാളിന്റെ ആഗമമാണിവിടെ പ്രതിപാദ്യം. അതിന്റെ അപകടകാരിതയും ഭയവിഹ്വലതയും പ്രകടിപ്പിക്കാന്‍ പര്യാപ്തമായ പല വിശേഷണങ്ങളും അതിന്റെ പേരായി ഉപയോഗിക്കാറുണ്ട്. അല്‍ഗാശിയ 88:1, അല്‍വാഖിഅ 56:1, അത്ത്വാമ്മ 79:34, അസ്സ്വാഘ്ഘ 80:33 തുടങ്ങിയവ ഉദാഹരണം. ചിന്നിച്ചിതറിയ പാറ്റകള്‍ പോലെ ജനകോടികള്‍ അങ്ങിങ്ങ് ഭയാക്രാന്തരായി ഓടും. മത്തു പിടിച്ച അവസ്ഥയാകും അവര്‍ക്ക്-22:1,2. ചുരുക്കത്തില്‍, സത്യവിശ്വാസികള്‍ക്ക് മാത്രമാണ് അന്ന് വിജയം..