ആലു ഇംറാൻ - آل عمران - Ali Imran

അലിഫ് ലാം മീം. അല്ലാഹുവല്ലാതെ ഒരു ഇലാഹുമില്ല. അവന്‍ ചിരഞ്ജീവിയും എല്ലാം നിയന്ത്രിക്കുന്നവനുമാകുന്നു. മുന്‍വേദങ്ങളെ ശരിവെച്ചുകൊണ്ട് താങ്കള്‍ക്കവന്‍ സത്യസമേതം ഗ്രന്ഥമിറക്കി. മാലോകര്‍ക്ക് മാര്‍ഗദര്‍ശകമായി നേരത്തെ തൗറാത്തും ഇന്‍ജീലും അവനവതരിപ്പിച്ചിരുന്നു. സത്യാസത്യവിവേചക പ്രമാണവും അവന്‍ ഇറക്കി. അല്ലാഹുവിന്റെ ദൃഷ്ടാന്തങ്ങള്‍ വ്യാജമാക്കിയവര്‍ക്ക് വേദനാജനകമായ ശിക്ഷയുണ്ട്. അവന്‍ പ്രതാപശാലിയും ശിക്ഷാമുറകള്‍ സ്വീകരിക്കുന്നവനുമാണ്. ആകാശത്തോ ഭൂമിയിലോ ഉള്ള യാതൊന്നും അവനു ഗോപ്യമാവില്ല. താനുദ്ദേശിക്കുംവിധം ഗര്‍ഭാശയങ്ങളില്‍ നിങ്ങളെ രൂപപ്പെടുത്തുന്നതവനാണ്. അവനല്ലാതെ മറ്റൊരു ദൈവമില്ല. പ്രതാപശാലിയും യുക്തിമാനുമാണവന്‍¹

അങ്ങയുടെ മേല്‍ ഗ്രന്ഥമിറക്കിയതവനാണ്. അവയില്‍ പ്രസ്പഷ്ട സൂക്തങ്ങളുണ്ട്; ഗ്രന്ഥത്തിന്റെ അടിസ്ഥാനം അവയാണ്. മറ്റു ചില ആയത്തുകള്‍ പരസ്പര സദൃശമായുമുണ്ടാകും. എന്നാല്‍ ഹൃദയങ്ങളില്‍ വക്രതയുള്ളവര്‍ കുഴപ്പമുണ്ടാക്കലും ദുര്‍വ്യാഖ്യാനവും ലക്ഷീകരിച്ച് ആ അസ്പഷ്ട സൂക്തങ്ങളുടെ വഴിയെ പോകുന്നതാണ്. യഥാര്‍ത്ഥത്തില്‍, അല്ലാഹുവിന്നു മാത്രമേ ആ വിഭാഗം വചനത്തിന്റെ വ്യാഖ്യാനമറിയൂ²
അചഞ്ചല വിജ്ഞാനമുള്ളവര്‍ ഇങ്ങനെയാണിതില്‍ പ്രതികരിക്കുക: 'രണ്ടു വിഭാഗം ആയത്തുകളും ഞങ്ങള്‍ വിശ്വസിച്ചിരിക്കുന്നു, എല്ലാം അല്ലാഹുവിങ്കല്‍ നിന്നവതീര്‍ണമാകുന്നു!' ബുദ്ധിമാന്‍മാര്‍ മാത്രമേ കാര്യങ്ങള്‍ ഗ്രഹിച്ചു പാഠമുള്‍ക്കൊള്ളുകയുള്ളൂ. അവരിങ്ങനെ പ്രാര്‍ത്ഥിക്കും: നാഥാ, നേര്‍മാര്‍ഗത്തിലാക്കിയ ശേഷം ഞങ്ങളുടെ മനസ്സുകള്‍ നീ വഴിതെറ്റിക്കരുതേ. നിന്റെ പക്കല്‍ നിന്നുള്ള അനുഗ്രഹം ഞങ്ങള്‍ക്കു ചൊരിയേണമേ. ഏറെ സൗജന്യം നല്‍കുന്നവന്‍ തന്നെയാണു നീ. നാഥാ, നിസ്സംശയം സംഭവിക്കുന്ന ഒരു ദിവസം മാനുഷ്യകത്തെ നീ സംഗമിപ്പിക്കുക തന്നെ ചെയ്യും. അല്ലാഹു വാഗ്ദാനം ലംഘിക്കുകയേയില്ല. നിഷേധികള്‍ക്ക് അല്ലാഹുവിന്റെ പിടിയില്‍ നിന്നുള്ള മോചനത്തിനായി സ്വസന്താനങ്ങളോ സമ്പാദ്യങ്ങളോ യാതൊരു ഫലവും നേടിക്കൊടുക്കില്ല. അവര്‍ നരകത്തിന്റെ ഇന്ധനമായിരിക്കും. ഫറോവാ സംഘത്തിന്റെയും അവരുടെ മുന്‍ഗാമികളുടെയും രീതി തന്നെ-അവര്‍ നമ്മുടെ ദൃഷ്ടാന്തങ്ങള്‍ വ്യാജമാക്കി; അപ്പോള്‍ പാപങ്ങള്‍ നിമിത്തം അല്ലാഹു അവരെ പിടികൂടി. കഠിനമായി ശിക്ഷിക്കുന്നവനാണവന്‍.

നിഷേധികളോട് താങ്കള്‍ ഇങ്ങനെ പറയുക: നിങ്ങള്‍ ജയിച്ചടക്കപ്പെടുന്നതും നരകത്തിലേക്ക് ഒരുമിച്ചു കൂട്ടപ്പെടുന്നതുമാണ്. എത്ര ദുഷിച്ച സങ്കേതമാണത്! ബദ്‌റില്‍ ഏറ്റുമുട്ടിയ രണ്ടു വിഭാഗങ്ങളില്‍ നിങ്ങള്‍ക്ക് മികച്ച ദൃഷ്ടാന്തമുണ്ട്. ഒരു വിഭാഗം അല്ലാഹുവിന്റെ വഴിയിലാണ് യുദ്ധം ചെയ്യുന്നത്; അപരരാകട്ടെ സത്യനിഷേധികള്‍. വിശ്വാസികള്‍ തങ്ങളുടെ ഇരട്ടിയുണ്ടെന്നാണ് നിഷേധികള്‍ കണ്ടത്.³
ഉദ്ദേശിക്കുന്നവര്‍ക്ക് തന്റെ സഹായം വഴി അല്ലാഹു പിന്‍ബലമേകുന്നു. ചിന്തിക്കുന്നവര്‍ക്ക് ഇതില്‍ വലിയ പാഠമുണ്ടെന്നു തീര്‍ച്ച. സ്ത്രീകള്‍, പുത്രന്മാര്‍, സ്വര്‍ണ-വെള്ളിക്കൂനകള്‍, മുന്തിയ കുതിരകള്‍, കാലികള്‍, കൃഷിയിടങ്ങള്‍ തുടങ്ങിയവയോടുള്ള ഭ്രമം മനുഷ്യര്‍ക്ക് അലംകൃതമാക്കപ്പെട്ടിട്ടുണ്ട്. ഇതൊക്കെയും ഇഹലോക ജീവിത വിഭവങ്ങളാണ്; ഉല്‍കൃഷ്ട ഭവനമുള്ളത് അല്ലാഹുവിങ്കലത്രേ. എന്നാല്‍ ഇവയെക്കാള്‍ ഗുണകരമായത് ഞാന്‍ നിങ്ങള്‍ക്കു പറഞ്ഞു തരട്ടെയോ എന്നു താങ്കള്‍ ചോദിക്കുക: ജീവിതത്തില്‍ സൂക്ഷ്മത പുലര്‍ത്തിയവര്‍ക്ക്, അടിയിലൂടെ അരുവികളൊഴുകുന്ന ആരാമങ്ങള്‍ റബ്ബിങ്കലുണ്ട്. അവരതില്‍ ശാശ്വതരാണ്. നിര്‍മലരായ ഇണകളും അല്ലാഹുവിന്റെ പൊരുത്തവും അവര്‍ക്കുണ്ടാകും. തന്റെ ദാസരുടെ കാര്യങ്ങള്‍ അല്ലാഹു നന്നായി കാണുന്നവനാണ്. 'നാഥാ, ഞങ്ങള്‍ വിശ്വസിച്ചിരിക്കുന്നു; അതിനാല്‍ ഞങ്ങള്‍ക്കു പാപങ്ങള്‍ പൊറുത്തുതരികയും നരകത്തില്‍ നിന്നു കാവലേകുകയും ചെയ്യേണമേ' എന്നു പ്രാര്‍ത്ഥിക്കുന്നവരും, ക്ഷമിക്കുന്നവരും സത്യസന്ധരും ഭക്തിയുള്ളവരും ധനം ചെലവു ചെയ്യുന്നവരും നിശയുടെ അന്ത്യയാമങ്ങളില്‍ പാപമോചനമര്‍ത്ഥിക്കുന്നവരുമായിരിക്കും അവര്‍.

താനല്ലാതെ ഒരു ദൈവവുമില്ല എന്നതിന്ന് അല്ലാഹു പലവിധ തെളിവുകള്‍ നിരത്തിയിട്ടുണ്ട്. മലക്കുകളും ജ്ഞാനികളും അങ്ങനെ സാക്ഷ്യം വഹിക്കുകയും ചെയ്തു. നീതി പാലകനാണവന്‍. അവനല്ലാതെ ഒരു ഇലാഹുമില്ല. പ്രതാപശാലിയും മഹായുക്തിമാനുമത്രേ അവന്‍. അല്ലാഹുവിങ്കല്‍ സ്വീകൃതമതം ഇസ്‌ലാം മാത്രമാണ്. തങ്ങള്‍ക്കു ജ്ഞാനം വന്നു കിട്ടിയതില്‍ പിറകെ മാത്രമേ വേദക്കാര്‍ ഭിന്നിച്ചിട്ടുള്ളൂ; അതവര്‍ക്കിടയിലെ അസൂയ നിമിത്തമാണ്. അല്ലാഹുവിന്റെ ദൃഷ്ടാന്തങ്ങള്‍ ആരു നിഷേധിക്കുന്നുവോ, അല്ലാഹു അതിദ്രുത വിചാരണ ചെയ്ത് പ്രതിഫലം കൊടുക്കുന്നവനത്രേ⁴
പിന്നെയും അവര്‍ തര്‍ക്കിച്ചാല്‍ താങ്കള്‍ പറയുക: 'ഞാനും എന്നെ അനുഗമിച്ചവരും അല്ലാഹുവിന്നു കീഴ്‌പെട്ടിരിക്കുന്നു'. നിങ്ങളങ്ങനെ വിധേയത്വമുള്ളവരായിക്കഴിഞ്ഞിട്ടുണ്ടോ എന്നു വേദക്കാരോടും നിരക്ഷരരായ അറബികളോടും താങ്കളന്വേഷിക്കുക. കീഴ്‌പ്പെട്ടിട്ടുണ്ടെങ്കില്‍ അവര്‍ സന്മാര്‍ഗ പ്രാപ്തരായി. ഇനിയവര്‍ അവഗണിച്ചാലോ, പ്രബോധനം മാത്രമാണു താങ്കളുടെ ചുമതല. തന്റെ അടിമകളെപ്പറ്റി അല്ലാഹു നന്നായി കണ്ടറിയുന്നവനാകുന്നു.

അല്ലാഹുവിന്റെ ദൃഷ്ടാന്തങ്ങള്‍ നിഷേധിക്കുകയും ഒരു നീതീകരണവുമില്ലാതെ പ്രവാചകന്മാരെ കൊല്ലുകയും മനുഷ്യരില്‍ നീതിയുപദേശിക്കുന്നവരെ വധിച്ചു കളയുകയും ചെയ്യുന്നവര്‍ക്കു വേദനയുറ്റ ശിക്ഷയുണ്ടെന്നു ശുഭവാര്‍ത്തയറിയിക്കുക. സ്വകര്‍മങ്ങള്‍ ഇഹത്തിലും പരത്തിലും ഫലശൂന്യമായവരാണവര്‍. യാതൊരുവിധ സഹായികളും അവര്‍ക്കുണ്ടാകില്ല. വേദജ്ഞാനം നല്‍കപ്പെട്ടവരെ താങ്കള്‍ കണ്ടുവോ? അവര്‍ക്കിടയില്‍ തര്‍ക്കമുണ്ടാകുമ്പോള്‍ വിധികല്‍പിക്കാനായി അതേ ഗ്രന്ഥത്തിലേക്കു ക്ഷണിക്കപ്പെടുന്ന സമയം ഒരു വിഭാഗമതാ അവഗണിച്ച് പിന്തിരിഞ്ഞു പോകുന്നു! ഏതാനും ദിനങ്ങളേ ഞങ്ങളെ നരകാഗ്നി സ്പര്‍ശിക്കൂ എന്നവര്‍ വീരവാദം മുഴക്കിയതിനാലാണിത്. സ്വയം കൃത ദര്‍ശനങ്ങള്‍ മതകാര്യങ്ങളില്‍ അവരെ വഞ്ചിതരാക്കുകയുമുണ്ടായി.⁵
സംശയ രഹിതമായ മഹ്ശര്‍ ദിനത്തിലേക്ക് നാം ഒരുമിച്ചു കൂട്ടുമ്പോള്‍ അവരുടെ സ്ഥിതി എന്താകും? ഓരോരുത്തര്‍ക്കും സ്വസമ്പാദ്യത്തിന്റെ പ്രതിഫലം അന്നു പൂര്‍ണമായി നല്കപ്പെടും; അവരോട് അനീതി കാണിക്കപ്പെടുകയില്ല.

താങ്കള്‍ പ്രഖ്യാപിക്കുക: സര്‍വാധിപതിയായ അല്ലാഹുവേ, നീ ഉദ്ദേശിക്കുന്നവര്‍ക്കു ഭരണം നല്‍കുകയും ഉദ്ദേശിക്കുന്നവരില്‍ നിന്നത് നീക്കുകയും ചെയ്യുന്നു; നീ വിചാരിക്കുന്നവരെ പ്രതാപികളാക്കുകയും നിനക്കു ബോധിച്ചവരെ ഹീനരാക്കുകയും ചെയ്യുന്നു. നന്മകളത്രയും നിന്റെ കൈയിലാണ്. നീ എല്ലാ കാര്യത്തിനും കഴിവുറ്റവനത്രേ. രാത്രിയെ പകലിലും പകലിനെ രാത്രിയിലും സന്നിവേശിപ്പിക്കുന്നത് നീയാണ്. നിര്‍ജീവിയില്‍ നിന്ന് ജീവിയെയും ജീവിയില്‍ നിന്ന് നിര്‍ജീവിയെയും പുറത്തു കൊണ്ടുവരുന്നതും നീ തന്നെ.⁶
നീ ഉദ്ദേശിക്കുന്നവര്‍ക്ക് കണക്കില്ലാതെ നല്‍കുന്നു. സത്യവിശ്വാസികള്‍ മുഅ്മിനുകളെ വിട്ട് നിഷേധികളെ മിത്രങ്ങളായി സ്വീകരിക്കരുത്. അങ്ങനെയൊരാള്‍ ചെയ്താല്‍ അല്ലാഹുവുമായി അവന്നൊരു ബന്ധവുമില്ല; എന്നാല്‍ നിങ്ങള്‍ക്കവരെക്കുറിച്ച ഭയപ്പാടുമൂലം പ്രത്യക്ഷത്തില്‍ അങ്ങനെ ചെയ്യുന്നതിനു കുഴപ്പമില്ല. അല്ലാഹു നിങ്ങളോടിത് താക്കീത് ചെയ്കയാണ്. അവങ്കലേക്കാകുന്നു സര്‍വരുടെയും മടക്കം.⁷

താങ്കള്‍ പ്രഖ്യാപിക്കുക: സ്വന്തം മനസ്സിലുള്ളത് നിങ്ങള്‍ ഒളിപ്പിച്ചാലും വെളിപ്പെടുത്തിയാലും അല്ലാഹു അതറിയും. ആകാശ ഭൂമികളിലുള്ളതെന്തും അവനു സുജ്ഞാതമത്രേ. അവന്‍ സകലകാര്യങ്ങള്‍ക്കും കഴിവുറ്റവനാകുന്നു. താന്‍ ദുന്‍യാവിലനുവര്‍ത്തിച്ച മുഴുവന്‍ സല്‍ക്കര്‍മങ്ങളും ഹാജറാക്കപ്പെട്ടതായി ഓരോ വ്യക്തിയും കണ്ടെത്തുന്ന നാള്‍ സ്മരണീയമാണ്; ചെയ്തുപോയ ദുഷ്പ്രവൃത്തികളും സമര്‍പ്പിക്കപ്പെടും-അവക്കും തനിക്കുമിടയില്‍ വളരെ അകന്ന ദൂരമാണുണ്ടായിരുന്നതെങ്കില്‍ എന്ന് അവനാഗ്രഹിച്ചുപോകും. അല്ലാഹു നിങ്ങളോടിതു താക്കീതു ചെയ്കയാണ്. അവന്‍ അടിമകളോട് പരമ ദയാലുവാകുന്നു. താങ്കള്‍ പ്രഖ്യാപിക്കുക: നിങ്ങള്‍ അല്ലാഹുവിനെ സ്‌നേഹിക്കുന്നുണ്ടെങ്കില്‍ എന്നെ പിന്തുടരുക; എന്നാല്‍ അവന്‍ നിങ്ങള്‍ക്ക് സ്‌നേഹം വര്‍ഷിക്കുകയും പാപങ്ങള്‍ പൊറുത്തു തരികയും ചെയ്യും. അവന്‍ ഏറെ പൊറുക്കുന്നവനും കരുണാമയനുമത്രേ. അല്ലാഹുവിനെയും റസൂലിനെയും അനുസരിക്കുക⁸
എന്നു താങ്കള്‍ വിളംബരം ചെയ്യുക. ഇതവര്‍ അവഗണിക്കുന്നുവെങ്കില്‍, സത്യനിഷേധികളെ അല്ലാഹു സ്‌നേഹിക്കുകയേയില്ല.

ആദം നബി, നൂഹ് നബി, ഇബ്രാഹീം കുടുംബം, ഇംറാന്‍ കുടുംബം എന്നിവരെ ലോകോത്തരരായി അല്ലാഹു തെരഞ്ഞെടുക്കുക തന്നെ ചെയ്തിരിക്കുന്നു. ഇവരില്‍ ചിലര്‍ മറ്റുചിലരുടെ സന്തതികളാണ്. അല്ലാഹു ഏറെ കേള്‍ക്കുന്നവനും സര്‍വജ്ഞനുമാകുന്നു. 'രക്ഷിതാവേ, എന്റെ ഗര്‍ഭസ്ഥ ശിശുവിനെ നിനക്കുഴിഞ്ഞുവെക്കാന്‍ ഞാനിതാ നേര്‍ച്ചയാക്കുന്നു, എന്നില്‍ നിന്നിതു സ്വീകരിക്കേണമേ, നീ തന്നെയാണ് എല്ലാം കേള്‍ക്കുന്നവനും അറിയുന്നവനും' എന്ന് ഇംറാന്റെ സഹധര്‍മിണി ഹന്നത്ത് പറഞ്ഞ സന്ദര്‍ഭം സ്മരണീയമത്രേ. അങ്ങനെ പ്രസവം കഴിഞ്ഞപ്പോള്‍ അവര്‍ ബോധിപ്പിച്ചു: എന്റെ റബ്ബേ, ഞാന്‍ പ്രസവിച്ചത് പെണ്‍കുട്ടിയാണ്-അതെന്താണെന്നു അവന്നു നന്നായറിയാം-ആണു പെണ്ണിനെപ്പോലെയല്ല. ആ ശിശുവിനു ഞാന്‍ മര്‍യം എന്നു നാമകരണം ചെയ്തിരിക്കുന്നു. അവളെയും സന്തതികളെയും അഭിശപ്തനായ പിശാചില്‍ നിന്നു സംരക്ഷിക്കാനായി ഞാനിതാ നിന്നില്‍ അഭയം തേടുന്നു. അങ്ങനെ നാഥന്‍ അവളെ നന്നായി സ്വീകരിക്കുകയും ഉദാത്തരീതിയില്‍ വളര്‍ത്തുകയും പരിപാലനത്തിനു സകരിയ്യാ നബിയെ ഏല്‍പിക്കുകയും ചെയ്തു. അവരുടെ സമീപം മേടമാളികയില്‍ കടന്നു ചെല്ലുമ്പോഴൊക്കെ എന്തെങ്കിലും ഭക്ഷണമവിടെ അദ്ദേഹം കാണുമായിരുന്നു-ഓ മര്‍യം, നിനക്കിത് എവിടന്നു കിട്ടി എന്നദ്ദേഹം ചോദിച്ചപ്പോള്‍ 'അല്ലാഹുവിങ്കല്‍ നിന്ന്' എന്നവര്‍ പ്രത്യുത്തരം നല്‍കി.⁹
താനുദ്ദേശിക്കുന്നവര്‍ക്ക് അല്ലാഹു കണക്കില്ലാതെ കൊടുക്കും.

അവിടെ വെച്ച് തന്റെ റബ്ബിനോട് സകരിയ്യാ നബി ദുആ ചെയ്തു: നാഥാ, നിന്റെ പക്കല്‍ നിന്നു ഒരുത്തമ സന്താനത്തെ എനിക്കു തരേണമേ; നീ നന്നായി പ്രാര്‍ത്ഥനകള്‍ കേള്‍ക്കുന്നവനാണല്ലോ. അങ്ങനെ മേടമാളികയില്‍ പ്രാര്‍ത്ഥിച്ചു കൊണ്ടു നില്‍ക്കവെ സകരിയ്യാനബിയെ മലക്കുകള്‍ വിളിച്ചറിയിച്ചു: യഹ്‌യാ എന്ന കുട്ടിയെപ്പറ്റി അല്ലാഹു ഇതാ താങ്കള്‍ക്ക് ശുഭവാര്‍ത്തയറിയിക്കുന്നു-റബ്ബിങ്കല്‍ നിന്നുള്ള 'വചനം' ശരിവെക്കുന്നവനും സാരഥിയും ആത്മനിയന്താവും സജ്ജനങ്ങളില്‍പെട്ട പ്രവാചകനുമായിരിക്കും ആ ജാതന്‍. സകരിയ്യാനബി ചോദിച്ചു: ഞാന്‍ വയോവൃദ്ധനും എന്റെ സഹധര്‍മിണി വന്ധ്യയും ആയിരിക്കെ എനിക്കെങ്ങനെ ഒരു മകനുണ്ടാകും? അല്ലാഹു പ്രതികരിച്ചു: അതൊക്കെ ശരി; താനുദ്ദേശിക്കുന്നത് അല്ലാഹു ചെയ്യുന്നതാണ്! സകരിയ്യാ നബി അപേക്ഷിച്ചു: നാഥാ, എനിക്കൊരു ദൃഷ്ടാന്തം കാണിച്ചു തരേണമേ! അവന്‍ മറുപടി നല്‍കി: ആംഗ്യത്തിലൂടെയല്ലാതെ മൂന്നുനാള്‍ താങ്കള്‍ക്കു ജനങ്ങളോടു സംസാരിക്കാനാവില്ലെന്നതാണ് അടയാളം; ധാരാളമായി നാഥനെ സ്മരിക്കുകയും പ്രഭാത-പ്രദോഷങ്ങളില്‍ അവന്റെ മഹത്ത്വം വാഴ്ത്തുകയും ചെയ്യുക.¹⁰

മലക്കുകള്‍ ഇങ്ങനെ പറഞ്ഞ സന്ദര്‍ഭം സ്മരണീയമാണ്: ഓ മര്‍യം, അല്ലാഹു നിങ്ങളെ ഉദാത്തയായി തെരഞ്ഞെടുക്കുകയും പരിശുദ്ധയാക്കുകയും ഇന്നു ലോകത്തുള്ള സ്ത്രീകളില്‍ വെച്ച് ഉല്‍കൃഷ്ടയാക്കുകയും ചെയ്തിരിക്കുന്നു. ഓ മര്‍യം, നിങ്ങളുടെ നാഥന്നു വണങ്ങുകയും സാഷ്ടാംഗം ചെയ്യുകയും നമസ്‌കാരം നിര്‍വഹിക്കുന്നവരോടൊപ്പം നമസ്‌കരിക്കുകയും ചെയ്യുക. നബിയേ, താങ്കള്‍ക്കു നാം ദിവ്യബോധനം നല്‍കുന്ന അദൃശ്യങ്ങളില്‍ പെട്ടതാണ് ഈ വിവരങ്ങളെല്ലാം. മര്‍യമിന്റെ രക്ഷാകര്‍തൃത്വം ആര് ഏറ്റെടുക്കുമെന്നു തീരുമാനിക്കാനായി തങ്ങളുടെ എഴുത്താണികളിട്ട് അവര്‍ നറുക്കെടുപ്പ് നടത്തിയപ്പോള്‍ താങ്കളവിടെ ഉണ്ടായിരുന്നില്ല; തദ്വിഷയകമായി അവര്‍ തര്‍ക്കവിതര്‍ക്കങ്ങള്‍ നടത്തിയപ്പോഴും താങ്കളവിടെ അസന്നിഹിതനായിരുന്നു.¹¹

മലക്കുകള്‍ പറഞ്ഞ സന്ദര്‍ഭം സ്മരണീയമാണ്: ഓ മര്‍യം, തന്റെ പക്കല്‍ നിന്നുള്ള ഒരു 'വചനം' കൊണ്ട് അല്ലാഹു നിങ്ങള്‍ക്ക് ശുഭവാര്‍ത്തയറിയിക്കുന്നു. മര്‍യമിന്റെ പുത്രന്‍ ഈസാ മസീഹ്¹²
എന്നാണദ്ദേഹത്തിന്റെ പേര്; ഇഹത്തിലും പരത്തിലും പ്രതാപശാലിയും നാഥന്റെ സമീപസ്ഥരില്‍ പെട്ടവനുമായിരിക്കും. തൊട്ടിലില്‍ വെച്ചു തന്നെ ജനങ്ങളോടു സംസാരിക്കും; മധ്യവയസ്‌കനാകുമ്പോഴും. സദ്‌വൃത്തരില്‍ പെട്ടവനുമാണദ്ദേഹം. മര്‍യം പ്രതികരിച്ചു: നാഥാ, ഒരു പുരുഷനും സ്പര്‍ശിച്ചിട്ടില്ലെന്നിരിക്കെ എനിക്കെങ്ങനെ കുട്ടി ജനിക്കും? അവന്‍ മറുപടി നല്‍കി: അതൊക്കെ ശരി തന്നെ; താനുദ്ദേശിക്കുന്നത് അല്ലാഹു സൃഷ്ടിക്കുന്നു. എന്തെങ്കിലും തീരുമാനിച്ചു കഴിഞ്ഞാല്‍ അവന്‍ അതിനോട് ഉണ്ടാവുക എന്നു കല്‍പിക്കും; ഉടനെയതു സംഭവിക്കുന്നു. അവന്‍ അദ്ദേഹത്തിനു വേദഗ്രന്ഥവും തത്ത്വജ്ഞാനവും തൗറാത്തും ഇന്‍ജീലും പഠിപ്പിക്കുന്നതാണ്. ഇസ്രാഈല്യരിലേക്കുള്ള ദൂതനായാണു താന്‍ നിയുക്തനാകുന്നത്. അവരോടദ്ദേഹം ഇങ്ങനെ പ്രഖ്യാപിക്കും: നിങ്ങളുടെ നാഥന്റെ പക്കല്‍ നിന്നുള്ള ദൃഷ്ടാന്തവുമായാണു ഞാന്‍ വന്നിരിക്കുന്നത്. അതായത് പക്ഷിയുടെ ആകൃതിയിലൊന്ന് ഞാന്‍ നിങ്ങള്‍ക്കുണ്ടാക്കിത്തരും. എന്നിട്ടതില്‍ ഊതുമ്പോള്‍ അല്ലാഹുവിന്റെ അനുമതിയോടെ അത് സാക്ഷാല്‍ പക്ഷിയാകും. അവന്റെ അനുമതിയോടെ ഞാന്‍ ജന്മാന്ധനെയും വെള്ളപ്പാണ്ടുകാരനെയും സുഖപ്പെടുത്തുകയും മരിച്ചവരെ ജീവിപ്പിക്കുകയും ചെയ്യും. വീടുകളില്‍ നിങ്ങള്‍ സൂക്ഷിച്ചു വെക്കുന്നതും ഭക്ഷിക്കുന്നതും ഞാന്‍ പറഞ്ഞുതരും. വിശ്വാസികളാണെങ്കില്‍ ഇതിലൊക്കെ നിങ്ങള്‍ക്ക് വലിയ ദൃഷ്ടാന്തമുണ്ട്. എന്റെ മുമ്പാകെയുള്ള തൗറാത്ത് ശരിവെച്ചും നിങ്ങള്‍ക്കു നിഷിദ്ധമായ ചില കാര്യങ്ങള്‍ അനുവദനീയമാക്കാനും ആണ് എന്റെ നിയോഗം. നാഥങ്കല്‍ നിന്നുള്ള ദൃഷ്ടാന്തവുമായാണ് ഞാന്‍ വന്നിരിക്കുന്നതെന്നതിനാല്‍ നിങ്ങള്‍ അല്ലാഹുവിനെ സൂക്ഷിക്കുകയും എന്നെ അനുസരിക്കുകയും ചെയ്യുക. എന്റെയും നിങ്ങളുടെയും നാഥന്‍ അല്ലാഹുവാകയാല്‍ അവനെ നിങ്ങളാരാധിക്കുക-ഇതാണ് ഋജുവായ പന്ഥാവ്.

അങ്ങനെ തനിക്കവരുടെ സത്യനിഷേധസ്വഭാവം അനുഭവബോധ്യമായപ്പോള്‍ 'അല്ലാഹുവിങ്കലേക്കു ക്ഷണിക്കാന്‍ എന്റെ സഹായികളായി ആരുണ്ടെ'ന്ന് ഈസാ നബി ചോദിച്ചു. അപ്പൊസ്തലന്മാര്‍ പറഞ്ഞു: 'ഞങ്ങള്‍ അല്ലാഹുവിന്റെ സഹായികളാണ് . അവനില്‍ ഞങ്ങള്‍ വിശ്വസിച്ചിരിക്കുന്നു. പൂര്‍ണമായും അവനെ അനുസരിച്ചവരാണ് ഞങ്ങളെന്ന് അങ്ങു സാക്ഷ്യം വഹിക്കുക. നാഥാ, ഞങ്ങള്‍ നീയവതരിപ്പിച്ചതില്‍ വിശ്വസിക്കുകയും ദൂതനെ പിന്‍പറ്റുകയും ചെയ്തിരിക്കുന്നു. അതുകൊണ്ട് സത്യസാക്ഷ്യ വാഹകരില്‍ ഞങ്ങളെയും രേഖപ്പെടുത്തേണമേ'. നിഷേധികള്‍ ചില ഗൂഢതന്ത്രങ്ങള്‍ പയറ്റി; അല്ലാഹു അവയ്ക്കു പ്രതിക്രിയ ചെയ്തു. അവന്‍ ഗൂഢതന്ത്രങ്ങള്‍ തകര്‍ക്കുന്നവരില്‍ ഉദാത്തനത്രേ¹³
അല്ലാഹു അരുളിയപ്പോള്‍: ഓ ഈസാ, താങ്കളെ നാം പൂര്‍ണമായി ഏറ്റെടുക്കുകയും എന്റെ സമീപത്തേക്കുയര്‍ത്തുകയും നിഷേധികളില്‍ നിന്ന് സംശുദ്ധനാക്കുകയും താങ്കളുടെ അനുയായികളെ അന്ത്യനാള്‍വരെ സത്യനിഷേധികളെക്കാള്‍ ഉയര്‍ന്നവരാക്കുകയും ചെയ്യുന്നതാണ്. പിന്നീട് നിങ്ങളുടെ മടക്കം എന്നിലേക്കു തന്നെയായിരിക്കും; അപ്പോള്‍ പരസ്പരം ഭിന്നപക്ഷക്കാരായിരുന്ന വിഷയങ്ങളില്‍ നിങ്ങള്‍ക്കിടയില്‍ ഞാന്‍ വിധികല്‍പിക്കുന്നതാണ്. എന്നാല്‍ നിഷേധികള്‍ക്ക് ഇഹത്തിലും പരത്തിലും ഞാന്‍ കഠിന ശിക്ഷനല്‍കും. അവര്‍ക്കൊരു സഹായിയുമുണ്ടാവില്ല. സത്യവിശ്വാസം കൈക്കൊള്ളുകയും സല്‍കര്‍മങ്ങളനുവര്‍ത്തിക്കുകയും ചെയ്തവരോ, അവര്‍ക്കു അല്ലാഹു പരിപൂര്‍ണ പ്രതിഫലം നല്‍കും. അവന്‍ അക്രമികളെ സ്‌നേഹിക്കുന്നതല്ല. ദിവ്യദൃഷ്ടാന്തങ്ങളിലും സയുക്തികോദ്‌ബോധനത്തിലും പെട്ടതാണ് താങ്കള്‍ക്ക് നാമീ ഓതിത്തരുന്നവയത്രയും.

അല്ലാഹുവിങ്കല്‍ ഈസാനബിയുടെ ഉപമ ആദം നബിയുടേതു പോലെയാണ്. അദ്ദേഹത്തെയവന്‍ മണ്ണില്‍ നിന്നു സൃഷ്ടിക്കുകയും പിന്നീട് ഉണ്ടാവുക എന്നു കല്‍പിച്ചപ്പോള്‍ അങ്ങനെ സംഭവിക്കുകയും ചെയ്തു. താങ്കളുടെ നാഥന്റെ പക്കല്‍ നിന്നുള്ള സത്യമാണിത്; അതിനാല്‍ സംശയാലുക്കളില്‍ താങ്കളകപ്പെട്ടു പോകരുത്.¹⁴
ഇനി, അറിവു ലഭിച്ചു കഴിഞ്ഞ ശേഷവും ഈസാ നബിയെപ്പറ്റി ആരെങ്കിലും തര്‍ക്കിക്കുന്നുവെങ്കില്‍ താങ്കള്‍ പറയുക: 'നിങ്ങള്‍ വരൂ, ഞങ്ങളുടെയും നിങ്ങളുടെയും മക്കളെയും സ്ത്രീകളെയും നമുക്കു വിളിച്ചു കൂട്ടാം; നമുക്കും സന്നിഹിതരാകാം. എന്നിട്ട്, നുണ പറയുന്നവരില്‍ അല്ലാഹുവിന്റെ ശാപവര്‍ഷത്തിനായി നമുക്ക് കേണപേക്ഷിക്കാം.'¹⁵
ഇത് സത്യസന്ധമായ കഥാകഥനം തന്നെയാണ്. അല്ലാഹു അല്ലാതെ ഒരു ദൈവവുമില്ല തന്നെ. അവന്‍ പ്രതാപശാലിയും യുക്തിമാനുമത്രേ. എന്നിട്ടുമവര്‍ പിന്തിരിയുന്നുവെങ്കില്‍, വിനാശകാരികളെപ്പറ്റി അവന്‍ സൂക്ഷ്മജ്ഞാനിയാകുന്നു.

താങ്കള്‍ പ്രഖ്യാപിക്കുക: 'വേദക്കാരേ, ഞങ്ങള്‍ക്കും നിങ്ങള്‍ക്കുമിടയില്‍ തുല്യമായ ഒരു തത്ത്വത്തിലേക്കു നിങ്ങള്‍ വരൂ-അല്ലാഹുവിനെയല്ലാതെ നാം ആരാധിക്കരുത്; അവനോടു യാതൊന്നിനെയും നാം പങ്കാളികളാക്കരുത്; അവനു പുറമെ നമ്മില്‍ ചിലര്‍ മറ്റു ചിലരെ സംരക്ഷകരാക്കരുത്.'¹⁶
എന്നിട്ടും അവര്‍ പിന്തിരിയുന്നുവെങ്കില്‍ നിങ്ങള്‍ വിളംബരം ചെയ്യുക: ഞങ്ങള്‍ അവനു കീഴ്‌പെട്ടവരാണെന്നതിനു നിങ്ങള്‍ സാക്ഷ്യം വഹിക്കുക. ഹേ വേദക്കാരേ, ഇബ്രാഹീം നബിയുടെ കാര്യത്തില്‍ നിങ്ങളെന്തിനാണ് കുതര്‍ക്കം നടത്തുന്നത്? തനിക്കു ശേഷമേ തൗറാത്തും ഇന്‍ജീലും അവതീര്‍ണമായിട്ടുള്ളുവല്ലോ. ചിന്തിക്കുന്നില്ലേ നിങ്ങള്‍? ഹേ കൂട്ടരേ, അറിവുള്ള കാര്യങ്ങളില്‍ തന്നെ നിങ്ങള്‍ തര്‍ക്കിച്ചിരിക്കയാണ്; യാതൊരറിവുമില്ലാത്ത വിഷയത്തില്‍ പിന്നെയെന്തിനാണ് വാഗ്വാദം നടത്തുന്നത്? അല്ലാഹു അറിയുന്നു; നിങ്ങള്‍ അറിയുന്നില്ല. ഇബ്രാഹീം നബി ജൂതനോ ക്രിസ്ത്യാനിയോ ആയിരുന്നില്ല; ഋജുമാനസനും റബ്ബിനു കീഴ്‌പെട്ടവനുമായിരുന്നു അദ്ദേഹം. താന്‍ ബഹുദൈവ വിശ്വാസികളില്‍ പെട്ടയാളല്ലായിരുന്നു. ഇബ്രാഹീം നബിയുമായി ഏറ്റം ബന്ധപ്പെട്ടവര്‍, തന്നെ അനുധാവനം ചെയ്തവരും ഈ മുഹമ്മദ് നബിയും സത്യവിശ്വാസികളുമാകുന്നു. മു അ്മിനുകളുടെ സംരക്ഷകന്‍ അല്ലാഹുവത്രേ.

നിങ്ങളെ ദുര്‍മാര്‍ഗികളാക്കാന്‍ കഴിഞ്ഞിരുന്നെങ്കില്‍ എന്നഭിലഷിക്കുകയാണ് ഒരുകൂട്ടം വേദക്കാര്‍. എന്നാലവര്‍ വഴിതെറ്റിക്കുന്നത് സ്വന്തത്തെ തന്നെയാണ്; അവരതറിയുന്നില്ല. ഹേ വേദക്കാരേ, സത്യത്തിന്നു സാക്ഷികളായിരിക്കെത്തന്നെ അല്ലാഹുവിന്റെ ദൃഷ്ടാന്തങ്ങള്‍ നിങ്ങളെന്തിനാണ് നിഷേധിക്കുന്നത്? നിങ്ങള്‍ അറിയുന്നവരായിരിക്കെ സത്യത്തെ അസത്യവുമായി കൂട്ടിക്കലര്‍ത്തുകയും യാഥാര്‍ത്ഥ്യം മറച്ചുവെക്കുകയും ചെയ്യുന്നതെന്തിനാണ്? വേദക്കാരില്‍ ഒരുകൂട്ടര്‍ പറഞ്ഞു: വിശ്വാസികള്‍ക്ക് അവതീര്‍ണമായ ഖുര്‍ആന്‍ രാവിലെ നിങ്ങള്‍ വിശ്വസിക്കുകയും വൈകുന്നേരം നിഷേധിക്കുകയും ചെയ്യുക-അവര്‍ മടങ്ങിയെങ്കിലോ!¹⁷
വേദക്കാര്‍ പറയുന്നു: 'നിങ്ങളുടെ മതംഅനുധാവനം ചെയ്യുന്നവരെ മാത്രമേ വിശ്വസിക്കാവൂ. നിങ്ങള്‍ക്കു നല്‍കപ്പെട്ടതുപോലുള്ള വേദം മറ്റാര്‍ക്കെങ്കിലും കൊടുക്കപ്പെടുമെന്നോ, രക്ഷിതാവിങ്കല്‍ മുസ്‌ലിംകളാരെങ്കിലും നിങ്ങളുമായി വാദപ്രതിവാദം നടത്തി ജയിക്കുമെന്നോ അംഗീകരിച്ചു കൊടുക്കരുത്.' നബിയേ, പ്രഖ്യാപിക്കുക: ശരിയായ മാര്‍ഗദര്‍ശനം അല്ലാഹുവിന്റേതത്രേ. അനുഗ്രഹം അവങ്കല്‍ മാത്രമാണ്. താനുദ്ദേശിക്കുന്നവര്‍ക്ക് അവനത് നല്‍കുന്നു. വിശാലമായി കൊടുക്കുന്നവനും അറിവുറ്റവനുമത്രേ അവന്‍. താനുദ്ദേശിക്കുന്നവരെ സ്വാനുഗ്രഹം കൊണ്ടവന്‍ സവിശേഷരാക്കുന്നു. മഹത്തായ ഉദാരനത്രേ അല്ലാഹു.

ഒരു കൂമ്പാരം സ്വര്‍ണമോ വെള്ളിയോ വിശ്വസിച്ചേല്‍പിച്ചാലും അതു തിരിച്ചു തരുന്നവര്‍ വേദക്കാരിലുണ്ട്; എന്നാല്‍ ഒരു ദീനാര്‍ ഏല്‍പിച്ചാല്‍ പോലും ശല്യം ചെയ്തു കൊണ്ടിരുന്നെങ്കിലേ മടക്കിത്തരൂ എന്ന നിലപാടുകാരെയും അവരില്‍ കാണാം. അതിനു കാരണമിതാണ്: നിരക്ഷരരായ അറബികളെ കബളിപ്പിക്കുന്നതില്‍ ഞങ്ങള്‍ക്കു കുറ്റമുണ്ടാകാന്‍ ന്യായമില്ലെന്നവര്‍ തട്ടിവിട്ടു. അറിഞ്ഞു കൊണ്ടു തന്നെ അല്ലാഹുവിന്റെ പേരില്‍ അവര്‍ വ്യാജം ചമക്കുകയുമുണ്ടായി. അങ്ങനെയല്ല, ആര് തന്റെ കരാര്‍ പാലിക്കുകയും സൂക്ഷ്മത പുലര്‍ത്തുകയും ചെയ്തുവോ, സൂക്ഷ്മാലുക്കളെ അല്ലാഹു സ്‌നേഹിക്കുക തന്നെ ചെയ്യുന്നു.

അല്ലാഹുവിന്റെ കരാറുകളും സ്വന്തം ശപഥങ്ങളും തുച്ഛവിലക്കു വില്‍ക്കുന്നവര്‍ക്ക് പരലോകത്ത് യാതൊരു വിഹിതവുമില്ല. അന്ത്യനാളില്‍ അവന്‍ അവരോടു സംസാരിക്കുകയോ അവര്‍ക്കവന്റെ കരുണാകടാക്ഷമുണ്ടാവുകയോ അവരെയവന്‍ സംസ്‌കരിച്ചെടുക്കുകയോ ചെയ്യില്ല. വേദനയുറ്റ ശിക്ഷയാണവര്‍ക്കുണ്ടാവുക. വേദഗ്രന്ഥത്തില്‍ കൃത്രിമം കാട്ടുന്ന ചിലര്‍ അവരിലുണ്ട്; അവ വേദത്തിലുള്ളതാണെന്നു നിങ്ങള്‍ വിചാരിക്കാന്‍ വേണ്ടി. യഥാര്‍ത്ഥത്തില്‍ അവ അതിലുള്ളതല്ല. അല്ലാഹുവിങ്കല്‍ നിന്നുള്ളതാണവയെന്നും അവര്‍ തട്ടിവിടും; സത്യത്തിലവ അവങ്കല്‍ നിന്നുള്ളതല്ല. അറിഞ്ഞു കൊണ്ടുതന്നെ അല്ലാഹുവിന്റെ പേരില്‍ നുണ പറയുകയാണവര്‍. ഒരാള്‍ക്കല്ലാഹു വേദവും തത്ത്വജ്ഞാനവും പ്രവാചകത്വവും നല്‍കുകയും, എന്നിട്ട് 'നിങ്ങള്‍ അല്ലാഹുവിന്നു പകരം എന്റെ അടിമകളാവുക' എന്നദ്ദേഹം ആളുകളോടാവശ്യപ്പെടുകയും ചെയ്യുക എന്നത് അസംഭവ്യമാണ്. മറിച്ച്, നിങ്ങള്‍ പഠിപ്പിക്കുകയും പാരായണം നടത്തുകയും ചെയ്തുകൊണ്ടിരിക്കുന്ന വേദപ്രകാരം നിഷ്‌കളങ്ക ദൈവ ദാസരാകണം എന്നാണദ്ദേഹം കല്‍പിക്കുക. മലക്കുകളെയോ പ്രവാചകരെയോ ആരാധ്യരായി വരിക്കാനും അദ്ദേഹം ശാസിക്കയില്ല. നിങ്ങള്‍ മുസ്‌ലിംകളായി കഴിഞ്ഞ ശേഷം സത്യനിഷേധം പുല്‍കാന്‍ അദ്ദേഹം കല്‍പിക്കുമോ?¹⁸

അല്ലാഹു പ്രവാചകന്മാരോടു കരാര്‍ വാങ്ങിയ സന്ദര്‍ഭം സ്മരണീയമത്രേ: 'ഞാന്‍ നിങ്ങള്‍ക്കു വേദവും തത്ത്വജ്ഞാനവും നല്‍കുകയും എന്നിട്ട്, നിങ്ങള്‍ വശമുള്ളതിനെ അംഗീകരിച്ചുകൊണ്ട് ഒരു ദൂതന്‍ വരികയുമാണെങ്കില്‍ നിങ്ങളദ്ദേഹത്തെ വിശ്വസിക്കുകയും സഹായിക്കുകയും ചെയ്‌തേ പറ്റൂ.' അല്ലാഹു ചോദിച്ചു: നിങ്ങള്‍ സമ്മതിച്ചുവോ, എന്റെ ഉടമ്പടി പാലിക്കാനുള്ള ഉത്തരവാദിത്വം ഏറ്റെടുത്തുവോ? ഞങ്ങള്‍ സമ്മതിച്ചിരിക്കുന്നു എന്നവര്‍ പ്രതികരിച്ചു. അല്ലാഹു പറഞ്ഞു: എങ്കില്‍ നിങ്ങള്‍ സാക്ഷ്യം വഹിക്കുക; ഞാനും നിങ്ങളൊന്നിച്ചു സാക്ഷിയാകുന്നു. ഇനിയും ഈ പ്രതിജ്ഞയില്‍ നിന്നു പിന്തിരിയുന്നവരാരോ അവര്‍ തന്നെയാണു ധിക്കാരികള്‍.¹⁹
അല്ലാഹുവിന്റെ മതമല്ലാത്ത മറ്റൊന്നാണോ അവരാഗ്രഹിക്കുന്നത്? ഭുവന-വാനങ്ങളിലുള്ളവരെല്ലാം സ്വമേധയായോ നിര്‍ബന്ധിതമായോ അവനു കീഴ്‌പെട്ടിരിക്കുന്നു. അവങ്കലേക്കു തന്നെയാണവര്‍ മടക്കപ്പെടുക. നബിയേ, പ്രഖ്യാപിക്കുക: അല്ലാഹുവിലും ഞങ്ങള്‍ക്കവതീര്‍ണമായതിലും, ഇബ്രാഹീം ഇസ്മാഈല്‍ ഇസ്ഹാഖ് ഇസ്രാഈല്‍സന്തതികള്‍ എന്നിവര്‍ക്കവതരിപ്പിക്കപ്പെട്ടതിലും, മൂസാ നബിക്കും ഈസാ നബിക്കും മറ്റു പ്രവാചകന്മാര്‍ക്കും നാഥങ്കല്‍ നിന്നു നല്‍കപ്പെട്ടതിലും ഞങ്ങള്‍ വിശ്വസിച്ചിരിക്കുന്നു. അവരിലാരോടും ഞങ്ങള്‍ വിവേചനം കാട്ടുന്നില്ല. അവന്റെ ആജ്ഞാനുവര്‍ത്തികളാണ് ഞങ്ങള്‍.

ഇസ്‌ലാമല്ലാത്ത മറ്റൊരു മതം ആരെങ്കിലുമന്വേഷിക്കുന്നുവെങ്കില്‍ അതയാളില്‍ നിന്നു തീര്‍ത്തും അസ്വീകാര്യമാണ്; പരലോകത്ത് അയാള്‍ നഷ്ടക്കാരനുമായിരിക്കും. സത്യവിശ്വാസം കൈക്കൊള്ളുകയും റസൂല്‍ സത്യനിഷ്ഠനാണെന്നു സാക്ഷ്യം വഹിക്കയും സ്പഷ്ട ദൃഷ്ടാന്തങ്ങള്‍ ലഭിക്കുകയും ചെയ്ത ശേഷം നിഷേധികളായിക്കഴിഞ്ഞൊരു വിഭാഗത്തെ അല്ലാഹു എങ്ങനെ നേര്‍വഴിയിലാക്കും?²⁰
അതിക്രമകാരികളായ ഒരു ജനതതിയെ അവന്‍ ഋജുവായ പന്ഥാവിലേക്കു കൊണ്ടുവരില്ല. അല്ലാഹുവിന്റെയും മലക്കുകളുടെയും സകലജനങ്ങളുടെയും ശാപമുണ്ടായിരിക്കുമെന്നതാണവരുടെ പ്രതിഫലം. അതിലവര്‍ ശാശ്വതരായിരിക്കും. അവര്‍ക്ക് ശിക്ഷ ലഘൂകരിക്കപ്പെടുകയോ അവധി നല്‍കപ്പെടുകയോ ഇല്ല. എന്നാല്‍ പിന്നീട് പശ്ചാത്തപിക്കുകയും കര്‍മപാത നന്നാക്കിത്തീര്‍ക്കുകയും ചെയ്തവരിങ്ങനെയാവില്ല; അല്ലാഹു ഏറെ പൊറുക്കുന്നവനും കരുണാമയനുമത്രേ.

സത്യവിശ്വാസം കൊക്കൊണ്ടതിനു ശേഷം നിഷേധികളായിത്തീരുകയും, പിന്നെയും അവിശ്വാസം കൂടിക്കൂടി വരികയും ചെയ്തവരുടെ പശ്ചാത്താപം അസ്വീകാര്യം തന്നെ, തീര്‍ച്ച. അവര്‍ തന്നെയാണ് ദുര്‍മാര്‍ഗികള്‍. അവിശ്വാസികളായിത്തീരുകയും നിഷേധികളായിക്കൊണ്ടു തന്നെ മരിക്കുകയും ചെയ്തവരില്‍ നിന്ന്, അവരിലൊരാള്‍ ഭൂമി നിറയെ സ്വര്‍ണം പ്രായശ്ചിത്തമായി നല്‍കിയാലും സ്വീകരിക്കപ്പെടുകയേയില്ല. വേദനയുറ്റ ശിക്ഷയാണവര്‍ക്കുണ്ടാവുക; അവര്‍ക്കാരും സഹായികളായി ഉണ്ടാകില്ല.

നിങ്ങള്‍ ഇഷ്ടപ്പെടുന്നതില്‍ നിന്നു ചെലവു ചെയ്യുന്നതു വരെ പുണ്യം നേടാനാകില്ല. എന്തു നിങ്ങള്‍ വ്യയം ചെയ്താലും അല്ലാഹു അതിനെക്കുറിച്ചു സൂക്ഷ്മജ്ഞാനമുള്ളവനത്രേ. സകല ഭക്ഷ്യവസ്തുക്കളും ഇസ്രാഈല്യര്‍ക്ക് അനുവദനീയമായിരുന്നു; തൗറാത്തിന്റെ അവതരണത്തിനു മുമ്പ് യഅ്ഖൂബ് നബി തന്റെ സ്വന്തത്തിന്നു നിഷിദ്ധമാക്കിയതൊഴികെ. താങ്കള്‍ പറയുക: നിങ്ങള്‍ സത്യവാദികളാണെങ്കില്‍ തൗറാത്ത് കൊണ്ടുവന്നു പാരായണം ചെയ്യുക!²¹
ഇങ്ങനെ സത്യം വ്യക്തമായതിനു ശേഷവും അല്ലാഹുവിന്റെ പേരില്‍ വ്യാജം കെട്ടിച്ചമക്കുന്നവരാരോ അവര്‍ തന്നെയാണ് അതിക്രമികള്‍.

നബിയേ, പ്രഖ്യാപിക്കുക: അല്ലാഹു സത്യം വ്യക്തമാക്കിയിരിക്കുന്നു. അതുകൊണ്ട് ഋജുമാനസനായ ഇബ്രാഹീം നബിയുടെ മാര്‍ഗം പിന്‍പറ്റുക; ബഹുദൈവാരാധകരുടെ കൂട്ടത്തിലല്ലായിരുന്നു അദ്ദേഹം. മാനവതയ്ക്കുവേണ്ടി സ്ഥാപിതമായ പ്രഥമ ആരാധനാഗേഹം ബക്കയിലുള്ളതാകുന്നു. അനുഗൃഹീതവും ലോകര്‍ക്ക് മാര്‍ഗദര്‍ശകവുമാണത്. സ്പഷ്ട ദൃഷ്ടാന്തങ്ങള്‍ അതിലുണ്ട്, വിശിഷ്യ ഇബ്രാഹീം മഖാം. അവിടെ ആരു പ്രവേശിക്കുന്നുവോ അവന്‍ നിര്‍ഭയനായി²²
ആ പുണ്യഗേഹത്തിലെത്താന്‍ കഴിവുള്ളയാളുകള്‍ അങ്ങോട്ടു തീര്‍ത്ഥാടനം നടത്തല്‍ അല്ലാഹുവിനോടുള്ള ബാധ്യതയാണ്. ആരെങ്കിലും അവിശ്വസിക്കുന്നുവെങ്കില്‍, അല്ലാഹു ലോകരില്‍ നിന്നൊക്കെ സ്വയം പര്യാപ്തനത്രേ.

നബിയേ, ചോദിക്കുക: ഹേ വേദക്കാരേ, നിങ്ങളെന്തിനാണ് അല്ലാഹുവിന്റെ ദൃഷ്ടാന്തങ്ങള്‍ നിഷേധിക്കുന്നത്? അവന്‍ നിങ്ങളുടെ ചെയ്തികള്‍ക്കൊക്കെ സാക്ഷിയത്രേ. വേദക്കാരേ, അല്ലാഹുവിന്റെ മാര്‍ഗത്തില്‍ നിന്ന്, അതിനെ വക്രീകരിക്കാന്‍ ശ്രമിച്ചുകൊണ്ട് നിങ്ങളെന്തിനു വിശ്വാസികളെ തടയുന്നു? വസ്തുതകള്‍ക്കു നിങ്ങള്‍ തന്നെ സാക്ഷികളാണല്ലോ. നിങ്ങളുടെ പ്രവൃത്തികളെക്കുറിച്ചൊന്നും അവന്‍ അശ്രദ്ധനല്ല തന്നെ. ഹേ സത്യവിശ്വാസികളേ, വേദം നല്‍കപ്പെട്ടവരില്‍ ഒരു സംഘത്തെ അനുസരിക്കുന്നുവെങ്കില്‍, വിശ്വാസികളായിക്കഴിഞ്ഞ ശേഷം നിങ്ങളെയവര്‍ സത്യനിഷേധികളാക്കി മാറ്റുന്നതാണ്. അല്ലാഹുവിന്റെ സൂക്തങ്ങള്‍ നിങ്ങള്‍ക്ക് പാരായണം ചെയ്യപ്പെട്ടുകൊണ്ടിരിക്കവെ, റസൂല്‍ നിങ്ങളിലുണ്ടായിരിക്കവെ എങ്ങനെ നിങ്ങള്‍ അവിശ്വസിക്കും? അല്ലാഹുവിനെ ആരു മുറുകെപ്പിടിക്കുന്നുവോ അവന്‍ ഋജുവായ പന്ഥാവിലേക്ക് മാര്‍ഗദര്‍ശനം ചെയ്യപ്പെട്ടിരിക്കുന്നു.

ഹേ സത്യവിശ്വാസികളേ, നിങ്ങള്‍ അല്ലാഹുവിനെ യഥാവിധി സൂക്ഷിക്കുക; മുസ്‌ലിംകളായല്ലാതെ മരിച്ചു പോകരുത്. അല്ലാഹുവിന്റെ പാശം ഒന്നിച്ചു മുറുകെ പിടിക്കുക, ഭിന്നിക്കരുത്. പരസ്പര ശത്രുക്കളായിരുന്നപ്പോള്‍ നിങ്ങള്‍ക്കു അല്ലാഹു ചെയ്തു തന്ന അനുഗ്രഹം സ്മരിക്കുക. നിങ്ങളുടെ മനസ്സുകളവന്‍ യോജിപ്പിക്കുകയും അങ്ങനെ ദിവ്യാനുഗ്രഹത്താല്‍ നിങ്ങള്‍ സഹോദരങ്ങളാവുകയും ചെയ്തു. നരകക്കുണ്ടിന്റെ വക്കിലായിരുന്നിട്ടും നിങ്ങളെയവന്‍ രക്ഷപ്പെടുത്തി. ഇപ്രകാരമവന്‍ തന്റെ ദൃഷ്ടാന്തങ്ങള്‍ നിങ്ങള്‍ക്കു സന്മാര്‍ഗപ്രാപ്തിക്കായി വിശദീകരിച്ചു തരികയാണ്. നന്മയിലേക്കു ക്ഷണിക്കുകയും സല്‍ക്കര്‍മങ്ങള്‍ കല്‍പിക്കുകയും ദുഷ്‌കര്‍മങ്ങള്‍ നിരോധിക്കുകയും ചെയ്യുന്ന ഒരു വിഭാഗം നിങ്ങളില്‍ നിന്നുണ്ടാകണം. അവര്‍ തന്നെയാണു വിജയികള്‍. പ്രസ്പഷ്ട ദൃഷ്ടാന്തങ്ങള്‍ വന്നുകിട്ടിയിട്ടും ഭിന്നാഭിപ്രായക്കാരും വ്യത്യസ്തകക്ഷികളുമായവരെപ്പോലെ²³
നിങ്ങളാകരുത്. ചില മുഖങ്ങള്‍ കറുക്കുകയും മറ്റു ചിലത് വെളുക്കുകയും ചെയ്യുന്ന ദിവസം അവര്‍ക്കു വേദനയുറ്റ ശിക്ഷയുണ്ട്. മുഖം കറുത്തവരോട് ഇങ്ങനെ പറയപ്പെടുന്നതാണ്: 'സത്യവിശ്വാസം പുല്കിയതിന്നു ശേഷം നിങ്ങള്‍ നിഷേധികളായില്ലേ? അതുകൊണ്ട് ആ അവിശ്വാസം കാരണമായി ശിക്ഷ ആസ്വദിച്ചുകൊള്ളുക'! മുഖം വെളുത്തവരാകട്ടെ, അല്ലാഹുവിന്റെ മഹത്തായ അനുഗ്രഹത്തിലായിരിക്കും, അവരതില്‍ ശാശ്വതരത്രേ.

ഇതെല്ലാം അല്ലാഹുവിന്റെ ദൃഷ്ടാന്തങ്ങളാകുന്നു; സത്യസന്ധമായി താങ്കള്‍ക്കവ നാം പാരായണം ചെയ്തുതരികയാണ്. സൃഷ്ടികളോട് ദ്രോഹം ചെയ്യാന്‍ അവനുദ്ദേശിക്കുന്നില്ല. ഭുവന-വാനങ്ങളിലുള്ളതൊക്കെ അവന്റേതത്രേ. കാര്യങ്ങളെല്ലാം മടക്കപ്പെടുക അവങ്കലേക്കാകുന്നു. നിങ്ങള്‍ മാനവതക്കു വേണ്ടി ഉയിര്‍ത്തെഴുന്നേല്‍പിക്കപ്പെട്ട ഉത്തമ ജനവിഭാഗമത്രേ. നന്മ കല്‍പിക്കുകയും തിന്മനിരോധിക്കുകയും അല്ലാഹുവില്‍ വിശ്വസിക്കുകയും വേണം നിങ്ങള്‍. വേദക്കാര്‍ സത്യവിശ്വാസം കൈക്കൊള്ളുന്നുവെങ്കില്‍ അവര്‍ക്കത് ഉദാത്തമായേനെ. അവരില്‍ വിശ്വാസികള്‍ ഉണ്ട്, എന്നാല്‍ മിക്കവരും അധര്‍മികളത്രേ. ചില്ലറ ശല്യങ്ങളേല്‍പിക്കുകയെന്നല്ലാതെ നിങ്ങളെ ഉപദ്രവിക്കുകയൊന്നുമില്ല അവര്‍. നിങ്ങളോടേറ്റു മുട്ടുകയാണെങ്കില്‍ അവര്‍ പിന്തിരിഞ്ഞോടുക തന്നെ ചെയ്യും; പിന്നീട് ഒരുവിധ സഹായവും അവര്‍ക്കു ലഭ്യമാവുകയില്ല.

എവിടെയാണുള്ളതെങ്കിലും ഹീനത്വം അവരില്‍ മുദ്രണം ചെയ്യപ്പെട്ടിരിക്കുന്നു. അല്ലാഹുവിങ്കലും ജനങ്ങളിലും നിന്നുള്ള പിടികയറില്ലാതെ അവര്‍ക്കു ഗത്യന്തരമില്ല. അല്ലാഹുവിന്റെ ക്രോധവും കൊണ്ടവര്‍ തെറിച്ചു പോയിരിക്കയാണ്. പതിത്വവും അവരിലടിച്ചേല്‍പിക്കപ്പെട്ടിട്ടുണ്ട്. അവര്‍ ദൈവിക ദൃഷ്ടാന്തങ്ങള്‍ നിഷേധിക്കുകയും യാതൊരു ന്യായീകരണവുമില്ലാതെ പ്രവാചകന്മാരെ കൊല്ലുകയും ചെയ്തിരുന്നതിനാലും അനുസരണരാഹിത്യവും അതിക്രമവും കാട്ടിയതിനാലുമാണത്. വേദക്കാര്‍ എല്ലാവരും തുല്യരല്ല-നിശയുടെ യാമങ്ങളില്‍ നമസ്‌കരിച്ചുകൊണ്ട് ദിവ്യസൂക്തങ്ങളോതുന്ന ഋജുമാനസരായൊരു കൂട്ടരും അവരിലുണ്ട്. അല്ലാഹുവിലും അന്ത്യനാളിലും വിശ്വസിക്കുകയും നന്മ കല്‍പിക്കുകയും തിന്മ നിരോധിക്കുകയും പുണ്യകര്‍മങ്ങളില്‍ അഹമഹമികയാ മുന്നോട്ടുവരികയും ചെയ്യും അവര്‍. ആ വിഭാഗക്കാര്‍ സദ്‌വൃത്തരില്‍ പെട്ടവരത്രേ²⁴
എന്തു നന്മയനുവര്‍ത്തിക്കുന്നുവെങ്കിലും അവര്‍ക്കത് നിഷേധിക്കപ്പെടുകയില്ല. ജീവിതത്തില്‍ സൂക്ഷ്മത പുലര്‍ത്തുന്നവരെക്കുറിച്ച് അല്ലാഹു നന്നായി അറിയുന്നവനത്രേ.

തങ്ങളുടെ സമ്പത്തുക്കളോ സന്താനങ്ങളോ സത്യനിഷേധികള്‍ക്ക് അല്ലാഹുവിങ്കല്‍ യാതൊരുപകാരവും ചെയ്യില്ല. നരകാവകാശികളാണവര്‍. അതിലവര്‍ ശാശ്വതവാസികളായിരിക്കും. അവര്‍ ഈ ഭൗതിക ലോകത്ത് ചെലവഴിക്കുന്ന ധനത്തിന്റെ ഉപമ കഠിനശൈത്യമുള്ള ഒരു കാറ്റുപോലെയാണ്; ഒരു കൂട്ടം ആത്മദ്രോഹികളുടെ കൃഷിയിടത്തിലത് ആഞ്ഞടിച്ചു നശിപ്പിച്ചു. അല്ലാഹു അവരോട് അക്രമം കാണിച്ചിട്ടില്ല; പ്രത്യുത അവര്‍ സ്വന്തത്തോടു തന്നെ ദ്രോഹം ചെയ്യുകയായിരുന്നു. ഹേ സത്യവിശ്വാസികളേ, അന്യരെയാരെയും നിങ്ങളുടെ രഹസ്യങ്ങളറിയുന്ന സ്വന്തക്കാരാക്കരുത്. നിങ്ങള്‍ക്കാപത്തുണ്ടാക്കുന്നതില്‍ ഒരു കുറവും അവര്‍ വരുത്തുകയില്ല. അവര്‍ക്കിഷ്ടം നിങ്ങളുടെ കഷ്ടപ്പാടാണ്; അവരുടെ വായയിലൂടെ കഠിനവിദ്വേഷം പ്രകടമായിട്ടുണ്ട്, മനസ്സിലുള്ളത് അതിനെക്കാള്‍ രൂക്ഷമാണ്.²⁵
നാമിതാ നിങ്ങള്‍ക്കു തെളിവുകള്‍ പ്രതിപാദിച്ചിരിക്കുന്നു; നിങ്ങള്‍ ചിന്തിച്ചു ഗ്രഹിക്കുന്നവരാണെങ്കില്‍!

അവസ്ഥ നോക്കൂ: നിങ്ങള്‍ അവരെ സ്‌നേഹിക്കുന്നു; അവരാകട്ടെ നിങ്ങളെ സ്‌നേഹിക്കുന്നില്ല. നിങ്ങള്‍ മുഴു വേദങ്ങളിലും വിശ്വസിക്കുന്നുമുണ്ട്.²⁶
നിങ്ങളെ അഭിമുഖീകരിക്കുമ്പോള്‍ 'ഞങ്ങളും വിശ്വസിച്ചിരിക്കുന്നു' എന്നവര്‍ തട്ടിവിടും; ഒറ്റക്കാകുമ്പോഴോ, നിങ്ങളോടുള്ള കഠിനരോഷം മൂലം വിരല്‍ കടിക്കയാണവര്‍. നബിയേ, പറയുക: നിങ്ങളുടെ രോഷവുമായിത്തുലഞ്ഞുകൊള്ളുക! മനസ്സുകളിലുള്ളത് അല്ലാഹു നന്നായറിയുന്നവനത്രേ. നിങ്ങള്‍ക്കെന്തെങ്കിലും നന്മ കിട്ടുമ്പോള്‍ അതവര്‍ക്കു വിഷമമുണ്ടാക്കും, തിന്മയുണ്ടാകുമ്പോള്‍ അവരതില്‍ സന്തോഷിക്കുകയും ചെയ്യും. ക്ഷമകൈക്കൊള്ളുകയും സൂക്ഷ്മത പുലര്‍ത്തുകയും ചെയ്യുന്നുവെങ്കില്‍ നിങ്ങള്‍ക്ക് അവരുടെ കുതന്ത്രങ്ങള്‍ ഒരു ദോഷവും ഉണ്ടാക്കില്ല. അവരുടെ ചെയ്തികളെക്കുറിച്ച സമഗ്രജ്ഞാനിയത്രേ അല്ലാഹു.

നബിയേ, അങ്ങ് രാവിലെ വീട്ടില്‍ നിന്നിറങ്ങി ഉഹുദ് യുദ്ധത്തിനുവേണ്ടി മര്‍മസ്ഥാനങ്ങളില്‍ സത്യവിശ്വാസികളെ വിന്യസിച്ച ഘട്ടം സ്മരിക്കുക. കാര്യങ്ങള്‍ നന്നായി കേള്‍ക്കുന്നവനും അറിയുന്നവനുമാണ് അല്ലാഹു. നിങ്ങളിലുള്ള രണ്ടു സംഘം-അല്ലാഹു അവരുടെ സംരക്ഷകനായിരിക്കെ-ഭയപ്പെട്ടു പിന്മാറാനാലോചിച്ച സന്ദര്‍ഭവും സ്മരണീയമാണ്.²⁷
സത്യവിശ്വാസികള്‍ അല്ലാഹുവിങ്കല്‍ ഭരമേല്‍പിച്ചുകൊള്ളട്ടെ. നിങ്ങള്‍ ബലഹീനരായിരിക്കെ ബദ്‌റിലും അല്ലാഹു നിങ്ങളെ സഹായിക്കുക തന്നെ ചെയ്തു. അതിനാല്‍ കൃതജ്ഞരായിരിക്കാനായി അവനെ സൂക്ഷിക്കുക. മൂവായിരം മലക്കുകളെയിറക്കി നാഥന്‍ സഹായിക്കുകയെന്നത് നിങ്ങള്‍ക്കു മതിയാവില്ലേ എന്നു വിശ്വാസികളോട് അങ്ങു ചോദിച്ച സന്ദര്‍ഭം സ്മര്‍ത്തവ്യമത്രേ. അല്ലാഹു അരുളി: അതെ, നിങ്ങള്‍ ക്ഷമയും സൂക്ഷ്മതയും പാലിക്കുകയും ശത്രുക്കള്‍ തല്‍ക്ഷണം വന്നെത്തുകയുമാണെങ്കില്‍ വ്യതിരിക്തലക്ഷണമുള്ള അയ്യായിരം മലക്കുകള്‍ മുഖേന നാഥന്‍ നിങ്ങള്‍ക്കു പിന്‍ബലമേകുന്നതാണ്.²⁸

അല്ലാഹു ആ സഹായം ഏര്‍പെടുത്തിയത് നിങ്ങള്‍ക്ക് ശുഭകരമായും മനഃസമാധാനത്തിനു വേണ്ടിയുമാണ്;-പ്രതാപശാലിയും യുക്തിമാനുമായ അവങ്കല്‍ നിന്നു മാത്രമാണു സഹായം- നിഷേധികളിലൊരു സംഘത്തെ നശിപ്പിക്കാനോ നിന്ദ്യരാക്കാനോ വേണ്ടിയും. അപ്പോഴവര്‍ തോറ്റു പിന്തിരിഞ്ഞു പോകും. നബിയേ, കാര്യങ്ങളില്‍ ഒരധികാരവും താങ്കള്‍ക്കില്ല; അവര്‍ പശ്ചാത്തപിച്ച് അല്ലാഹുവത് സ്വീകരിക്കുകയോ അതിക്രമികളായതു കൊണ്ട് ശിക്ഷിക്കുകയോ ചെയ്യുന്നതുവരെ.²⁹
ഭുവന-വാനങ്ങളിലുള്ളതെല്ലാം അല്ലാഹുവിന്റേതാണ്. താനുദ്ദേശിക്കുന്നവര്‍ക്ക് അവന്‍ പാപമോചനം നല്‍കുകയും ഉദ്ദേശിക്കുന്നവരെ ശിക്ഷിക്കുകയും ചെയ്യുന്നു. ഏറെ പൊറുക്കുന്നവനും കരുണാമയനുമാണവന്‍.

സത്യവിശ്വാസികളേ, മേല്‍ക്കുമേല്‍ ഇരട്ടിയായി നിങ്ങള്‍ പലിശ തിന്നരുത്; വിജയം വരിക്കേണ്ടതിനു അല്ലാഹുവിനെ സൂക്ഷിക്കുക; നിഷേധികള്‍ക്കായി സജ്ജീകൃതമായ നരകം പേടിക്കുക; അല്ലാഹുവിനെയും റസൂലിനെയും അനുസരിക്കുക-നിങ്ങള്‍ കരുണ ചെയ്യപ്പെട്ടേക്കാം. നാഥങ്കല്‍ നിന്നുള്ള പാപമോചനത്തിലേക്കും ഭുവന-വാനങ്ങളുടെ വിസ്തൃതിയുള്ള സ്വര്‍ഗത്തിലേക്കും അതിദ്രുതം ചെല്ലുക; സന്തോഷാവസ്ഥയിലും സന്താപഘട്ടത്തിലും ധനം ചെലവഴിക്കുകയും ക്രോധം ഒതുക്കുകയും ജനങ്ങള്‍ക്ക് മാപ്പരുളുകയും ചെയ്യുന്ന സൂക്ഷ്മാലുക്കള്‍ക്കായി സജ്ജീകൃതമാണത്. പുണ്യവാന്മാരെ അല്ലാഹു സ്‌നേഹിക്കുന്നു. എന്തെങ്കിലും ഹീനകൃത്യം പ്രവര്‍ത്തിക്കുകയോ ആത്മദ്രോഹമനുവര്‍ത്തിക്കുകയോ ചെയ്താല്‍ അവര്‍ അല്ലാഹുവിനെയോര്‍ക്കുകയും പാപമോചനമര്‍ത്ഥിക്കുകയും ചെയ്യും-അവനല്ലാതെയാരുണ്ട് ദോഷങ്ങള്‍ പൊറുക്കാന്‍? അറിഞ്ഞു കൊണ്ടവര്‍ സ്വന്തം ദുഷ്‌ചെയ്തികളില്‍ ഉറച്ചു നില്‍ക്കില്ല. രക്ഷിതാവിങ്കല്‍ നിന്നുള്ള പാപമുക്തിയും, അടിയിലൂടെ അരുവികളൊഴുകുന്ന സ്വര്‍ഗീയാരാമങ്ങളുമാണ് അത്തരക്കാരുടെ പ്രതിഫലം. അവരതില്‍ ശാശ്വതരത്രേ. സല്‍കര്‍മനിരതരുടെ കൂലി എത്ര ഉദാത്തം!

വിവിധ ദൈവിക നടപടിച്ചട്ടങ്ങള്‍ നിങ്ങള്‍ക്കു മുമ്പും കഴിഞ്ഞുപോയിട്ടുണ്ട്. അതുകൊണ്ട് ഭൂമിയില്‍ യാത്ര ചെയ്ത് നിഷേധികളുടെ പരിണതി എങ്ങനെയുണ്ടായിരുന്നുവെന്നു നോക്കിക്കാണുക. മാനവതക്കുള്ള വ്യക്തമായ ഒരു പ്രതിപാദനവും സൂക്ഷ്മാലുക്കള്‍ക്കുള്ള മാര്‍ഗദര്‍ശനവും ഉപദേശവുമാണ് ഈ ഖുര്‍ആന്‍. നിങ്ങള്‍ ദുര്‍ബലരോ ദുഃഖിതരോ ആകരുത്; സത്യവിശ്വാസികളാണെങ്കില്‍ നിങ്ങള്‍ തന്നെയാണ് അത്യുന്നതന്മാര്‍. ഉഹുദില്‍ നിങ്ങള്‍ക്കു ദുരിതം ബാധിച്ചുവെങ്കില്‍ അതുപോലെ മുമ്പ് ബദ്‌റില്‍ അക്കൂട്ടര്‍ക്കും ദുരന്തമേല്‍ക്കുകയുണ്ടായി. ആ യുദ്ധനാളുകള്‍ ആളുകള്‍ക്ക് മാറിമാറി നല്‍കുകയാണു നാം; വിശ്വാസികളെ അല്ലാഹു സ്പഷ്ട ലക്ഷണങ്ങളിലൂടെയറിയാനും നിങ്ങളില്‍ നിന്ന് വിശ്വാസികളെ ശുദ്ധീകരിക്കാനും നിഷേധികളെ നശിപ്പിക്കാനും രക്തസാക്ഷികളെയുണ്ടാക്കാനും വേണ്ടി.³⁰
അതിക്രമകാരികളെ അവന്‍ സ്‌നേഹിക്കുകയില്ല.

അതല്ല, രണാങ്കണത്തില്‍ വെച്ച് പൊരുതിയവരെയും ക്ഷമാപൂര്‍വം ഉറച്ചു നിന്നവരെയും അല്ലാഹു പ്രത്യക്ഷീഭവിച്ചറിയാതെ സ്വര്‍ഗത്തില്‍ കടന്നുകളയാമെന്നു നിങ്ങള്‍ വിചാരിക്കുന്നുണ്ടോ? രണാങ്കണത്തില്‍ മൃത്യുവിനെ കണ്ടുമുട്ടും മുമ്പ്, മരിക്കാന്‍ കൊതിച്ചിരുന്നതാണു നിങ്ങള്‍. ഇപ്പോള്‍, നോക്കി നില്‍ക്കെത്തന്നെ നിങ്ങളത് കാണുകയുണ്ടായി³¹
മുഹമ്മദ് നബി അല്ലാഹുവിന്റെ ഒരു ദൂതന്‍ മാത്രമാണ്; പല ദൂതന്മാരും മുമ്പ് കഴിഞ്ഞുപോയിട്ടുണ്ട്. നബി മരണപ്പെടുകയോ വധിക്കപ്പെടുകയോ ചെയ്തിട്ടുണ്ടെങ്കില്‍ തന്നെ പിന്തിരിയുകയാണോ നിങ്ങള്‍?! ആരെങ്കിലും പുറകോട്ടു പോകുന്നുവെങ്കില്‍ അല്ലാഹുവിന്ന് ഒരു ദ്രോഹവുമേല്‍പിക്കാന്‍ അവന്നാകില്ല. കൃതജ്ഞര്‍ക്ക് അല്ലാഹു മതിയായ പ്രതിഫലം നല്‍കുന്നതാണ്. അല്ലാഹുവിന്റെ അനുമതി പ്രകാരമല്ലാതെ ഒരു വ്യക്തിക്കും മരിക്കാനാകില്ല; നിര്‍ണിതാവധിയുള്ള ഒരു നിയമമാണത്. ഒരാള്‍ ഐഹിക പ്രതിഫലമാണുദ്ദേശിക്കുന്നതെങ്കില്‍ അതില്‍ നിന്നവന്ന് നാം നല്‍കും; ഇനിയവന്നു പരലോകത്തെ കൂലിയാണു ലക്ഷ്യമെങ്കില്‍ അതില്‍ നിന്നു നാമവനു കൊടുക്കുന്നതാണ്. നന്ദി പ്രകാശിപ്പിക്കുന്നവര്‍ക്ക് തക്ക പ്രതിഫലം നാം നല്‍കും.

എത്രയെത്ര നബിമാര്‍ കഴിഞ്ഞുപോയി. അവരൊന്നിച്ചു ധാരാളം ദൈവദാസന്മാര്‍ പടപൊരുതി! എന്നിട്ട് ദൈവമാര്‍ഗത്തില്‍ തങ്ങള്‍ക്കു നേരിട്ട കഷ്ടപ്പാടുകളൊന്നു കൊണ്ടും അവര്‍ ഭീരുക്കളായില്ല; ദുര്‍ബലരാവുകയോ കീഴടങ്ങുകയോ ചെയ്തില്ല. ക്ഷമാശീലരെ അല്ലാഹു സ്‌നേഹിക്കുന്നു. അവരുടെ പ്രാര്‍ത്ഥന ഇതുമാത്രമായിരുന്നു: 'നാഥാ, ഞങ്ങളുടെ പാപങ്ങളും സ്വന്തം കാര്യങ്ങളിലെ അതിര്‍ലംഘനങ്ങളും പൊറുത്തുതരേണമേ! ഞങ്ങളുടെ പാദങ്ങള്‍ അടിയുറപ്പിച്ചു നിറുത്തുകയും നിഷേധികള്‍ക്കെതിരെ സഹായമേകുകയും ചെയ്യേണമേ!' തന്മൂലം ഐഹിക ലോകത്തെ പ്രതിഫലവും പരലോകത്തെ ഉദാത്തമായ കൂലിയും അല്ലാഹു അവര്‍ക്കു കനിഞ്ഞേകി. അവന്‍ പുണ്യവാന്മാരെ സ്‌നേഹിക്കുന്നു.

സത്യവിശ്വാസികളേ, നിഷേധം വരിച്ചവരെ അനുസരിക്കുന്നുവെങ്കില്‍ നിങ്ങളെയവര്‍ പുറകോട്ടു കൊണ്ടുപോവുകയും അങ്ങനെ നിങ്ങള്‍ പരാജിതരായിത്തീരുകയും ചെയ്യുന്നതാണ്. അതല്ല വേണ്ടത്: അല്ലാഹുവാണ് നിങ്ങളുടെ രക്ഷകന്‍; സഹായികളില്‍ ഉദാത്തന്‍ അവനത്രേ. അല്ലാഹു യാതൊരു തെളിവും നല്‍കിയിട്ടില്ലാത്തവയെ അവന്റെ പങ്കാളികളാക്കിയതുമൂലം സത്യനിഷേധികളുടെ മനസ്സില്‍ നാം ഭയം നിക്ഷേപിക്കും. നരകമാണവരുടെ സങ്കേതം. അതിക്രമികളുടെ ആവാസകേന്ദ്രം എത്ര ഹീനം!

അല്ലാഹുവിന്റെ അനുമതിയോടെ ശത്രുക്കളെ വധിച്ചു കൊണ്ടിരുന്നപ്പോള്‍ നിങ്ങളോടുള്ള വാഗ്ദാനം അവന്‍ സത്യസന്ധമായി പാലിക്കുകയുണ്ടായി. എന്നാല്‍, പ്രിയംകരമായ വിജയം കാണിച്ചു തന്ന ശേഷം നിങ്ങള്‍ അനുസരണക്കേടു കാട്ടുകയും ഭീരുക്കളാവുകയും യുദ്ധ കാര്യത്തില്‍ ഭിന്നപക്ഷക്കാരാവുകയും ചെയ്തപ്പോള്‍ സ്ഥിതി മാറി-ദുന്‍യാവിനെ ലക്ഷ്യമാക്കുന്നവരും പരലോക മോക്ഷമുദ്ദേശിക്കുന്നവരും നിങ്ങളിലുണ്ട്-പിന്നീട് നിങ്ങളെ പരീക്ഷണാര്‍ത്ഥം അവന്‍ ശത്രുക്കളില്‍ നിന്നു പിന്തിരിപ്പിച്ചു. അവന്‍ നിങ്ങള്‍ക്കു മാപ്പരുളിയിരിക്കുന്നു. സത്യവിശ്വാസികളോട് ഉദാരനത്രേ അവന്‍. തിരുമേനി പുറകില്‍ നിന്നു വിളിക്കവെ, ആരെയും തിരിഞ്ഞുനോക്കാതെ യുദ്ധമുഖത്തു നിന്നു നിങ്ങള്‍ നിഷ്‌ക്രമിച്ച സന്ദര്‍ഭം സ്മരിക്കുക. അങ്ങനെ മേല്‍ക്കുമേല്‍ ദുഃഖം അല്ലാഹു നിങ്ങള്‍ക്കു പ്രതിഫലം തന്നു. വിജയം കൈവിട്ടതിലും വിപത്തേറ്റതിലും നിങ്ങള്‍ ഇനിയും ദുഃഖിക്കാതിരിക്കാനാണ് മാപ്പരുളിയത്. നിങ്ങളുടെ ചെയ്തികളെപ്പറ്റി സൂക്ഷ്മജ്ഞനാണ് അല്ലാഹു.³²

പിന്നീടവന്‍ ആ ദുഃഖത്തിനു ശേഷം നിങ്ങള്‍ക്കു സമാധാനം-ഒരു മയക്കം- തന്നു. അതു നിങ്ങളിലൊരു വിഭാഗത്തെ ആവരണം ചെയ്തു. മറുവിഭാഗമാകട്ടെ, വ്യാകുലചിത്തരാവുകയും അല്ലാഹുവിനെപ്പറ്റി സത്യവിരുദ്ധമായ ജാഹിലീ ധാരണകള്‍ വെച്ചുപുലര്‍ത്തുകയുമുണ്ടായി-നമുക്കു വല്ല ആധിപത്യവുമുണ്ടോ എന്നാണവര്‍ ചോദിക്കുന്നത്. നബിയേ, പ്രഖ്യാപിക്കുക: 'മുഴുകാര്യങ്ങളും അല്ലാഹുവിന്റെ അധീനത്തിലാകുന്നു.' താങ്കളോടു വെളിപ്പെടുത്താത്ത പലതും അവര്‍ മനസ്സിലൊളിപ്പിക്കുന്നുണ്ട്³³
യുദ്ധ വിഷയങ്ങളില്‍ എന്തെങ്കിലും സ്വാധീനമുണ്ടായിരുന്നുവെങ്കില്‍ ഇവിടെ വെച്ചു നാം വധിക്കപ്പെടുകയില്ലായിരുന്നു എന്നു പരിഭവിക്കയാണവര്‍. നബിയേ, പറയുക: നിങ്ങള്‍ സ്വഗൃഹങ്ങളിലായിരുന്നുവെങ്കില്‍ തന്നെ, മരണം വിധിക്കപ്പെട്ടു കഴിഞ്ഞിരുന്നയാളുകള്‍ തങ്ങളുടെ വധസ്ഥാനങ്ങളിലേക്ക് പുറപ്പെട്ടിരുന്നേനെ. അവന്‍ നിങ്ങളുടെ ഉള്ളിലിരിപ്പ് പരീക്ഷിക്കുവാനും മനസ്സുകളിലുള്ളത് ശുദ്ധീകരിക്കാനും വേണ്ടിയാണിങ്ങനെയെല്ലാം സംഭവിച്ചത്. നിങ്ങളുടെ മനോഗതങ്ങള്‍ നന്നായറിയുന്നവനാണ് അല്ലാഹു. ഇരുകക്ഷികള്‍ ഉഹുദില്‍ എറ്റുമുട്ടിയ ദിനം നിങ്ങളില്‍ നിന്നു പിന്തിരിഞ്ഞോടിയവരെ തങ്ങളുടെ ചില ദുഷ്‌ചെയ്തികള്‍ മൂലം പിശാച് വഴിതെറ്റിച്ചതാണ്. അല്ലാഹു അവര്‍ക്ക് മാപ്പരുളിയിരിക്കുന്നു. അവന്‍ ഏറെ പൊറുക്കുന്നവനും സഹിഷ്ണുവുമത്രേ.

വിശ്വാസികളേ, സത്യനിഷേധം കൈവരിക്കുകയും, തങ്ങളുടെ സഹോദരങ്ങള്‍ യാത്രയിലോ യുദ്ധത്തിലോ മരണം വരിച്ചാല്‍ 'ഞങ്ങളുടെയടുത്തായിരുന്നെങ്കിലവര്‍ മരിക്കുകയോ വധിക്കപ്പെടുകയോ ചെയ്യുമായിരുന്നില്ല' എന്നു തട്ടിവിടുകയും ചെയ്തവരെപ്പോലെ നിങ്ങളാകരുത്³⁴
അങ്ങനെയത് അവരുടെ മനസ്സുകളില്‍ അല്ലാഹു ഒരു ഖേദമാക്കി വെക്കുകയാണ്. അവനാണ് ജീവിപ്പിക്കുകയും മരിപ്പിക്കുകയും ചെയ്യുന്നത്. നിങ്ങള്‍ ചെയ്യുന്നതൊക്കെ അവന്‍ നന്നായി കാണുന്നവനാകുന്നു. നിങ്ങള്‍ ദൈവമാര്‍ഗത്തില്‍ വധിക്കപ്പെടുകയോ മരിക്കുകയോ ആണെങ്കില്‍ അവങ്കല്‍ നിന്നുള്ള പാപമോചനവും അനുഗ്രഹവുമാണ്, ആളുകള്‍ വാരിവലിച്ചു കൂട്ടുന്ന ഐഹിക വിഭവങ്ങളെക്കാള്‍ ഉത്തമം; വധിക്കപ്പെട്ടാലും മരിച്ചാലും അവങ്കലേക്കു തന്നെയാണ് ഒരുമിച്ചു കൂട്ടപ്പെടുക.

അല്ലാഹുവിങ്കല്‍ നിന്നുള്ള മഹത്തായ അനുഗ്രഹം കൊണ്ടാണ് താങ്കള്‍ക്ക് ജനങ്ങളോട് സൗമ്യ സമീപനത്തിന്നു കഴിയുന്നത്. അങ്ങ് പരുഷനും കഠിന ഹൃദയനുമായിരുന്നെങ്കില്‍ അവര്‍ താങ്കളുടെ ചുറ്റും നിന്നു പിരിഞ്ഞുപോയേനെ. അതുകൊണ്ട് അവര്‍ക്ക് മാപ്പുനല്‍കുകയും പാപമോചനമര്‍ത്ഥിക്കുകയും കാര്യങ്ങള്‍ അവരുമായി കൂടിയാലോചന നടത്തുകയും ചെയ്യുക. ഒരു തീരുമാനം എടുത്തുകഴിഞ്ഞാല്‍ അല്ലാഹുവില്‍ ഭരമേല്‍പിക്കണം. തന്നില്‍ ഭരമേല്‍പിക്കുന്നവരെ അവന്‍ സ്‌നേഹിക്കുന്നു. അവന്‍ സഹായിക്കുന്നുവെങ്കില്‍ പിന്നെ നിങ്ങളെ അതിജയിക്കുന്ന ഒരാളുമില്ല. ഇനി, അവന്‍ ഹീനരാക്കുന്നുവെങ്കില്‍ പിന്നെ നിങ്ങളെ അവനല്ലാതെ ആരു സഹായിക്കും? സത്യവിശ്വാസികള്‍ അല്ലാഹുവിന്റെ മേല്‍ ഭരമേല്‍പിച്ചു കൊള്ളട്ടെ. ഏതൊരു പ്രവാചകനും എന്തെങ്കിലും വഞ്ചിക്കുക എന്നത് അസംഭവ്യമാണ്.³⁵
ആരൊരാള്‍ വഞ്ചിച്ചെടുക്കുന്നുവോ, ആ തൊണ്ടി സാധനവുമായി അന്ത്യനാളിലവന്‍ സന്നിഹിതനാകും. അനന്തരം ഓരോരുത്തര്‍ക്കും താനനുവര്‍ത്തിച്ച കര്‍മത്തിന്റെ ഫലം പൂര്‍ണമായി നല്‍കപ്പെടും; യാതൊരു നീതികേടും അവരോടു കാണിക്കപ്പെടില്ല. അല്ലാഹുവിന്റെ ക്രോധവുമായി തെറിച്ചു പോവുകയും നരകം-അതെത്ര ഹീനഗേഹം!- സങ്കേതമാവുകയും ചെയ്തവനെപ്പോലെയാണോ അവന്റെ സംതൃപ്തി അനുധാവനം ചെയ്തവന്‍? അല്ലാഹുവിന്റെയടുത്ത് ഭിന്ന പദവിക്കാരാണവര്‍. അവരുടെ ചെയ്തികളെപ്പറ്റി അവന്‍ സൂക്ഷ്മജ്ഞാനിയാകുന്നു.

സ്വന്തത്തില്‍ നിന്നു തന്നെ ഒരു റസൂലിനെ വിശ്വാസികള്‍ക്ക് നിയോഗിക്കുക വഴി വലിയ അനുഗ്രഹമാണവര്‍ക്ക് അല്ലാഹു ചെയ്തത്. അവര്‍ക്ക് അവിടന്ന് അവന്റെ ആയത്തുകള്‍ ഓതിക്കൊടുക്കുകയും സംസ്‌കാരമുണ്ടാക്കുകയും ഗ്രന്ഥവും വിജ്ഞാനവും പഠിപ്പിക്കുകയും ചെയ്യുന്നു. അതിനു മുമ്പ് വ്യക്തമായ ദുര്‍മാര്‍ഗത്തില്‍ തന്നെയായിരുന്നു അവര്‍. ഉഹുദില്‍ നിങ്ങള്‍ക്കൊരു ദുരന്തമുണ്ടായപ്പോള്‍-അതിന്റെയിരട്ടി നിങ്ങളവര്‍ക്ക് ബദ്‌റില്‍ വരുത്തിയിരുന്നു-'ഇതെങ്ങനെ സംഭവിച്ചു' എന്നതിശയം കൂറുകയാണോ നിങ്ങള്‍? പറയുക: 'നിങ്ങളുടെ പക്കല്‍ നിന്നു തന്നെയാണിതുണ്ടായത്!' അല്ലാഹു എല്ലാ കാര്യങ്ങള്‍ക്കും കഴിവുറ്റവനത്രേ. ആ രണ്ടു കക്ഷികള്‍ ഏറ്റുമുട്ടിയ ദിവസം നിങ്ങള്‍ക്കുണ്ടായ ദുരന്തം അല്ലാഹുവിന്റെ വിധിയനുസരിച്ചും സത്യവിശ്വാസികളെയും കപടന്മാരെയും അവന്‍ പ്രത്യക്ഷീഭവിച്ചറിയുന്നതിന്നുമായിരുന്നു. 'നിങ്ങള്‍ വന്ന് ദൈവ സരണിയില്‍ യുദ്ധം ചെയ്യുകയോ ശത്രുവിനെ ചെറുത്തുനില്‍ക്കുകയെങ്കിലുമോ ചെയ്യൂ' എന്നാവശ്യപ്പെട്ടാല്‍, യുദ്ധമുണ്ടാകുമെന്നുറപ്പുണ്ടായിരുന്നെങ്കില്‍ നിങ്ങളൊന്നിച്ച് ഞങ്ങളും വന്നേനെ എന്നവര്‍ തട്ടിവിടും.³⁶
വിശ്വാസത്തേക്കാളേറെ അവര്‍ക്ക് സത്യനിഷേധത്തോടായിരുന്നു ഏറ്റമടുപ്പം. മനസ്സിലുള്ളതല്ല വായകൊണ്ടവര്‍ പറയുന്നത്. അവര്‍ മറച്ചുവെക്കുന്നത് അല്ലാഹു നന്നായറിയും. സ്വഗൃഹങ്ങളിലിരിക്കുകയും അടരാടാന്‍ പോയ കൂട്ടുകാരെപ്പറ്റി 'ഞങ്ങളെയനുസരിച്ചിരുന്നെങ്കില്‍ അവര്‍ വധിക്കപ്പെടില്ലായിരുന്നു' എന്നു ജല്‍പിക്കുകയും ചെയ്യുന്നവരാണ് കപടന്മാര്‍. താങ്കള്‍ അവരോടു പറയുക: നിങ്ങള്‍ സത്യവാദികളാണെങ്കില്‍ സ്വശരീരത്തില്‍ നിന്നു മരണത്തെ പ്രതിരോധിച്ചു നിറുത്തുക!

അല്ലാഹുവിന്റെ മാര്‍ഗത്തില്‍ കൊല്ലപ്പെട്ടവരെപ്പറ്റി മരിച്ചവരാണെന്നു നിങ്ങള്‍ വിചാരിക്കരുത്; തങ്ങളുടെ നാഥങ്കല്‍ ജീവിച്ചിരിക്കുന്നവരും ഭക്ഷണം നല്‍കപ്പെടുന്നവരും തന്റെ ഔദാര്യത്തില്‍ നിന്നു അല്ലാഹു നല്‍കിയതില്‍ സന്തോഷിച്ചു കൊണ്ടിരിക്കുന്നവരുമാണവര്‍. തങ്ങളൊന്നിച്ചു വന്നുചേരാത്തവരും തങ്ങളുടെ പിന്നില്‍ ഭൗതികലോകത്തുള്ളവരുമായ കൂട്ടുകാരെപ്പറ്റി 'അവര്‍ക്ക് ഭയപ്പെടാനോ ദുഃഖിക്കാനോ ഒട്ടുമില്ലെ'ന്നോര്‍ത്ത് ഇവര്‍ സായൂജ്യമടയുകയാണ്. അല്ലാഹു സത്യവിശ്വാസികളുടെ പ്രതിഫലം പാഴാക്കുകയില്ല എന്നതിലും അവങ്കല്‍ നിന്നുള്ള അനുഗ്രഹവും ഔദാര്യവും ലഭിക്കുന്നതിനാലും ആനന്ദം കൊള്ളുകയാണവര്‍.³⁷

ഉഹുദില്‍ പരിക്കേറ്റ ശേഷവും അല്ലാഹുവിന്നും റസൂലിന്നും ഉത്തരം ചെയ്തവര്‍ ആരോ, അവരില്‍ സൂക്ഷ്മജീവിതം നയിക്കുകയും പുണ്യമനുവര്‍ത്തിക്കുകയും ചെയ്തവര്‍ക്ക് മഹത്തായ പ്രതിഫലമുണ്ട്. 'ആളുകള്‍ നിങ്ങളെ നേരിടാന്‍ സൈന്യശേഖരണം നടത്തിയിരിക്കുന്നു, അതിനാല്‍ അവരെ പേടിക്കണം' എന്നു ചിലര്‍ പ്രചരിപ്പിച്ചപ്പോള്‍ വിശ്വാസം വര്‍ധമാനമാവുകയും 'ഞങ്ങള്‍ക്കു പടച്ചവന്‍ മതി, കാര്യങ്ങള്‍ ഭരമേല്‍പിക്കാന്‍ അവനാണുത്തമന്‍' എന്നു പ്രതികരിക്കുകയും ചെയ്തവരാണവര്‍. അങ്ങനെ അവങ്കല്‍ നിന്നുള്ള അനുഗ്രഹവും ഔദാര്യവുമായി, യാതൊരു ദൂഷ്യവും സ്പര്‍ശിക്കാതെ അവര്‍ തിരിച്ചെത്തുകയും അവന്റെ സംതൃപ്തി അവരനുധാവനം ചെയ്യുകയുമുണ്ടായി³⁸
അല്ലാഹു ഏറെ ഔദാര്യനത്രേ. ആ സൂത്രധാരകന്‍ പിശാചാകുന്നു; തന്റെ മിത്രങ്ങളെപ്പറ്റി നിങ്ങളെയവന്‍ ഭീഷണിപ്പെടുത്തുകയാണ്; അതിനാല്‍ അവരെ പേടിക്കരുത്; എന്നെ ഭയപ്പെടുക-നിങ്ങള്‍ സത്യവിശ്വാസികളാണെങ്കില്‍.

സത്യനിഷേധത്തിലേക്ക് കൂപ്പുകുത്തുന്നവര്‍ താങ്കളെ വ്യാകുലപ്പെടുത്തിക്കളയരുത്; അല്ലാഹുവിന്ന് ഒരു ദ്രോഹവുമേല്‍പിക്കാന്‍ അവര്‍ക്കാവില്ല തന്നെ. പരലോകത്ത് അവര്‍ക്കൊരു വിഹിതവും നല്‍കരുതെന്നാണ് അവന്റെയുദ്ദേശ്യം. കഠിന ശിക്ഷയാണവര്‍ക്കുണ്ടാവുക. വിശ്വാസം വിറ്റു നിഷേധം കൊണ്ടവര്‍ക്ക് അല്ലാഹുവിനെ ഒട്ടുമേ ദ്രോഹിക്കാനാകില്ല. വേദനാജനകമായ ശിക്ഷയാണവര്‍ക്കുണ്ടാവുക. നാം അവധി നീട്ടിക്കൊടുക്കുന്നു എന്നത് തങ്ങളുടെ നന്മക്കാണെന്നു സത്യനിഷേധികള്‍ ധരിക്കാതിരിക്കട്ടെ. ദോഷങ്ങള്‍ വര്‍ധിപ്പിക്കാനായി മാത്രമാണ് നാമവര്‍ക്ക് സമയം ദീര്‍ഘിപ്പിച്ചു നല്‍കുന്നത്. അവര്‍ക്ക് അപമാനകരമായ ശിക്ഷയുണ്ട്³⁹

നിങ്ങളുടെ വര്‍ത്തമാനകാലാവസ്ഥയില്‍-നല്ലതില്‍ നിന്നു ദുഷിച്ചതിനെ വേര്‍തിരിക്കുംവരെ-സത്യവിശ്വാസികളെ അല്ലാഹു വിടുകയില്ല. അദൃശ്യങ്ങള്‍ നിങ്ങള്‍ക്കവന്‍ വെളിപ്പെടുത്തുക എന്നതും സംഭവിക്കില്ല. എങ്കിലും തന്റെ ദൂതരില്‍ നിന്നു ഉദ്ദേശിക്കുന്നവരെ അവന്‍ പ്രത്യേകം തെരഞ്ഞെടുക്കുന്നു. അതിനാല്‍ അവനിലും ദൂതന്മാരിലും വിശ്വാസമര്‍പ്പിക്കുക. നിങ്ങള്‍ സത്യവിശ്വാസികളാവുകയും സൂക്ഷ്മതപാലിക്കുകയും ചെയ്യുന്നുവെങ്കില്‍ മഹത്തായ പ്രതിഫലമുണ്ടായിരിക്കും. തന്റെ ഔദാര്യത്തില്‍ നിന്നു അല്ലാഹു നല്‍കിയതില്‍ പിശുക്കു കാണിക്കുന്നവര്‍ അതു ഗുണകരമാണെന്നു ധരിച്ചു പോകാതിരിക്കട്ടെ; പ്രത്യുത വമ്പിച്ച ദോഷമാണത്. ആ ലുബ്ധിച്ച വസ്തു അന്ത്യനാളിലവര്‍ക്ക് കണ്ഠാഭരണമായി ചാര്‍ത്തപ്പെടും⁴⁰
ഭുവന-വാനങ്ങളുടെ അനന്തരാവകാശം അല്ലാഹുവിന്നു മാത്രമാണ്. നിങ്ങളുടെ ചെയ്തികള്‍ സൂക്ഷ്മമായറിയുന്നവനാണവന്‍.

ഞങ്ങള്‍ സമ്പന്നരും അല്ലാഹു ദരിദ്രനുമാണ് എന്നു ജല്‍പിച്ചവരുടെ പ്രസ്താവം അവന്‍ കേള്‍ക്കുക തന്നെ ചെയ്തിരിക്കുന്നു⁴¹
അവര്‍ ആ ജല്‍പിച്ചതും ന്യായരഹിതമായി പ്രവാചകരെ കൊന്നു കളഞ്ഞതും നാം രേഖപ്പെടുത്തും; 'കത്തിജ്ജ്വലിക്കുന്ന നരകശിക്ഷ നിങ്ങളാസ്വദിച്ചു കൊള്ളുക' എന്നു നാം ഉത്തരവിടുന്നതാണ്. നിങ്ങളുടെ സ്വന്തം കരങ്ങള്‍ പ്രവര്‍ത്തിച്ചതിന്‍ ഫലമായാണത്. അല്ലാഹു തന്റെ അടിമകളോട് ഒട്ടുമേ അനീതി ചെയ്യില്ല. 'ഒരു ബലിയര്‍പ്പിച്ചു കാണിച്ച് അതിനെ ഒരു വാനാഗ്നി വിഴുങ്ങിയാലല്ലാതെ ഒരു റസൂലിനെയും വിശ്വസിക്കേണ്ട' എന്നു അല്ലാഹു ഞങ്ങളോടു കല്‍പിച്ചിട്ടുണ്ടെന്നു തട്ടിവിട്ടവരാണിക്കൂട്ടര്‍. ചോദിക്കുക: ദിവ്യ ദൃഷ്ടാന്തങ്ങളും നിങ്ങളാവശ്യപ്പെട്ടതുമെല്ലാമായി എനിക്കു മുമ്പേ പല ദൂതരും വന്നിരുന്നുവല്ലോ, എന്നിട്ട് നിങ്ങളവരെ കശാപ്പു ചെയ്തതെന്തിനാണ്-നിങ്ങള്‍ സത്യവാദികളാണെങ്കില്‍? നബിയേ, അങ്ങയെ അവര്‍ നിഷേധിച്ചുവെങ്കില്‍ സാരമില്ല; സ്പഷ്ടദൃഷ്ടാന്തങ്ങളും ഏടുകളും പ്രകാശക ഗ്രന്ഥവും കൊണ്ട് താങ്കള്‍ക്കു മുമ്പു വന്ന പല ദൂതരും നിഷേധിക്കപ്പെട്ടിട്ടുണ്ട്⁴²

ഏതൊരു ശരീരവും മരണം രുചി നോക്കും. അന്ത്യനാളില്‍ നിങ്ങള്‍ക്കു കൂലി പൂര്‍ണമായി നല്‍കപ്പെടുന്നതാണ്. ആരൊരാള്‍ അന്നു നരകത്തില്‍ നിന്നു ദൂരീകരിക്കപ്പെടുകയും സ്വര്‍ഗത്തില്‍ പ്രവേശിപ്പിക്കപ്പെടുകയും ചെയ്തുവോ, അവന്‍ വിജയിക്കുക തന്നെ ചെയ്തു. കബളിപ്പിക്കുന്ന ഒരു വിഭവം മാത്രമത്രേ ഭൗതികജീവിതം! നിങ്ങള്‍ സ്വശരീരങ്ങളിലും സമ്പത്തുക്കളിലും പരീക്ഷിക്കപ്പെടുന്നതും നേരത്തെ വേദം നല്‍കപ്പെട്ടവരിലും ബഹുദൈവവിശ്വാസികളിലും നിന്ന് ഒട്ടേറെ കുത്തുവാക്കുകള്‍ കേള്‍ക്കേണ്ടിവരുന്നതുമാണ്. നിങ്ങള്‍ ക്ഷമിക്കുകയും സൂക്ഷ്മതപുലര്‍ത്തുകയും ചെയ്യുന്നുവെങ്കില്‍ അതു നിശ്ചയ ദാര്‍ഢ്യത്തിന്റെ കാര്യങ്ങളില്‍ പെട്ടതു തന്നെയാകുന്നു.

വേദം നല്‍കപ്പെട്ടവരോട്, നിങ്ങളത് ആളുകള്‍ക്ക് വിവരിച്ചുകൊടുക്കുകയും മറച്ചുവെക്കാതിരിക്കുകയും ചെയ്യണമെന്നു അല്ലാഹു ഉടമ്പടി ചെയ്തതനുസ്മരിക്കുക. എന്നിട്ട് അവരതഗണ്യ കോടിയില്‍ തള്ളുകയും തുച്ഛ വിലക്കു വില്‍ക്കുകയുമുണ്ടായി. അവര്‍ വാങ്ങിയത് എത്ര ഹീനം! തങ്ങള്‍ ചെയ്തതില്‍ സന്തോഷിക്കുകയും അനുവര്‍ത്തിക്കാത്തതിന്റെ പേരില്‍ അനുമോദിക്കപ്പെടാനിഷ്ടപ്പെടുകയും ചെയ്യുന്നവരെപ്പറ്റി, ശിക്ഷയില്‍ നിന്നു രക്ഷപ്പെട്ടവരാണവരെന്ന് താങ്കള്‍ ഒട്ടുമേ വിചാരിക്കേണ്ട; വേദനയുറ്റ ശിക്ഷയുണ്ടവര്‍ക്ക്⁴³
ഭുവന-വാനങ്ങളുടെ ആധിപത്യം അല്ലാഹുവിനാണ്. എല്ലാ കാര്യത്തിനും കഴിവുറ്റവനത്രേ അവന്‍.

ആകാശഭൂമികളുടെ സൃഷ്ടിപ്പിലും രാപ്പകലുകള്‍ മാറി മാറി വരുന്നതിലും ബുദ്ധിയുള്ളവര്‍ക്കു ധാരാളം അദ്ഭുത ദൃഷ്ടാന്തങ്ങളുണ്ട്. നിന്നും ഇരുന്നും കിടന്നുമൊക്കെ അല്ലാഹുവിനെ സ്മരിക്കുന്നവരാണവര്‍. ആകാശങ്ങളുടെയും ഭൂമിയുടെയും സൃഷ്ടിപ്പിനെപ്പറ്റിയവര്‍ ചിന്തിച്ചുകൊണ്ടിരിക്കും-'നാഥാ, ഇതൊന്നും നീ വെറുതെ പടച്ചതല്ല. ഞങ്ങളിതാ നിന്റെ വിശുദ്ധി പ്രകീര്‍ത്തിക്കുന്നു. നരക ശിക്ഷയില്‍ നിന്നു ഞങ്ങളെ കാക്കേണമേ. നീയൊരാളെ നരകത്തില്‍ പ്രവേശിപ്പിച്ചുവെങ്കില്‍ അയാളെ നിന്ദിക്കുക തന്നെ ചെയ്തു. അക്രമികള്‍ക്കു സഹായികളായി ആരും ഇല്ല തന്നെ. റബ്ബേ, സത്യവിശ്വാസത്തിലേക്കുള്ള പ്രബോധക വിളിയാളം, 'നിങ്ങള്‍ വിശ്വസിക്കൂ' എന്ന ക്ഷണം ഞങ്ങള്‍ ശ്രവിച്ചു. തത്സമയം ഞങ്ങള്‍ വിശ്വാസം കൈക്കൊണ്ടു. അതിനാല്‍ നാഥാ, ഞങ്ങളുടെ പാപങ്ങള്‍ പൊറുക്കുകയും തിന്മകള്‍ മാപ്പാക്കിത്തരികയും പുണ്യാത്മാക്കളില്‍ ചേര്‍ത്തു മരിപ്പിക്കുകയും ചെയ്യേണമേ. ദൂതന്മാരിലൂടെയുള്ള നിന്റെ വാഗ്ദത്തനേട്ടം ഞങ്ങള്‍ക്കു നല്‍കേണമേ. പുനരുത്ഥാനദിനം ഞങ്ങളെ അപമാനിക്കരുതേ. നീ വാഗ്ദാനം ലംഘിക്കുകയില്ല തന്നെ.'

തത്സമയം തങ്ങളുടെ നാഥന്‍ അവരോടു പ്രതികരിച്ചു: പുരുഷനോ സ്ത്രീയോ ആകട്ടെ, നിങ്ങളില്‍ ഒരു പ്രവര്‍ത്തകന്റെ കര്‍മവും ഞാന്‍ ഫലശൂന്യമാക്കില്ലതന്നെ. നിങ്ങളെല്ലാം ഒരേ വര്‍ഗമാണല്ലോ. അതുകൊണ്ട് ആദര്‍ശ സംരക്ഷണാര്‍ത്ഥം പലായനം ചെയ്യുകയും സ്വഗൃഹങ്ങളില്‍ നിന്നു ബഹിഷ്‌കൃതരാവുകയും എന്റെ മാര്‍ഗത്തില്‍ മര്‍ദിതരാവുകയും പുണ്യസമരം ചെയ്യുകയും വധിക്കപ്പെടുകയും ചെയ്തവരാരോ അവര്‍ക്കു ഞാന്‍ പാപങ്ങള്‍ പൊറുത്തു കൊടുക്കുന്നതും അടിയിലൂടെ അരുവികളൊഴുകുന്ന സ്വര്‍ഗങ്ങളില്‍ പ്രവേശനം നല്‍കുന്നതുമാണ്. അല്ലാഹുവിങ്കല്‍ നിന്നുള്ള മഹത്തായ പ്രതിഫലമത്രേ ഇത്. അവങ്കലാകുന്നു ഉദാത്ത പ്രതിഫലം.

നിഷേധികള്‍ നാടുകളിലെങ്ങും നടത്തുന്ന സൈ്വരതാണ്ഡവം താങ്കളെ വഞ്ചിതനാക്കാനേ പാടില്ല-അതൊരു ക്ഷണികാസ്വാദനം മാത്രം. പിന്നീടവരുടെ വാസസ്ഥലം നരകമാണ്;⁴⁴
അതെത്ര ദുഷിച്ച സങ്കേതം! എന്നാല്‍ തങ്ങളുടെ നാഥനെ സൂക്ഷിച്ചവര്‍ക്ക് അടിയിലൂടെ ആറുകളൊഴുകുന്ന സ്വര്‍ഗങ്ങളാണുള്ളത്. അവരതില്‍ ശാശ്വതരാണ്-പടച്ചവന്റെ പക്കല്‍ നിന്നുള്ള ആതിഥ്യം! അവങ്കലുള്ളതത്രേ സജ്ജനങ്ങള്‍ക്ക് ഏറ്റം ഉദാത്തം. ഇനി, വേദക്കാരില്‍ ഇങ്ങനെയുള്ളവരുമുണ്ട്: അല്ലാഹുവിലും, നിങ്ങളിലേക്കും തങ്ങളിലേക്കും അവതീര്‍ണമായ വേദങ്ങളിലും വിശ്വസിക്കുകയും അവനെ ഭയപ്പെടുകയും ചെയ്യും അവര്‍. അവന്റെ വചനങ്ങളവര്‍ തുച്ഛവിലക്കു വില്‍ക്കില്ല. തങ്ങളുടെ പ്രതിഫലം നാഥങ്കല്‍ അവര്‍ക്കുണ്ടായിരിക്കും. അവന്‍ അതിവേഗം വിചാരണ ചെയ്യുന്നവനാകുന്നു.⁴⁵

ഹേ സത്യവിശ്വാസികളേ, നിങ്ങള്‍ ക്ഷമിക്കുകയും നിസ്തുലമായ സഹനം കൈക്കൊള്ളുകയും അസത്യത്തിനെതിരെ പ്രതിരോധ സജ്ജരാവുകയും ചെയ്യുക⁴⁶
അല്ലാഹുവിനെ ഭയപ്പെട്ടു ജീവിക്കുക-നിങ്ങള്‍ വിജയം വരിച്ചേക്കാം.