അന്നിസാഅ് - النساء - An-Nisa

ഹേ മനുഷ്യരേ, ഒരേയൊരു വ്യക്തിയില്‍ നിന്നു നിങ്ങളെ പടക്കുകയും അതില്‍ നിന്നു തന്നെ അതിന്റെ ഇണയെ സൃഷ്ടിക്കുകയും അവരിരുവരില്‍ നിന്നുമായി ഒട്ടേറെ സ്ത്രീപുരുഷന്മാരെ വ്യാപിപ്പിക്കുകയും ചെയ്ത നിങ്ങളുടെ നാഥനെ സൂക്ഷിക്കുക. ഏതൊരുവന്റെ പേരില്‍ നിങ്ങള്‍ അവകാശങ്ങള്‍ ചോദിക്കുന്നുവോ ആ അല്ലാഹുവിനെയും കുടുംബബന്ധവും സൂക്ഷിക്കുക. നിശ്ചയം അവന്‍ നിങ്ങളെ നിരീക്ഷിച്ചുകൊണ്ടിരിക്കുന്നവനാണ്. അനാഥക്കുട്ടികളുടെ സമ്പത്തുകള്‍ അവര്‍ക്കുവിട്ടുകൊടുക്കുക; നല്ലതിനു പകരം ചീത്തയെടുക്കരുത്. നിങ്ങളുടെ സമ്പത്തുകളോട് കൂട്ടിക്കലര്‍ത്തി അവരുടേത് തിന്നാനും പാടില്ല. വമ്പിച്ച കുറ്റമാണത്¹

അനാഥക്കുട്ടികളുടെ കാര്യത്തില്‍ നീതി പാലിക്കാന്‍ കഴിയില്ലെന്നു ഭയപ്പെടുകയാണെങ്കില്‍ മറ്റുവനിതകളില്‍ നിന്നു നിങ്ങളിഷ്ടപ്പെടുന്ന രണ്ടോ മൂന്നോ നാലോ പേരെ വിവാഹം കഴിക്കുക; അവരോടും നീതി ചെയ്യാനാവില്ലെന്നു പേടിയുണ്ടെങ്കില്‍ ഒരുത്തിയെ മാത്രം; അല്ലെങ്കില്‍ നിങ്ങളുടെ അടിയാത്തികള്‍. പരിധികള്‍ ലംഘിക്കാതിരിക്കാന്‍ നിങ്ങള്‍ക്ക് അതാണേറ്റം നല്ലത്²
ഭാര്യമാര്‍ക്ക് വിവാഹമൂല്യം സസന്തോഷം നല്‍കണം. ഇനി, സ്വേഷ്ടപ്രകാരം അവരതില്‍ നിന്നു വല്ലതും നിങ്ങള്‍ക്ക് തരുന്നുവെങ്കില്‍ സാമോദം സുഖമായി ഭക്ഷിക്കുക. നിങ്ങളുടെ നിലനില്‍പിന്നനിവാര്യമായി അല്ലാഹു നിശ്ചയിച്ച സമ്പത്തുകള്‍ മൂഢന്മാര്‍ക്ക് വിട്ടുകൊടുക്കരുത്. നിങ്ങളവര്‍ക്ക് അതില്‍ നിന്നു ഭക്ഷണവും വസ്ത്രവും നല്‍കുകയും നന്മയുപദേശിക്കുകയും ചെയ്യുക.

വിവാഹപ്രായം വരെ അനാഥക്കുട്ടികളെ നിരീക്ഷണവിധേയരാക്കുകയും എന്നിട്ട് നിങ്ങള്‍ക്കവരുടെ കാര്യശേഷി മനസ്സിലായാല്‍ തങ്ങളുടെ സ്വത്തവര്‍ക്കു വിട്ടുകൊടുക്കുകയും ചെയ്യുക. അവര്‍ വലുതാകുമെന്നു കണ്ട് നിങ്ങളത് ധൃതികൂട്ടി ധൂര്‍ത്തടിച്ച് തിന്നൊടുക്കരുത്. സംരക്ഷകന്‍ സമ്പന്നനാണെങ്കില്‍ പങ്കുപറ്റാതെ മാന്യത പുലര്‍ത്തണം; ദരിദ്രനാണെങ്കില്‍ മര്യാദപ്രകാരം തിന്നാം. സ്വത്തുകളവര്‍ക്ക് ഏല്‍പിക്കുമ്പോള്‍ നിങ്ങളതിനു സാക്ഷിനിറുത്തണം. സൂക്ഷ്മ വിചാരണക്ക് അല്ലാഹു മതി.

മാതാപിതാക്കളും ഏറ്റമടുത്ത ബന്ധുക്കളും വിട്ടേച്ചുപോയ സമ്പത്തില്‍ പുരുഷന്മാര്‍ക്കും സ്ത്രീകള്‍ക്കും വിഹിതമുണ്ട്; കുറച്ചാകട്ടെ കൂടിയതാകട്ടെ, നിശ്ചിത ഓഹരിയാണത്. ധനം ഭാഗം വെക്കുന്നിടത്ത് ബന്ധുക്കളോ അനാഥകളോ പാവങ്ങളോ സന്നിഹിതരായാല്‍ അതില്‍ നിന്നവര്‍ക്കെന്തെങ്കിലും കൊടുക്കുകയും നല്ലവാക്കു പറയുകയും വേണം³
ബലഹീന സന്തതികളെ വിട്ടേച്ച് മരിക്കുന്നത് ഭയക്കുന്നവര്‍ മറ്റനാഥരെക്കുറിച്ചും പേടിച്ചുകൊള്ളട്ടെ.⁴
അവര്‍ അല്ലാഹുവിനെ സൂക്ഷിക്കുകയും നേര്‍വാക്കു പറയുകയും ചെയ്യണം. അനാഥകളുടെ സ്വത്ത് അതിക്രമമായി ശാപ്പിടുന്നവര്‍ തങ്ങളുടെ വയറ്റിലേക്ക് തീ മാത്രമാണു തിന്നുനിറക്കുന്നത്; വഴിയെ നരകത്തിലവര്‍ പ്രവേശിക്കുന്നതാണ്.

അല്ലാഹു നിങ്ങള്‍ക്കു കല്‍പനതരികയാണ്: സ്വന്തം മക്കളുടെ കാര്യത്തില്‍ ആണിന്നു രണ്ടു പെണ്ണിന്റെയത്ര വിഹിതമുണ്ട്. രണ്ടിലേറെ പെണ്‍മക്കളാണെങ്കില്‍ വിട്ടേച്ച സ്വത്തിന്റെ മൂന്നില്‍ രണ്ട് അവര്‍ക്കുണ്ട്; കേവലം ഒരു മകളാണെങ്കില്‍ പാതിയും. ഇനി, പരേതന്നു സന്താനമുണ്ടെങ്കില്‍ അയാളുടെ മാതാപിതാക്കളിലോരോ വ്യക്തിക്കും ആറിലൊന്നു കിട്ടും. മരിച്ചയാള്‍ക്കു മക്കളില്ലാതിരിക്കുകയും മാതാപിതാക്കളവകാശികളാവുകയും ചെയ്താല്‍ ഉമ്മാക്ക് മൂന്നിലൊന്നുണ്ടാകും; പരേതന്നു സഹോദരന്മാരോ സഹോദരിമാരോ ഉണ്ടെങ്കില്‍ മാതാവിനു ആറിലൊന്നാണു കിട്ടുക. ഇപ്പറഞ്ഞതൊക്കെ പരേതന്റെ വസ്വിയ്യത്തും കടവും കഴിച്ചാണ്. മാതാപിതാക്കളിലും മക്കളിലും നിന്ന് ആരാണു കൂടുതലുപകാരപ്പെടുകയെന്നു നിങ്ങള്‍ക്കറിയില്ല. അല്ലാഹു നിര്‍ണയിച്ച ഓഹരികളാണിവ. നിശ്ചയം അവന്‍ സൂക്ഷ്മജ്ഞാനിയും യുക്തിമാനുമാകുന്നു.

നിങ്ങളുടെ ഭാര്യമാര്‍ വിട്ടുപോകുന്ന സ്വത്തില്‍-അവര്‍ക്കു സന്താനങ്ങളില്ലെങ്കില്‍-പാതി നിങ്ങള്‍ക്കാണ്; കുട്ടികളുണ്ടെങ്കില്‍ നാലിലൊന്നും. അവരുടെ വസ്വിയ്യത്തുകളും കടങ്ങളും വീട്ടിയ ശേഷമാണിത്. നിങ്ങള്‍ക്കു സന്താനമില്ലെങ്കില്‍ നിങ്ങള്‍ വിട്ടുപോകുന്ന ധനത്തിന്റെ നാലിലൊന്നാണ് സഹധര്‍മിണികള്‍ക്കുണ്ടാവുക; സന്താനമുണ്ടെങ്കില്‍ എട്ടിലൊന്നും-നിങ്ങളുടെ വസ്വിയ്യത്തും കടവും കഴിച്ച ശേഷം. മരിച്ച പുരുഷന്നോ സ്ത്രീക്കോ അവകാശികളായി പിതാവോ സന്താനമോ ഇല്ല, മാതാവൊത്ത ഒരു സഹോദരനോ സഹോദരിയോ ഉണ്ട്താനും⁵
എങ്കില്‍ ഓരോരുത്തര്‍ക്കും ആറിലൊന്നു കിട്ടും; അവര്‍ കൂടുതലാളുകളുണ്ടെങ്കില്‍ മൂന്നിലൊന്നില്‍ തുല്യാവകാശികളാകുന്നതാണ്. പരേതന്റെ നിരുപദ്രവകരമായ വസ്വിയ്യത്തോ കടമോ ഉണ്ടെങ്കില്‍⁶
അതു കഴിച്ചാണിത്. അല്ലാഹുവിങ്കല്‍ നിന്നുള്ള കല്‍പനയാണിതെല്ലാം. അവന്‍ ഏറ്റം അറിയുന്നവനും സഹനശീലനുമത്രേ.

അല്ലാഹുവിന്റെ നിയമപരിധികളാണിതെല്ലാം. അവനെയും അവന്റെ റസൂലിനെയും ആരൊരാള്‍ അനുസരിക്കുന്നുവോ, താഴ്ഭാഗത്തുകൂടി അരുവികളൊഴുകുന്ന സ്വര്‍ഗങ്ങളില്‍ അവനെ അല്ലാഹു പ്രവേശിപ്പിക്കും. അതിലവര്‍ ശാശ്വതവാസികളായിരിക്കുന്നതാണ്. മഹാവിജയം തന്നെയാണത്. അല്ലാഹുവിനെയും അവന്റെ ദൂതനെയും ആരു ധിക്കരിക്കുകയും അവന്റെ പരിധികള്‍ മറികടക്കുകയും ചെയ്യുന്നുവോ അവനെ അല്ലാഹു നരകാഗ്നിയില്‍ കടത്തുന്നതാണ്. അവനതില്‍ എന്നെന്നും കഴിഞ്ഞുകൂടും. ഹീന ശിക്ഷയാണവനതിലുണ്ടാവുക.

സ്വന്തം വനിതകളില്‍ നിന്നു നീചവൃത്തിയിലേര്‍പ്പെടുന്നവര്‍ക്കെതിരെ നിങ്ങളില്‍ നാലുപേരെ സാക്ഷികളായി ഹാജറാക്കുക. അങ്ങനെ അവര്‍ സാക്ഷ്യം വഹിച്ചാല്‍ മരണം വരെയോ അല്ലാഹു എന്തെങ്കിലും വഴിയുണ്ടാക്കുന്നതു വരെയോ ആ സ്ത്രീകളെ വീടുകളില്‍ തടഞ്ഞുവെക്കണം⁷
നിങ്ങളില്‍ നിന്നു ആ മ്ലേച്ഛ വൃത്തിചെയ്യുന്ന ഇരുവരെയും പീഡനവിധേയരാക്കുക⁸
ഇനി അവരിരുവരും പശ്ചാത്തപിക്കുകയും കര്‍മങ്ങള്‍ നന്നാക്കുകയും ചെയ്താല്‍ അവരെ ഒഴിവാക്കണം. അല്ലാഹു പശ്ചാത്താപം ഏറെ സ്വീകരിക്കുന്നവനും കരുണാമയനും തന്നെയായിരിക്കുന്നു.

അജ്ഞതമൂലം തെറ്റു ചെയ്കയും പിന്നെ താമസിയാതെ ഖേദിച്ചുമടങ്ങുകയും ചെയ്യുന്നവരുടെ പശ്ചാത്താപ സ്വീകാരമേ അല്ലാഹു ഏല്‍ക്കൂ; അവരുടേതവന്‍ സ്വീകരിക്കുന്നതാണ്. അവന്‍ സൂക്ഷ്മജ്ഞാനിയും യുക്തിമാനുമത്രേ. കുറ്റകൃത്യങ്ങളനുവര്‍ത്തിച്ചു കൊണ്ടിരിക്കുകയും, എന്നിട്ട് ആസന്ന മരണനാകുമ്പോള്‍ ഞാനിതാ പശ്ചാത്തപിച്ചിരിക്കുന്നു എന്നുരുവിടുകയും ചെയ്യുന്നവര്‍ക്കും, സത്യനിഷേധികളായി മരിക്കുന്നവര്‍ക്കും ഉള്ളതല്ല പശ്ചാത്താപ സ്വീകാരം. അത്തരക്കാര്‍ക്ക് വേദനയുറ്റ ശിക്ഷ നാം സജ്ജീകരിച്ചിട്ടുണ്ട്.

സത്യവിശ്വാസികളേ, സ്ത്രീകളെ നിങ്ങള്‍ നിര്‍ബന്ധപൂര്‍വം അനന്തരാവകാശമായി എടുക്കുക അനുവദനീയമല്ല⁹
നിങ്ങളവര്‍ക്ക് കൊടുത്ത മഹ്‌റില്‍ നിന്നു ഒരു വിഹിതം തട്ടിയെടുക്കാനായി അവരെ തടഞ്ഞുവെക്കാനും പാടില്ല, വ്യക്തമായ വല്ല ദുര്‍വൃത്തിയിലും അവര്‍ ഏര്‍പ്പെട്ടാലൊഴികെ. ഉദാത്തരീതിയില്‍ അവരോടു വര്‍ത്തിക്കണം. ഇനി അവരോട് വെറുപ്പുണ്ടെങ്കില്‍ ക്ഷമിക്കുക; കാരണം, നിങ്ങള്‍ക്ക് ഒരു വസ്തുവിനോടു അസംതൃപ്തിയുണ്ടാവുകയും അല്ലാഹു അതില്‍ ഒട്ടേറെ നന്മ നിശ്ചയിക്കുകയും ചെയ്‌തെന്നുവന്നേക്കാം.

ഇനി ഒരു ഭാര്യക്കുപകരം മറ്റൊരുത്തിയെ സ്വീകരിക്കാന്‍ നിങ്ങള്‍ വിചാരിച്ചു; അവരിലൊരാള്‍ക്ക് ധാരാളം ധനം കൊടുത്തിരുന്നുതാനും. എങ്കില്‍ അതില്‍ നിന്ന് ഒന്നും തന്നെ തിരിച്ചുവാങ്ങരുത്. വ്യാജമായും സ്പഷ്ടാപരാധമായും നിങ്ങളതു മടക്കിവാങ്ങുകയോ? പരസ്പരം ഇണ ചേരുകയും നിങ്ങളില്‍ നിന്ന് അവര്‍ ഈടുറ്റ കരാര്‍ വാങ്ങുകയും ചെയ്തിരിക്കെ അതെങ്ങനെ തിരിച്ചു വാങ്ങും?

സ്വപിതാക്കള്‍ വിവാഹം ചെയ്ത സ്ത്രീകളെ നിങ്ങള്‍ക്കു വേളികഴിച്ചുകൂടാ; മുമ്പ് അജ്ഞതായുഗത്തില്‍ ചെയ്തതൊഴികെ. നിശ്ചയം അതു മ്ലേച്ഛവൃത്തിയും ദിവ്യകോപത്തിന്നു കാരണവും ദുര്‍മാര്‍ഗവുമാണ്. ഉമ്മമാര്‍, പുത്രികള്‍, സഹോദരികള്‍, പിതൃസഹോദരികള്‍, മാതൃസഹോദരികള്‍, സഹോദര-സഹോദരീ പുത്രികള്‍, മുല തന്ന ഉമ്മമാര്‍, മുലകുടിബന്ധത്തിലുള്ള സഹോദരികള്‍, ഭാര്യാമാതാക്കള്‍ എന്നിവരെ വേള്‍ക്കല്‍ നിങ്ങള്‍ക്കു നിഷിദ്ധമാണ്; ഇണചേര്‍ന്ന സഹധര്‍മിണികളുടെ മക്കളായി നിങ്ങളുടെ കീഴിലുള്ള വളര്‍ത്തു പുത്രിമാരും; ഇണ ചേര്‍ന്നിട്ടില്ലെങ്കില്‍ തെറ്റില്ല. സ്വപുത്രരുടെ ഭാര്യമാരെ വരിക്കുന്നതും രണ്ടു സഹോദരികളെ സഹകളത്രങ്ങളാക്കുന്നതും നിഷിദ്ധമാണ്-മുമ്പ് സംഭവിച്ചവ ഇതില്‍ നിന്നൊഴിവാകുന്നു. അല്ലാഹു ഏറെ പൊറുക്കുന്നവനും കരുണാമയനുമത്രേ¹⁰

ഭര്‍തൃമതികളെയും നിങ്ങള്‍ വിവാഹം ചെയ്തുകൂടാ; എന്നാല്‍ സ്വന്തം ഉടമത്വത്തില്‍ വന്നു ചേരുന്ന അടിയാത്തികള്‍ക്കു കുഴപ്പമില്ല¹¹
അല്ലാഹു നിയമമാക്കിയതാണിതെല്ലാം. മേല്‍പറഞ്ഞവരല്ലാത്ത വനിതകളെ സ്വധനം വിവാഹമൂല്യം നല്‍കി ദാമ്പത്യജീവിതമുദ്ദേശിച്ചും മ്ലേച്ഛവൃത്തിക്കല്ലാതെയും കാംക്ഷിക്കുന്നത് നിങ്ങള്‍ക്കനുവദനീയമാണ്¹²
അങ്ങനെ അവരില്‍ നിന്നു നിങ്ങള്‍ സുഖമനുഭവിച്ചാല്‍ ഒരു ബാധ്യതയായി വിവാഹമൂല്യം നല്‍കണം; ഇനി അതു നിര്‍ണയിച്ചു കഴിഞ്ഞ ശേഷം പരസ്പര സംതൃപ്തിയോടെ വല്ല വിട്ടുവീഴ്ചയും ചെയ്യുന്നതിന്നു കുഴപ്പമില്ല. നിശ്ചയം, അല്ലാഹു ഏറ്റം അറിയുന്നവനും യുക്തിമാനുമത്രെ.

സ്വതന്ത്രസത്യവിശ്വാസിനികളെ വിവാഹം ചെയ്യാന്‍ നിങ്ങളിലൊരാള്‍ക്ക് സാമ്പത്തികശേഷിയില്ലെങ്കില്‍ സത്യവിശ്വാസിനികളായ അടിയാത്തികളിലാരെയെങ്കിലും വരിക്കാം. നിങ്ങളുടെ വിശ്വാസം സംബന്ധിച്ച് അല്ലാഹു നന്നായറിയുന്നവനാകുന്നു. ചിലര്‍ മറ്റു ചിലരില്‍ നിന്നുണ്ടായവരാണു നിങ്ങള്‍¹³
അതുകൊണ്ട് അവരുടെ രക്ഷിതാക്കളുടെ സമ്മതത്തോടെ അവരെ വരിക്കുകയും വിവാഹമൂല്യം മാന്യമായി നല്‍കുകയും ചെയ്യുക. രഹസ്യവേഴ്ചക്കാരെ സ്വീകരിക്കാത്തവരും വേശ്യകളുമല്ലാത്ത ചാരിത്ര്യവതികളാകണം അവര്‍. ഇനി വിവാഹാനന്തരം വല്ല ഹീനകൃത്യത്തിലും ഏര്‍പ്പെട്ടാല്‍ സ്വതന്ത്ര കന്യകകള്‍ക്കുള്ള വ്യഭിചാരശിക്ഷയുടെ പാതിയാണ് ആ ദാസിക്കുണ്ടാവുക. നിങ്ങളില്‍ നിന്ന് വ്യഭിചാരം ഭയപ്പെടുന്നവര്‍ക്കാണ് ഈ അനുവാദം; ക്ഷമകൈക്കൊള്ളുകയത്രേ നിങ്ങള്‍ക്കുത്തമം¹⁴
അല്ലാഹു ഏറെ പൊറുക്കുന്നവനും കരുണാമയനുമത്രേ.

നിങ്ങള്‍ക്കു വിഷയങ്ങള്‍ പ്രതിപാദിക്കാനും പശ്ചാത്താപം സ്വീകരിക്കാനും പൂര്‍വ്വികരുടെ ഉദാത്തചര്യകള്‍ കാണിച്ചു തരാനും അല്ലാഹു ഉദ്ദേശിക്കുന്നു. അവന്‍ എല്ലാം അറിയുന്നവനും യുക്തിമാനുമത്രേ. നിങ്ങളുടെ പശ്ചാത്താപം സ്വീകരിക്കണമെന്നാണ് അല്ലാഹുവിന്റെ ഉദ്ദേശ്യം; എന്നാല്‍ സ്വേച്ഛാനുഗാമികളുടെയഭിലാഷം നിങ്ങളുടെ ഗുരുതരമാര്‍ഗഭ്രംശമാകുന്നു. അല്ലാഹുവിന്റെ ആഗ്രഹം നിങ്ങള്‍ക്കു ഭാരം ലഘൂകരിക്കണമെന്നാണ്. ദുര്‍ബലനായാണ് മനുഷ്യന്‍ സൃഷ്ടിക്കപ്പെട്ടിരിക്കുന്നത്.

സത്യവിശ്വാസികളേ, പരസ്പര സംതൃപ്തിയോടെ നടത്തുന്ന കച്ചവടത്തിലൂടെയല്ലാതെ, സ്വത്തുകള്‍ അന്യായമായി നിങ്ങള്‍ തിന്നരുത്. അന്യോന്യം കൊലനടത്താനും പാടില്ല¹⁵
അല്ലാഹു നിങ്ങളോട് ഏറെ കരുണാമയനത്രേ. ആരെങ്കിലും നിയമം മറികടന്ന് അക്രമമായി അങ്ങനെ ചെയ്താല്‍ അവനെ നാം വഴിയെ നരകത്തില്‍ പ്രവേശിപ്പിക്കും. അത് അല്ലാഹുവിന്നു ക്ഷിപ്രസാധ്യമത്രേ. നിരോധിക്കപ്പെട്ട വന്‍പാപങ്ങള്‍ വര്‍ജിക്കുകയാണെങ്കില്‍ നാം നിങ്ങളുടെ ചെറുദോഷങ്ങള്‍ പൊറുക്കുന്നതും പവിത്ര സ്ഥാനത്ത് നിങ്ങളെ പ്രവേശിപ്പിക്കുന്നതുമാകുന്നു.

ചിലരെക്കാള്‍ മറ്റുചിലര്‍ക്ക് അല്ലാഹു നല്‍കിയ ഔദാര്യം സ്വന്തമാക്കാന്‍ നിങ്ങള്‍ വ്യാമോഹിക്കരുത്. പുരുഷന്മാര്‍ പ്രവര്‍ത്തിച്ചതില്‍ നിന്ന് അവര്‍ക്കും സ്ത്രീകള്‍ പ്രവര്‍ത്തിച്ചതില്‍ നിന്നു അവര്‍ക്കുമുണ്ടാകും. നിങ്ങള്‍ ദിവ്യാനുഗ്രഹങ്ങളില്‍ നിന്ന് അല്ലാഹുവിനോടു ചോദിക്കുക. അല്ലാഹു എല്ലാ കാര്യങ്ങളെക്കുറിച്ചും സൂക്ഷ്മജ്ഞാനിയത്രേ.¹⁶
മാതാപിതാക്കളും അടുത്തബന്ധുക്കളും വിട്ടുപോയ മുഴുവന്‍ സമ്പത്തിനും നാം അവകാശികളെ നിശ്ചയിച്ചിട്ടുണ്ട്. സഹായം നല്‍കാന്‍ നിങ്ങള്‍ ശപഥം ചെയ്തവര്‍ക്ക് അവരുടെ വിഹിതം നല്‍കുക. അല്ലാഹു മുഴുവന്‍ കാര്യങ്ങള്‍ക്കും സാക്ഷിയാകുന്നു.

പുരുഷന്മാര്‍ സ്ത്രീകളുടെമേല്‍ നിയന്ത്രണാവകാശമുള്ളവരാണ്. ചിലരെ മറ്റുചിലരെക്കാള്‍ അല്ലാഹു ശ്രേഷ്ഠരാക്കിയതു കൊണ്ടും ആണുങ്ങള്‍ സമ്പത്തു ചെലവഴിക്കുന്നതിനാലുമാണത്. അനുസരണ ശാലിനികളും നാഥന്റെ നിയമാനുസൃതം പുരുഷന്റെ അഭാവത്തില്‍ വേണ്ടതൊക്കെ സംരക്ഷിക്കുന്നവരുമായിരിക്കും പുണ്യവതികള്‍. എന്നാല്‍, പിണങ്ങിയേക്കുമെന്ന് ആശങ്കിക്കുന്ന സ്ത്രീകളെ നിങ്ങള്‍ ഉപദേശിക്കുകയും, വേണ്ടി വന്നാല്‍ കിടപ്പറകളില്‍ മാറ്റി നിര്‍ത്തുകയും ചെയ്യുക. ഇവയൊക്കെ നിഷ്ഫലമായാല്‍ അടിക്കുക. ഇനി നിങ്ങളെ അനുസരിച്ചാല്‍ പിന്നീടവരെപ്പറ്റി ശിക്ഷാമാര്‍ഗമന്വേഷിക്കരുത്. നിശ്ചയം അല്ലാഹു ഉന്നതനും മഹാനുമാകുന്നു¹⁷

ഇനി ദമ്പതിമാര്‍ക്കിടയില്‍ ഛിദ്രതയുണ്ടാകുമെന്നു ഭയമുണ്ടെങ്കില്‍ അവന്റെയും അവളുടെയും ബന്ധുക്കളില്‍ നിന്ന് ഓരോ മധ്യസ്ഥനെ നിങ്ങള്‍ നിയോഗിക്കുക. അവരിരുവരും അനുരഞ്ജനമാഗ്രഹിക്കുന്നുണ്ടെങ്കില്‍ ദമ്പതികള്‍ക്കിടയില്‍ അല്ലാഹു യോജിപ്പുണ്ടാക്കും. നിശ്ചയം അവന്‍ എല്ലാം അറിയുന്നവനും സൂക്ഷ്മജ്ഞാനിയുമായിരിക്കുന്നു.

നിങ്ങള്‍ അല്ലാഹുവിനെ ആരാധിക്കുക; അവനോട് യാതൊന്നിനെയും പങ്കുചേര്‍ക്കരുത്. മാതാപിതാക്കള്‍, ബന്ധുക്കള്‍, അനാഥകള്‍, അഗതികള്‍, ബന്ധുവോ അന്യനോ ആയ അയല്‍ക്കാരന്‍, സഹവാസികള്‍, സഞ്ചാരികള്‍, സ്വന്തം അധീനതയിലുള്ള അടിമകള്‍ എന്നിവരോടൊക്കെ നല്ലരീതിയില്‍ വര്‍ത്തിക്കുക. അഹങ്കാരിയെയും ദുരഭിമാനിയെയും അല്ലാഹു ഒട്ടുമേ സ്‌നേഹിക്കുകയില്ല; പിശുക്കുകാട്ടുകയും അതിനായി മനുഷ്യരെ പ്രേരിപ്പിക്കുകയും തങ്ങള്‍ക്കു അല്ലാഹു തന്ന അനുഗ്രഹം മറച്ചുവെക്കുകയും ചെയ്യുന്നവരാണവര്‍. ആ നിഷേധികള്‍ക്ക് ഹീന ശിക്ഷയാണ് നാം സജ്ജീകരിച്ചിരിക്കുന്നത്. ജനങ്ങളെ കാണിക്കുവാനായി സ്വധനം ചെലവുചെയ്യുകയും അല്ലാഹുവിലോ അന്ത്യ ദിനത്തിലോ വിശ്വസിക്കാതിരിക്കുകയും ചെയ്യുന്നവരാണവര്‍. ചെകുത്താന്‍ ആരൊരാളുടെ ചങ്ങാതിയായോ, ആ ചങ്ങാതി മഹാ ചീത്ത തന്നെ. അല്ലാഹുവിലും അന്ത്യ നാളിലും വിശ്വസിക്കുകയും അവന്‍ കനിഞ്ഞേകിയ സമ്പത്തില്‍ നിന്നു ചെലവഴിക്കുകയും ചെയ്യുന്നതിനു അവര്‍ക്ക് എന്തുണ്ട് തടസ്സം?¹⁸
അല്ലാഹു അവരെപ്പറ്റി സൂക്ഷ്മ ജ്ഞാനിയത്രേ.

നിശ്ചയം, അല്ലാഹു ഒരണു അളവ് അനീതി കാട്ടില്ല. കടുകിട നന്മയാണുള്ളതെങ്കില്‍ അതവന്‍ ഇരട്ടിയാക്കിക്കൊടുക്കും; തന്റെ പക്കല്‍ നിന്നുള്ള മഹത്തായ കൂലി നല്‍കുകയും ചെയ്യും. നബിയേ, എല്ലാ സമുദായത്തില്‍ നിന്നും ഓരോ സാക്ഷിയെയും അവര്‍ക്കു സാക്ഷിയായി താങ്കളെയും നാം ഹാജരാക്കുമ്പോള്‍ എന്തായിരിക്കും സ്ഥിതി? നിഷേധികളാവുകയും റസൂലിനെ ധിക്കരിക്കുകയും ചെയ്തവരെല്ലാം തങ്ങള്‍ മണ്ണോടു ചേര്‍ന്നിരുന്നെങ്കില്‍ എന്ന് ആ ദിവസം അഭിലഷിച്ചു പോകും. ഒരു വിഷയവും അല്ലാഹുവില്‍ നിന്നു ഒളിച്ചു വെക്കാന്‍ അവര്‍ക്കാവില്ല¹⁹

സത്യവിശ്വാസികളേ, ലഹരിബാധിതരായി നിങ്ങള്‍ നമസ്‌കാരത്തോടടുക്കരുത്-ഉരുവിടുന്നത് എന്താണ് എന്നു മനസ്സിലാകുന്നത് വരെ²⁰
ജനാബത്തുണ്ടായാല്‍ കുളിക്കുന്നതുവരെയും. ഇനി നിങ്ങള്‍ രോഗികളോ യാത്രയിലോ ആയി, അല്ലെങ്കില്‍ മലമൂത്ര വിസര്‍ജ്ജനം ചെയ്തു, അഥവാ സ്ത്രീകളെ സ്പര്‍ശിച്ചു. എന്നിട്ട്, വെള്ളം കിട്ടാതെ വന്നുവെങ്കില്‍ ശുദ്ധിയുള്ള മണ്ണ് ലക്ഷീകരിക്കുകയും അതുകൊണ്ട് മുഖങ്ങളും കൈകളും തടവുകയും²¹
ചെയ്യുക. അല്ലാഹു ഏറെ മാപ്പരുളുന്നവനും ഏറ്റം പൊറുക്കുന്നവനും തന്നെയാകുന്നു.

വേദത്തില്‍ നിന്ന് ഒരു ഓഹരി നല്‍കപ്പെട്ടവരെ താങ്കള്‍ കണ്ടില്ലേ? അവര്‍ ദുര്‍മാര്‍ഗം വിലകൊടുത്തു വാങ്ങുകയും നിങ്ങള്‍ വഴിപിഴച്ചു പോകണമെന്നാഗ്രഹിക്കുകയും ചെയ്യുന്നു. നിങ്ങളുടെ ശത്രുക്കളെപ്പറ്റി അല്ലാഹുവിനു നന്നായറിയാം. സംരക്ഷകനും സഹായിയുമായി അല്ലാഹു തന്നെ മതി²²

ജൂതന്മാരില്‍ പെട്ട ചിലര്‍ വാക്കുകള്‍ സ്ഥാനഭ്രംശം വരുത്തുകയാണ്. നാവുകള്‍ വക്രീകരിച്ചും മതത്തെയധിക്ഷേപിച്ചും അവരിങ്ങനെ ജല്‍പിക്കും: 'ഞങ്ങള്‍ കേള്‍ക്കുകയും ധിക്കരിക്കുകയും ചെയ്യുന്നു; നീ ശ്രവിക്കുക, നിനക്കു കേള്‍ക്കാന്‍ കഴിയാതിരിക്കട്ടെ;²³
'റാഇനാ' എന്നും അവര്‍ പറയും. എന്നാല്‍, ഞങ്ങള്‍ കേള്‍ക്കുകയും അനുസരിക്കുകയും ചെയ്തിരിക്കുന്നു; താങ്കള്‍ ശ്രവിക്കുകയും ഞങ്ങളെ ശ്രദ്ധിക്കുകയും ചെയ്താലും... എന്ന് അവര്‍ ബോധിപ്പിച്ചിരുന്നുവെങ്കില്‍ അതവര്‍ക്ക് ഋജുവും ഉദാത്തവുമായിരുന്നു²⁴
പക്ഷെ, തങ്ങളുടെ സത്യ നിഷേധം നിമിത്തം അവരെ ശപിച്ചിരിക്കുകയാണ് അല്ലാഹു. തന്മൂലം വളരെക്കുറച്ചേ അവര്‍ വിശ്വസിക്കൂ!

ഹേ വേദം നല്‍കപ്പെട്ടവരേ, നിങ്ങള്‍ വശമുള്ള ഗ്രന്ഥത്തെ ശരിവെക്കുന്നതായി നാമവതരിപ്പിച്ച ഖുര്‍ആനില്‍ വിശ്വസിക്കുക-ചില മുഖങ്ങള്‍ നാം മായ്ച്ചുകളഞ്ഞ് പുറകിലേക്കു മാറ്റുകയോ, ശാബ്ബത്തുകാരെയെന്ന പോലെ അവരെയും ശപിക്കുകയോ ചെയ്യും മുമ്പ്²⁵
അല്ലാഹു വിന്റെ കല്‍പന പ്രയോഗവല്‍കരിക്കപ്പെടുക തന്നെ ചെയ്യുന്നതാണ്. തനിക്കു പങ്കാളികളെ സ്ഥാപിക്കപ്പെടുന്നത് അല്ലാഹു പൊറുക്കുകയില്ല തന്നെ;²⁶
മറ്റുപാപങ്ങള്‍ താനുദ്ദേശിക്കുന്നവര്‍ക്ക് അവന്‍ പൊറുത്തുകൊടുക്കുന്നതാണ്. അല്ലാഹുവിനോട് ആരെങ്കിലും പങ്കുചേര്‍ത്താല്‍ ഗുരുതരമായ പാതകം തന്നെയാണവന്‍ കെട്ടിച്ചമച്ചത്. തങ്ങള്‍ വിശുദ്ധരാണെന്നവകാശപ്പെടുന്നവരെ താങ്കള്‍ കണ്ടില്ലേ?²⁷
എന്നാല്‍ അതു ശരിയല്ല, താനുദ്ദേശിക്കുന്നവരെ അല്ലാഹു പരിശുദ്ധരാക്കുന്നു; അവര്‍ അല്‍പം പോലും ദ്രോഹിക്കപ്പെടുന്നതല്ല. അല്ലാഹുവിന്റെ മേല്‍ എങ്ങനെയൊക്കെയാണവര്‍ വ്യാജം കെട്ടിച്ചമക്കുന്നതെന്ന് നോക്കൂ. സ്പഷ്ടാപരാധമായി അതുതന്നെ ധാരാളം!

വേദഗ്രന്ഥത്തില്‍ നിന്നുള്ള വൈജ്ഞാനിക വിഹിതം നല്‍കപ്പെട്ടവരെ താങ്കള്‍ കണ്ടില്ലേ? അവര്‍ ബിംബങ്ങളിലും പിശാചുക്കളിലും വിശ്വാസമര്‍പ്പിക്കുകയും, സത്യനിഷേധികളെപ്പറ്റി 'ഇവരാണ് മുഹമ്മദില്‍ വിശ്വസിച്ചവരെക്കാള്‍ ഏറെ സന്മാര്‍ഗപ്രാപ്തര്‍' എന്നു തട്ടിവിടുകയും ചെയ്യുന്നു. അല്ലാഹു ശപിച്ചവരാണവര്‍. അവന്‍ ആരെ ശപിക്കുന്നുവോ അയാള്‍ക്കു യാതൊരു സഹായിയെയും താങ്കള്‍ക്കു കണ്ടെത്താനാവില്ല, തീര്‍ച്ച. അതോ, ആധിപത്യത്തില്‍ വല്ലവിഹിതവും അവര്‍ക്കുണ്ടോ? എങ്കില്‍ മനുഷ്യര്‍ക്ക് ഒരിത്തിരിപോലും അവര്‍ നല്‍കുകയില്ല.²⁸
അതോ, തന്റെ ഔദാര്യത്തില്‍ നിന്നു അല്ലാഹു കൊടുത്തതിന്റെ പേരില്‍ ജനങ്ങളോടവര്‍ അസൂയപ്പെടുകയാണോ? എങ്കില്‍ ഇബ്രാഹീം കുടുംബത്തിന് വേദവും തത്ത്വജ്ഞാനവും പ്രൗഢാധിപത്യവും നാം നല്‍കിയിട്ടുണ്ട്.²⁹
എന്നിട്ട് അതില്‍ വിശ്വസിച്ചവര്‍ അവരിലുണ്ട്. പുറം തിരിഞ്ഞവരുമുണ്ട് അവരില്‍; കത്തിജ്ജ്വലിക്കുന്ന നരകാഗ്നി മതി അവര്‍ക്ക്.

നമ്മുടെ ദൃഷ്ടാന്തങ്ങള്‍ നിഷേധിച്ചവരെ നരകാഗ്നിയില്‍ നാം കടത്തുന്നതാണ്. അവരുടെ ചര്‍മങ്ങള്‍ വെന്തുപോകുമ്പോഴെല്ലാം വേറെ ചര്‍മങ്ങള്‍ നാം പകരമാക്കും; അവര്‍ ശിക്ഷ രുചിക്കുവാന്‍ വേണ്ടിയാണിത്³⁰
അല്ലാഹു പ്രതാപശാലിയും യുക്തിമാനും തന്നെയത്രേ. സത്യവിശ്വാസം കൈക്കൊള്ളുകയും സല്‍കര്‍മങ്ങളനുഷ്ഠിക്കുകയും ചെയ്തവരെ അടിയിലൂടെ അരുവികളൊഴുകുന്ന ചില സ്വര്‍ഗോദ്യാനങ്ങളില്‍ നാം കടത്തുന്നതാണ്. അവരതില്‍ ശാശ്വതരായിരിക്കും. പരിശുദ്ധരായ ഇണകളും അവര്‍ക്കതിലുണ്ടാകും. സ്ഥിരമായ തണലില്‍ നാമവരെ പ്രവേശിപ്പിക്കുന്നതുമാകുന്നു.

വിശ്വസിച്ചേല്‍പിക്കപ്പെട്ട അമാനത്തുകള്‍ അവയുടെയാളുകള്‍ക്കു തിരിച്ചു കൊടുക്കാനും ജനമധ്യേ വിധികല്‍പിക്കുമ്പോള്‍ അതു നീതിപൂര്‍വകമാക്കാനും അല്ലാഹു നിങ്ങളോടനുശാസിക്കുകയാണ്. എത്ര നല്ല ഉപദേശമാണവന്‍ നിങ്ങള്‍ക്കു തരുന്നത്! നന്നായി കേള്‍ക്കുന്നവനും കാണുന്നവനും തന്നെയാണവന്‍. സത്യവിശ്വാസികളേ, അല്ലാഹുവിനെയും റസൂലിനെയും നിങ്ങളില്‍ നിന്നുള്ള കൈകാര്യകര്‍ത്താക്കളെയും³¹
അനുസരിക്കുക. ഇനി ഏതെങ്കിലും കാര്യത്തില്‍ പരസ്പരം ഭിന്നാഭിപ്രായമുണ്ടായാല്‍ അത് അല്ലാഹുവിലേക്കും റസൂലിലേക്കും മടക്കുക - അല്ലാഹുവിലും അന്ത്യനാളിലും നിങ്ങള്‍ വിശ്വസിക്കുന്നുവെങ്കില്‍. അതാണ് ഉദാത്തവും ഏറ്റം നല്ല അന്ത്യഫലദായകവും.

താങ്കളിലേക്കും ഇതിനുമുമ്പും അവതീര്‍ണമായ വേദങ്ങളില്‍ തങ്ങള്‍ വിശ്വസിച്ചിരിക്കുന്നു എന്ന് തട്ടിവിടുന്ന ചിലരെ താങ്കള്‍ കണ്ടില്ലേ? വിധിതേടി ദുര്‍മൂര്‍ത്തികളിലേക്കു പോകാനാണവര്‍ വിചാരിക്കുന്നത്. അവരോടനുശാസിക്കപ്പെട്ടിരുന്നതാകട്ടെ അത് അവിശ്വസിക്കാനാണ്! നേര്‍മാര്‍ഗത്തില്‍ നിന്ന് അവരെ ബഹുദൂരം വഴിതെറ്റിക്കാനാണ് പിശാച് ഉദ്ദേശിക്കുന്നത്³²
അല്ലാഹു അവതരിപ്പിച്ച ഖുര്‍ആനിലേക്കും റസൂലിലേക്കും വരൂ എന്ന് ആഹ്വാനം ചെയ്യപ്പെട്ടാല്‍, ആ കപടന്മാര്‍ അങ്ങയെ വിട്ട് നിശ്ശേഷം പിന്തിരിഞ്ഞു പോകുന്നതായി കാണാം. എന്നാല്‍ സ്വയംകൃത പ്രവൃത്തിമൂലം അവര്‍ക്കെന്തെങ്കിലും വിപത്തേല്‍ക്കുകയും എന്നിട്ട് അങ്ങയുടെയടുത്തുവന്ന് നന്മയും രഞ്ജിപ്പും മാത്രമേ ഞങ്ങളുദ്ദേശിച്ചിട്ടുള്ളൂ എന്ന് അല്ലാഹുവിന്റെ പേരില്‍ ആണയിടുകയും ചെയ്യുമ്പോള്‍ അവരുടെ സ്ഥിതി എന്തായിരിക്കും?³³
അവരുടെ ഉള്ളിലിരിപ്പ് അല്ലാഹു അറിയും. അതുകൊണ്ട് താങ്കള്‍ അവരെ അവഗണിക്കുകയും അവരോട് ഉപദേശിക്കുകയും ഹൃദയസ്പര്‍ശിയായ വാക്ക് പറയുകയും ചെയ്യുക.

അല്ലാഹുവിന്റെ നിര്‍ദ്ദേശപ്രകാരം, അനുസരിക്കപ്പെടാനായല്ലാതെ ഒരു റസൂലിനെയും നാം അയച്ചിട്ടില്ല. സ്വന്തത്തോടു തന്നെ അക്രമം ചെയ്തപ്പോള്‍ അവര്‍ താങ്കളുടെയടുത്തു വരികയും അല്ലാഹുവിനോടു പാപമോചനമര്‍ത്ഥിക്കുകയും റസൂല്‍ അവര്‍ക്ക് പൊറുക്കലിനെ തേടുകയും ചെയ്തിരുന്നുവെങ്കില്‍ പശ്ചാത്താപം സ്വീകരിക്കുന്നവനും കരുണാവാരിധിയുമായി അല്ലാഹുവിനെ അവര്‍ കണ്ടെത്തുമായിരുന്നു³⁴
താങ്കളുടെ നാഥന്‍ തന്നെ സത്യം, തങ്ങള്‍ക്കിടയിലുണ്ടായിത്തീരുന്ന തര്‍ക്കങ്ങളില്‍ അങ്ങയെ വിധികര്‍ത്താവാക്കുകയും അങ്ങയുടെ വിധിയെപ്പറ്റി മനസ്സിലൊട്ടും പ്രയാസമുണ്ടാവാതിരിക്കുകയും സമ്പൂര്‍ണമായി വിധേയത്വമുള്ളവരായിത്തീരുകയും ചെയ്യുന്നതുവരെ അവര്‍ സത്യവിശ്വാസികളാകുന്നതല്ല³⁵

നിങ്ങള്‍ ജീവാര്‍പ്പണം ചെയ്യണമെന്നോ ദേശത്യാഗം വരിക്കണമെന്നോ നാം കല്‍പിച്ചിരുന്നെങ്കില്‍ തുച്ഛം പേരൊഴികെ അവരതനുവര്‍ത്തിക്കുമായിരുന്നില്ല. ഉപദേശിക്കപ്പെട്ടവിധം ചെയ്തിരുന്നെങ്കില്‍ അവര്‍ക്ക് അതേറ്റം ഉദാത്തവും വിശ്വാസത്തെ ദൃഢീകരിക്കുന്നതുമായേനേ. എങ്കില്‍ നാമവര്‍ക്കു നമ്മുടെ പക്കല്‍ നിന്നുള്ള മഹത്തായ പ്രതിഫലം കൊടുക്കുകയും നേര്‍മാര്‍ഗദര്‍ശനം നല്‍കുകയും ചെയ്യുമായിരുന്നു³⁶

അല്ലാഹുവിനെയും റസൂലിനെയും ആര് അനുസരിക്കുന്നുവോ അവര്‍ അല്ലാഹു അനുഗ്രഹം ചെയ്ത പ്രവാചകന്മാര്‍, സ്വിദ്ദീഖുകള്‍, രക്തസാക്ഷികള്‍, സദ്‌വൃത്തര്‍ എന്നിവരോടൊപ്പമായിരിക്കും; എത്രയും മെച്ചപ്പെട്ട കൂട്ടുകാരത്രേ അവര്‍. അല്ലാഹുവിങ്കല്‍ നിന്നുള്ള മഹത്തായ ഔദാര്യമാണത്; സര്‍വജ്ഞനായി അല്ലാഹു തന്നെ പര്യാപ്തനത്രേ³⁷

സത്യവിശ്വാസികളേ, നിങ്ങള്‍ ജാഗ്രത പുലര്‍ത്തുകയും ചെറുവ്യൂഹങ്ങളായോ ഒറ്റക്കെട്ടായോ യുദ്ധത്തിനു പുറപ്പെടുകയും ചെയ്യുക. പിന്തിരിയുന്ന ചിലര്‍ നിങ്ങളിലുണ്ടെന്നു തീര്‍ച്ച; എന്നാല്‍, എന്തെങ്കിലും വിപത്തു നിങ്ങള്‍ക്കു ബാധിച്ചാല്‍, ഞാനവരൊന്നിച്ച് സന്നിഹിതനാകാതിരുന്നതുകൊണ്ട് അല്ലാഹു എനിക്കനുഗ്രഹം ചെയ്തു എന്നാണവന്‍ പ്രതികരിക്കുക. ഇനി, അല്ലാഹുവിങ്കല്‍ നിന്ന് എന്തെങ്കിലും അനുഗ്രഹം കൈവന്നാലോ, നിങ്ങള്‍ക്കും അവനുമിടയ്ക്ക് യാതൊരു സ്‌നേഹബന്ധവുമുണ്ടായിരുന്നിട്ടില്ലാത്ത വിധം അവന്‍ പരിഭവിക്കും :കഷ്ടം,ഞാനവരൊന്നിച്ചു ണ്ടായിരുന്നെങ്കില്‍ എനിക്കു മഹാ വിജയം നേടാമായിരുന്നു³⁸

പാരത്രിക ലോകത്തിനു പകരം ഐഹിക ജീവിതം വില്‍ക്കുന്നവര്‍ ദൈവമാര്‍ഗത്തില്‍ യുദ്ധം ചെയ്യട്ടെ. അല്ലാഹുവിന്റെ വഴിയില്‍ അടരാടിയിട്ട് ഒരാള്‍ വധിക്കപ്പെട്ടാലും വിജയിച്ചാലും നാമവന്ന് മഹത്തായ പ്രതിഫലം നല്‍കും. ഞങ്ങളുടെ നാഥാ, അക്രമികളുള്ള ഈ നാട്ടില്‍ നിന്ന് ഞങ്ങളെ മോചിപ്പിക്കുകയും നിന്റെ പക്കല്‍ നിന്നു ഒരു രക്ഷകനെയും സഹായിയെയും ഞങ്ങള്‍ക്കു നിശ്ചയിച്ചു തരികയും ചെയ്യേണമേ എന്നു പ്രാര്‍ത്ഥിക്കുന്ന ദുര്‍ബലരായ സ്ത്രീ പുരുഷന്മാരുടെയും കുട്ടികളുടെയും വിമോചനകാര്യത്തിലും അല്ലാഹുവിന്റെ മാര്‍ഗത്തിലും നിങ്ങളെന്തുകൊണ്ട് യുദ്ധം ചെയ്യുന്നില്ല?³⁹
സത്യവിശ്വാസികള്‍ അല്ലാഹുവിന്റെ വഴിയിലും നിഷേധികള്‍ പൈശാചിക പന്ഥാവിലുമാണ് അടരാടുക. അതുകൊണ്ട് നിങ്ങള്‍ പിശാചിന്റെ മിത്രങ്ങളോട് യുദ്ധം ചെയ്യുക. പിശാചിന്റെ കുതന്ത്രം ദുര്‍ബലമാണ്, തീര്‍ച്ച!

ചിലയാളുകളുടെ കാര്യം നിങ്ങളറിഞ്ഞില്ലേ? ബഹുദൈവവിശ്വാസികളോട് നിങ്ങള്‍ ഏറ്റുമുട്ടുന്നതവസാനിപ്പിക്കുകയും നമസ്‌കാരം നിലനിറുത്തുകയും സകാത്ത് നല്‍കുകയും ചെയ്യുക എന്ന് അവരോട് നിര്‍ദ്ദേശിക്കപ്പെടുകയുണ്ടായി⁴⁰
അങ്ങനെ അവര്‍ക്കു യുദ്ധം നിയമമാക്കപ്പെട്ടപ്പോഴാകട്ടെ, അവരില്‍ ഒരു വിഭാഗമതാ, അല്ലാഹുവിനെ ഭയപ്പെടുന്നതുപോലെയോ അതിലുപരിയോ ആയി ജനങ്ങളെപ്പേടിക്കുന്നു! അവരിങ്ങനെ പറയുകയും ചെയ്തു: നാഥാ, നീയെന്തിനാണ് ഞങ്ങള്‍ക്കു യുദ്ധം നിര്‍ബന്ധമാക്കിയിരിക്കുന്നത്? അടുത്ത ഒരവധിവരെ നീ ഞങ്ങളെ പിന്തിച്ചിട്ടിരുന്നുവെങ്കില്‍ എത്ര നന്നായേനേ! നബിയേ, താങ്കള്‍ പ്രഖ്യാപിക്കുക: ഭൗതികതയുടെ സൗഖ്യം വളരെ തുച്ഛമത്രേ; സൂക്ഷ്മതയുള്ളവര്‍ക്ക് പാരത്രിക ലോകമാണ് ഉത്തമം. ഒരല്‍പം പോലും നിങ്ങള്‍ അക്രമവിധേയരാവില്ല.

എവിടെയാണെങ്കിലും നിങ്ങളെ മരണം പിടികൂടുക തന്നെ ചെയ്യും; പണിതുയര്‍ത്തപ്പെട്ട കോട്ടകളിലാണെങ്കില്‍ പോലും⁴¹
വല്ല നന്മയും കപടവിശ്വാസികള്‍ക്കു ലഭിക്കുകയാണെങ്കില്‍ ഇത് അല്ലാഹുവിങ്കല്‍ നിന്നുള്ളതാണ് എന്ന് അവര്‍ പറയും; ഇനി എന്തെങ്കിലും തിന്മയാണ് വന്നുഭവിക്കുന്നതെങ്കില്‍, ഇത് നിന്റെ ദുഃശകുനം മൂലമാണ് എന്നാണവര്‍ തട്ടിവിടുക! നബിയേ, എല്ലാം അല്ലാഹുവിങ്കല്‍ നിന്നുണ്ടാകുന്നതാണ് എന്ന് അങ്ങ് പ്രഖ്യാപിക്കുക. അക്കൂട്ടര്‍ക്ക് എന്തുപറ്റി? ഒരു കാര്യവും അവര്‍ യഥായോഗ്യം മനസ്സിലാക്കുന്നില്ലല്ലോ?⁴²

ഏതൊരു നന്മ താങ്കള്‍ക്ക് വന്നുഭവിച്ചാലും അത് അല്ലാഹുവിങ്കല്‍ നിന്നുള്ളതാണ്; വല്ല തിന്മയും ബാധിക്കുന്നുവെങ്കില്‍ സ്വകര്‍മഫലമായുണ്ടാകുന്നതത്രേ. മാനവതക്കുള്ള ദൂതനായാണ് താങ്കളെ നാം നിയോഗിച്ചിട്ടുള്ളത്. അതിനു സാക്ഷിയായി അല്ലാഹു മതി. റസൂലിനെ ഒരാള്‍ അനുസരിക്കുന്നുവെങ്കില്‍ അയാള്‍ അല്ലാഹുവിനെ അനുസരിക്കുക തന്നെയാണ് ചെയ്തത്⁴³
ഇനി ആരെങ്കിലും പിന്തിരിഞ്ഞാല്‍ (അത് കാര്യമാക്കേണ്ട;) അവരുടെ കാവല്‍ക്കാരനായി താങ്കളെ നാം നിയോഗിച്ചിട്ടില്ല!

ഞങ്ങളുടെ നിലപാട് അനുസരണമാണ് എന്നവര്‍ തട്ടിവിടും⁴⁴
എന്നാല്‍, താങ്കളുടെ സന്നിധിയില്‍ നിന്ന് പുറത്തുപോയിക്കഴിഞ്ഞാല്‍ പറയുന്നതിനു വിപരീതമായി അവരിലൊരു വിഭാഗം നിശാഗൂഢാലോചന നടത്തും. അവരുടെ നിശാഗൂഢാലോചനകള്‍ അല്ലാഹു രേഖപ്പെടുത്തുന്നുണ്ട്. താങ്കള്‍ അവരെയവഗണിക്കുകയും അല്ലാഹുവിങ്കല്‍ ഭരമേല്‍പിക്കുകയും ചെയ്യുക. കാര്യങ്ങള്‍ ഭരമേല്‍പിക്കപ്പെടുവാന്‍ അല്ലാഹു തന്നെ മതി!

അവര്‍ ഖുര്‍ആനെപ്പറ്റി ചിന്തിക്കുന്നില്ലേ? അല്ലാഹു അല്ലാത്തവരുടെ പക്കല്‍ നിന്നുള്ള താണ് അതെങ്കില്‍ ഒട്ടേറെ വൈരുദ്ധ്യങ്ങള്‍ അവര്‍ക്കതില്‍ കാണാമായിരുന്നു⁴⁵
സമാധാനാവസ്ഥയുമായോ യുദ്ധഭീതിയുമായോ ബന്ധപ്പെട്ട എന്തെങ്കിലും വിവരം ലഭിച്ചാല്‍ കപടവിശ്വാസികള്‍ അത് പറഞ്ഞുപരത്തും. അവരത് റസൂലിന്റെയും തങ്ങളില്‍ കാര്യവിവരമുള്ളവരുടെയുമടുത്ത് എത്തിച്ചു കൊടുത്തിരുന്നുവെങ്കില്‍ അവരിലെ അന്വേഷണവിദഗ്ദര്‍ക്ക് അതു ഗ്രഹിക്കാന്‍ കഴിഞ്ഞിരുന്നേനെ. അല്ലാഹുവിന്റെ ഔദാര്യവും അനുഗ്രഹവും ഉണ്ടായിരുന്നില്ലെങ്കില്‍ അല്‍പം ചിലരൊഴികെ നിങ്ങള്‍ പിശാചിനെ പിന്‍പറ്റുമായിരുന്നു.

അതുകൊണ്ട് അല്ലാഹുവിന്റെ മാര്‍ഗത്തില്‍ താങ്കള്‍ ധര്‍മ സമരമനുഷ്ഠിക്കുക. സ്വന്തം കാര്യമേ താങ്കളോടനുശാസിക്കപ്പെടുകയുള്ളു. സത്യവിശ്വാസികളെ പ്രോത്സാഹിപ്പിക്കുകയും ചെയ്യുക. സത്യനിഷേധികളുടെ ദ്രോഹം അല്ലാഹു പ്രതിരോധിച്ചേക്കാം. അതിശക്തനും കഠിനമായി ശിക്ഷിക്കുന്നവനുമത്രേ അല്ലാഹു. ആരൊരാള്‍ ഉത്തമമായൊരു ശുപാര്‍ശ ചെയ്യുന്നുവോ അവന്ന് അതില്‍ നിന്ന് ഒരു വിഹിതമുണ്ടാകും. ഒരാള്‍ ചീത്തശുപാര്‍ശ ചെയ്താല്‍ അതില്‍ നിന്ന് ഒരോഹരി അയാള്‍ക്കും ലഭിക്കും. എല്ലാ കാര്യങ്ങള്‍ക്കും നിരീക്ഷകനാണ് അല്ലാഹു⁴⁶

നിങ്ങള്‍ക്ക് ഒരഭിവാദ്യമര്‍പ്പിക്കപ്പെട്ടാല്‍ അതിനെക്കാള്‍ മെച്ചപ്പെട്ടതോ അല്ലെങ്കില്‍ തത്തുല്യമെങ്കിലുമോ ആയി പ്രത്യഭിവാദ്യം ചെയ്യുക. അല്ലാഹു എല്ലാ കാര്യങ്ങള്‍ക്കും പ്രതിഫലം നല്‍കുന്നവനാണ്. അല്ലാഹു അല്ലാതെ വേറെ ഒരു ദൈവവുമില്ല. നിസ്സംശയം അന്ത്യനാളില്‍ നിങ്ങളെയവന്‍ ഒരുമിച്ചുകൂട്ടുക തന്നെ ചെയ്യും. അല്ലാഹുവിനേക്കാള്‍ സത്യസന്ധമായി കാര്യങ്ങള്‍ പറയുന്നവരായി ആരുണ്ട്?!

കപടവിശ്വാസികളുടെ കാര്യത്തില്‍ നിങ്ങളെങ്ങനെ ഇരുകക്ഷികളായിപ്പോയി! ദുഷ്‌ചെയ്തികള്‍ കാരണം അവരെ അല്ലാഹു മടക്കിവിട്ടിരിക്കുകയാണ്⁴⁷
അല്ലാഹു വഴിതെറ്റിച്ചവരെ നേര്‍മാര്‍ഗത്തിലാക്കാനാണോ നിങ്ങളുടെ ഉദ്ദേശ്യം? എങ്കില്‍, ഏതൊരാളെ അവന്‍ ദുര്‍മാര്‍ഗിയാക്കുന്നുവോ, അയാള്‍ക്ക് യാതൊരുവഴിയും നിങ്ങള്‍ കണ്ടെത്തുന്നതല്ല. നിങ്ങളും തങ്ങളെപ്പോലെ നിഷേധികളാകണം എന്നാണവരുടെയാഗ്രഹം; അപ്പോള്‍ നിങ്ങള്‍ തുല്യരാകുമല്ലോ. അതുകൊണ്ട്, അല്ലാഹുവിന്റെ വഴിയില്‍ അവര്‍ ഹിജ്‌റ ചെയ്യുന്നതുവരെ നിങ്ങളവരെ മിത്രങ്ങളാക്കരുത്. അവര്‍ പിന്തിരിയുകയാണെങ്കില്‍ നിങ്ങളവരെ പിടികൂടുകയും കണ്ടുകിട്ടിയേടത്തുവെച്ചു കൊല്ലുകയും ചെയ്യുക⁴⁸
അവരില്‍ ഒരാളെയും സഹായിയോ മിത്രമോ ആയി സ്വീകരിക്കരുത്. എന്നാല്‍ നിങ്ങളുടെ സഖ്യകക്ഷികളുമായി അടുപ്പത്തിലുള്ളവരുമായോ, നിങ്ങളോടോ സ്വന്തം ജനതയോടോ ഏറ്റുമുട്ടാന്‍ മനസ്സുവരാതെ നിങ്ങളെ സമീപിച്ചവരുമായോ യുദ്ധത്തിലേര്‍പ്പെടരുത്. അല്ലാഹു ഉദ്ദേശിച്ചിരുന്നുവെങ്കില്‍ നിങ്ങള്‍ക്കുമേല്‍ അവര്‍ക്ക് ആധിപത്യം നല്‍കുകയും നിങ്ങളോടവര്‍ പടപൊരുതുകയും ചെയ്യുമായിരുന്നു⁴⁹
ഇനി നിങ്ങളെ മാറ്റി നിര്‍ത്തി, ഏറ്റുമുട്ടല്‍ ഒഴിവാക്കി സന്ധിക്കു തയ്യാറാകുന്നുവെങ്കില്‍ അവരുമായി യുദ്ധം ചെയ്യാന്‍ ഒരു വഴിയും അല്ലാഹു നിങ്ങള്‍ക്കുണ്ടാക്കിയിട്ടില്ല.

വേറൊരു വിഭാഗം കപടവിശ്വാസികളെയും നിങ്ങള്‍ക്ക് കാണാം; തങ്ങളുടെയാളുകളില്‍ നിന്നും നിങ്ങളില്‍ നിന്നും സുരക്ഷിതരായിത്തീരണമെന്നാണവരുടെ ഉദ്ദേശ്യം. മുസ്‌ലിംകള്‍ക്കെതിരെ കുഴപ്പമുണ്ടാക്കാന്‍ തിരിച്ചു വിളിക്കപ്പെടുമ്പോഴെല്ലാം അവരതില്‍ ചാടിവീഴും. അവര്‍ നിങ്ങളെ വിട്ട് മാറി നില്‍ക്കുകയും നിങ്ങളുടെ മുമ്പാകെ സന്ധിസമര്‍പ്പിക്കുകയും ആക്രമണ വാസന നിറുത്തിവെക്കുകയും ചെയ്യുന്നില്ലെങ്കില്‍, അവരെ പിടികൂടുകയും കണ്ടിടത്തു വെച്ചു കൊല്ലുകയും ചെയ്യുക. അവര്‍ക്കെതിരെ സ്പഷ്ടമായ ന്യായം നിങ്ങള്‍ക്ക് നാം നല്‍കിയിരിക്കുന്നു⁵⁰

ഒരു സത്യവിശ്വാസി മറ്റൊരു സത്യവിശ്വാസിയെ വധിക്കുക എന്നത് സംഭവിക്കാന്‍ പാടില്ല; അബദ്ധവശാല്‍ വന്നുപോകുന്നതൊഴികെ. എന്നാല്‍, അബദ്ധത്തില്‍ ഒരു സത്യവിശ്വാസിയെ വല്ലവനും വധിച്ചാല്‍, ഒരു വിശ്വാസിയായ അടിമയെ മോചിപ്പിക്കുകയും പരേതന്റെ അവകാശികള്‍ക്ക് നഷ്ടപരിഹാരം നല്‍കുകയുമാണ് പ്രായശ്ചിത്തം; അവകാശികള്‍ ഔദാര്യമായി വിട്ടുകൊടുത്താലൊഴികെ. ഇനി ഘാതേയന്‍ സത്യവിശ്വാസിയും നിങ്ങളുടെ ശത്രുവിഭാഗങ്ങളില്‍ പെട്ടവനുമാണെങ്കില്‍ സത്യവിശ്വാസിയായ ഒരടിമയെ മോചിപ്പിക്കുക മാത്രമാണ് പ്രായശ്ചിത്തം. ഇനി, നിങ്ങളുമായി സന്ധീവ്യവസ്ഥകളുള്ള ഒരു ജനസമൂഹത്തില്‍ പെട്ടവനാണ് ഘാതേയനെങ്കില്‍ അവകാശികള്‍ക്ക് നഷ്ടപരിഹാരം കൊടുക്കുകയും വിശ്വാസിയായ ഒരടിമയെ മോചിപ്പിക്കുകയും വേണം; അടിമയെ കിട്ടിയില്ലെങ്കില്‍ രണ്ടുമാസം തുടരെ നോമ്പനുഷ്ഠിക്കണം. അല്ലാഹു നിശ്ചയിച്ച പശ്ചാത്താപമാര്‍ഗമെന്ന നിലക്കാണിതു ചെയ്യേണ്ടത്. സര്‍വജ്ഞാനിയും യുക്തിമാനുമാണ് അല്ലാഹു⁵¹
ഒരു സത്യവിശ്വാസിയെ കരുതിക്കൂട്ടി ഒരാള്‍ കൊല്ലുന്ന പക്ഷം നരകമാണവന്റെ പ്രതിഫലം. അവനതില്‍ ശാശ്വതവാസിയായിരിക്കും. അല്ലാഹു അവനോട് കോപിക്കുകയും അവനെ ശപിക്കുകയും ചെയ്യും. കഠോര ശിക്ഷയാണ് അവന് അല്ലാഹു തയ്യാറാക്കിവെച്ചിട്ടുള്ളത്⁵²

സത്യവിശ്വാസികളേ, നിങ്ങള്‍ അല്ലാഹുവിന്റെ മാര്‍ഗത്തിലായി യുദ്ധയാത്ര പുറപ്പെട്ടാല്‍ കാര്യങ്ങള്‍ സ്പഷ്ടമായി ഗ്രഹിക്കണം. നിങ്ങള്‍ക്ക് സലാം പറഞ്ഞ ഒരാളോട് നീ മുസ്‌ലിമല്ല എന്നു-ഭൗതിക നേട്ടം കാംക്ഷിച്ച്-പ്രതികരിക്കരുത്. എന്നാല്‍ ലാഭങ്ങള്‍ അല്ലാഹുവിങ്കല്‍ ധാരാളമുണ്ട്. മുമ്പ് നിങ്ങളും ഇങ്ങനെത്തന്നെയായിരുന്നു; എന്നിട്ട് നിങ്ങള്‍ക്ക് അല്ലാഹു ഔദാര്യം ചെയ്തതാണ്. അതുകൊണ്ട് കാര്യങ്ങള്‍ സ്പഷ്ടമായി ഗ്രഹിക്കണം. നിങ്ങളുടെ പ്രവൃത്തികളെക്കുറിച്ച് അല്ലാഹു സൂക്ഷ്മജ്ഞാനി തന്നെയാകുന്നു⁵³

അകാരണമായി യുദ്ധത്തില്‍ നിന്നൊഴിഞ്ഞിരിക്കുന്ന വിശ്വാസികളും ശരീരവും സമ്പത്തും കൊണ്ട് ദിവ്യമാര്‍ഗത്തില്‍ അടരാടുന്നവരും തുല്യരാവുകയില്ല. ധനവും ദേഹവും കൊണ്ട് ധര്‍മസമരം ചെയ്യുന്നവര്‍ക്ക് സകാരണമായി യുദ്ധത്തില്‍ നിന്നൊഴിഞ്ഞു നില്‍ക്കുന്നവരെക്കാള്‍ വിശിഷ്ടസ്ഥാനം അല്ലാഹു നല്‍കിയിരിക്കുന്നു. എല്ലാവര്‍ക്കും അല്ലാഹു ഉദാത്ത പദവി വാഗ്ദാനം ചെയ്തിട്ടുണ്ട്. പുണ്യസമരം ചെയ്യുന്നവരെ യുദ്ധത്തില്‍ നിന്നൊഴിഞ്ഞിരിക്കുന്നവരെക്കാള്‍ മഹത്തായ പ്രതിഫലം കൊണ്ട്, തന്റെ പക്കല്‍ നിന്നുള്ള ശ്രേഷ്ഠപദവികളും പാപമോചനവും കാരുണ്യവും നല്‍കിക്കൊണ്ട് അല്ലാഹു ഉല്‍കൃഷ്ടരാക്കിയിരിക്കുന്നു. ഏറെ പൊറുക്കുന്നവനും പരമ കാരുണികനുമാണ് അല്ലാഹു⁵⁴

നിഷേധികള്‍ക്കു മധ്യേ ജീവിച്ച് സ്വന്തത്തോടു ദ്രോഹം ചെയ്തവരെ മരിപ്പിക്കുമ്പോള്‍ മലക്കുകള്‍ ചോദിക്കും: നിങ്ങളുടെ സ്ഥിതി എന്തായിരുന്നു? ഞങ്ങള്‍ സ്വന്തം നാട്ടില്‍ പീഡിതരായിരുന്നു എന്ന് അവര്‍ പ്രതികരിക്കും. അല്ലാഹുവിന്റെ ഭൂമി വിസ്തൃതമായിരുന്നില്ലേ, അതിലെവിടെയെങ്കിലും നിങ്ങള്‍ക്കു മാറിത്താമസിക്കാമായിരുന്നില്ലേ എന്ന് അവരോട് മലക്കുകള്‍ തിരിച്ചു ചോദിക്കുന്നതാണ്. നരകമാണവരുടെ ആവാസ കേന്ദ്രം. വളരെ ദുഷിച്ച സങ്കേതമത്രേ അത്. എന്നാല്‍ ഒരു തന്ത്രവുമാവിഷ്‌കരിക്കാനും ഒരു വഴിയും കണ്ടെത്താനുമാകാതെ പീഡിതരായിക്കഴിഞ്ഞിരുന്ന സ്ത്രീ-പുരുഷന്മാരും കുട്ടികളും ഇതില്‍ നിന്നൊഴിവാണ്; അവര്‍ക്ക് അല്ലാഹു മാപ്പ് നല്‍കിയേക്കാം. ഏറെ മാപ്പരുളുന്നവനും പൊറുക്കുന്നവനുമാണ് അല്ലാഹു⁵⁵

അല്ലാഹുവിന്റെ വഴിയിലായി ഒരാള്‍ ദേശത്യാഗം ചെയ്താല്‍ ഭൂമിയില്‍ ഒട്ടേറെ അഭയസ്ഥലങ്ങളും ജീവിത വിശാലതയും അവനു ലഭ്യമാകും. ഒരാള്‍ സ്വഗൃഹത്തില്‍ നിന്ന് അല്ലാഹുവിങ്കലേക്കും റസൂലിങ്കലേക്കുമായി ദേശത്യാഗിയായി പുറപ്പെടുകയും പിന്നീടവനു മരണം വന്നെത്തുകയും ചെയ്താല്‍ അല്ലാഹുവിങ്കല്‍ അവന്റെ പ്രതിഫലം സ്ഥിരീകൃതമായിക്കഴിഞ്ഞു! ഏറെ പൊറുക്കുന്നവനും കരുണാമയനുമാണ് അല്ലാഹു⁵⁶

നിങ്ങള്‍ ഭൂമിയില്‍ യാത്ര ചെയ്യുകയാണെങ്കില്‍- ശത്രുക്കള്‍ അക്രമിക്കുമെന്നു ഭയന്നാല്‍- നമസ്‌കാരം ഖസ്വ്ര്‍ ആക്കുന്നതിനു വിരോധമില്ല. സത്യനിഷേധികള്‍ നിങ്ങളുടെ പ്രത്യക്ഷ ശത്രുക്കള്‍ തന്നെയാകുന്നു⁵⁷

താങ്കള്‍ അനുയായികളൊന്നിച്ചാവുകയും അവര്‍ക്ക് ഇമാമായി നമസ്‌കരിക്കുകയുമാണെങ്കില്‍ അവരിലൊരു വിഭാഗം ആയുധ പാണികളായി താങ്കളൊന്നിച്ചു നമസ്‌കരിക്കട്ടെ. അവരുടെ നമസ്‌കാരം തീര്‍ന്നാല്‍ പിന്നിലേക്കുമാറുകയും നമസ്‌കരിക്കാത്ത മറ്റേ വിഭാഗം വന്ന് ജാഗ്രത്തുക്കളും ആയുധ പാണികളുമായി താങ്കളൊന്നിച്ചു നമസ്‌കരിക്കുകയും ചെയ്യട്ടെ. സ്വന്തം ആയുധങ്ങളെയും സാധനങ്ങളെയും കുറിച്ച് നിങ്ങള്‍ അശ്രദ്ധരായാല്‍ തല്‍ക്ഷണം ഒരൊറ്റ ആഞ്ഞടി നടത്താമെന്നാണ് സത്യനിഷേധികളുടെ പൂതി! ഇനി മഴ മൂലം ബുദ്ധിമുട്ടാവുകയോ രോഗികളാവുകയോ ചെയ്താല്‍ നിങ്ങള്‍ ആയുധം താഴെ വെക്കുന്നതിനു കുഴപ്പമില്ല; എന്നാലും നിതാന്ത ജാഗ്രത പുലര്‍ത്തണം. സത്യനിഷേധികള്‍ക്ക് അല്ലാഹു അപമാനകരമായ ശിക്ഷ ഒരുക്കിവെക്കുക തന്നെ ചെയ്തിരിക്കുന്നു⁵⁸
ഇനി നമസ്‌കാരം നിര്‍വഹിച്ചു കഴിഞ്ഞാല്‍ നിന്നും ഇരുന്നും കിടന്നും സര്‍വദാ അല്ലാഹുവിനെ സ്മരിക്കുക; സമാധാന നില പ്രാപിച്ചാല്‍ മുറപോലെ നമസ്‌കരിക്കണം. നിശ്ചയമായും സത്യവിശ്വാസികള്‍ക്ക് സമയനിര്‍ണിതമായ നിര്‍ബന്ധബാധ്യതയത്രേ നമസ്‌കാരം

എതിരാളികളെ അന്വേഷിച്ചു പിടിക്കുന്നതില്‍ നിങ്ങള്‍ ദുര്‍ബലരാകരുത്. നിങ്ങള്‍ക്ക് വേദനാജനകമായ അവസ്ഥകളുണ്ടാകുന്നുണ്ട് എങ്കില്‍ അതേ പോലെ അവരും വേദനിക്കുന്നുണ്ട്. എന്നാല്‍ നിങ്ങളാകട്ടെ അവര്‍ക്ക് പ്രതീക്ഷിക്കാനില്ലാത്ത ദിവ്യാനുഗ്രഹം അല്ലാഹുവിങ്കല്‍ നിന്നു പ്രത്യാശിക്കുന്നുണ്ട് താനും. അല്ലാഹു പരമജ്ഞാനിയും യുക്തിമാനുമാകുന്നു.

അല്ലാഹുവിന്റെ മാര്‍ഗദര്‍ശനമനുസരിച്ച് മനുഷ്യര്‍ക്കിടയില്‍ വിധികല്‍പിക്കാനാണ് സത്യസമേതം താങ്കള്‍ക്ക് നാം ഈ ഖുര്‍ആന്‍ അവതരിപ്പിച്ചു തന്നിരിക്കുന്നത്; വഞ്ചകന്മാര്‍ക്കു വേണ്ടി വാദിക്കുന്നവനാകരുത് താങ്കള്‍; അല്ലാഹുവിനോട് പാപമോചനമര്‍ത്ഥിക്കുക. അല്ലാഹു വളരെയേറെ പൊറുക്കുന്നവനും കരുണാമയനുമാണ് തീര്‍ച്ച.

ആത്മവഞ്ചകന്മാര്‍ക്ക് വേണ്ടി താങ്കള്‍ വാദിക്കരുത്. കഠിന വഞ്ചകനും മഹാപാപിയുമായ ഒരാളെ അല്ലാഹു സ്‌നേഹിക്കുകയേയില്ല. ആളുകളില്‍ നിന്നു ഒളിഞ്ഞു കഴിയുകയാണവര്‍; എന്നാല്‍, അല്ലാഹുവില്‍ നിന്നു ഒന്നും മറച്ചുവെക്കാനവര്‍ക്കാകില്ല⁵⁹
അല്ലാഹുവിന് അതൃപ്തമായ വാക്കുകളിലൂടെ നിശാ ഗൂഢാലോചന നടത്തിയപ്പോള്‍ അവരൊന്നിച്ചു അവനുണ്ട്. അവരുടെ ചെയ്തികളെക്കുറിച്ചെല്ലാം സൂക്ഷ്മജ്ഞനാണ് അല്ലാഹു. ശരി, ഇഹലോകത്ത് നിങ്ങള്‍ ആ വഞ്ചകര്‍ക്കുവേണ്ടി വാദിച്ചു; എന്നാല്‍, അന്ത്യനാളില്‍ അവര്‍ക്കുവേണ്ടി അല്ലാഹുവിനോടു വാദിക്കാനോ അവരുടെ കാര്യം ഏറ്റെടുക്കാനോ ആരുണ്ടാകും?⁶⁰

ആരെങ്കിലും ഒരപരാധമോ ആത്മദ്രോഹമോ ചെയ്തിട്ട് അല്ലാഹുവിനോട് പശ്ചാത്തപിക്കുന്ന പക്ഷം വളരെയേറെ പൊറുക്കുന്നവനും കരുണാമയനുമായി അല്ലാഹുവിനെ അവന്‍ കണ്ടെത്തുന്നതാണ്. ഒരാള്‍ പാപം അനുവര്‍ത്തിക്കുന്നുവെങ്കില്‍ തനിക്കെതിരെ തന്നെയാണ് അവനത് ചെയ്യുന്നത്. അല്ലാഹു സര്‍വജ്ഞനും യുക്തിമാനുമാകുന്നു. ഒരാള്‍ ഒരു തെറ്റോ പാതകമോ ചെയ്തിട്ട് അത് ഒരു നിരപരാധിയുടെ മേല്‍ വെച്ചുകെട്ടുന്ന പക്ഷം അവന്‍ ഒരു വ്യാജാരോപണവും സ്പഷ്ടപാതകവും വഹിക്കുക തന്നെയാണ് ചെയ്തിരിക്കുന്നത്.

അല്ലാഹുവിന്റെ ഔദാര്യവും അനുഗ്രഹവും ഉണ്ടായിരുന്നില്ലെങ്കില്‍ അവരിലൊരു വിഭാഗം താങ്കളെ (നീതി പൂര്‍വമായ വിധിയില്‍ നിന്നു) വഴിതെറ്റിക്കാന്‍ തീരുമാനിച്ചതാണ്.⁶¹
സത്യത്തില്‍ സ്വന്തത്തെ മാത്രമാണവര്‍ ദുര്‍മാര്‍ഗത്തിലാക്കുന്നത്. താങ്കള്‍ക്ക് ഒരു വിധ ദ്രോഹവും വരുത്താന്‍ അവര്‍ക്കാവില്ല. അല്ലാഹു താങ്കള്‍ക്ക് വേദവും ജ്ഞാനവും അവതരിപ്പിക്കുകയും അറിയാത്തതു പഠിപ്പിക്കുകയും ചെയ്തു. താങ്കള്‍ക്ക് അല്ലാഹു നല്‍കിയ അനുഗ്രഹം അതിമഹത്തരമാകുന്നു.

അവരുടെ മിക്ക രഹസ്യാലോചനകളിലും നന്മയേ ഇല്ല; ദാനം ചെയ്യാനോ സദാചാരമനുവര്‍ത്തിക്കാനോ ആളുകള്‍ക്കിടയില്‍ രഞ്ജിപ്പുണ്ടാക്കാനോ നിര്‍ദേശിക്കുന്നവരുടേതിലൊഴികെ. ദൈവ പ്രീതികാംക്ഷിച്ച് അങ്ങനെയൊരാള്‍ ചെയ്താല്‍ അവനു നാം അതിമഹത്തായ പ്രതിഫലം നല്‍കുന്നതാണ്.

സന്മാര്‍ഗം വ്യക്തമായിക്കഴിഞ്ഞിട്ടും ഒരാള്‍ റസൂലുമായി ഭിന്നിക്കുകയും സത്യവിശ്വാസികളുടേതല്ലാത്ത വഴി അനുഗമിക്കുകയും ചെയ്യുന്നുവെങ്കില്‍ അവന്റെ പാട്ടിനു നാമവനെ വിടുകയും നരകത്തില്‍ കടത്തുകയും ചെയ്യും.⁶²
എത്രഹീനമായ സങ്കേതമാണത്!

തന്നോട് മറ്റാരെയെങ്കിലും പങ്കുചേര്‍ക്കപ്പെടുന്ന മഹാപാതകമായ ബഹുദൈവ വിശ്വാസം അല്ലാഹു പൊറുക്കുകയില്ല, തീര്‍ച്ച. അതല്ലാത്തത് താനുദ്ദേശിക്കുന്നവര്‍ക്ക് അവന്‍ പൊറുത്തുകൊടുക്കും. അല്ലാഹുവിനോട് മറ്റാരെയെങ്കിലും ഒരാള്‍ പങ്കുചേര്‍ത്താല്‍ അവന്‍ ബഹുദൂരം വഴിതെറ്റുക തന്നെ ചെയ്തു!

അല്ലാഹുവിനെവിട്ട് അവര്‍ ആരാധിക്കുന്നത് ചില പെണ്ണുങ്ങളെ മാത്രമാണ്. അല്ലാഹു ശപിച്ച ധിക്കാരിയായ പിശാചി - ഇബ്‌ലീസ്- നെയല്ലാതെ മറ്റാരെയുമല്ല അവര്‍ ആരാധിക്കുന്നത്⁶³
അല്ലാഹുവോടവന്‍ പറഞ്ഞിട്ടുണ്ട്: നിന്റെ അടിമകളില്‍ നിന്നു ഒരു നിശ്ചിതവിഭാഗത്തെ തീര്‍ച്ചയായും ഞാന്‍ സ്വന്തമാക്കുന്നതും ദുര്‍മാര്‍ഗത്തിലാക്കുന്നതും വ്യാമോഹിപ്പിക്കുന്നതുമാണ്; ഞാന്‍ കല്‍പിക്കുമ്പോള്‍ അവര്‍ കാലികളുടെ കാതുകള്‍ കീറും, ഞാന്‍ ഉത്തരവിടുമ്പോള്‍ അവര്‍ അല്ലാഹുവിന്റെ സൃഷ്ടിപ്പില്‍ മാറ്റം വരുത്തും, തീര്‍ച്ച⁶⁴
എന്നാല്‍, അല്ലാഹുവിനെ വിട്ട് പിശാചിനെ ആര് സംരക്ഷകനാക്കുന്നുവോ അവന്‍ സ്പഷ്ടമായി പരാജയത്തിലാപതിക്കുക തന്നെ ചെയ്തിരിക്കുന്നു.

പിശാച് അവര്‍ക്ക് പലതും വാഗ്ദാനം ചെയ്യും; ഒട്ടേറെ വ്യാമോഹങ്ങള്‍ ജനിപ്പിക്കും. വഞ്ചന മാത്രമേ അവര്‍ക്കവന്‍ വാഗ്ദാനം ചെയ്യുന്നുള്ളൂ. അവരുടെ സങ്കേതം നരകമാകുന്നു. അതില്‍ നിന്ന് ഒരഭയസ്ഥാനം അവര്‍ കണ്ടെത്തുന്നതല്ല.

സത്യവിശ്വാസം കൈക്കൊള്ളുകയും സല്‍ക്കര്‍മങ്ങളനുഷ്ഠിക്കുകയും ചെയ്തവരെ താഴ്ഭാഗത്തുകൂടി നദികളൊഴുകുന്ന സ്വര്‍ഗങ്ങളില്‍ നാം പ്രവേശിപ്പിക്കുന്നതാണ്. അവരതില്‍ ശാശ്വതനിവാസികളായിരിക്കും. അല്ലാഹുവിങ്കല്‍ നിന്നുള്ള സത്യസന്ധമായ വാഗ്ദാനമാണിത്. അല്ലാഹുവിനേക്കാള്‍ സത്യഭാഷിയായി ആരുണ്ട്?

ഈ വാഗ്ദത്ത സ്വര്‍ഗം നിങ്ങളുടെ വ്യാമോഹം കൊണ്ടുകിട്ടുകയില്ല; വേദക്കാര്‍ പൂതി വെച്ചു നടന്നതുകൊണ്ടും ലഭ്യമാകില്ല⁶⁵
ആരൊരാള്‍ തിന്മപ്രവര്‍ത്തിച്ചുവോ അതിനവന്‍ പ്രതിഫലം നല്‍കപ്പെടും. അല്ലാഹുവിനെ കൂടാതെ ഒരു രക്ഷകനെയും സഹായിയെയും അവനു കിട്ടില്ല. സത്യവിശ്വാസിയായി കൊണ്ട് ആണോ പെണ്ണോ ആയ ഒരാള്‍ സല്‍ക്കര്‍മങ്ങള്‍ അനുഷ്ഠിച്ചാല്‍ അവര്‍ സ്വര്‍ഗത്തില്‍ പ്രവേശിക്കും. കടുകിട അവരോട് അക്രമം പ്രവര്‍ത്തിക്കപ്പെടില്ല.

സദ്‌വൃത്തനായി സ്വന്തത്തെ അല്ലാഹുവിന് കീഴ്‌പ്പെടുത്തുകയും ഋജുമാനസനായി ഇബ്രാഹീം നബിയുടെ മാര്‍ഗം പിന്‍പറ്റുകയും⁶⁶
ചെയ്തവനെക്കാള്‍ ഉത്തമമതസ്ഥനായി മറ്റാരുണ്ട്? ഇബ്രാഹീം നബിയെ അല്ലാഹു ആത്മമിത്രമായി സ്വീകരിച്ചിരിക്കുന്നു. ഭുവന-വാനങ്ങളിലുള്ളതെല്ലാം അല്ലാഹുവിന്റേതാണ്. സമസ്ത കാര്യങ്ങളെ സംബന്ധിച്ചും സൂക്ഷ്മജ്ഞനാണ് അല്ലാഹു.

വനിതകളുടെ കാര്യത്തില്‍ താങ്കളോടവര്‍ മതവിധി ചോദിക്കുന്നു. പറയുക: അവരുടെ കാര്യത്തില്‍ അല്ലാഹു ഇതാ നിങ്ങള്‍ക്ക് മതവിധി നല്‍കുന്നു. നിര്‍ണയിക്കപ്പെട്ട അവകാശങ്ങള്‍ നിങ്ങള്‍ കൊടുക്കാതിരിക്കുകയും എന്നാല്‍ നിങ്ങള്‍ വിവാഹം കഴിക്കാന്‍ ആഗ്രഹിക്കുകയും ചെയ്യുന്ന അനാഥ സ്ത്രീകളുടെ കാര്യത്തിലും⁶⁷
ദുര്‍ബലരായ കുട്ടികളുടെ കാര്യത്തിലും ഈ ഗ്രന്ഥത്തില്‍ നേരത്തെ നിങ്ങള്‍ക്ക് പാരായണം ചെയ്യപ്പെട്ടുകഴിഞ്ഞ വിധികളും ഗ്രഹിക്കുക. അനാഥകളോട് നീതിപൂര്‍വം വര്‍ത്തിക്കണമെന്ന നിയമവും ഓര്‍ക്കണം. നിങ്ങളനുവര്‍ത്തിക്കുന്ന ഏതു നന്മയും അല്ലാഹു നന്നായറിയും. ഭര്‍ത്താവിന്റെ പിണക്കമോ അവഗണനയോ ഒരു സ്ത്രീ ഭയപ്പെട്ടാല്‍ അവര്‍ പരസ്പരം സന്ധിയുണ്ടാക്കുന്നതിനു കുഴപ്പമില്ല. ഒത്തുതീര്‍പ്പിലെത്തുന്നതാണ് ഏറ്റവും നല്ലത്⁶⁸
മനുഷ്യ ഹൃദയങ്ങളിലെ നിത്യസാന്നിധ്യമാണ് ലുബ്ധത. നിങ്ങള്‍ ഉദാത്ത സമീപനമനുവര്‍ത്തിക്കുകയും സൂക്ഷ്മത പുലര്‍ത്തുകയും ചെയ്യുന്നുവെങ്കില്‍ നിങ്ങളുടെ ചെയ്തികളെപ്പറ്റി അഗാധ ജ്ഞാനിയാണ് അല്ലാഹു. നിങ്ങള്‍ക്ക് എത്ര കൊതിയുണ്ടെങ്കിലും ശരി, ഭാര്യമാര്‍ക്കിടയില്‍ തുല്യ നീതി പാലിക്കാനാവുകയേയില്ല; അതുകൊണ്ട് ഒരുത്തിയുമായി പൂര്‍ണാഭിമുഖ്യം പുലര്‍ത്തി മറ്റവളെ ബന്ധനസ്ഥയെപ്പോലെ വിട്ടേക്കരുത്⁶⁹
നിങ്ങള്‍ സമീപനം മെച്ചപ്പെടുത്തുകയും സൂക്ഷ്മത പുലര്‍ത്തുകയും ചെയ്യുന്ന പക്ഷം അല്ലാഹു ഏറെ പൊറുക്കുന്നവനും കരുണാമയനുമാകുന്നു. ഇനി അവരിരുവരും വഴിപിരിയുന്നുവെങ്കില്‍ തന്റെ വിശാലമായ കഴിവില്‍ നിന്നു അവര്‍ ഓരോരുത്തരെയും അല്ലാഹു സ്വാശ്രയരാക്കുന്നതാണ്. പ്രവിശാലനായ ഔദാര്യനും യുക്തിമാനുമാണ് അല്ലാഹു

ഭുവന-വാനങ്ങളിലുള്ളതൊക്കെയും അല്ലാഹുവിന്റേതാണ്. നിങ്ങള്‍ക്കുമുമ്പ് വേദം നല്‍കപ്പെട്ടവരോടും നിങ്ങളോടും അല്ലാഹുവിനെ സൂക്ഷിക്കണമെന്നു നാം കല്‍പിച്ചിരിക്കുന്നു. ഇനി നിങ്ങള്‍ നിഷേധികളാകുന്നുവെങ്കില്‍ ഒരു കുഴപ്പവുമില്ല, കാരണം, ഭുവന-വാനങ്ങളിലുള്ളതൊ ക്കെയും അല്ലാഹുവിന്റെതാണ്. സ്വയം പര്യാപ്തനും സ്തുത്യര്‍ഹനുമാണ് അല്ലാഹു. ആകാശ ഭൂമികളിലുള്ളതെല്ലാം അല്ലാഹുവിന്റെതാണ്. അതിനു സാക്ഷിയായി അവന്‍ തന്നെ മതി! ഹേ മനുഷ്യരേ, അവനുദ്ദേശിക്കുകയാണെങ്കില്‍ നിങ്ങളെ ഉന്മൂലനം ചെയ്ത് മറ്റൊരുകൂട്ടരെ അവന്‍ കൊണ്ടുവരും. അല്ലാഹു അതിനു കഴിവുറ്റവനത്രേ. ഇഹലോകത്തെ പ്രതിഫലമാണ് ഒരാള്‍ ഉദ്ദേശിക്കുന്നതെങ്കില്‍, അവനറിയണം, ഇഹലോകത്തെയും പരലോകത്തെയും പ്രതിഫലം അല്ലാഹുവിങ്കലാണുള്ളത്⁷⁰
അല്ലാഹു എല്ലാം കേള്‍ക്കുന്നവനും കാണുന്നവനുമാകുന്നു.

സത്യവിശ്വാസികളേ, നിങ്ങള്‍ കണിശമായ നീതി പാലകരാവുകയും അല്ലാഹുവിനു വേണ്ടിയുള്ള സാക്ഷികളാവുകയും ചെയ്യുക, അത് നിങ്ങള്‍ക്കുതന്നെയോ മാതാപിതാക്കള്‍ക്കോ അടുത്ത ബന്ധുക്കള്‍ക്കോ എതിരായാലും ശരി. അവന്‍ ധനികനോ ദരിദ്രനോ ആയാലും അവരിരുവരോടും ഏറ്റം ബന്ധപ്പെട്ടവന്‍ അല്ലാഹുവാണ്. അത് കൊണ്ട് നീതി കൈവിട്ട് സ്വേച്ഛയെ നിങ്ങള്‍ പിന്‍പറ്റരുത്. വളച്ചൊടിച്ചു പറയുകയോ സാക്ഷ്യത്തില്‍ നിന്നു പിന്തിരിയുകയോ ചെയ്യുന്നുവെങ്കില്‍, നിങ്ങളുടെ ചെയ്തികളെക്കുറിച്ചു അല്ലാഹു സൂക്ഷ്മജ്ഞാനിയാകുന്നു. സത്യവിശ്വാസികളേ, അല്ലാഹുവിലും അവന്റെ റസൂലിലും തന്റെ ദൂതന്‍ മുഹമ്മദ് നബിക്കും അതിനുമുമ്പും അവനവതരിപ്പിച്ച കിത്താബിലും നിങ്ങള്‍ വിശ്വസിക്കുക. അല്ലാഹുവിനെയും അവന്റെ മലക്കുകളെയും കിത്താബുകളെയും മുര്‍സലുകളെയും അന്ത്യനാളിനെയും ആരു നിഷേധിക്കുന്നുവോ, അവന്‍ ബഹുദൂരം വഴിതെറ്റുക തന്നെ ചെയ്തു⁷¹

സത്യവിശ്വാസം കൈക്കൊള്ളുകയും പിന്നീട് നിഷേധികളാവുകയും വീണ്ടും വിശ്വസിക്കുകയും പിന്നെയും നിഷേധം വരിക്കുകയും അനന്തരം വര്‍ധമാനമായ അവിശ്വാസം പുല്‍കുകയും ചെയ്തവര്‍ക്ക് അല്ലാഹു പൊറുത്തു കൊടുക്കുകയോ സന്മാര്‍ഗ ദര്‍ശനം നല്‍കുകയോ ചെയ്യുന്നതേയല്ല⁷²
സത്യവിശ്വാസികളെ വിട്ട് നിഷേധികളെ സംരക്ഷകരായി സ്വീകരിക്കുന്ന കപട വിശ്വാസികളോട്, അവര്‍ക്ക് വേദനാ ജനകമായ ശിക്ഷയുണ്ടെന്നു താങ്കള്‍ ശുഭവാര്‍ത്തയറിയിക്കുക. ആ നിഷേധികളുടെയടുത്താണോ അവര്‍ പ്രതാപം പ്രത്യാശിക്കുന്നത്? എന്നാല്‍ ആഭിജാത്യമത്രയും അല്ലാഹുവിങ്കലത്രേ!

അല്ലാഹുവിന്റെ വചനങ്ങള്‍ നിഷേധിക്കപ്പെടുകയും അവഹേളിക്കപ്പെടുകയും ചെയ്യുന്നത് കേട്ടാല്‍ അവര്‍ മറ്റു വല്ല സംസാരത്തിലും വ്യാപൃതരാകുന്നതുവരെ നിങ്ങള്‍ അവരൊന്നിച്ചിരിക്കരുതെന്നും അങ്ങനെ ഇരിക്കുകയാണെങ്കില്‍ അവരെപ്പോലെ നിങ്ങളുമായിത്തീരുമെന്നും അല്ലാഹു ഈ ഖുര്‍ആനില്‍ നിങ്ങള്‍ക്കവതരിപ്പിച്ചു തന്നിട്ടുണ്ടല്ലോ⁷³
കപടവിശ്വാസികളെയും നിഷേധികളെയുമൊന്നടങ്കം നരകത്തില്‍ അല്ലാഹു ഒരുമിച്ചുകൂട്ടുന്നതാണ്. നിങ്ങളുടെ അവസ്ഥകള്‍ നിരീക്ഷിച്ചു കൊണ്ടിരിക്കയാണ് ആ കപടന്മാര്‍. അല്ലാഹുവിങ്കല്‍ നിന്നു ഒരു നേട്ടം നിങ്ങള്‍ക്ക് ലഭ്യമായാല്‍, 'ഞങ്ങള്‍ നിങ്ങളൊന്നിച്ചു തന്നെയായിരുന്നില്ലേ' എന്നവര്‍ തട്ടിവിടും. ഇനി അവിശ്വാസികള്‍ക്കാണ് വിജയമുണ്ടായതെങ്കില്‍ 'നിങ്ങളെ കീഴ്‌പ്പെടുത്താന്‍ കഴിയുമായിരുന്നിട്ടും വിശ്വാസികളില്‍ നിന്നു ഞങ്ങള്‍ നിങ്ങളെ ഉപരോധിച്ചില്ലേ' എന്നാണവര്‍ ചോദിക്കുക⁷⁴
എന്നാല്‍ അന്ത്യനാളില്‍ നിങ്ങള്‍ക്കിടയില്‍ അല്ലാഹു വിധികല്‍പിക്കുന്നതാണ്. സത്യവിശ്വാസികള്‍ക്കെതിരെ അല്ലാഹു നിഷേധികള്‍ക്ക് യാതൊരു വഴിയും വെച്ചുകൊടുക്കുന്നതേ അല്ല.

ആ കപടന്മാര്‍ അല്ലാഹുവിനെ ചതിക്കാന്‍ നോക്കുകയാണ്. എന്നാല്‍ അവരുടെ വഞ്ചനക്കവന്‍ പ്രതിക്രിയ ചെയ്യും. നമസ്‌കരിക്കാനൊരുങ്ങുകയാണെങ്കില്‍ അവര്‍ മടിയന്മാരായും ആളുകളെ കാണിക്കാനുമാണ് നില്‍ക്കുക. വളരെക്കുറച്ചു മാത്രമേ അവര്‍ അല്ലാഹുവിനെ പറയുകയുള്ളൂ; ആ വിഭാഗത്തിലേക്കോ ഈ വിഭാഗത്തിലേക്കോ അല്ലാതെ ആടിക്കളിക്കുകയാണവര്‍! അല്ലാഹു ഒരാളെ വഴിതെറ്റിച്ചാല്‍ പിന്നെ അവന്ന് യാതൊരു മാര്‍ഗവും കാണാന്‍ താങ്കള്‍ക്കു കഴിയുന്നതല്ല⁷⁵

സത്യവിശ്വാസികളേ, മുഅ്മിനുകളെ വിട്ട് കാഫിറുകളെ നിങ്ങള്‍ ഉറ്റമിത്രങ്ങളാക്കരുത്. സ്വന്തത്തിനെതിരായി അല്ലാഹുവിനു സ്പഷ്ടമായ തെളിവുണ്ടാക്കിക്കൊടുക്കുവാനാണോ നിങ്ങളുദ്ദേശിക്കുന്നത്?⁷⁶
കപട വിശ്വാസികള്‍ നരകത്തിന്റെ അടിത്തട്ടിലാണു തീര്‍ച്ച! അവര്‍ക്ക് ഒരു സഹായിയെയും താങ്കള്‍ കണ്ടെത്തുന്നതല്ല; എന്നാല്‍ പശ്ചാത്തപിക്കുകയും കര്‍മങ്ങള്‍ ഉല്‍കൃഷ്ടമാക്കുകയും അല്ലാഹുവിനെ മുറുകെ പിടിക്കുകയും മതകാര്യങ്ങള്‍ അല്ലാഹുവിനായി നിഷ്‌കളങ്കമാക്കുകയും ചെയ്തവര്‍ ഇങ്ങനെയല്ല, അവര്‍ സത്യവിശ്വാസികളൊന്നിച്ചായിരിക്കും. സത്യവിശ്വാസികള്‍ക്ക് അല്ലാഹു മഹത്തായ പ്രതിഫലം നല്‍കുന്നതാണ്. നന്ദിപ്രകടിപ്പിക്കുകയും സത്യവിശ്വാസം കൈകൊള്ളുകയും ചെയ്തിട്ട് പിന്നെ നിങ്ങളെ ശിക്ഷിക്കുന്നതില്‍ അല്ലാഹുവിനെന്തുകിട്ടാനാണ്? അല്ലാഹു നിങ്ങളുടെ കൃതജ്ഞത സ്വീകരിക്കുന്നവനും സൂക്ഷ്മജ്ഞനുമാകുന്നു.

ചീത്തവാക്ക് പരസ്യമാക്കുന്നത് അല്ലാഹു ഇഷ്ടപ്പടുകയില്ല; എന്നാല്‍ മര്‍ദിതന്‍ ഇതില്‍ നിന്നൊഴിവാണ്. എല്ലാം കേള്‍ക്കുന്നവനും അറിയുന്നവനുമാണ് അല്ലാഹു. നിങ്ങള്‍ നന്മ വെളിപ്പെടുത്തുകയോ ഗോപ്യമാക്കുകയോ ദുഷ്പ്രവൃത്തി മാപ്പ് ചെയ്യുകയോ ആണെങ്കില്‍, നിശ്ചയം അല്ലാഹു ഏറെ മാപ്പു ചെയ്യുന്നവനും സര്‍വശക്തനുമാകുന്നു. അല്ലാഹുവിനെയും അവന്റെ ദൂതന്മാരെയും നിഷേധിക്കുകയും അല്ലാഹുവിന്റെയും ദൂതന്മാരുടെയുമിടക്ക് വിവേചനമുണ്ടാക്കാനുദ്ദേശിക്കുകയും 'ഞങ്ങള്‍ ചിലരെ വിശ്വസിക്കുകയും മറ്റുചിലരെ അവിശ്വസിക്കുകയും ചെയ്യുന്നു' എന്നു പറഞ്ഞ് വിശ്വാസത്തിനും അവിശ്വാസത്തിനുമിടക്കുള്ള ഒരു മാര്‍ഗമുണ്ടാക്കിത്തീര്‍ക്കാനാഗ്രഹിക്കുകയും ചെയ്യുന്നവരുണ്ടല്ലോ, അവരാണ് സാക്ഷാല്‍ നിഷേധികള്‍. നിഷേധികള്‍ക്ക് ഹീനമായ ശിക്ഷ നാം സജ്ജീകരിച്ചു വെച്ചിട്ടുണ്ട്! അല്ലാഹുവിലും അവന്റെ ദൂതരിലും വിശ്വസിക്കുകയും അവരിലൊരാള്‍ക്കിടയിലും വിവേചനം കല്‍പിക്കാതിരിക്കുകയും ചെയ്തവര്‍ക്ക് അഹിക്കുന്ന പ്രതിഫലം അവന്‍ നല്‍കുന്നതാണ്. ഏറെ പൊറുക്കുന്നവനും കരുണാമയനുമാണ് അല്ലാഹു⁷⁷

ആകാശത്തുനിന്നു തങ്ങള്‍ക്ക് ഒരു ഗ്രന്ഥമിറക്കിക്കൊടുക്കാന്‍ വേദക്കാര്‍ താങ്കളോടാവശ്യപ്പെടുകയാണ്! എന്നാല്‍ ഇതിനേക്കാള്‍ ഗുരുതരമായ കാര്യം മൂസാനബിയോടവര്‍ ചോദിച്ചിട്ടുണ്ട്. അല്ലാഹുവിനെ പരസ്യമായി ഞങ്ങള്‍ക്ക് കാണിച്ചുതരണം എന്നാണവര്‍ പറഞ്ഞത്. അങ്ങനെ തങ്ങളുടെ അക്രമം മൂലം അവരെ ഇടിത്തീ ബാധിച്ചു. ദൃഷ്ടാന്തങ്ങള്‍ കിട്ടിക്കഴിഞ്ഞിട്ടും പിന്നീടവര്‍ പശുക്കുട്ടിയെ ദൈവമാക്കുകയുണ്ടായി. എന്നിട്ട് നാമത് മാപ്പുചെയ്തു. നാം മൂസാനബിക്ക് വ്യക്തമായ ദൃഷ്ടാന്തം നല്‍കുകയും, കരാര്‍ ലംഘിച്ചതുമൂലം ഥൂര്‍ പര്‍വതം അവര്‍ക്കുമീതെ ഉയര്‍ത്തിപ്പിടിക്കുകയുമുണ്ടായി. നിങ്ങള്‍ നമ്രഃശിരസ്‌കരായി ഖുദ്‌സിന്റെ നഗരകവാടം കടക്കുക എന്നും ശനിയാഴ്ച അതിക്രമം കാട്ടരുത് എന്നും അവരോട് നാം കല്‍പിച്ചു. അവരില്‍ നിന്നു ബലിഷ്ഠമായ കരാര്‍ നാം വാങ്ങിയിരുന്നു.⁷⁸

എന്നിട്ടവര്‍ കരാര്‍ ലംഘനം നടത്തിയതിനാലും ദൈവിക ദൃഷ്ടാന്തങ്ങള്‍ നിഷേധിച്ചതിനാലും യാതൊരു വിധ ന്യായീകരണവുമില്ലാതെ പ്രവാചകന്മാരെ വധിച്ചതിനാലും 'ഞങ്ങളുടെ ഹൃദയങ്ങള്‍ അടഞ്ഞുകിടക്കുകയാണെ'ന്ന് ജല്‍പിച്ചതിനാലും നാമവരെ ശപിച്ചു. എന്നാല്‍, നിഷേധം കാരണമായി അവരുടെ ഹൃദയങ്ങളില്‍ അല്ലാഹു മുദ്രവെച്ചിരിക്കുകയാണ്; തന്മൂലം വളരെക്കുറച്ചു മാത്രമേ അവര്‍ വിശ്വസിക്കൂ⁷⁹
ഈസാനബിയെ നിഷേധിക്കുകയും മര്‍യം ബീവിയുടെ പേരില്‍ നിഷ്ഠുരമായ വ്യഭിചാരമാരോപിക്കുകയും അല്ലാഹുവിന്റെ ദൂതനായ മസീഹ് ഈസബ്‌നു മര്‍യമിനെ ഞങ്ങള്‍ വധിച്ചിരിക്കുന്നു എന്നു ജല്‍പിക്കുകയും ചെയ്തതുമൂലവും നാമവരെ ശപിക്കുകയുണ്ടായി. യഥാര്‍ത്ഥത്തില്‍ അദ്ദേഹത്തെയവര്‍ വധിച്ചിട്ടില്ല, ക്രൂശിച്ചിട്ടുമില്ല; അവര്‍ക്ക് ആളെ തിരിച്ചറിയാതാവുകയാണുണ്ടായത്. ഈസാ നബിയുടെ കാര്യത്തില്‍ ഭിന്ന പക്ഷക്കാരായവര്‍ തദ്വിഷയകമായി സംശയത്തില്‍ തന്നെയാണ്. ഊഹാപോഹങ്ങള്‍ പിന്‍പറ്റുന്നുവെന്നല്ലാതെ അവര്‍ക്കതു സംബന്ധമായ അറിവ് ഒട്ടുമേയില്ല. ഒരു കാര്യം തീര്‍ച്ച-അവര്‍ അദ്ദേഹത്തെ കൊലപ്പെടുത്തിയിട്ടില്ല; പ്രത്യുത, തന്റെയടുത്തേക്ക് അല്ലാഹു ഈസാ നബിയെ ഉയര്‍ത്തുകയാണുണ്ടായത്⁸⁰
അല്ലാഹു അഭിജാതനും യുക്തിമാനുമാകുന്നു.

താന്‍ മരിക്കും മുമ്പ് ഈസാനബിയെ വിശ്വസിക്കാത്തവരായി വേദക്കാരിലാരുമുണ്ടാകില്ല, തീര്‍ച്ച. അന്ത്യനാളിലാകട്ടെ, അദ്ദേഹം അവര്‍ക്കെതിരെ സാക്ഷ്യം വഹിക്കുന്നതുമാണ്⁸¹
അക്രമ പ്രവര്‍ത്തനങ്ങളനുവര്‍ത്തിക്കുക, ദൈവമാര്‍ഗത്തില്‍ നിന്നു ആളുകളെ ധാരാളമായി തടയുക, നിരോധിക്കപ്പെട്ടിട്ടും പലിശവാങ്ങുക, ജനങ്ങളുടെ സമ്പത്ത് അന്യായമായി തിന്നുക എന്നീ കുറ്റങ്ങള്‍ ചെയ്തതുമൂലം അനുവദനീയമായിരുന്ന പല നല്ലവസ്തുക്കളും ജൂതന്മാര്‍ക്കു നാം നിഷിദ്ധമാക്കുകയുണ്ടായി. അവരില്‍ നിന്നു സത്യനിഷേധികളായവര്‍ക്ക് വേദനാ ജനകമായ ശിക്ഷ നാം ഒരുക്കി വെച്ചിരിക്കുന്നു.

എന്നാല്‍, അവരിലെ അഗാധജ്ഞാനികളും വിശ്വാസികളും താങ്കള്‍ക്കവതീര്‍ണമായ ഗ്രന്ഥത്തിലും അതിനുമുമ്പവതരിപ്പിക്കപ്പെട്ടവയിലും വിശ്വസിക്കുന്നു. അവര്‍ നമസ്‌കാരം കൃത്യമായ നുഷ്ഠിക്കുന്നവരാണെന്ന് പ്രത്യേകം പ്രസ്താവ്യമത്രെ. സകാത്ത് നല്‍കുന്നവരും അല്ലാഹുവിലും അന്ത്യദിനത്തിലും വിശ്വസിക്കുന്നവരുമാണവര്‍. മഹത്തായ പ്രതിഫലം അവര്‍ക്കു നാം നല്‍കുന്നതാണ്.

നൂഹ് നബിക്കും തന്റെ ശേഷം വന്ന പ്രവാചകന്മാര്‍ക്കും നാം ദിവ്യബോധനം നല്‍കിയതുപോലെ താങ്കള്‍ക്കും നാം വഹ്‌യ് നല്‍കി. ഇബ്രാഹീം, ഇസ്മാഈല്‍, ഇസ്ഹാഖ്, യഅ്ഖൂബ്, തന്റെ സന്തതീ പരമ്പര, ഈസാ, അയ്യൂബ്, യൂനുസ്, ഹാറൂന്‍, സുലൈമാന്‍ എന്നീനബിമാര്‍ക്കും നാം ദിവ്യ സന്ദേശമേകി; ദാവൂദ് നബിക്ക് സബൂര്‍ എന്ന ഗ്രന്ഥം അവതരിപ്പിച്ചു കൊടുത്തു. മുമ്പ് താങ്കള്‍ക്കു നാം വിവരിച്ചു തന്നവരും അല്ലാത്തവരുമായ ദൂതന്മാരെയും നാം നിയോഗിച്ചു. മൂസാ നബിയോട് അല്ലാഹു നേരിട്ടുതന്നെ സംസാരിക്കയുണ്ടായി. ശുഭവാര്‍ത്തയറിയിക്കുന്നവരും താക്കീത് നല്‍കുന്നവരുമായാണവര്‍ നിയുക്തരായത്. വഴിയെ അല്ലാഹുവിനെതിരെ മനുഷ്യര്‍ക്ക് യാതൊരു തെളിവും ഉണ്ടാകാതിരിക്കാന്‍ വേണ്ടി⁸²
അല്ലാഹു പ്രതാപശാലിയും യുക്തിമാനുമാകുന്നു. എന്നാല്‍ (അവര്‍ വിശ്വസിക്കുന്നില്ലെങ്കിലും) താങ്കള്‍ക്കല്ലാഹു അവതരിപ്പിച്ചു തന്നതു സംബന്ധിച്ച് അവര്‍ സാക്ഷിയാണ്. തന്റെ ജ്ഞാനപൂര്‍വം തന്നെയാണ് അവനത് അവതരിപ്പിച്ചിരിക്കുന്നത്. മലക്കുകളുമതിന്ന് സാക്ഷ്യം വഹിക്കുന്നുണ്ട്. അല്ലാഹു തന്നെ മതി സാക്ഷിയായി.

സത്യനിഷേധം കൈകൊള്ളുകയും അല്ലാഹുവിന്റെ വഴിയില്‍ നിന്നു മറ്റുള്ളവരെ തടയുകയും ചെയ്തവര്‍ സന്മാര്‍ഗത്തില്‍ നിന്നു ബഹുദൂരം അകന്നുപോയതു തന്നെ! അവിശ്വസിക്കുകയും അക്രമം പ്രവര്‍ത്തിക്കുകയും ചെയ്തവര്‍ക്ക് അല്ലാഹു പൊറുത്തുകൊടുക്കുകയോ നരകമാര്‍ഗത്തിലേക്കല്ലാതെ മറ്റൊരു വഴിയിലേക്ക് അവരെയവന്‍ നയിക്കുകയോ ചെയ്യുന്നതേയല്ല. ആ നരകത്തിലവര്‍ ശാശ്വതവാസികളായിരിക്കും. അല്ലാഹുവിനത് നിഷ്പ്രയാസകരമത്രെ⁸³
ഹേ മനുഷ്യരേ, നിങ്ങളുടെ നാഥന്റെ പക്കല്‍ നിന്നുള്ള സത്യസമേതം ഇതാ റസൂല്‍ നിങ്ങള്‍ക്കു വന്നിരിക്കുന്നു; അതിനാല്‍ സ്വന്തം നന്മക്കായി റസൂലിനെ വിശ്വസിക്കൂ; ഇനി നിങ്ങള്‍ അവിശ്വസിക്കുന്നുവെങ്കിലോ, ആകാശ ഭൂമികളിലുള്ളതെല്ലാം അല്ലാഹുവിന്നുള്ളതാണ്; അവന്‍ എല്ലാം അറിയുന്നവനും യുക്തിമാനുമാകുന്നു.

ഹേ വേദക്കാരേ, മതത്തിന്റെ കാര്യത്തില്‍ നിങ്ങള്‍ പരിധിവിടുകയോ സത്യമല്ലാത്തത് അല്ലാഹുവിന്റെ പേരില്‍ ജല്‍പിക്കുകയോ അരുത്. മര്‍യം ബീവിയുടെ പുത്രന്‍ മസീഹ് ഈസാ അല്ലാഹുവിന്റെ റസൂലും അവരിലേക്കവന്‍ നിക്ഷേപിച്ച സ്വന്തം വചനവും അവന്റെ പക്കല്‍ നിന്നുള്ള ഒരാത്മാവും മാത്രമാണ്. അതുകൊണ്ട് നിങ്ങള്‍ അല്ലാഹുവിലും അവന്റെ മുര്‍സലുകളിലും യഥായോഗ്യം വിശ്വസിക്കുക. മൂന്നു ദൈവങ്ങളുണ്ടെന്നു നിങ്ങള്‍ പറയരുത്. ആ ജല്‍പനം നിറുത്തുക. അതാണു നിങ്ങള്‍ക്കു നല്ലത്. അല്ലാഹു മാത്രമാണ് ഒരേയൊരാരാധ്യന്‍. സന്താനം ജനിക്കുക എന്ന ഒരവസ്ഥയില്‍ നിന്ന് അവനെത്ര പരിശുദ്ധന്‍! ആകാശഭൂമികളിലുള്ളതെല്ലാം അവന്നത്രേ. അവയത്രയും സംരക്ഷിക്കുവാന്‍ അല്ലാഹു തന്നെ മതി. അല്ലാഹുവിന്റെ ദാസനാവുക എന്നതില്‍ ഈസാ നബിക്കോ ദിവ്യസാമീപ്യമുള്ള മലക്കുകള്‍ക്കോ യാതൊരു അപമാനവുമില്ല; അല്ലാഹുവിനെ ആരാധിക്കുന്നതില്‍ ആരെങ്കിലും അപമാനമുള്ളവരാവുകയോ അഹങ്കരിക്കുകയോ ചെയ്യുന്നുവെങ്കില്‍, അവരെയത്രയും തന്റെയടുത്തേക്ക് അല്ലാഹു ഒരുമിച്ചു കൂട്ടുന്നതാകുന്നു⁸⁴

സത്യവിശ്വാസം കൈകൊള്ളുകയും സല്‍ക്കര്‍മങ്ങളനുഷ്ഠിക്കുകയും ചെയ്തവരുണ്ടല്ലോ, അവര്‍ക്ക് തങ്ങളുടെ പ്രതിഫലം അല്ലാഹു പൂര്‍ത്തീകരിക്കുകയും തന്റെ ഔദാര്യത്തില്‍ നിന്നു വര്‍ധിപ്പിച്ചുകൊടുക്കുകയും ചെയ്യും; എന്നാല്‍ അപമാനം തോന്നുകയും അഹങ്കരിക്കുകയും ചെയ്തവര്‍ക്ക് അവന്‍ വേദനയുറ്റ ശിക്ഷ നല്‍കുന്നതാണ്. അല്ലാഹുവൊഴിച്ച് മറ്റൊരു സംരക്ഷകനെയും സഹായിയെയും അവര്‍ക്കു കണ്ടെത്താനാവില്ല. ഹേ ജനങ്ങളേ, നിങ്ങള്‍ക്കു നാഥനില്‍ നിന്നുള്ള ദൃഷ്ടാന്തമിതാ (മുഹമ്മദ് നബി) കിട്ടിക്കഴിഞ്ഞിരിക്കുന്നു. സ്പഷ്ടമായ ഒരു പ്രകാശം (ഖുര്‍ആന്‍) നിങ്ങള്‍ക്കു നാം അവതരിപ്പിച്ചു തന്നിട്ടുമുണ്ട്. അതുകൊണ്ട് ആര് അല്ലാഹുവില്‍ വിശ്വസിക്കുകയും റസൂലിനെ മുറുകെപിടിക്കുകയും ചെയ്യുന്നുവോ അവരെ അല്ലാഹു തന്റെ മഹത്തായ കാരുണ്യത്തിലും ഔദാര്യത്തിലും പ്രവേശിപ്പിക്കുന്നതും തന്നിലേക്കവരെ സന്മാര്‍ഗത്തിലൂടെ നയിക്കുന്നതുമാകുന്നു.

പിതാവോ സന്താനമോ ഇല്ലാതെ മരിച്ച വ്യക്തി (കലാല) യുടെ അനന്തരാവകാശ വിഭജനം സംബന്ധിച്ച് താങ്കളോടവര്‍ മതവിധിയന്വേഷിക്കുന്നു. ഇങ്ങനെ മറുപടി നല്‍കുക: സന്താനമോ പിതാവോ ഇല്ലാതെ ഒരാള്‍ മരിച്ചു, അവനു സഹോദരിയുണ്ട്; എന്നാല്‍ അവന്‍ വിട്ടേച്ച ധനത്തിന്റെ പാതി അവള്‍ക്കാണ്. ഇനി, മരിച്ചത് അവളാണ്, സന്താനമോ പിതാവോ ഇല്ല, ഒരു സഹോദരനുണ്ട്; എങ്കില്‍ ധനമത്രയും അവന്‍ അനന്തരമെടുക്കും. ഇനി, സഹോദരിമാര്‍ രണ്ടുപേര്‍ (അല്ലെങ്കില്‍ അധിലതികം) ആയാല്‍ വിട്ടേച്ച ധനത്തിന്റെ മൂന്നില്‍ രണ്ടുഭാഗം അവര്‍ക്കു ലഭിക്കുന്നതാണ്. ഇനിയവര്‍ ആണും പെണ്ണുമടങ്ങുന്ന സഹോദരങ്ങളാണെങ്കില്‍ രണ്ടു പെണ്ണുങ്ങളുടേതിനു സമാനമായ ഒരോഹരി ആണിനു കിട്ടും. നിങ്ങള്‍ വഴിതെറ്റിപ്പോകാതിരിക്കാനാണ് അല്ലാഹു ഇങ്ങനെ പ്രതിപാദിച്ചു തരുന്നത്. സകല കാര്യങ്ങളെപ്പറ്റിയും സര്‍വജ്ഞനാണ് അല്ലാഹു⁸⁵