സൂര്യനും അതിന്റെ പ്രകാശവും തന്നെ സത്യം; ചന്ദ്രന്‍ തന്നെ സത്യം, അത് സൂര്യനു വഴിയെ വരുമ്പോള്‍; പകലിനെ തന്നെ സത്യം, അത് സൂര്യനെ വെളിപ്പെടുത്തുമ്പോള്‍; രാത്രിയെ തന്നെ സത്യം, അത് സൂര്യനെ ആവരണം ചെയ്യുമ്പോള്‍; ആകാശത്തെയും അത് സ്ഥാപിച്ച മഹച്ഛക്തിയെയും തന്നെ സത്യം, ഭൂമിയെയും അത് വിരിപ്പാക്കിയ മഹച്ഛക്തിയെയും തന്നെ സത്യം; ആത്മാവിനെക്കൊണ്ടും അതിനെ ന്യൂനതാമുക്തമാക്കി നന്മ-തിന്മകള്‍ ഗ്രഹിപ്പിച്ചുകൊടുത്ത മഹച്ഛക്തിയെ കൊണ്ടും സത്യം1
ആത്മാവിനെ ശുദ്ധീകരിച്ചവന്‍ വിജയം വരിക്കുക തന്നെ ചെയ്തിരിക്കുന്നു; അതിനെ മലിനീകരിച്ചവന്‍ നിശ്ചയം പരാജിതനായിരിക്കുന്നു2
2 വിശദീകരണങ്ങൾ കാണുക
1. സൂര്യന്‍ ചന്ദ്രന്‍, രാത്രി പകല്‍, ആകാശം ഭൂമി, മനുഷ്യമനസ്സ് എന്നിവ മാനവലോകത്തിന്റെ അടിസ്ഥാന ശിലകളാണെന്ന് പറയാം. ഇവയെക്കൊണ്ടാണിവിടെ സത്യം ചെയ്തിരിക്കുന്നത്. ഇവയിലോരോന്നും പ്രപഞ്ചനാഥന്റെ അജയ്യമായ കഴിവിന്റെ തെളിവുകളാണല്ലോ
2. സത്യം ചെയ്തു ദൃഢീകരിച്ചു പറയുന്ന വിഷയമാണ് ഒമ്പത്, പത്ത് സൂക്തങ്ങളില്‍. മനുഷ്യമനസ്സ് എന്നത് അല്ലാഹു സൃഷ്ടിച്ച ഒരമൂല്യനിധിയാണ്. എന്നാല്‍ ശുദ്ധീകരിച്ച് സംസ്‌കരിച്ച് ശ്രദ്ധയോടെ സൂക്ഷിച്ചു വന്നുവെങ്കിലേ അതിന്റെ തിളക്കവും മഹത്ത്വവും നിലനിര്‍ത്താനാകൂ. മറിച്ചാണെങ്കില്‍ അതു ദുഷിച്ചു നശിച്ചു പോകും; സര്‍വ തിന്മകളുടെയും സംവിധാനവും ആവിഷ്‌കാരവും അവിടെയാണ് നടക്കുക. മനുഷ്യന്റെ വിജയ-പരാജയ കേന്ദ്രം മനസ്സാണെന്നു വിവക്ഷ.